30.5.10, Falam Times

Kawlram thuthang

Ragoon Mingalar Zii a  kaang

27.5.10, irrawady. Ragoon khawpi sungih a larzet mi Mingalar Zii pi cu May 24 ( Monday) ni ah Meisa in a kaangral theh. Zinglam 8:20 AM ihsin a kaang thokih  a thaizing zingpit lawng ah felfai ten an mit suak thei  thu an sim. Dawr nei tu pawl ih  daitlannak ruangah tisa bel ihsin a alh thok mi a si ti ah taunvo neitu pawl in an  sim.   Ramsung le ramleng ih suakmi thil tampi zuarnak a siih thilri mankung tampi a siatsuah theh.

Ahleice in a dawt-4 nakih  dawrpakhat ah  ting 1000 hnak  tam man a nei mi siidawr  400 le sii retnak Store room pawl a kangtheh ruangah sii man a kai theh ih ramsung mipi pawl in  harsatnak an tong thu tla an sim. Hi meisa ruangah Dawr 797 le rawl dawr 48 a kang theh ih  thilri man  lawng ah  ting 209263 Ks an sung ih a dang pawl cu theih thei a si hirh lo ti ah Acozah in a phuang. Kawlram sii suahnak cetzung pawl in an tul vek in sii an suah sak thei lo ruangah ah Tuluk, India le Thailand ram ih sii pawl a cangthei tawk an zemdarh thu Kawlram SiiBawi pakhat in a sim.

Kawlram ah tui kum sungih inn kang hi khaw-26 hnakih tam a si zo. Tui ttum ih kang khalhi ramsung mi pakhat ih rel nak ah cun ” mihrek cun Ralkap a cozah ih nawk kang hrim mi a si ding” tiah an zum thu FT hnen ah a sim (FT thubet)

Gordon Brown ih netabik cakuat

28 May 2010 Irrawad: Britain PM hlun Gordon Brown in PM sinak ihsin a cawl hlan te ah Daw Aung San Su Kyi hnen ah a neta bik cakuat  a rak ngan. Gordon Brown cun “ Hi ca kuat hi PM dinhmun a ne tabik ka lo kuat nak a si, Kawlram Democracy ngah ding ih na zuam mi le na tuan mi par ah  ka lo dinpi ringring ding. A cang thei tawk in ka lo bawm ding, Ka thazang I tlung ter zet ih Kawlram mipi luatnak ding a si ah cun  nangmah thawn ka tang ve ding “ tiah  a ngan thu New Statement Webside in a tar lang. Gordon Brown hi 2007 June ihsin  a tuan thok ih Conservative Party in a neh rungah ah May 11 niah PM sinak ihsin a rak cawl zo mi a si.

Tuluk PM Kawlram a tlawng tum

Tukluk PM Wen Jiaba cu Kandung April tla  Qinghai linghnin ruangih a   tlolh sal  mi South Asia le Kawlram kawltlawnnak pawl cu May tlacem ah a thok sal ding ti ah thutang pawl in a tar lang.  Tu vek in Tuluk ram hruaitu pakhat a ra tlawng ding hi Kawlram hrang ah cun a thu pi zet ding zum a um. Kawlram le Tuluk  Pusum leilawnnak, ramkhat le ramkhat pehtlaihawk nak le Ahlice ce in Tukum sung ih tuah ding mi Kawlram hrilawknak ah Tuluk Aconzah ih hmuh daan thuhla pawl relkhawm ding a si ruangah  a thupizet a si ti ah ramdanglam pehtlaihnak tuanvo nei tu U Own Myint in a sim. Wen Jiaba hi Kawlram tlawngding a tumnak  ih veithum tiang a tlolh zo ruangah tuitum cu tlawngsuak teng teng a tul tin khal a sim bet.

Htet Htet Moe OO a caang sual

27, May Irrawady:Kawlram  zuknung cangthiam Htet Htet Moe Oo cu 19/05/2010 niah Sedona Hotel ih tuah mi Thilri piahpuai ah 7 Day thutang la tu pakhat thawn interview an tuah lai ah tiaw thiam loin  a kut a rak tlak pang ruangah thuthennak zung tiang a rak tleng. Hi thuhla ruangah Htet Hhet le thuthang la tu cu May 24 ah Yan Kin thuthennak ah thusuhnak an nei ih a canglai ih a hmutu pawl khal an tel ve. Hi thu buai hi 003/06/2010 ah relsal ding a si ih cumi ni ah thuthen tu ih thuthencat nak ca pawl a siar sak thlang ding ti ah 7 Day News Editor Ma Nyein Nyein Naing in a sim. Hi thubuai hi Kawlram Journalist pawl in an theiduh tuk ruangah thuthennakzung ah minung an tam tuk ih Palik pawl in an kil thepthep ih an  buaipi zet ti ah thuthang la tu pakhat in a sim.

