Pathian ih Khuakhannak a Tthabik

HAPPY NEW YEAR TO YOU ALL

January 1, 2012
Nipi Ni

Pathian ih Khuakhan a Thabik

Van khi leilung hnakih a saan bangtuk in ka ruahnak le ka lamzin cu nan ruahnak le nan lamzin hnakin a saang sawn a si.
- Isaiah 55;9

Bible Siar Ding: Seemtirnak 28:10-22

Kan thlarau nun khualtlawnnak vun thlir saal sehla, caan tampi kamahte kan duhmi lamzin kan thlun caan a um ti kan hmu ding. Kanmai’ lam a net tikah Pathian ih control caan hram a thok. Ca Thianghlim in hiti’n in sut, “Lungkim tlang loin mi pahnih hmunkhat ah khual an tlawng tlang thei maw?” (Amos 3:3). Pathian ih kilvennak lo cun a nasami thutak sungah kan lut thei lo ding, “thii le sa ih tuahmi cun Pathian uknak a co thei lo ding; cule a thi theimi in a thi thei lomi cu a co thei lo ding” (1 Korin 15:50).

Jacob timi hmin ih sullam cu “thlenghtu asilole ai-rawltu” tican a si. Jacob in amai’ khuakhannak ih a net tawpkhawk a thlen tikah, Pathian in a hrangah khuakhannak tthasawn a neih sak. Lamzin tthasawn a um a si timi hi kan va hmu fung thei ve!

Sunlawinak cu khuaruahhar le mangbangza a si dah lo, bawmtu nei lo dinhmun kan sinak kan theih awk, kan raalnaam kan thlak tik, le Pathian hnenih kan ap awk ahcun. Jacob hi hnattuan taima le milawzet a si, ih ziangtluk harsatnak hman tong khal sehla amai’ tidaan te’n a pahtlang ringring. Caan tampi ah amai’ tidaan te a nei ringring ih Pathian ih a hrangah a sunglawizetmi khuakhannak a neihsakmi a thei ta riai lo ee.

Pathian in khuakhannak pakhat kan ruah theih baanmi ih leengah a nei ringring a si. Mi pakhat cio ih nunnak hrangah tumtahnak a nei. Kanmahte khuakhannak kan neih asile cuih khuakhannak nasabik cu kan tthelh a si. A liamciami cu atu caan thawn ziangti hmanin a bang thei lo, ih atu caan khal a ralai dingmi thaizing caan thawn an bang aw thei fawn lo. Bawipa ih tleunak sungah kan um a si ahcun kan thaisun caan cu a thianghlimmi ruahsannak in a khat ding. Pathian in a minung pawl cu leitlun mi zaraan vualvo vek fang si dingah in duhsak lo. Amai’ vanlam huham kengin, Cross le sui lukhum theithiam in A hrangah mei-alh bangih hlio vutvo ding hi a si sawn.

Jacob le a nu cun fa upa sinak ro (birthright) le thluasuah (blessing) co ngah dingin khua an khang nasa, asinan Pathian in Jacob hrangah vancungmi le van kainak lilawn sawn khua a khan sak ti kan hmu. Amahte a tawlrel awklai ah ziang thil ttha hman a suak lo, Pathian in a hrangah a dikmi hmun a hmu cia sawn a si. Amai’ khuakhannak ah upat tlak a um lo, asinan Bethel ahcun Pathian a hnenih a um kha a hmu a si.

A ttha, a tthasawn timi a um, asinan Pathian cu a tthabik, a saangbik a thei, kanmai’ khuakhannak a si lo.

@ Smith Wigglesworth

Rual Duh Ruat Hnik Law!

RUALDUH RUATHNIK LAW!

