A Vei 27 Nak Southeast Asian Games Kawlram Ah

BN | 30 December

A vei 27 nak Southeast Asian Game (SEA) kawlram ih tuahnak ding ah lehnak lam ih hruaitu pawl cun tlawmngai ih tuantu mi 12000 pawl an la ding ih hi pawl thawn thuhla thanawknak lam leh hmasawnnak dangdang a um theinak dingah hnatuan dangdang pawl an tuan ding tiin thu don a si.

Famkim Siarbet

Google Leh Facebook US In Zohtambik; 2011

BBC | 30 December

Goolge site cu 2011 kum ah US ih zohhawlh bik a siih Facebook in a sangsuan tiin zohhawlnak neitu pawl cun an sim. Zarhtin US mi 153 million lenlgo in Google an zoh ih 138 million lenglo pawlin Facebook an rak zohve. Cu laiah tuihlan ih vanmaimomzaam (website) ropibik rak ngah theutu Yahoo cun pathumnak siin zohtu mi 130 million lailawng a rak nei.

Famkim Siarbet

Kum 99 Upa In A Nupi 1940 Ih Thilthleng Ruangah Then

TOI| 30 December

LONDON: Thikthu siatnak hi tar lam khalah a rak reh cuanglo. Italy ih kum 99 mi putar cun a nupi kum 96 mi cu 1940 ih thil thleng ruangah a then ta riai. Leilung tlun ih kum tarbik thenawk hminsin an ngah.

Famkim Siarbet

Suu Kyi In Kangmei Suak Ruangih Harsatnak Tuar Pawl Vehvai

Kawlram thatnak hrangih nasa zet ih hnatuah rerotu, NLD party hruaitu Suu Kyi cun tuni, 30.12.2011 zianglam nazi 11.00 hrawng ah Kawlram khawpi hlun Yangon, Mingala Taung-Ngyut Township ih kangmei tuar pawl hnenah Suu Kyi feh in forhfialnak a pek.

Kawlram khawpi hlun, Yangoh ih Mingala Taung-Ngyut Township kangmei suak ruangih harsatnak tuarpawl umnak hmun Ma-ha-wih-za-yah phunggicawng ah tuni nazi 11:00 hrawngah NLD hruaitu ropi Suu Kyi cun kangmei tuar pawl hnenah feh in an harsatnak tuar mipawl zingzawinak le thazang peknak a neih cih ih kangmei tuar ruangih harsatnak tawng pawl cu NLD party in thei tawk ih bawmnak an pek ding thu khal a sim.

Suu Kyi cun kangmei tuar ruangih harsatnak tawng pawl umnak hmun a feh ding thu an theih ruangah kangmei tuartu pawl cun lungawi soparte’n Suu Kyi hmuahnak khal an tuah ih Suu Kyi cun bulpak cio hnenah thanau ih um men lo dingah thazang peknak a nei. Harsatnak tuar lak ih sin hmin tarlan duh lo pakhat cun, “Harsatnak tuar lai ih lungawinak pakhat kan neih mi cu Suu Kyi in in hngilh lo hi a si. Harsatnak tuar pawl hrangah bawmnak a phunphun tawlrel tu pawlkawm pawl le mipi khal in bawmnak in pe nan hi vek ih Suu Kyi rori a ra thei hi kan lungawi hleice. Ziangahtile Kawlram mipi tamzet lak ah kan nih vek harsatnak tuar pawl in theitu le in ngaihventu an um lai hi kan lungawi tuk’ tiah a rel.

