Dar Forth Ih Economic Forum Ah U So Tein A Tel Ding

Irrawady | January 26

Switzerland khawpi, Der Frot ih neih a si dingmi Economic Forum ah Kawlram ihsin Kawlram president aiawh in minister of economy, U So Tein a tel ding thu Kawlram thuthangca in atarlang.

Kawlram president U Thei Sein in hriamhrei keng pawl remnak thu a relpi theinak dingih nasa zet ih tan raklatu Dr. Chaw Zin Hlein khal a tel ding a si. Hi Economic Forum cu January 25 ihsin 29 tiang Switzerland ram, Der Forth ah neih a si dingih hi hmun ih tel dingin Kawlram president U Thei Sein le NLD general-chairperson Awng San Suu Kyi sawm an sinan ramthuhla ih an tuanvo neimi pawl ruangah an telpi thei lo a si.

Awng San Suu Kyi cun lailak-hrilawknak hrangih tawlrel tul pawl a tawlrel rero lai ruangah a feh theilonak san a si ih U Thei Sein khal ramsung remthatawknak thuhla a fehpi vivonak ding ih tulhaimi pawl a tawlrel lai ding ruangah  a feh thei lo a si.

Hi Economy Forum an neih dingmiah Asia, Africa, European le Latin America pawl ihsin palai an fehkhawm dingih leitlun pursumleilawnnak lam ih milian pawl, mifim langsar pawl, zaihla lam ih hmingthang langsar pawl le calai lam ih fimthiamnak nei pawl khal an tel ding a si.