Kawlram Hremnak Pakhat EU In Hlihsak

VOA | January 24

Kawlram cun ram dangdang pawl ih mihmuh ah langngan in remthatawknak a feh pi vivo ruangah EU (Europian Union) cun Kawlram cu kil dangdang ihsin hremnak a pekmi pakhat a hlihsak a si.

EU hruaitu pawl cun January 23, tlawngkaini khat ah tawnawk-khamnak an nei ih Kawlram cozah hruaitu pawl ramdang an fehtheinak (visa) kum 15 sung siannak pe lo ding ih an relcat zomi cu siannak pe thlang ding in thu an relcat zo a si. Cuhleiah Kawlram ah pursumleilawnnak lam le social lam ih bawmnak an pek theinak ding ah zung (office) khal awng ding in timlamnak an nei rero zo. Kawlram hremnak an pekmi a dang pawl cu cozah in remthatawknak a fehpi vivo ding a si ah cun an hlihsak leh ding thu khal an rel khawm a si.

EU thusimtu, Maja Kocijaneic cun Kawlram cozah thar in ram remthat-awknak an neih rero ruangah ram 27 tel ih din a simi EU cun remthat-awknak an theihpinak le an lungawinak tilannak ah tuvek in ram palai pawl tawnawknak a veikhatnak an nei thu a rel.

EU cun visa thu cu reihlan ah an buaipi ding ih Kawlram cozah in remthat-awknak a fehpi vivo a si ahcun hremnak dang pawl khal a dawtdawt in an ngaihtuah thatsak ding a si. Cuhleiah ramsung ih remdaihnak a um theinak ding khal ah a tul dandan ih bawmnak pe ding khalin thu an rel.

Maja Kocijaneic cun Kawlram cu bawmnak hrangah EU ting 150 khal bawmnak hrang pe ding in thu an relcat thu le hmuar nei sinsin ih Kawlram bawmnak an pek vivo theinak ding hrangah EU zung (office) khal awn a si theinak ding in EU Foreign Policy hohatu Kawlram ah fehin Kawlram acozah hruaitu le Suu Kyi thawn thurelkhawm-nak a neihpi ding thu khal a rel.

Maja Kocijaneic cun tuvek ih EU in Kawlram remthat-awknak an theihpi in an lungawinak lan ternak ah hremnak an hlihsak zo ruangah Kawlram acozah thar cun hmailam khal ah ram remthat-awknak cu dung sip lo in a fehpi vivo an beisei thu khal a rel tel bet.