NLD party cun harsatnak tuar pawl hrangah zohawknak hmun zato te khal an tawlrel sak ih a tul daan vek ih bawmnak khal an pek rero lai a si. Harsatnak tuar pawl cun ei le in, sin le fen cu tlasam lo in bawmtu an nei nan an umnak runinn cio ih um leh thei nak le inn sak nak ding ih bawmtu ding an um hrih lo ruangah an buainak tawnmi cu khrihkhan zet a si. “Kangmei suak ruangah inn tam zet cu a cim ih cozah lam in ziangtivek in harsatnak tuartu pawl hrangah inn a tawl relsak ding ti cu theih a si hrih lo. Umnak thawnsak in khawpi lenglam ah innhmun a pek khal a si thei, a sin an an umnak hmun cio an co lo a si ah cun buainak a sosang nasa ding” tiah kangmei suaknak veng sung upa pakhat cun a rel.

December 29 zan ih kangmei suak ruangah godawn 16 kang ral in meisa mittu (Mii-Tat) 17 in nunnak an hloh ih hleiah 91 in hliamhma nasa zet an tuar phah a si. Cuhleiah inn 226, insungsang 216 le mipum 1038 lenglo in umnak neilo ih an um phah a si. Hi kangmei suak ruangah ting thawngkhat lenglo a kang ral phah thu khal thuthangca in a tarlang bet.

Irrawaddy

Indonesia Ram Foreign Minister Marty Natalegawa Le Suu Kyi Tawng Aw!

NLD party hruaitu ropi Awng San Suu Kyi le Indonesia Froeign Minister Marty Natalegawa cu 28.12.2011 ah tawngaw in Kawlram dinhmun rel tlannak an nei.

Kawlram ih ni reilote sung cambang ih feh Indonesia Foreign Minister Marty Natalegawa le NLD party hruaitu Suu Kyi cu kan dung tlawngkaini 3 ni ah Suu Kyi umnak hmun Yangon ih a inn ah tawngaw in Kawlram in kilkip ih thansonnak a neih mi thuthawn pehparawmi pawl rel tlangin kawmawknak an nei.

Hi an kawmawknak ah Marty Natalegawa cun Suu Kyi hnenah Indonesia ram cun ziang vek in Kawlram mipi hrangah theitawk ih bawmnak a pek tile ziangtivek in hmalaknak Kawlram hrangah an nei ve ti pawl a sim ih Kawlram in mipi rorelnak le zalennak diktak a neih theinak ding hrangah Indonesia cozah cun hmalaknak a neih vivo ding thu pawl a sim. Suu Kyi khal in Marty Natalegawa hnenah Indonesia ram in Kawlram  a ngaihsaknak parah lungawinak tampi a neih thu le hivek ih Kawlram a thansoh theinak ding ih hmalaknak nei vivo ding khal ah forhfialnak thu a sim ve.

Suu Kyi le Marty Natalegawa cun tawnawknak an neih thluh hnuah thuthanglatu pawl kawmnak an neih cih ih an rel mi thu pawl khal mipi theih ah an sim bet. Suu Kyi cun Kawlram le Asia ram pawl lak biakpawhawknak a that vivo ding a duh thu le Asia cun Kawlram cu zohmen lo in an ti thei tawk ih bawmnak peve cio ding ah a ngen tel fawn a si.

Suu Kyi le Marty Natalegawa tawnawknak ih Kawlram hrangah cun lungawi um zet pakhat a si ih Indonesia ram cun Kawlram ih inhnen ram a si vek ih Kawlram hrangah nasa zet in hmalaknak a nei vivo ding ti khal ruahsannak Kawlram mipi a neih ter a si.

BBC, Irrawaddy

Manpek T’ul Sehla

Manpek T’ul Sehla

Mai Zilthli Lal Nei Thluai

Nitin ka thawtmi ka thaw hi
Manpek t’ul sehla
Kei ka thihnak a reizo ding

Nitin ka hawpmi thlithiangte tla hi
Manpek tu’l sehla
Kei tuisunni tiang ka dam lamlam lo ding

Nitin ka thil tuah/t’uannak ih ka hmanmi ka kut tlahi
Manpek t’ul sehla
Kei kut ka neihnawnlonak a reizet zo ding

Nitin ka hmanmi ka ke tla hi
Manpek t’ul sehla
Feh/Vak theilo ih ka ke a bulnak a reizo ding