PM Hlun Thaksin Kai Ding

Thailand kumpi cozah in an ram PM hlun, Thaksin kai dingin thei tawp suahin tan an la zik. Hi thuhi Deputy PM, Suthep Thaugsuban in a rel ih, an ram sung buai nakih opposition pawl thil tisual dingin forh tu bikah Thaksin- hi puh a si. Cu ruangah kaih thei nak dingah Interpol sawm in an hawl tlang ti an sim. Interpol sawm ding/sawm loding thuah kumpi cozah thuneitu pawlin an rel khawm hnuah, Special Investigation Department, Attorney General office leh Foreign Ministry ih pawmpinak in Interpol sawm hi an lungkim tlang ti a sim bet.

Thaksin hi an ramah un lo hman seh la, Thailand Criminal Court cun kaih nak ding thupek a suah zo. Thaksin cun tut um buai nakah hnamhnoih nak ka nei lo tiah a sim ve, a sinan, Deputy PM cun, a hnam hnoih lo a si len a tel lo nak thu relfel dingah ramsung ih rat lung ding a si tiah a sim ve. Interpol ih mawh thluk nak vek in a par thu then sak a si ah cun thih npawm nak ih kaih a si ah cun, a thubuaiah hin thi dingih a parthu relsak  theih a si ding.

Leitlun thuthang

Kum-2 nauhak in kuakfawp

27.5.10, Merinenews. Ziangtin na ruat ve, feh thei ceu Sumartran nauhak kum-2 mipa te cun kuak fawp loin a um thei nawn lo ti ai si. Ardi Rizal hi Indonisia mi a si ih thla-18 a kim ihsin kuak a fawp thok. Hi nauhak pate ih kuak fawh dan cu (cikcin kuak fawh) ti mi cawllo ih kuakfawk a siih nikhat ah zial-40 a fawp thluh ti a si. A nu le a pa in kuak fawplo dingin an dawn le a thin hengin kheng le kho a den ih a Lu khal phar ah a mah le a mah a sut ciam co ti a si. Hi nauhak nu in a fapa teih kuak fawh a hmuh tikah kuat a zongsang zo ti a hmuh tikah ka lungci a mit ih nat ka ngah rori tiah a sim.

Indonesia hi Central Statistics Agency in Leitlun ih kuak fawp bik ram tiih record a si. Nauhak mipum (3-15 years old) ih 3.2 per cent cu nauhak kuak fawp an si ih 4.1 million hi kumtin ramsung mino kuakfawk an karh cak ti a si. Cu ruangah kumpi a cozah khalin kuak fawp ti mal vivo dingin hma a la rero.

Israeli Raldo vanzam Gaza tlunah

29.5.10 AFP. Israel in tui Friday ah Gaza cu raldo vanzam pa-5 thawn bomb a thlak,. Asi nan hi bomb thlak ruangah mithi an um lo ih hriamhma tuar khal an um lo. Gaza hi Israel in 2009 January ah ni-22 sung a do ih  nasa zetih a siatsuah hnu, tu hi a veihnih siat suah sal nak a si.

Thursday ah khan Gaza nisuah naklam ah raldo vanzam in bomb thawn veikhat a thlak ih mi-2 in hriamhma an pu. Cui hnuah Israel ralkap pawl cu ramri ah tamnawn a ret hnuah zan khat sungah veiruk rori vanzam thawn bomb in a va thlak hai mi a si.

Hi tiih bomb thawn Gaza a siatsuah salnak cu Israel hi Gaza ihsin Israel ramsungah Motor thawn an kah sal ruangah a si. Israel hin Egypt thawn an peh zomnak sumdawn zinpi cu a phit ih ramri sumdawn nak khal a khar. Cu pawl cu Gaza lam in thlun lo in a thupten Egypt lam thawn pehzom nak an neih tlun ah ralthuam an neih veten Israel ram cu motor thawn  an kap theu ruangah a si. Israel hin kut a thlak hmai sa lo nan Gaza lam in rocket thawi an kah cun dim lo takih a kutthlak nak ruangah sualnak neilo mipi tiangin an tuar phah theu a si.

