KHRISTIAN NUN PITLINNAK KARBAK (7)

KHRISTIAN NUN PITLINNAK KARBAK (7)

Joel Lal Cung Mang

Cuti a si ruangah hmailamah nor uhsi;

Khristian thuthang a hramthokih zirh awknak cu tanta in

pitling zirh awknak ah feh uhsi (Heb. 6:1a)

THOKNAK

Ahmaisabik le a pakhatnak ih tarlang ka duh-mi cu Khristian nun tthanlennak le pitlinnak ah a tawp / bi-khiah a um lo tihi a si. Sim duh-mi cu Khristian nun timi cu ni khat hnu ni khat tthanglian ih pitling rero / vivo ding tinak a si. Himi thu thawn pehpar aw-in mirang ttong ah ‘growth’ le ‘maturity’ timi a um ih, ‘growth’ cun nitin tthan rero nak thu a sim ih, ‘maturity’ cun cuih a tthang rero mi Khristian ih pitlinnak a sim duh. Kan Laimi zumtu lakah Khristian nun ih tthanglian rero cu kan tam zet nan, Khristian nun ih pitling (a matured Christian) cu hmuh ding a mal zet. Curuangah a tthanglian rero mi Khristian si lo in, Khristian nun ih pitling tu kan si cio theinak dingah, ‘Khristian Nun Pitlinnak Karbak 7’ timi thulu hmangin kan thinlung, taksa le thlarau hrangah thazaang laknak kan nei tlang ding!

Khristian Nun Karlak (7) pawl cu:

1.Baibal siarnak (Bible reading / meditation)

Khristian nun pitlinnak ih hrambunnak, lo theih lo ih a ttul bikmi le karbak a pakhatnak cu Baibal siarnak a si. Asile:

*Baibal cu ziang a si?

-Kan nunnak ih hrampi a si (John 1:3-4)

-Thlarau hnawi / rawl a si  (IPet. 2:2)

-Thil ti thei (Heb. 4:12)

-Lam in hruaitu  (Saam 119:105)

*Baibal siarnak ih zumtu pawl kan nunnak ah ziangvek hlawknak le tthathemnak in pe?

-Sualnak ihsin in kilhim (Saam. 119:11)

(Jesuh thlemnak a tonnak :Daan. 8:3; Saam. 91:11-12;Daan. 6:16;13)

Dwight L. Moody cun a Baibal phaw (cover)sung lam ah hiti’n catlang a ngan, ‘Hih Baibal in sualnak a lo hrialter lo asile, sualnak in himi Baibal ihsin a lo hrialter ve ding’ a ti.

-Kan sual / bah caan ah in runnsuak (Saam. 119:9)

-Khristian hlawhtling in siter (Joshua 1:8;Efe. 6:17)

-Khrih sungih tthanglian dingin in cawm dawl (IPet. 2:2)

-Thlacam nun in tthangsoter (Thufim 28:9; John 15:7;IJohn 3:22).

Zumtu nitin kan nunnak ah piltinnak nun mawi neitu kan si theinak dingah cun Pathian thu (Baibal) hi nitin a siar ringringtu, a thluntu le a takih a tuahsuaktu (IJohn 2;5;Rev. 1:3;James 1:22)si dingin kan zuam cio a ttul a si.

2. Thlacamnak (Prayer)

Khristian nun pitlinnak hrangih karbak pahnih-nak cu Pathian hnen ih thlacamnak (thlacam nun) hi a si.

*Thlacamnak cu ziang a si?

-Pathian kawh / biaknak a si ((Saam. 17:6; 34:4)

-Pathian mithmai hawlnak a si (IISansiarnak 7:14)

-Pathian hnenih au-nak a si (Saam.3:4;66:1)

-Pathian neih-nak a si (Heb. 10:22)

-Pathian pawlkom (Daniel 6:10)

*Ziangruangah thlacam nun kan nei ding?

-Kan biakmi Jesuh Khrih hi thlacam nun neitu a si (Matt. 26:36)

-Jesuh ih thlacamnak a thupitter tuk ruangah in zirh hai (Matt. 6:5-8)

-A dungthluntu pawl hrang khalah thla a cam (John 17)

-Zumtu zaten thalcam ringring dingin in fial (Matt. 26:4; Mk. 13:33;Lik. 18:1)

*Ziangti’n thlacamnak kan nei ding?

-Lungsir / sualsirnak (ISansiarnak 7:14)

-Lungawi thu simnak (Fil. 4:6)

-Kan tuah dingmi Pathian hnenih hlanh-nak (Thufim 16:3)

-Khrih satsalnak hngak phah in (Mak. 13:3).

-Midang hrangih thlacamnak (Saam. 27:7-12;John 17:6-26)

-Tangdornak le zumnak (IISan. 33:12-13; Mk. 11:24).