Khua ka hmuh theinak ka mit tla hi
Manpek t’ul sehla
Kei ka mit a cawtnak a reizo ding

Thu ka theih theinak ka hna tla hi
Manpek t’ul sehla
Kei ka hna a setnak a reizo ding

Ka ei/in/t’awng theinak ka ka/lei tla hi
Manpek t’ul sehla
Kei tuisunniah ka in/ei/t’awng thei nawn lamlam loding

Thawsuah pakhat hnu pakhat siar aw
Bawipai’ pekmi in a lo mangbangter ding

A Thlengaw Reromi Sanah Ziangtin Kan Nung Ding?

A Thlengaw Reromi Sanah Ziangtin Kan Nung Ding?

Rev.Dr. CJ Hrang Hmung

Kum a cem zawngah a liamciami caan pawl kan zohkir sal ttheu. Cutikah kan san hi zamrangzet in a thleng aw rero tihi kan hmu thei ciomi a si. Nidang laiahcun rocket san, computer san kan tiih san hi a hercak zet ah kan ruat. Kan Laimi dinhmun hrangah cun a zamrang tuk zomi a si ko. Culawng si loin atu cu Information Technology timi IT san kan thleng ih caan takfang kan hmang thlang. Leitlun khuazakip ih ummipawl khal pakhat le pakhat hmel rori hmu awk ih biak-aw theimi web camera timi khal a suak thar vivo thlang. Kan ruahban dah lomi pawl an si. Cuticun kan tikcu caan hi a thleng-awcak zet ih a thangso ngaingai ti kan hmu thei a si.

Hiti ih a thleng awmi pawl sungah hin kan duh lozetmi thil tampi a um ding. Kan hrangah siatnak lam in fehpimi siamtharmi tampi an um ko ding. Asinain kan duh zetmi le kan hrangah a tthahnemzetmi thil khal tampi a um ve ko ding. Lungawi thathozet ih kan cohlang ih kan hmang rero mi thil khal tampi a um ve ko ding. A hmunmi thil a um nawn lo tluk a siih a thar in a airol cingcing. Tuisun thilthar a suak tiih kan neihmi khal thaisun ahcun a hlun ah a cang ta mai. Model thar a phunphun in a suak cingcing. Cumi pawl cu hi lei khawvel ih kan nun sungih nitin kan hmuhtonmi, a thleng aw rero mi thil pawl an si.

Cuti ih a thleng aw rero mi san ih a ummi kan si vekin minung kan thinlung siseh, thilri le ziangzongza khal a hngetmi a um thei lo. A thleng aw cingcing. Cumi lakah a thleng aw dah lomi thil khal a um ve ko. Cutin a thleng aw rero mi kan san hi Saam cangantu cun, “Khuahlan laipi ah leilung hi na rak seemsuah; Na kutzung in van pawl hi na tuah. An zate in an hloral theh ding. Asinain nang cu kumkhua in na hmun ding; An zate in hnipuan bangtuk in an ttet thluh ding; Hnipuan vekin na thleng hai ding ih an hloral theh ding. Sikhalsehla nang cu nangmah keel thotho na si; Na nunnak cu cem ti a nei lo” tiah Pathian ih sinak kha fel zetin a hmufiang thei (Saam 102:25-27).

Pathian lawng hi a keel te’n a awh ringring. A duhdawtnak khal kumkhua in a hmun ringring a si (Saam 136). Cuih tlunah kan Bawipa Jesuh Khrih khalin, “Lei le van a cemral ding na in ka ttongkam cu a cem dah lo ding,” tiah in sim (Mat. 24:35). Pathian thu le a ttongkam hi minung cun kanmah le duh daan a phunphun lakin kan pom cio, kan rel cio. Asinain kanmai’ pom le rel vek si loin A thunung ttongkam cu kumkhua in a hnget ringring a si, ti in simfiang duhmi a si.

1. Thleng awknak timi cu a um ringringmi a si. Ni le thla, caan pawl hi a herliam vivo. Nithla siarnak khal nikhat hnu nikhat thleng vivo a ttul. Pathian kutsuak hi leilung boruakpi hi a her aw rero ih nitin siamthar rero a si. Kan leilungpi hi cawl men loin a her rero ih a sungum thil ziangkim khal a thleng awk rero. Kan nunnak khal nikhat hnu nikhat, thlakhat hnu thlakhat, kumkhat hnu kumkhat a thleng awk vivo vekin kan kum khal a tar vivo. Leilungpi a seemsuah ihsin thlengawknak timi hi a um ringring. Cuti ih thleng awknak a um ruangah tthansonak tampi a suahpi ih minung le leilung ih a ummi zate hrangah qhathnemnak tampi a um.

Asinain khatlam ah tthansonak a um vekin siatralnak lam in thlenter theitu thil khal tampi an um ve. Kan duh khalah siseh, duh lo khalah siseh, a thleng aw rero cu a si tamai. Thlengawknak a um lo ahcun ttihnungza rapthlakza tampi a suak thei men. Thleng awknak a um lo ahcun kan nun khal hi kan ningzet men ding. Amah kel ringring timi cu kan duh ding zum a um lo nasa. Thleng awknak timi cu minung kan tthatnak hrangah a si. Thleng awknak ruangah nitin in tthanlen ter ih pitling nun ah in fehpi. Kumpi kumkhat sung kan nunnak kan zohkir sal tikah thlengawknak tampi kan tong ko ding. A hrekkhat thleng awknak pawlcu kan duhmi a si ko ding. Asinain kan duh lomi thil tampi khal cu duh lo cing khalin kan tong thotho mi an si. Cumi pawl khal cu Pathian ih remruat a siih kan el theimi a si fawn lo. A thokpek ih kan rel zo vekin kan tlanlennak hi leilungpi hi nitin a thleng aw rero ruangah a si.

2. Asinain kan “Bawipa cu ziangtik hmanah a thleng awk dah lo”. Saam cangantu in Pathian parah ziangtluk a rinsan timi thu hi hngetzetin a sim. A dinnak hmun hrampi cu Pathian ah a ret. Baibal in “thihnak a um lo,” a ti lo. Asinain “thihnak horkuam sung zawh hman ningla maw Bawipa ka ttih lo ding,” a ti sawn. “Ral do awknak a um lo,” a ti lo ih “midang in in siatsuah dingin an rat khal le Bawipa lawng ka rinsan ding” tiah a ti. Leitlun thil ziang hmuahhmuah cu a herliam vivo ih a thleng awk rero ko hman sehla kan biakmi Pathian cu kumkhua in a hmun ringringa si.

Curuangah a liamcia zomi kan nunnak kan zohkir sal tikah thlengawknak tampi kan tong, kan liampi zo ti cu kan tonteh ciomi a si. Taanta ding thil tampi kan nei vekin pehzom ih fehpi vivo ding le neih vivo lai dingmi thil tampi a um ko ding. Thukam timi hi a thupizet. Zianghman ka tuah nawn lo ding tiah thukam kan tuah ttheu. Asinain kan pelhsal ringring. A hleice in kumtinte’n kumcem zaan ah Pathian hnenah thukamnak tampi kan tuah ttheu. ‘Bawipa, tui’ kumthar sungah cun tthatlonak hmuahhmuah ka tansan dingih na duhnak vekin ka tuah, ka nung thlang ding’, tvp. A phunphun kan ti ttheu.