American mipi titi

Tu fang American ramih buai nak sosang rero mi cu President Obama ih Sakhua Biak nak thu  a si. Obama cu Muslim thlacam nakih a tel lawng si loin ka Sakhua Biaknak ah zohmanin in sut hlahuh ti a si. A tongmi le a um tudan an zoh tikah Christian a si lo tiah fiangten kan thei a si tiin opposition lam cun an sim. Cun Obama in USA $ par ih ngan mi “In God We Trust” ti mi cu kan malh sal ding tiah a tong thlithlam an thei zo. Cu tikah Christian tangrual le opposition party pawlcun Obama hi a term ( A uk can kum-4) kimhlan ih hlon thlak sal si dingin an cangvai thok rero zo. Hi ti vekih hlonthlak taktak a si cun USA ah hin Midum (Negaro) lal thei nawnlo dingin daan khal an tuah cih ding zum a um. Kan ram kan din thokih kan thuken le kan ram in cawisang tu kan Pathian cu kan tlan san a si len kan ram in harsat nak, hremnak kan tong ding a si tiah Christian tangrual pawlkom khalin an sim ve. Cu ruangah USA rampi hin sunglam buainak a hma tawt rero ih leilungpi hman thleng danglam aw thei mi a si ti mi an mah USA ramsungmi buai nak tete cu USA ih um kan Laimi pakhat hnen in thu kan dong a si. FT.

Mizo in Buddhist puithiam sawisa

20.5.10, Merinenews. Mizoram, Marpara Dist. ih um Phurdungsei khuaih um BUDHIST Phungki pa cu tui 19th May ah zo ti theihlo Lusei(mizo) tlangval pawlin an thawi.

Hi phungki pa in Guwahati(Assam) state ihsin an Budhah milem pawl cu motor sangin a hun phur lai ih an rak tuah mawh nak a si. Hi phungki pa ih phurh mi milem pawlhi Thailand tuah a siih Mahabodhi Society Bangalore pawlkom in Marpara thlanglam tlangtluan ih temple pawlah ret dingih an hun bawm mi a si.

An buai thok dan cu hi Budish milem phurtu motor cu Phuldungsei a thlen ah mizo tlangval pawlin an din terih a driver tum dingin an fial, a tum duhlo ruangah an caih thlakih an thawi. Cu laiah Phungki pa cun zangfah ih lamzin kian dingin a dil hai. A sin an Mizo tlangval rual cun duh loin a mah riangri an thawiih an sit, an thong, an vuak hnu ah an tlan san thluh.

Phungki pa cun Marpara ih Buddhist temple ah a phone ih cutin thuneitu pawl thawn an ra hmuak. Cun hi thuhi thunei tuin relfel sak si dingin ca a ngan. Kei cu Phungki ka si ih biaknak lamih hruai tu ka si, hi an thilti dan cu biaknak thlei dan nak a si, a sinan mizo zate cun an si lo ih a sualtu pawlhi an parih thurel siseh tiah kumpi thunei tu hnenah a dil.

N.Korea Le S.Korea Buai nak

North Korea in a ram tipi ih South Korea lawng a hmuh poh poh a kap zel ding ti a phuang. South Korea thawn ralkap lawng pahaw pangih hman ding, rem awk nak an tuah cia zo khal a titawp cih thu a puang bet. South Korea raldo lawng kap piltu ah North Korea cu puh a si ihsin ram pahnih pehtlaih awk nak cun siat lam a pan vivo. South Korea cun ram pahnih kar lak in ansumdawn awk nak an neih theu hmuah hmuah a titawp hnuah, North Korea cun an ram boruakih South Korea vanzam zam zuanter a khap ih tipi ih South Korea lawng feh ding khal a khap. South Korea raldo lawng 10-in tihnuailawng kahdan an zir ruangah hiti vekih hngirhngo awknak sosang vivo nak bik a si.

Kan mai thu

IOM le CDU  ah Falam mithiam tuanthar kan nei

IOM ( International Organization for Migrant ) Medical lam pangih tuantu dingah Salai Thawng Thawn le Mai  Biak Tha Mang cu a tharin laklut a si zo. Cule CDU (Community Development Unit) ih Facilitator ding ah Sayamah Khin May San cu UNHCR , CDU ih an hnatuan pi dingah pom a si zo. Hitivekih kan Falam mi sung ihsin mai miphun hrangih pumpeaw tu kan mifim mithiam pathum tlun ah Falam mipi ai-awh in lungawi thu kan sim a si.