Liamcia caan ih kan tuah kan tuan
kan cangvaihnak,
Kan mi kan zia langfiang tertu;
Tesinfa ih an rel dingmi,
Kan thuanthu…

A ralai ding kan hmailam caan,
Khui zin zawh in ziang dinhmun ah
ziang kan cang ding;
Theih cia um lo,
Thuthup hlir…

Kan hrang thabik tu’ih kan nunnak,
Duhbang hman theih;
Sunglawi caan tha,
Zangfahnak laksawng kan dong cio.

Rualduh ruat hnik law,
Cuih caan tawite;
Na hman daan ziangvek a si?

Kum Hlun Mangtha

Kum Hlun Mangtha

 

Cung Pathian zaangfahnak le

A lam hruainak thawng in

Kum hlun cu liam in

Kum thar kan thleng zo

 

Duhnung lo nundan hmuah le

Sualnak ka rak tuah mi

Kumhlun in liampi sehlaw

Mual dang ah

 

Kumhlun zamual liam hnu

Khir tumin ai hram hman ning

Kawhkir sal a thei nawn si lo

Siang lo cingten’ thlahliam ko ning 2011

 

Kumhlun maw mangtha

Nunhlun mangtha

Ka ngai nawn lo ding kum hlun

Duhnung kumthar ah

Nun thar,ruahnak thar thawn

Ka nung thlang ding

Kum hlun mangtha

 

Salai Lal Biak Luai @ Luaite

American Milian George Soros in Aung San Suh Kyi Tawng Ding

American milian George Soros cu January 2 ah Aung San Suh Kyi thawn tawnawk an nei ding.

Mr. George Soros cu amai vanzam le a fale pahnih thawn December 26 ah ni 8 sung cam dingin Kawlram a tlawng. Kawlram acozah a tawng ding ti khal thuhla a um nan theihfeng a si hrih lo.

Hungary ih a piang mi American milian Mr George Soros hi kum 81 ih upa a siih 1993 ah Open Society Institute (OSI) pawlkawmpi rak dinsuahtu a si.

Asia| Euro | le Africa pawl le ram 70 lai ah zung (Office) a ret darh vivoih US$8000 million a bawm tiin OSI pawl cun an sim. Kawlram zanlennak kheltu pawl hrang khalah kum tin thawngza tel bawmnak a nei. OSI foundation Burma Project |fimthiamnak | harhdamnak | ramkelhnak pawl ih cangvaitu pawl khal bawmnak a nei.

— Irrawaddy

Remdaihnak Dingah CNF Cun Mipi Hnenah Thlacamnak Dil

Kawlram sungah kum 60 lenglo doawknak pawl cu hnangamdihanak le zalennak hrangah tiin CNF pawl cun ramleng um mi siseh ramsung um mi siseh Chin miphun zate hnenah thlacam bawmnak an dil.

“Ka pumpak in ram daihnak hrangah zantin thla ka cam theu” tiin ramsung um Gospel Baptist Church pastor pakhat cun a sim.

CNF pawl le Chinram acozah pawl cu a ra lai dingmi January 5-6 ah Hakha khawpi ah tawnawknak nei in thurelkhawmnak an nei ding.

Himi an tawnawknak dingah CNF lamin Dr.Sui Khar in a ho dingih acozah lamin ralbawi Zawm Min in a ho ding.

– Khonumthung

India Um Chin Mi Beunakhawl Palai Pawl In Manipur MP Tawng

Uk Lian & Van Bawi Lian

CT Media Groups | 31 December

New Delhi : Manipur MP Thang So Baite cu Delhi Chin Communities Fellowship (DCCF) palai pawl in 28 December 2011 ah New Delhi ih a umnak inn ah va leng in thurelpinak an nei. DCCF palai  Salai Lal Sawi Ceu, Salai Khoi Tuang (David), Pu Tin Duh Thang, Salai Lal Ram Muana le Pu La Voe pawl hin MP Thang So Baihte hi zinglam sml 9:00 zl ihsin 10:30 zl tiang thurelpinak an nei.

Famkim Siarbet

Falam – Leilet Moto Zin Cek Thok A Si Zo

Falam Thuthang |28 December

Coverment Ministry of Environmental Conservation on Forestry Central Miniter U Win Tun ih Lairam farah zonzai bawmnak khua te zin Falam-Tal- Leilet mortor zin cu, Myatnothu Company Cultivator tank pi thawn Taal khua kiang Kalay in peng 96.3, Falam in peng 16.3 zin pial in 28-12-2011 in an tuan thok zo.

Famkim Siarbet

Kumhlun & Kumthar – Rev. Ro Khar Thang (Rtd)

Sermon Thupi: KUMHLUN  LE   KUMTHAR by  Rev.  Ro Khar Thang (Rtd)

Text: Danpek.32 :7. “A cem ciami tikcu khi vun ruat sal hnik uh. Hlanlaipi ih tikcu can kha. Nan pa sut uhla a lo sim ding, nan patar pawl dil uhla an phuang ding”.

Thuhmai : Moses cu a thi zik thlang ih Moab phairawn ah Israel miphun pawl hnen ah thu a cah ta. Ralrinnak a pek. A liamzo mi an san kha ziangvekin a cemral zo ti mi an zoh sal hnu lawngah a tang lai mi an hmai lam can kha an hmang thiam ding.

1. A liamral zo mi kum pawl kan vun ruat sal ding.

*Israel pawl in kum 40 sung ih Pathian in a hruai le a um pitnak ( a zangfahnak) an vun zohsal lawngah a thatnak le a siatnak a vun hmu  thei.  Cu bangin zokhalin mah le kan tikcu fehliam zo mi kan vun zohsal ciau hnik pei. Nitinte ziangvekin na can na rak hmang ve?

*An rualpi, an kom mi pawl an vun zohsal tikah Joshua le Caleb lawnglawng an taang thlang. Kan rualpi, kan hmel theih tampi  cu thlanmual an liam thluh ve zo. Tuisun ah, ziangruangah kei hi ka rak nung lai? Ti mi  hi thaten ruat  ve aw!

2. A tanglai mi hmailam hrangih timtuahnak.

A rah lo mi theipi kung:   (Luka. 13: 6-9).

*Hau mai aw, ti ah hmuan neitu in thu a pek.  Israel pawl kha Pathian ih kilvennak cotu an sinan thaten an nung duh lo ruangah  tlaksiatnak an tong.

- Hmuan kiltu in theipi kung cu kum 3 sung a tuamhlawm  ih rahsuah thei dinhmun ah a um zo.

- Asinan a rah hmuh ding a um cuang lo.  Rah a rah mi lawng kha kan duh mi a si. (Gal. 5:22) Thlarau rah a rahtu Pathian in a hmu duh.

*Leiram a pam lak men, hau mai aw; ti mi kan si lonak dingah kan timtuah a cu zo.

3.   Duhdawt lainattu ih dilnak tongkam : Tui kum khatte um hrih seh, i hngak hrih aw.

*  Leilung ka coklet hrih ding (Isaiah. 5:2) Lungto hrawl pawl ka hlon thluh ding. “Zumnak, ruahsannak, duhdawtnak ih a hrampi pawl dawnkhamtu a tam tuk ih rah a suah thei theu lo. Coklet a tul ringring.

*  Caw ek dawm le leitha ka vur (burh) hrih ding. Thlarau thazang pekin a tulsam mi ka bawm ta hrih ding.

*  A rah thei thlang men ding. Khrih ih hngah mi le ruahsan mi cu, cumi a si. (Heb. 6: 7-8)

Thu netnak: A liam ral zo mi kum pawl kan vun ruat sal pei. Kanmah pawl hi “ kumkhat te um hrih seh” in ti tu Bawi Khrih kan Pathian ih tumtah le ruahsannak kim tertu si kan tum ciau pei.  Amen.

Pathian thawn Nung tlang

December 31
Zarhte Ni

Pathian thawn Nung tlang

Cuhnakin Pathian Uknak le A felnak hawl hmaisa sawn uhla thil dang hmuahhmuah cu a lo pek bet ding a si. – Matt. 6:33

Bible Siar Ding: 2 Peter 1

Kan zumnak tthangcak thei lo ko a dawnkhamtu thil pakhat cu emcaakmi vekin a naami thinlung khuaruahnak hi a si. Thlarau nun tel loin thluak lawng ih khuaruahnak a um ih, cule Pathian ih umpinak ah thlarau nun a ong awzetmi khuaruahnak a um ve, cumi cun leitlun ih thil fatebik kha Pathian hnenah a fehpi. Kan ttulmi cu Pathian duhmi thawn a mil awmi thil kha sia le ttha thleidan thiamnak thawih hril thiam ding hi a si.

Kan nunnak ah Pathian thawn kan pehzom awknak hnaihnok theitu le kan zumnak vaivuanter theitu thil pakhat hman lut thei lo ding in kan kham a ttul. Sia le ttha thleidan theinak khuaruah felfai le rinnak takthak thawn Pathian hmaika ih kan thlen ahcun kan thinlung in in mawhthluk lo ding ih Pathan fa kan sinak ah rin-awknak (confidence) kan nei ding (1 John 3:21), “A hnen ihsin kan dilmi pohpoh kan ngah, ziangahtile a thupekmi kan thlun ih a lungawimi kan tuah ruangah a si” (c. 22).

Thuthangtha Marka 11:24 ah, “Curuangah hiti in ka lo sim: thla nan cam ih thil pakhatkhat nan dil tikah ka ngah zo ti’n zum uhla nan dilmi hmuahhmuah cu nan ngah ko ding,” ti’n kan hmu. Caang 23 cun tlang pawl hman umhmun tthawnter thei tiangin huham an nei ding a ti. Pathian kan theih taktak a ttul ih Pathian thawn pehtlaih awknak thukzet kan neih a tul. Pathian ih huham thawn kan khah a ttul. Pathian ih in duhnak kan theih hnu lawngah a duhnak thawn mil aw in thla kan cam thei ding a si.

Jesuh Khrih ih dingnak na ttawm zo ruangah a sunglawimi zumnak (precious faith) cu na sungah a nung a si. Cumi cun zianghman ttihmi nei loin raalthazet in a lo nunter ding. Pathian in ttihmi nei lo dungthluntu pawl a duh ce timi hi ciing ringring aw. Hih zumnak cu ziangti’n kan co thei ding? Nangmai’ ruahnak kha hlon awla Pathian ih ruahnak a simi Pathian Thu kha laak in nunpi aw. Na suangtuahnak (imigination) parih na tthum awk asile na palh ding. Pathian Thu na nei, cumi a tawk a si.

Pathian Ttongkam cun mi pakhat ih nunnak kha a thlengh thei taktak ih “Khrih ih cakuat” ah a canter thei a si (2 Korin 3:3). Bible in a thinlung khurkhua ruahnak a thlengh sak, a mizia a thlengh sak, ih zaangfahnak ihsin zaangfahnak sungah a thlenter, Pathian ih mizia kengtu le rocotertu ah a tuah a si. Pathian cu an thinluhng sangka ong in Thlarau a co ih thawtkhum mi sinak a neitu pawl nunnak sungah a ra luhhnawh, a ceencilh, a umpi, thu a ruah, ih amah thawn rawl a ei tlang a si.

Ruahnak, cangvaihnak, le thil pakhat in Pathian na pawlkomnak lo hnaihnok hlah seh! Caan tinte hi thianghlim teih nunnak ah canter aw.

@ Smith Wigglesworth

April 1, 2012 Ah Karlak Hrilawknak (Ciaphit) Nei Ding

BBC | 31 December

Kawlramkarlak hrilawknak cu April 1,2012 ah nei dingah Yangon ramthen hrilawknak tuanvo neitu U Ko Ko in a sim. Cuihlei ah Kawlram pumpi hrilawknak tuanvo neitu khal in kawlram TV ihsin phunsuahnak an nei zo.

Himi thuthannak an neih ihsin thlakhat sungah hrilawknak ih tel dingmi palai (kusale) pawl ih hmin khal pek ding a si. 2010 ih ram pumpi hril awknak ah NLD in duh lo nak langter in hril awknak ah an tel duh lo. Hmansehla tu ahcun 2008 hril awknak dan an thleng sal ruangah tuitum ih laklawh hril awknak ah tel dingin an lungkim. NLD in hmunlawng hmuahhmuah ah candidate aw dingah an tum. Himi hril awknak ah NLD le Ciankhaingzi party pa 2 in nasaten zuamawknak an nei ding tiah zum a si.

Thupi: Harsat/Tuarnak ( Ps 31: 9)

Tuarnak ( Ps  31: 9)     By Pastor: Henry SuiThan Hrang ( Henry S)

1. 1. Harsat kan tuar cio.
2. a. Harsatnak a ra ding ( 1 Cor 4:12-13)
3. b. A mah ah Zumnak hram taktak kan neih ahcun harsatnak pahtlang a awlte/a har lo.

( Lam 3:22-23)

1. c. Harsatnak Kan tuar reilo/ Rei lo te sung lawng an si.(Rom 8:18)
2. d. Pathian in kan tuar thei lomi in tuarter lo. ( 1 Cor 10:13)

1. 2. Ziang ruangah harsatnak kan tuar.
   1. a. Hasat tuar kan tul ( 1 Pet 1:6)
   2. b. Pathian  kan naih sinsin nak dingah.( Ps 119:67)
   3. c. Kan zumnak a langter. ( John 6:5-6,Ps 26:2)
   4. d. Zumnak/Thlarau lam ah in tthang lianter.(2 Cor 12:9)
   5. e. Tuarnak cun nunthian hlimnak a suahter.( Prov.25:4, Heb 12:11).
   6. f. Harsatnak cun Jesu’ tuarnak in hmuhter.( Heb 4:15).
   7. g. Mi dang tuarpi theinak in neihter .(2 Cor 1:3-4)
   8. h. Harsatnak kan tuarnak ihsin Pathian caknak a in theihter.(2 Cor 12:7-10)
2. 3. Harast zawnzaih kan tuar tikah ziangtin thazaang kan la ding.
   1. a. Hasatnak  thimkhawzing sung ihsin zir ding kan si.
   2. b. Pathian  khawkhan miah thum aw thiam  ding kan si.
   3. c. Rin umnak hripi kai hnget ding kan si   . ( Heb 12:1).
   4. d. A mah rinsan nak lamah zir sinsin ding kan si.( Ps 34:19)
   5. e. Thlacam ih tan la sinsin ding kan si.( James 5:13).
   6. f. Harsat nak thim khawzingpi inkulh can khal ah lungawi ringring ding kan si. ( James 1:2)
   7. g. Pathian lawng kan rinsan a tul. ( Jer 29:11, 1)
   8. h.

Nitin harsatnak le vanduai nak lakah himi  Bibal bung cang te siarnak ihsin thazaang rak lave dingah ka lo sawm hai!!

 

Kawlram Thawngtla Pawl Kumthar Ah Suahsal Ding

AFP |30 December 2011

Kawlram acozah cun rampi thlengawknak tuah in, ram dang hruaitu pawl an hip theinak dingah tuahthleng awknak nasa zet a tuah rero. Cui a tuahthlengawknak thawn pehpar in January 4 leh February 12 ah thawngtla mi ziangmaw tizat suahsal an si ding thu Kawlram rorel inn hnuaita ih roreltu pakhat cun a sim.

Famkim Siarbet

Next Page »