Kan thinlung sungih a suakmi hmuahhmuah kan sal ih Pathian hnenah ‘thu kan kam a si’ kan rak ti ttheu. Sikhalsehla caan a reihlan ah kan pelhsal ringring cu teh. Rei hman a daih dah lo. Kanmah keel ah kan cang sal lala. Kan hngilh pang maw, kan hngilh hrim maw cu thei ve hlah. Thukam pelh hmang pawl cu zohman in kan zum ngam dah lo si khawh. A thukam vekin a tuah ttheu lotu cu rinsantlak an si dah kel lo ti cu kan thei cio ko. Cuvek in Pathian hnen ih thu kan kammi kan pelh ringring ahcun Pathian in teh in zum ngam thei nawn pei maw? tihi ruah ding a um.

Mi relsiatnak, iksiknak, mi huatnak, khawm paih lonak, Pathian thu ah nung duh lo ti pawl hi a ttha lomi pawl an si ti kan thei. Cuvek pawl cu a liamcia caan sungah taanta ding pawl an si. Santhar, kumthar sungah kan luhpi loding a thupizet. Zu in, kuakfawp, khaini hmawm, kuanza ei tivek ritthei thil ziangkim hman rero pawl hin kan taksa kan siatsuah awk rero ti hi kan thei a ttul. Atu ah in siatsuah hrih lo na’n a hmang ringringtu pawl cu a reihlan ah an taksa ruangpum ah natnak pakhat khat a suahpi thei.

Kan taksa nunnak hrangah tthathnemnak zianghman a um lomi pawl an si. Cubang pawl hi a thleng rero mi san sungah hmang nawn lo thei sehla a ttha. Isaiah 55:1-2 sung kan zoh asile, “Bawipa in, ‘Ra uh, ti a haal mi hmuahhmuah ra uh, hinah tidai a um. Ra uh paisa a nei lomi pawl rawl ra lei uhla ei uh. Ra uh, sabit le cawhnawi ra lei uh; man loin nan ngah ding. Ziangahso rawl a si lomi hrangah paisa nan hman? Ziangahso pum puarter lomi thil hrangah nihlawh nan pek? I ngai uhla ka simmi vekin tuah uh; Rawl lakih a qhabikmi nan ei dingih nan nun a nuam ding,’” timi thu kan hmu thei.

Pathian ttongkam a si ih poisa lo ih um san men dingmi a si hrimhrim lo. Curuangah kan nunnak hrangah tthathnemnak zianghman a um lomi thil pawl cu kan hrial thei asile kan hrangah a qhazet ding. Cubang thil pawl cu kan hrangah tthathnemnak a um lo, siatsuahnak lawng an si ti kan thei ringring ah a ttha. Curuangah Jesuh Khrih sungah thleng-awknak taktak kan neih a ttul. Kan nun hi Jesuh Khrih ih ukmi taktak si a ttul. Kan sim zovekin kan san hi a hercak tuk. Kan tikcu caan hi theih lo karlak ah a herliam zutzo. Mah duhduh ih um men dingmi kan si lo. Kan nun hi in tlentu Khrih Jesuh thawn pehzom in kan um ringring lawngah san a man ringringmi kan si ding.

Ziangahtile a thleng awk rero mi hi kan leilungpi ah a nung rerotu kan si kona’n kan biakmi Pathian cu a thleng awk dah lo, kumkhua in a hmun a si. Hebru cangantu in, “Jesuh Khrih cu mizan, tuihsun le kumkhua in a hmun ringring a si” (Heb. 13:8) tiah a sim.. Saam cangantu in, “Sikhalsehla maw Bawipa, Nang cu kumkhua in siangpahrang na si.Sankhat hnu sankhat nang cu an lo thei ringring ding,” a ti (Saam 102:12). “Bawipa cu ziangtik hmanah a thleng awk dah lo”. Curuangah a thleng awk rero mi san ih kan nun daan ding a thupi bik cu kan nunnak a neitu Bawipa thei in amah sungah um ringring hi a si (2 Kor. 5:17-21).

Kan thilrit le kan zonzainak hmuahhmuah cu kan Bawipa Jesuh Khrih hnen ah qhum cio uhsi (Mat. 11:28-30). Ziangvekin san hi a thleng aw rero khal le Jesuh Khrih sungah cat loin kan um ringring ding a thupibik. Cumi cu a thleng aw rero mi san sungih kan nun daan ding a thupibik miangmo cu a si.