Family benduh hrang

Mobile Registration sung hmuahhmuah ah kan Falam mi le sa mitampi kan lut thei ih  lungawi a um zet. 24.05.10 thokin UNHCR cun family ben dan ding thu ah thuhla lam dang ternak an nei. A hlanih RST interview ah nu le fa benduh pawl direct ih bensak theu mi cu tun thokin RSD interview nak hrangah dilnak caa thunlut hmaisa a tul. Family ben duh pawl FRO zungah rain dilnak caa nganding a si.

UNHCR, CDU le EST  thlatin meeting

UNHCR, CDU le (Community Development, Employment Service Team) thlatin meeting cu 27.05.10 zing nazi 9:30-11:30am tiang Chinese Assembly Hall ah neih a si. CDU ihsin Ms. Shenti , OPI sin Mr. Kai, EST sin Ms. Su le arualpi pahnih in meeting ah in tel pi. EST department cun refugee hna neilo pawl hawlsak tu an si vekin hnatuannak ding hrangih atul mi pawl community hotu pawl hnenah simfiang nak an nei.

UNHCR le FRO in hminlist kan tul

Malaysia acozah  le UNHCR  pawlkom dangdang ( NGOs ) thawn ramsung um refugee a laang teih hnatuan theinak (work permit ) ngah dingin thurel khawmnak an nei zo ih tunitiang cu acozah lam in felfai zet ih simfiang mi an nei thei hrih lo. Ziang sikhalsehla a thu a um zo ruangah le UNHCR in refugee pawl rammi pawlih siatsuah mi duh lo ruangah refugees hmuahhmuah hnatuannak ah vehvaih nak nei rero zo a si. Cule UNHCR zung rori khalah Boss tamnawn cun  refugee pawl an company ih tuan ding duh thu suthlam nak a tam zet. Cumi pawl cu EST in Community upa pawl thawn pehtliahnak neih sak ringring a si. Hlawhman ngahlo , licensed neilo mi company pakhat ih tuan ngah pang ruangih thawngtlak tivek um lo nak dingin kan hminlist , tuannak company lole dawrih address , UNfile number  le phone number pawl kha FRO ah arang theitawkin rak pek cio uhsi. UNHCR tuanvo neitu pawlin boss pawl ih background le license nei le neilo khal a cekfel dingih boss le nangmah rori thawn hnatuannak ah vehvaih ding a si. Cule hnatuan neihrih lo pawl khal FRO zungah pan in hmin pe cio uhsi aleng lamih kanneih cia mi hnatuan neitu thawn le UNHCR tuanvo neitu pawl thawn theitawk in hna lo hawl sak ding a si.

UNHCR ,  BID Department Contact theilo

BID ( Best Interest Determination ) in kan falam mi Kum kimlo pawl interview ding ah an hawl rero ih an hmu theilo . Curuangah atang ih tarlang mi hmin , a minung  le contact number kan thei a si le zamran ten FRO zungah thei ter nak nei hram uh si. An hmin le khua pawl cu atang lam vek in a si;

0101.  Marry Mawi                 ( Tlangkawi )

0202.Machuan                      ( Locawm )

0303.Bawi Nei Kim                ( Falam )

0404. Mal Sawm Sanga         ( Valang )

0505.Van Ram Ting               ( Tlang Khan )

0606.Biak Lian Sang              ( Rulbu )

0707. Lian Ceu                       ( Caanta )

0808. Zing Htwe                    ( Lumbang )

0909.  Ngun Tha Sung            ( Tlangzar )

(Visited 200 times, 1 visits today)

Comments

comments

4 Comments

  1. Pingback: Malaysia panih ra pawl vanduai tong : chinlandtoday.info

  2. Falam Time siar hi cu, haal a riam suahso rori a si ee!
    Tawifamkim rori!

    Ka lo uar tuk hai.

  3. kan falam Time hi siar nuam tuk lawnman e!

  4. Kan ram a har sa tuk ruang ah hi vek kan tawng hi a pawi ka ti na sa ih hmai lam can ah tawang nawn lo ding in pathian hnan ah thla cam ding in ka losawm. Hi vek a tuar tu pawl hnen ah pathian zang fah nak thlang hram seh. ziang tin bawm nak kan tuah thei ding.

Comments

%d bloggers like this: