President U Thei Sein Singapore Ah Feh Ding

Myanmarynews.Net | January 27

Kawlram president U Thei Sein cun a reihlanah Singapore ih a feh ding thu Kawlram thuthangca in a tarlang.

Kawlram president U Thei Sein cun Singapore ram cu a veikhatnak hrangah a reihlah ih a feh ding thu January 26, tlawngkaini li ah a rel.

U Thei Sein Le Singapore Foregin Minister K Shanmugam cu kum 2010, December ah Singapore in Yangon ih tube tikhur tuahnak hrang bawmnak a pek tum ah an rak tawngaw zo ih tu’itum an tawnawknak ah cun Kawlram in pursumleilawnnak lam ah hmasawnnak a neih theinak ding hrang Singapore ram thawn hmuar nei sinsin ih an tuantlan theinak ding thu rel an rel ding a si.

Pursumleilawnnak lam zingzawtu pawl cun kum 2010 ihsin kum 2011 sungah Kawlram le Singapore ram pahnih in pursumleilawnnak lam ih tuantlannak an neihmi cu US dollor in 2.074 langlo a si thu a phuang.

Kawlram in Singapore thawn pursumleilawnnak lam hrang biakawknak a neihpi ih a hlawhtling a si ahcun Kawlram cun pursumleilawnnak lam ah hmasawnnak tampi a neih phah ding ih zum a si.