USA-FBCI Tu khaaltu Rev.Ci Lian Kap Thawn Camkhat

CT: A hmaisabik ah na suahkehnak khua le nahmin pum hlum in sim thei pei maw?

CLK: Kei cu Falam peng Thip Cang Khua ah ka suakih Falam khuapi ah ka thanglian. Ka hmin Cu: Ci Lian Kap a si.

CT: Fimthiam zirnak lam tla in sim thei in, innsang duhumzet na nei ti kan thei ih innsang nu ih hmin le fale pawl ih hmin teh in simsiang pei maw?

CLK: Fimthiam nak lam ahcun B.Th (Bachelor of Theology); M.Min (Master of Ministry; M.Div(Master of Divinity) ka zirsuak. Ka nupi cu Thawng Nei Kim(Naw Eh Phaw) a siih ka fapa Nathan Vanlian Kap (kum riat) le Olivia Parthasin Kap(kumkhat le hrek) tla an si.

Famkim Siarbet

Rinnak In

December 30
Tlawngkai Ninga

Rinnak In

Ziangahtile nannih tla cu Pathian zaangfahnak zarah zumnak in rundam nan si. Hih rundamnak cu nan ttuannak ruangih nan ngahmi a si lo, Pathian laksawng a si.
– Efesa 2:8

Bible Siar Ding: Hebru 11

Abel in Pathian a zum ruangah Pathian hnenih a pekmi raithawinak cu Kain ih raithawinak hnakin a ttha deuhmi a si (Hebru 11:4); Enoch kha thi loin Pathian hnenih cawiso a sinak cu a zumnak ruangah a si (c. 5); Noah kha hmailam thu ah Pathian in raalrinnak a pekmi a theihnak cu a zumnak ruangah a si. Pathian thu a ngai ih lawng a tuah ih cuih lawng sungah amah le a innsang himte in an luat (c. 7). Abraham cu Pathian in ka lo pe ding tiih a tiammi ram feh dingih kawh a si tikah Pathian duhnak a thlun theinak cu a zumnak ruangah a si. Khui tawk ram ah ka feh ding ti hman thei loin a khua le a ram cu a fehsan (c. 8).

Pathian ih hlawnthil zate co theinak lamzin pakhat te lawng a um, ih cumi cu zumnak (faith) hi a si. Jesuh in, “Na tuah theimi a si ahcun, na ti. A si! Zumnak neitu hrang ahcun ziang hmuahhmuah a cang thei a si,” a ti (Marka 9:23).

Innhram a simi Jesuh lungpacal parih inn kan sak lo ahcun kan nunnak ah tlaksamnak a um tengteng ding. Amah lawng hi lamzin umsun a si; Amah cu thutak a si; ih Amah cu nunnak a si (John 14:6). Cule in pekmi A Thu cu kan hrangah nunnak (life) a si. Pathian ih Nunak Ttongkam kan cosaan ahcun in nunter ding, lamzin in ong sak ding, in khatter ding, in cangvaiter dingih in thlengh ding. Cule cumi cun Pathian ih simmi zate parih Amen! kan ti theinak hmun ah in hruai thleng ding.

Vei tamzet thlacam in kan hrum kan ai ko ding, asinan Pathian hnen ihsin zianghman kan ngah lo tla a si thei; asinan ziangruangah kan dilmi kan ngah tile kan zumnak ruangah a si. Asinan a caancaan ahcun Pathian in caan reipi hrum le ai dingin in tuah, zumnak kan neih hlan ahcun.

Pathian hmaika ih na rat tikah na dilmi zate ka ngah ding a si ti’n zum aw. Na laak thei, na hmang thei, ziangahtile Pathian ih huham cu na rinnak ih na thulehnak sungih duhduh ih thiltitheinak a si. Himi zate hrangah Jesuh Khrih in Calvary Cross parah a man a pek thluh zo. Aw, Amah cu a nungmi Pathian a si, kan nunnak in thlengh theitu Pathian a si. “Bawipa cu Pathian a si kha hngilh hlah uh; Amah in in tuah ih Amah ih taa kan si; Kannih cu A minung kan si; A khalhmi tuurual kan si” (Saam 100:3).

Mikip cu anmai’ zumnak nei in an suak, asinan Pathian in zumnak maksak, Amah ih pekmi laksawng neitu dingah in ko.

@ Smith Wigglesworth

2011 Kum CT Mipi Hnen Ih Lungawithusimnak

Kum 2011, Christmas lungawi soparten nan rak hmang cio ding kan lo beisei. Kum 2012, kumpi cun ruahsannak thawn in rak hmuak ih aipuangzet in kum thar ni sunglawi kan lut thlang ding a si. Kum 7 lenglo ih upa Chinland Today hin kum cem zawngah lungawithusim ding tamzet a nei.

Ahmaisa in tuini tiang CT dam cahnak petu le in kilkhawisaktu Cung  Pathian hnenah lungawithu kan sim hmaisa duh a si. Cun, CT in sunsak ih ram kilkip ih in siarsaktu mipi zate hnenah lungawithu kan sim. Cuihlei ah CT ih fakselnak comment in petu pawl zate hnen khalah lungawi thu kan sim duh bet a si.

CT ih nitin manna, Pathian thuthangtha in ngansaktu Rev. Run Cung Mang (Malaysia LCF) pastor hnen khalah lungawinak simcawklo kan nei. Cun, Zarhtin thuthang in hlawmtu, CT kutkai ih hna a tuanpi Surbung Tlang Thuthang Chief Editor Pu Khuang Lian Sum hnen khalah lungawi thu kan sim.

CT palai pawl dilnak lengih thuthang a phunphun thawn in bawmtu ramsung ramleng ih kan rualpipawl hnen khalah lungawithu kan sim lo theilo a si. Cun, bulpak ih irawm suak cahram a phunphun in ngansaktu pawl hnenah le Biazai, Nunthuleng, Thufim, Capoh le a phunphun siar nuam thawn in bawmtu pawl hnen khalah lungawithu kan sim bet a si.

Mipi hrang hmalatu Chinland Today Media Group (CT palai pawl) zaten hi zuknung hmang in lungawithu kan lo sim a si. Nan umnak ram le hmun cio ah thlawsuah malsawm dawng in dam le cak ih nan um ding CT hin a lo duhsak zet fawn a si.

Chinland Today Media Group hin Chin mipi hrangah nasa sinsin in hmalaknak a nei vivo dingih mipi zaten nan thlacam saknak le sunsaknak kan tul ringring ding a si. Nitinten CT in ka lo hmuak! ih nan Comment fatebik in tumbik tiang kan lo sunsakzet a si ti khal lungawithusim phah in kan phuang duh bet a si. Comment ah CT hrang na duhsaknak le hmasawnnak dingih na ruahnak pawl khal phuhrungaw lo in na tarlang ringring fawn a si.

CT lungawithusimnak in rak ngaisaktu nan zate hnen ah kan lungawi.

Biazai : Phatsan Tu’i Annka

PHATSAN TU’I ANNKA

Hausum Fanu

Thennak biathu in hlan zan kha
Lungvai ruairawn ka lungaa theh
Ka zohmi thilhman hmufiang thei lawn
Ka ruahnak hman ee theifiang thei lo
Ka tap ruairo maw a cu’i zanah
Kan rak hmantlan mi caan duhnung pawl
Kan rak rem mi runinn mawite
Kan rak hlanawk mi dawtnak thu pawl
Thuanthu hlun ih cang men ding cu
Ka siang hrim lo ,duh ka khop hrih lo

Ziang tin so maw ka ti ding?
Ziang ka tuah le ka hnen na um thei ding?
Mah lawng ih ka thaisun caan hman ding
Ka ngam hrim lo,ka hreh duahdo
Ka lungthlitum na hnenah hlan in
Ka ruahsan mi nang na si kha
A lo tul bik tu kei leng nu hi
Ruat ve lawn maw in um san ding!!

