Pathian uknak (Vancung uknak)

Pathian uknak (Vancung uknak)

Saya Khar Thuan

Pathian uknak (the kingdom of God) timi tongfang kan hmuhtambiknak hi Thuthang tha (Gospels) cabu pawl sungah an si. Zesuh ih a zirhmi thu muril khal a si.

Bible pumhlum sungih Pathian uknak in zirh daan cu uknak rampi thu si lo in amah Pathian kha amai’ duhdaan vek ih a cangvaihtheinak le hna a tuantheinak sawn a si. Pathian uknak mi pakhat in a hawl timi cu cui’ a hawltu ih nunnak sungah Pathian kha thu a neiter ih Pathian duhdaan bangtukin a nung ti a si (Matt. 6:33). Pathian uknak cu thlarau ram thu a sawh ringring.

Pathian uknak timi le vangcung uknak (the kingdom of heaven) timi thu pahnih hi thu hmunkhat, hmannak hmun le caan dangaw menmi an si. A zate cun a si lo na’n Jews pawl ih hmuhdaan thaw’n rem-aw ih nganmi Matthai sungah Pathian uknak a hmang tam ih a dang Thuthang tha cabu pawl in Vancung uknak timi an hmang sawn (Mk. 10:14;Lk. 18:16; Matt. 19:14).

Pathian uknak sungah kan lut timi cu a fapa Jesuh Khrih kan zum ruangih kumkhua nunnak kan neih, lole rundam kan si ngah kha a si. Atu ihsin Pathian uknak ih a thawtnam kan tep zo ih famkimnak taktak cu Jesuh thawn kan tonawk tikah kan co leh ding tinak a si. Pathian uknak ah kan lut zo ih Pathian uknak ramsung ih nun daan in kan nung rero ding ih Pahian uknak ih famkimnak taktak kan tep thluh leh ding (the Kingdom of God is both present and future).

Pathian uknak sungah kan lut thok zo timi in thu in simmi cu kan mai duhdaan ih nung ringring lo in Pathian ih duhdaan kha ziang a si ti tu sawn hi asunzan ih a nunpitu ding kan si. Setan uknak ram sungah kan um nawn lo ih Pathian uknak ramsungah kan lut zo ruangah kanmai’ rem ti zawng, ruahdaan, tha ti zawng in duhduh ih nun men cu a ngah nawn lo. Cu ti ih nung thei ding in thlarau thianghlim ih cahnak huham in in bawm cio hram seh!

Comments

comments

Comments

%d bloggers like this: