Suu Kyi In Lailak-hrilawknak Hrangih Hmalaknak Ah Khual Tlawng Ding

Myanmarnewshub | January 24

National League For Democracy (NLD) General-chairperson Awng San Suu Kyi cun a rei hlanah Kawlram in lailak-hrilawknak a neih dingmi hrang timlamnak ah ram sung hmun dangdang ih mipi vehvai in khual a tlawng tan(campaign) ding a si.

Kawlram nubik tiih kawh a si mi Suu Kyi cun lailak-hrilawknak hrang timlamnak ah Tanintayi, Thaway ah mipi vehvainak le an party hrang campaign cu January 29, zarhpini ah a neih ding thu ramsung thuthangca in a tarlang.

Febuary 4 le 5 ah Mandalay khalah zankhat riak ding in a feh ding ih cuhleiah Febuary 7 ah cun Irrrawaddy, Patein Myo ah a feh leh ding a si. Suu Kyi in ziangruangah hi hmun pawl hi an party hrang campaign a tuah ding ti thusuhnak mipi lam in an neihmi cu NLD thusimtu, U Ngian Win in, “ Hi hmun pawl cu vanzam thawn feh theihnak an si ruangah a hril hmaisa  asi bik in ka thei. Constituency (hrilawknak hmun pi) dang dang pawl khal ah a feh vivo ding.  Tu dinhmun ah cun thlen awlainak hmun pawl lawng ah a fe hrih ding a si.” tiah a rel.

Suu Kyi in Thaway a thlen ve ten an party member pawl lawng siloin mipi thawn khal in tawnawknak an nei ding ih Cozah thuneitu pawl khal thehter tum a sinan Suu Kyi kilhimnak lam cu NLD in tuanvo an la ding a si.

Tu’itum Suu  Kyi in an party hrang campaign an neihmi hi  Suu Kyi a innsungih kaihtar  asi ihsin a suah hnu a hmaisa bik ih a neih dingmi a si ti ih rel theih a siih Suu Kyi cun an party hrangah hmalaknak a neih vivo dan ding khal an rel khawm leh ding  asi.