Zangfah zoh tal in in zoh ta hnik
Ka mitthli ih ka lo sim hi run ngai ta hnik
Mangbang anhai ih a tap mi ka mitthmai run hmu ta hnik
Ziang thu ruangah kei i tan ta ding?
Bumawknak lawng in maw lai na rel
Phatsan awknak in na dung in tun
Na duhdawt mi in nikhat ni ah
Duhdah zet ih a lo tan leh tikah
Kei tuarnak hi theithiam leh in
Dawt tu’i lungthin bum hram nawn hlah

Tongkam khaa zet in fah zanah
Dunglet hoi ih na liam hnu cu
Kei hrang kumkhua thinnatnak ding
In thlen ter tu an rung cang ti hi
Veikhat te tal ruat ve kei maw
Nang phatsan tu in!!

Mi Nih An Ti-1

Mi Nih An Ti-1

Baw Boih(Saw Cung Zing)

1. Na um-nak ah um ve ka duh. A hlaat pi’n lo thang tthat ka duh lo. Don Moen
2. Na Huuham ih a kulh-mi Cabuai ah rawl ei ve ka duh. Na hnen ah i hruai ve aw. Don Moen
3. Ka sih-nak leh ka neih-mi hmuah thawn na hmai ah ka kuun. Don Moen
4. Ka ruahsan-nak, ka tumtah-nak, ka thin-lung leh ka baan pharh in ka nun-nak ka lo ap. Don Moen
5. Tuih suun cu peng thawngkhat hnak in tla na hlaat sawn vek in ka thei. Hmaan te’n ti le thlacam ding hman tla har ka ti. Don Moen
6. Ka hrang ih na ret mi Ruah-nak leh Tumtah-nak pawl cu hmuh thei a har, Bawipa. A si na’n ka zum-nak na sung ah ka ret ding. Don Moen
7. Kan thin dam ter aw. Kan kut thian ter aw. Don Moen
8. Mi thiang-hlim pawl,. . . . kan Cahnak kan Pathian kha lungawi te’n thang tthat cio uh. Don Moen
9. Ruah-nak tuumpi na nei lo le ruah man a um lo. Rin nak na nei lo le zum man a um lo. Justin Bieber
10. I huat-tu pawl hrang ah tthat-nak ka lo duh sak hngai. In thlaak thei cuang lo. Zing ka thawh tin te’n caan ttha leh rualpi ttha pawl hrang ah ka lung a awi. Justin Bieber
11. ”Na thin-lung zaa te’n na pek le na tuah thei thluh” tih ka lo theih ter duh. Justin Bieber
12. Ka thlarau dai te’n um aw. Na phurh-rit tthum aw. Na hna-ttuan cawl aw. Don Moen
13. Na thin ban-nak, na thin nat-nak cawl in ”Daih-nak” ah thar thawh thlang aw. Don Moen
14. A zaangfah-nak tiva sung-ah phuum awk aw. A baan in a lo pom. Cawl thlang aw. Don Moen
15. Ral hraang in ttih-nung hman seh Pathian aw-neem ngai aw.Don Moen
16. Ka thlarau, na thei maw? A thok teih sin Pathian na lam-ah a ttang tih. Don Moen
17. Ka thlarau, ttih hlah! Pathian par-ah ruah san-nak ret aw. A Dingfel-nak leh a Huu-ham in lam a lo hruai ding. Don Moen
18. Paih thin-lung tong-tu sih ka duh. Donn Edwards
19. Thang tthat-nak thli a hrang. Donn Edwards
20. Tang dor-nak in ka thok. Donn Edwards

« Previous Page — Next Page »