Iran in Tanhmun Khuar Tum Ve Thlang

Rel ttheuzo vekin Iran in Nuclear ralthuam a tuahtum tiih puh a si ruangah European Union ram pawl leh US leh ram dangdang pawlin Nuclear ralthuam tuahlo dingih an dilih an ngen nakcu Iran in ngaipawimawh lo ih Nuclear ralthuam a tuah thuptum thotho ih theih a siih, Iran in Nuclear ralthuam a a neih taktak a si ah cun a tuar hmaisa biktu dingcu Israel a siih, Curuangah Israel cun Iran in Nuclear ralthuam a tuahsuak hlanih  Iran Nuclear ralthuam hmun leh thilri pawlcu kahsiat sak mailo cu Israel hrangah lamzin danglam hrilding a um cuanglo tiih kahsiat a tumthu voi ziangmawzat a relsuak hnuah  Isreal cun Iran kap dingin  ralthuam leh an ralkap Commando tha cungcuang pawlkhal timtuah awknak an nei rero tiah theih a siih, Hiti vek boruak a si ruangah America khalin  Iran ramri Strait Homuz tipi ah raldo nak lawngpi  Aircraft Carrier pahnih  raldo nak Vanzam tampi phurtheitu cu tui naite ah a thlahlut zo.

Hiti vek boruak a si ruangah Israel hin Iran hi ziangtik ah a kapding tihi theih a silo ih, Curuangah Iran khalin kilhim awk tumin  ttanhmun khuar a tumve ih ruah siih,  tuah hin Iran khalin an raldo nak lawngpi pawlziang mawzatcu  Suez Canal fehtlangin  Syria ramih lawngcolh nak hmunpi pakhat Tartous an pan rero lai ve ih, Iran leh Israel karlak boruak a siat tukthlang ruangah International Atomic Energy Agency (IAEA) pailai minung 5 pawlcun  Iran Nuclear thuhla ah Iran Cozah hotu pawl dawr dingin Iran an thlenglutve zo, Iran ramah hin ni 2 an caam dingih an caam sungah  Nuclear thuhla ih ram dang pawl thawi an buai rero mipawl hi relfel pi an tum.

IAEA Deputy Director General, Herman Nackaerts in a sim nakah Tehran ih ancaam sungah Iran Nuclear thuhla rungih  ralkap cahnak leh ralthuam tiangtiang hman tumnak a suah ruangah hihi a rangthei bikih tireh zamrang a ttulih, Iran ram hotu pawl thaw khalin  boruak tthazet hnuaiih biakawk nak an neihthei a zumthu a sim.

US leh British cun Iran cu ralthuam leh ralkap cahnak hmangih kap hrihlo dingin Israel  an dilih, Iran Nuclear ralthuam tuahtum nakih leitlun ram dangdang pawlih an hremnak pekmi hi Iran in a ngai pawimawh maw ngai pawimawh lo tihi  zohfiang hmaisa ta sehla tiah an tive thung. France President  khalin   Iran cu ralthuam  cahnak hmangin Israel in kapmai hrihlo sehla a duhthu a simih, Israel leh France rualpi thatawk nak leh pehzawm awknakcu hnin theihlo tlukih hngetmi a si konan  Iran dinhmun zoh tikah  ttongkam ih relfel theilo ding khawpih thilfehsual a um hrihlo ruangah  Israel hin ralkap cahnak hmangin kap hrihlo hramseh la France cun a duh a si a ti.

British Foreign  Secretary, William Haque cun  Daily Telegraph  Thuthangca hnenih a sim nakah Iran  Cozah thilti dan hin  Cold War a suakter pangding ti a phan um tiah a simih, Iran in Nuclear ralthuam a neih a si ah cun  Middle East ramdang pawl khalin  Nuclear ralthuam neihve an tumthluh dingih Nuclear ralthuam neih nak dingih tlan kan zuamawk ciamco a si ah cun leitlun ralpi a voi 2 nak ceem hnuih US leh Russia in  ralthuam neih nak lamih tlan an zuamawk ciamco vek a si dingih leitlun hi hlawmhnih ah a phel a  ttul ding a si a ti.

Israel Defence Minister, Ehud Barak cun  Iran in Nuclear ralthuam a neih suak taktak a si ah cun Israel ram hranglawng silo in leitlun   ram dangdang hrangkhalah thil ttihnung bik a siih,  Israel cu a tuar hmaisa biktu ding kan si ruangah  himi thu ruangih Israel in Iran kan kap a si ahcun Iran in a duh hrilnak ruangah a si ding a ti. Hiti vekih Nuclear ralthuam tuahnak bansan dingih ram dangdangin an nawr rero laiah Iran President, Mahmoud Ahmadinejad cun  Nuclear Project thar pathum a ongbet salih, President, Mahmoud Ahmadinejad hin Tehran khawpi ih Iranian Atomic Organisation Nuclear Project a on hnuah  Video Conference hmangin  Natanz Plant ih Project pahnih a ongbet.

Tehran  reaton  hi kum 1967 ih tuahmi Megawatt 5 poll Type ih tuahmi a siih, himi reator tuahnak ding Fuel an hman mihi Argentina ram ihsi an laklutmi a siih, a sinan titawp sal a si hnuah  Russia leh France in  Fuel hi an pesalih, a sinan kum 2009 October thla ah khan  himi thu ih remnak thutiam an tuahmi cu titawpsal a si leh salih cu ruangah Iran hin a hman dingmi Fuel hi a mahte a tuahcawpih tuah Nuclear ralthuam  tuah tumih puh a siih a sinan Iran cun Nuclear a tuah mihi ralthuam ding silo in Electrict Power tuahsuak nakding a si tiah a tangve.