*Thlacamnak ih rahsuah mi pawl :

-Damnak (IIKing. 20:1-7)

-Sual ngaidamnak (IISan. 7:14)

-Cah-nak (Thutthentu 16:25-30)

-Harsatnak ihsin luatnak (Daniel 6:10;16-22)

-Thawngtla luatnak (Tirh. 12:3-11;16:25-26)

-Mithi hrangih nunnak (ISiang. 17;19-23; IISiang. 4:32-35).

-Pathian kutcak mangbangza hmuh-nak (ISam. 1:9-20; ISiang. 18:41-45).

E.M Bound cun hiti’n a sim, Hih thil pali hi thei ringring uh si: Pathian in thlacamnak a thei, Pathian in thlacamnak a poimawhter / thupitter, Pathian in thlacamnak a sang / let, Pathian in thlacamnak hmangin ruundamnak / runsuahnak a thlenh’ a ti.

Khristian nun piltinnak hrangah thlacamnak hi karbak thupi zet  a si ruangah, nitin kan nunnak ah thlacamnak nun nei dingin zuam cio uh si!

3. Zumtu dang pawl thawih pawlkomawknak

(Be in fellowship with other believers)

Zumnak le Khristian nun pitlinnak  hrangih tah-fung pakhat a simi cu zumtu dang pawl thawih hmun khat ih pawlkomawknak neih hi a si.

*Ziangruangah zumtu pawl hmun khat ih pawlkomawknak neih a ttul?

-Zumtu pawl ih Lu cu Khrih a si ih, kannih cu a ruangpum kan si. Curuangah hmun khat ih kan pawlkomawk hrimhrim a ttul a si (IKor. 11:33).

*Ziangti’n pawlkomawknak kan nei ding?

-Hmun khat ah Pathian thu thawn pawlkomnak neih ding a si (IKor. 12:12-31;Efe. 2:11-33)

-Pathian thu zir tlangin thlacamnak le Pathian thangtthatnak nei tlang ding kan si (Tirh. 2:42)

*Pawlkomawknak in ziangmi hlawknak in pe?

-Zumnak ah tthanglian (Efe. 4:11-16)

-Zumtu dang pawl thawn nuam zetin hmun khat ah Pathian thangtthat tlang (Saam. 149:1)

-Thlarau laksawng sarsuak (Rom 12:3-8)

-Khat le khat bawm-aw in thazaang pekawknak nei (Heb. 10:24-25).

Pathian thuthawih pawlkomawknak a simi: biakinn ih khawmnak le thlacamnak, camping le crusade, Home-cell khawmnak le hmun Pathian thu thawih pawlkomnak ih kan tel tam poh le Khristian nun ah pitlinnak kan co hrimhrim ding!

4. Peknak (Be a giver)

Mipiangthar / zumtu in Khristian nun pitlinnak hrangih a tuah tengteng dingmi (tuah lo theih lo) cu PEKNAK a si. Ziangahtile kan biakmi Pathian ih zia (nature) cu peknak a si ruangah kannih a fale (amah zumtu pawl in) pawl in a takih langsuakter ding kan si.

*Ziangmi kan pek ding?

Peknak kan ti tikah: nunnak/ kanmah (Thutthentu 4,5,Matt. 16:25)), caan (Tirh. 9:36-42) le neih-nak / sumpai (Mark 14:3-8) ti’n kan hmu thei.

*Ziangti’n kan pe ding?

-Lakin / lungawizetin kan pe ding (Thufim 11:24-25; IIKor 9:7)

-Langlo (mi dangih hmuh ciamco a ttul lo) (Matt. 6:1-4)

-Siangzetin (uinak le kut supnak umlo riai in) (IIKor. 8:13; Matt. 26:9)

*PEKNAK IH HLAWHKZIA

-Taksa thlawsuah (Malakhi 3:10-12)

-Thlarau Thlawsuah (Vaan ih kan laksawng ding an si) (Matt. 6:19-20;Matt. 25:31-46)

*HMINSIN & RAALRIN DINGMI

-Peknak nun kan neih lo a sile Pathian hmaiah rukru le camsiatmi kan si dingih (Mal. 3:8-9) harsatnak phunphun kan tong ding a si (Mal. 3:9).

Khristian nun pitlinnnak lamzin kan feh rero nak ah PEKNAK ih thupitzia thei ih, kan dam caan tawite, kan neihsun kan nunnak le, kan neih tawkte sumpai hi Pathian hnattuannak hrangah hmangcio uh si!

5. Thlemnak raalrin ding (Be alert / Be aware of temtation)

Zumtu nitin kan nunna ah thlemtu (tempter) le thlemnak (temptation) hi kan hmuhton ringring mi a si ih, thlemnak a neh lotu cun Khristian nun ah a tlusia vivo ih, thlemnak a nehtu cun Khristian nun ah a piling vivo a si.

*Thlamnak hi khui tawkin a ra?

Thlemnak hi Setan (John 8:44) Khawvel(Rom 12:2) le Mai’ tisa dunnak (Rom 8) pawl ruangih ra thlengmi an si.

*Thlemnak in ziang a tilang?

Thlemnak in zumtu pawl Jesuh Khrih parih kan rinumnak, thianhlimnak le amah kan duhdawtnak a tilang a si (IKor. 10:13; Lk.4:1-4)

*Thlemnak ziangti’n kan neh thei ding?

-Thlarau ih khah-nak (Lk. 4:1-2)

-Nehtu Khrih rinsanak (Lk. 22:31-32)

-Thlacamnak neih ringring (Matt. 26:41)

-Raalringteih umnak (IPet. 5:8)

-Pathian hnenah nunnak hlan (Jam. 4:7)

-Pathian raalthuam hruk (Efe. 6:11)

6. Zumnak ih nun (Live by faith)

Khristian nun piltinnak hrangih karbak a paruknak cu nitin  ‘zumnak ih nun’ hi a si.

*Zumnak ih nun timi cu ziang a si?

-Ziang hmuahhmuah zumnak ih tuah thluh hi a si (IThes. 1:3a)

*Ziangruangah zumnak ih nun a thuopi tuk?

-Zumnak locun Pathian lungawiter a theih lo (Heb. 11:6)

*Zumnak thawn ziangti’n kan nung ding?

-Leitlun thilri rinsan hnakin zumnak ih nung ding kan si (IIKor. 5:7)

-Leitlun thilri in kan zumnak derdaiter ding a si lo (ITim. 5:8)

-Zumnak hi raalthuam le ttangphaw vekih hruk ding a si (Efe. 6:16; IThes. 5:8)

*Kan zumnak cu ziangti’n tuah a si ttheu?

A siat theimi lei thilri SUI hman a tak le taklo theihnak ah hniksak a si ringring. Cu vekih kan zumnak khal zumnak nung le dik a si le silo theih-nak ah hniksak a si ttheu (IPet. 1:6-8)

*ZUMNAK IH NUN IH RAHSUAH-MI

Zumnak ih a nungtu, harstanak le hniksaknak a nehsuaktu pawl cu lei le vaan thlawsuahnak cotu ding an si (Job. 42:10-16; IPet. 6-7).

7.Khrih theihpitu / Palai (Be a witness for/of Christ)

A netabik le a pasarihnak ah Khristian nun pitling kan neih theinak dingah cun Khrih theihpitu / palai kan si a ttul. Hi tawkih ‘theihpitu / pali’ timi ih a sim duh bikmi cu ‘Khrih ih hnattuantu’ tinak a si.

*Ziangruangah Khrih ih hna (mission hna) kan ttuan a ttul?

-Khrih amah rori in ttuan dingin in fial ruangah a si (Matt. 28:19-20;Tirh. 1:8)

-Pathian hnattuan (missiona hnattuan ) hi a thupi tuk, ziangahtile kumkhua hrang daih-mi a si (Thuphuan 20:15, IIThes. 1:8).

*Ziangti’n Khrih ih hna kan ttuan ding?

Kan nunnak rori thawn kan ttuan ding (Matt. 5:16)

-Thuthangttha simnak (IKor. 12:10; IPet. 3:5)

-Peknak (IIKor. 8:6)

-Thlacamnak( Kol. 4:4)

-Mah le ti thei daan daan ih ttuan cio ding (IKor. 12:5)

*Khrih ih hna kan ttuannak ruangah ziangmi kan ngah ding?

-Kumkhua nunnak pek kan si ding (ttuannak ruangih rundamnak a sim duhnak a silo, Pathian hnattuantu pawl kumkhua ih an sunlawizia sim duhnak asi) (Matt. 19:29-30)

-Kan ttuanmi vek cekci in laksawng kan ngah sal ding (IIKor. 5:10).

-Kumkhua in vaan arsi bangin kan tleu ding (Daniel 12:3)

NETNAK

Kan PATHIAN :in sersiamtu Pa Pathian, in ruundamtu fapa Jesuh Khrih Pathian le nitin in kilkhawitu Thlarau ThliamhlimPathian cun zumnak ih kan tthanlen rero lawng hi tawk a ti lo, Khristian nun piling kan neih dingmi a duh bikmi a si. Pathian duhnak le tumtahnak vekih Khristian nun pitling neitu kan si cio theinak ding hrangih karbak pasarih a simi: Baibal siarnak, thlacamnak, zumtu dang pawl thawih pawlkomawknak, peknak, thlemnak ih raalrin, zumnak ih nun le Khrih theipitu sinak thu pawl hi nitin kan nunnak ah a theihfiang taktaktu, a nuncilh ngahtu le midang hnenih a phuangsuaktu si thei dingin siartu zate nunnak ah Pathian in hlawhtlingnak, lungawinak le thlawsuahnak thar lo pe hram seh!

“Khristian nun pitlinnak hi na duhhrilnak parih tthumaw a si, hril aw!”

(Visited 68 times, 1 visits today)

Comments

comments

Comments

%d bloggers like this: