Biazai : Dawt Mi CT

Dawt Mi CT

Hausum Fanu

Dawtmi CT ropi ngai ee;
Na tanlaknak ka hrang thatnak
Na zuamnak cu kei hlawknak  an cang
Na pekawknakah hnangamnak ka co
Theihhmuah suah in mi hrang tuan in
Na lainatnak a maksak tuk ee
Dawt mi CT dam rei seh law!

Theihkohnak ding thutha in sim
Harhdamnak hrang zirnak in pe
Ka thlarau hrang tiang dam ter duhah
Thuthangtha thawn lamzin in hmuh
Leitlun thuah sanman ding in
Thu maksak pawl in thei ter fawn
Na ngaihsaknak a sunglawi ngai ee

Dawt tu ka nu’i ankaa nem bang
Ka hrang fim ding beisei in
Thufim zirh in kei in duhsak
Zaihla mawi in ka lung in hnem
Biazai rii in ka lung in thlim
Na ankaa nem in hlan mi
Ka lungthin sung thlum duahdo ee

Miphun hrangah na tuan na zuam
Chin mi hrangah taimak suah in
Harsat ,buainak tawng phah hmanseh
Beidong siang lawn na zuam tento
Miphun hrangah na duhdawtnak cu
Thuhla hmang in na lang ter sin
Dawt mi CT cak sin seh law

Rinum vapual bang i hruai sin aw
Zalennak ram cu i hmufiang ter sin aw
Na ankaa cu ka ngai ring ring ding
Na tuh mi thingrah a ei ngah tu in
Na duhsaknak hmufiang hramseh
CT na ram kau sinseh
CT na hmelmawi cuang sin seh
Kei CT dawt tu in
Lungtak suah ih duhsaknak ankaa lo hlan ve ning
Dawt mi CT na hrangah ti in!!

Rakhein Ah Cozah In Dan Lo Vek In Loram Cuhsak

BBC | January 29

Rakhein State, Yianbe Township ih Palihngiu tikluh ihum lonei tu 40 lenglo in eihawlnak ih an hman mi loram acre 800 lenglo cu environment department thuneitu pawl in thingkung phunnak ding hmun ah hman an tum ih an siatsuah rero thu thuthangca in a tarlang.

Environment department thuneitu pawl cun hi tikuluh ih um loneitu pawl cu an lohmun suahsan ih hmun dangah an thawngaw a silo ahcun kum 6 sung thawng thlak ding in an hro ih lo neitu pawl cun tingaihnak theilo in an um rero a si.

Famkim Siarbet

Insein Ih Inn 30 Lenglo Umnak Thawn Ding

Myanmarewshub | January 29

Kawlram khawpi hlun, Yangon ah inn san/luah ding awlai le hmanawl sawn ih san/luah a si theinak dingah Taw-win-mih-ta-suh company in project an fehpi reromi ah Yangon, Insein Township ih (kah) yiatkuat ihum inn 30 lenglo cu an umnak hmun thawn an si ding thu yiatkuat um mipakhat in a rel.

Hi project ruangah ahmat (115) kah/3 ihum Daw Puh cun a inn cu ks. 170,000 ih a zuar zo. January 31 ah thawn tengteng a tul ding thu le Cozah thuneitu lam in zuar lai can ih zuar lole an buaipi lo ding thu pawl an rel ruangih hramhram ih zuar asi thu pawl a rel.

Famkim Siarbet

SSPP/SSA Le Kawlram Cozah Remnak Tuah

BBC | January 29

Kawlram cozah in remnak tuahtu dingih a bikih a ruatmi pawl cu January 27,tlawngkaini nga ah SSA thawn remnak an tuah.

Kawrlam cozah in remnak hawltu le tuahtu dingih a bikin a ruatmi pawl cun January 27, tlangkaini nga ah SSA thawn Tawng-gi Myo ah remnak an tuah asi.

Hi tawnawknak ah Kawlram cozah palai U Awng Tawng ih hohanak in mangki 13 in an telpi ih SSA lam khal in SSPP ih vice secretary Buuhmugi Khe Thein, SSA ih ralkap hohatu bik Sat Khe Min le SSPP Foreign department buhmugi Kuan Seing pawl ih hohanak thawn 10 in an telpi a si.

Famkim Siarbet

THINLUNG THAR

Ro Khar Thang

Text: Rome. 12 :2. “…….nan thinlung kha tharthawh tahratin thlengaw sawn uh”.

THUHMAI THI: Thil thar pakhat tuah suak dingah kum reipi hawl le zuam a tul theu. Nundan thar nei dingah ziangtluk in zuam le tuan kan tum. Kumpi kum khat sungah nundan thar ziangvek ka nei ih neih ka tum ti hi, mah le mah ngunngaih zetih kan ruahawk a tul ngaingai.

THINLUNG THAR NEITU PAWLIH NUNCAN DAN

1). Mah le sinak hnakih sang in an retaw nawn lo ih, an sinak ding zawn ciarin um dan an thiam(Rom.12:3)

2). A tha lo mi cu an hua ih a tha mi cu fek zetin an kai ringring(Rom. 12:9)

3). Khristian unau an si vekin khat le khat sunsakaw zetin an duhdaw aw cio( Rom.12:10)

4). Zaangzel le daithlang ih um men loin tairial suahin mah le tuanvo ciar an tuan(Rom. 12:11)

5). Thinhar mangbangnak a thlen canah thinnau le beidong ih um men loin lungawinak thup an nei ringring(Rom.12:12)

6). Bang loin thl an cam ringring(12:12f)

7). A nei lo mi Khristian unau pawl thawn an neihsun an hlawmaw(Rom. 12:13)

8). Khualtlawng lamvak mi pawl hrangah an ongaw zet(Rom. 12:13)

9). An mah hremtu cu camriam loin Pathian hnenah thluasuah an dilsak sawn(Rom. 12:13)

10).Lungawi mi pawl an lungawi pi ih hleiah riahsia mi pawl tuarpit dan an thiam(Rom.12:15)

11).Mai’ zawn lawng ruat loin midang zawn an ruat thiamih bangran ten nun tlang dan an thiam(Rom. 12:16)

12). Thinlung tangdor mi pawl thawn pawlkomawk an duh(Rom. 12:16)

13). Fim bik le thiam bik ti’n an ruataw dah lo(Rom.12:16)

14). Zo thaw hmanin dokalhawk nak le ral awknak an nei lo(Rom. 12: 17)

15). Mi hmuahhmuah thyawn remaw te ih um thei dingin an zuam tento(Rom. 12:18)

THU KHAR  NAK: A tlun ih thu pawl siarin ruataw la, kum 2012 kum thar sungah ziang vekih nuncan ding a si ti, na ruataw thei ding. Hi mi nundan phun 15 sung ihsin phun ziangzat ka nun pi zo ih ziangmi pawl ka nun pi thei hrih lo ti cu nangmah ten na zoh fiang aw thei thlang ding. Tumtahnak thar pakhat khat nei ih kum le can, ni le thla hmangthiamtu si kan tum cio pei, Amen.

‘International Conference’ Delhi Ih Neihmi Ah CNP Palai Hngepi Le Zo Zam Telve

CT News Delhi | January

International Conference tu’ini January 28, zarhteni New Delhi, Chanakya Puri ih neih miah Kawlram political party 10 ihsin palai 2 ciar cu hi conference ih tel ve ding ah India, New Delhi ih an thlen thu le conference an kairero lai thu CT palai Salai Star hnen ihsin thu kan dawng.

Kawlram political party 10 lak ihsin Chin mi in an rinsan zetmi, CNP (Chin National Party) khal in an palai 2 : Hngepi le Zo Zam cu hi conference ah tel ve ding in an thlah ve a si.

Famkim Siarbet

“Praise With Heart” Awnmawi Puai Neih A Si Ding!

CT News | January 28

“Praise With Heart” tiih hmin pekmi awnmawi hlasak puai (Live Concert) cu February 20 ni zanlam nazi 6pm ihsin 10pm tiang, PuDu Plaza kiangih um mi First AG Church ah tuah a si ding tin tuanvo neitu pawl cun an sim.

Himi awnmawi puai hi Chin Christian Youth International (CCYI) le Chinhill Collection pawl hohanak ih tuahmi a si. Hi Pathian hlasaknak hmun ih hlasaktu ding pawl cu tufang Kawlram sungih hlasakthiam hminthang Sang Pi, L Lun War le Chaw Su Khin pawl an si ding. Malaysia ram sungih um cia mi ihin hlasakthiam Kim Kim le Henry VL Hmangaih khal hi awnmawi puai ah an tel ve ding. Laimi sungih Guitar tumthiam Salai Cung Aung khal hi Concert hrangah Philippines ihsin a ra ve ding.

Hi Live Concert zoh theinak Ticket cu pakhat ah RM30 in zuar a si ih Falam Community pawl, FRO zung le hmun dangdang ah lei theih a si. Thuhla cipciar deuh ih theih a duhtu cun a tanglam vekin pehtlaihnak tuah a theih.

Wesley Bawi (017 882 5271); Than Te (017 343 5492).

UNHCR Card Kai Pawl March Ah Kutzung Nam Ding

UNHCR, CDU Department honanak ih tuahmi kum 2012 sungih a hmaisabik meeting cu Chinese Assembly Hall ah January 19/2012 ni ah tuah a si ih refugee community tinkim ihsin palai pawl an kai khawm. Cumi ni ih an rel dan vek asiah cun March thla ihsin UN card a nei cia tu refugee hmuahhmuah kutzung nam (finger print) ter sal ding a si.

Kutzung namnak ding hmun, a ni le tikcu can pawl cu UNHCR hin community pawl hnenah theihternak a nei leh ding. Curuangah UNHCR card a nei cia zo tu pawl cun March thla a thlen hlan deuh ihsin timtuah cia in thu le hla felfai ten thei dingah mai community thawn cat loih pehzomnak nei dingin sawm a si.

Hi kutzung nam dinghy refugee community pawl hmangih tuah ding a si ruangah UN Card a ngah zo tu FRO member zozo khal a nung lai mi FRO card (valid FRO card) nei cio dingah le a nei hrih lo tu cun a rang thei bikin FRO zungah card a thar tuah dingah sawm a si.

(FPM/ FRO)

Kawlram Private Bank Pawl Ah Ram Dang Ihsin Sumpai Kuat Theih Cing Ding

Mizzima | January 28

Kawlram cozah cun private bank 4 pawl hnenah Malaysia, Singapore le Thailand ram sumpai thleng le dawn/ kuat(receive)siannak cu February thla ihsin a pek thlang ding thu thuthangca in a tarlang.

Kawlram cun hivek ih siannak a peknak san cu Asean ram member pawl thawn pursumleilawnnak a neihpi duh ruangah  asi ih private bank siannak an pekmi pawl cu Cooperative Bank, Kanbawza Bank, Asian Green Development Bank le Ayeyawaddy Bank pawl an si.

Famkim Siarbet

NLD Aiawhtu Pawl In Kawh-Mu Ah Mipi Vehvai

Myanmary News Hub | January 28

NLD party thuneitu thenkhat pawl cun January 27, tlawngkaini nga ah Suu Kyi in lailak-hrilawknak  ih a telnak ding hmu Yangon, Kawh-mu Township ah Suu Kyi thupek vekin mipi vehvainak (campaign) an nei.

NLD aiawhtu pawl cun Suu Kyi in lailak-hrilawknak ih a telnak ding hmun Yangon, Kawh-mu Township ih khua 11 ah feh in lailak-hrilawknak hrangah mipi an vehvai ih mipi 100 lenglo in lungawi soparte’n an rak hmuak asi.

“ Suu Kyi a tello cing hman in mipi 100 lenglo in inrak hmuak cu kan lungawi in kan tha a tho zet.” tiah a hmun ih fehvetu Ko Ngi Ngi U in a rel.

Famkim Siarbet

Suu Kyi Le 88 Generation Tlawngta Hruaitu Pawl Tawngawk Nak Nei

BDC | January 28

Kawlram ih ramthukhel hmingthang 88 generation tlangta hruaitu pawl cun January 27, tlawngkaini nga ah Kawlram nubik a simi Awng San Suu Kyi thawn tawnawknak nei in hmailam ih hmalaknak an neih vivo dan ding relkhawmnak an nei.

88 Generation tlawngta hruaitu pawl cun Suu Kyi cu lailak-hrilawknak ih a tel dingmi ah theiawkih bawmnak an pek ding thu, a tanglaimi ramthukhel thawngtla pawl suah an si theinak ding le hmailam can ih ramthuhla um dan ding pawl relkhawmnak an neih thu atelpitu Ko Ko Gi in a rel.

Famkim Siarbet

Tha-way Ih Pursumleilawnnak ‘Special Zone’ Ruangah Mipi 4,000 Lenglo Umnak Thawn Ter Tum

Irrwaddy | January 28

Kawlram cozah in Tha-way ih prsumleilawnnak hrangih special zone tuahnak ding a tawlrel rero ruangah khua 20 ihsin mipi 4000 lenglo cu an umnak thawn ter ding in thuneitu pawl in an tawlrel rero lai a si.

Kawlram cozah cun pursumleilawnnak lam ah hmalaknak a nei vivo ih hivek hmalaknak a neihmi lakah Tha-way ih pursumleilawnnak hrang ‘Special Zone’ a tawlrel rero ruangah kiangkap khua 20 ihsin mipi 4,000 lenglo cu an umnak thawn ter ding in thuneitu pawl cun thu an tawlrel rero ih thawn ter cing an si ding thu khal thuthangca in a tarlang.

Famkim Siarbet

« Previous Page — Next Page »