‘BIK’ Hrekkhat Pawl – Tleu-te

‘BIK’ hrekkhat pawl

1. Kumkhat sungih raaltlan (Refugee) nei tambik ram          Pakistan (1.8 Mil, 2008)
2. Khualtlawng phur tambik Airline                            Delta Airline (108.6 Mil, 2009)
3. Hmangtu tambik Social Networking Website        Facebook
4. Hmangtu tambik Search Engine                             Google
5. US ih kumkhat sung Mawtaw zuar tambik
Passanger Car                         Toyota Camry (473,108  2007)
Truck                                       Ford F-Series  (633,949  2007)
(2007 hi US sungih mawtaw zuar suak tambik kum a si.)
6. US Bank Company tumbik                                      Bank of America
7.  Nuclear Energy hmang tambik ram                      Lithuania (An ram sungih Electricity                                                                                     76.2% cu Nuclear cahnak an hmang)
8. Digital Music Dics zuarsuak tambik kum               2004 (12,345.0 Mil)
9. US sungih kuakfawp  tambik kum                           1985 (Mipum 38.7% in kuak an fawp)
10. Harhdamnak hrangih sumpai hmang tambik      USA (A pahnihnak France a si ih US                                                                                        in a letin a hleih)
11.  Tax pek tamnak bik ram                                      Belgium (sumlut 41.5% cu Tax an pe)
12.  Tourist lut tambik ram                                         France (A pahnihnak USA)
13. Cellphone hmang tambik                                     Saudi Arabia (Minung 100 in                                                                                                  Cellphone 174.43 tluk an nei)
14.  Khualtlawng tambik Airport                                London Heathrow
(A pahnihnak Beijing Capital)
2011 ih Airport thabik hrilmi                                HongKong International Airport
(A pahnihnak- Singapore Int’ Airport)
15.  Mawtaw tuah tambik                                          China (18,264,667   2010)
16. Music Album zuar tambik                                                 Thriller,Micheal Jackson 29 MilCopies
Eagles, Greatest Hits 29 Mil copies
17. US ih Newspaper khawng tambik mi                    The Wall Street Journal
US ih Magazine khawng tambik mi                     AARP Magazine
18.  US sungah hnam zoh in sum lalut tambik           Asian
19. 2010 ih Stock Market sangbik ram                       Germany (352.7 June 1)
20.  Vanzam tla tambik kum                                       1988, 1989 (Vei 29 veve)
21. Element hmuh hmaisabik pawl                            Silver, Zinc, Lead, Iron, Gold le                                                                       Copper pawl an si ih 2000 BC hlanih hmuh mi an si
22. Element hmuh netabik cu                         Ununseptium 2010
23. Ramsa tlancakbik                                      Tlavang (Cheetah) (70 mph)
24. Thlisia le Tisuar nasabik                           Bangladesh 1970 (300,000 an thi)
25. Tilik rapthlak bik                                       China 1931 (3,700,000 an thi)
26. Linghnin nasabik                                       China 1556 (830,000 an thi)
27. Thil puak nasabik                                      India, Chemical plant Explosion 1984
(3849 an thi, 50,000 hrawng hliam tuar)
28. Paam (Famine) nasabik                            Africa 1984 (800,000-1mil an thi)
29. Natnak nasabik                                         Worldwide 1918 Flu (Leitlun minung then                                                                             thum then khat in an tuar, 20 mil an thi)
30. Number tambik                                         Centillion (Zero 600 a um)
31. 2010 ih Website zoh tambik                     Google Sites (Youtube, Blogger)
EMail hman tambik                            Yahoo!Mail
32. US President lakih sansaubik                    Gerald R. Ford (kum 93 thla 5)

33. US President lakih fa nei tambik              William H. Harrison (Fapa 6/ fanu 4 )
34. US President lakih sangbik                        Abraham Lincoln (6′ 4″)
35. US Pres. White House lut hmaisabik        John Adam, 1800
36. US Pres. suah tamnak bik State                Virginia ( President
37. US Press. lakih Telephone hmang hmaisabik       Rutherford Hayes, 1879
38. US Pres. TV ih lang hmaisabik                  Franklin D. Roosevelt, 1939
39. US Pres. Internet Chat hmang hmaisabik-Bill Clinton, 1999
40. Kum 1950 – 2000 tiang Mirang First Names Larbik (mipa)         Micheal
Kum 2000 –                                                                                   Jacob
41. Mirang Last Names larbik                                    Smith
42. US ih Cabu Printed hmaisabik                              Bay Psalm Book ,1640
43. Leitlun hmun tinkim ih lamzin kap hlasak
kutdawh pawlih thiam bikmi hla                    Standby Me
Laknak:  The World Almanac And Book of Facts 2011

Ka lo bet:
1. 1925 hlan US ram sungah Public mi Mawtaw nei an um lo.
2. US ram sungah Naute rawl hnakin Zawhte rawl an zuar suak tam sawn.
3. Washington DC le Yangon cu peng  8610.8 (Air distance) a hla.
4. US ah 1857 tiang tangka pia hrek (Half Cent) an hmang.
5. Kawlram Paisa thleng (Official Rate) cu    1 US$ = 6.51 Kyats a si.
6. 1810 ah US ram sung um  then sarih ih then khat cu Sal an si.

Thutheih duh tteu tteu tu-

Tleu-te

‘Hrilawknak Nehtu Center Committee’ NLD In Din!

Daw Aung San Su Kyi hoha mi “National Democracy Party (NLD) Centre Nehtu Committee” cu minung11 sungtel in tuisun ih an dinsuah thu thuthang kan dawng.

“NLD Committee” sungah hlanih Center hohatu; U Tin Uu, Daw Aung San Su Kyi, U Win Tin, U Tan Htun, U Hla Phe, U Ngunt Way, U Uung Kyaing, U Nyian Winn, U Winn Myint, U Han Ta Myint, Dr. Daw May Winn Myint pawl thawn dinkhawm a siih, President U Aung Shwe, U Lyuin, U Lunn Ttin pawl cu an upa tuk zo ih an hriselnak a tthat tuk ruangah an tel thei lo thu Party thusimtu, U Uung Kyaing in a sim.

“Thungaithlak in hna kan ttuan thawk thlang ding! A rei hlanah ramtin, khawtin, vengtinkim ah ‘Hrilawknak Nehtu Center Committee (NLD) Party’  cu dinsuah vivo thei khal kan tumtah a si” tiah U Uung Kyaing cun a rel bet.

Cun, kan dung kar tlawngkai ni 5 sun ahkhan Daw Aung San Su Kyi cu Kawlram hlasakthiam le phuah thiam 50 lenglo thawn tawngaw khawm in ‘Hrilawknak (NLD) Party’ hrang hla phuah ih sak ding in an titi khawm. Cubetah, zuknung lam ih cangtu pawl thawn a ra ding mi December ni 3 sun ih tawngaw leh ding in timlamnak a um. ‘NLD Party’ lam ihsin hrilawknak ih tel ding in timtuahnak an nei rero ko nan ‘Acozah Hrilawknak Commission’ lam ihsi cun ziangtik ni/caan ah tuah a si ding ti cu than a si hrih lo.

Pyituhhlutdaw President, Tu Ra Uu Shwe Mann cun kan dung zarh tlawngkai ni 5 ih thuzingzawitu(media) pawl thawn an tawnawknak ah hrilawknak cu a ra ding mi thla3 sungah tuah a si thei a zumum lo thu Weekly Eleven Internet Thuthang Cahmai ah tarlan a si. Cubetah Daw Aung San Su Kyi hi “Pyituhhlutdaw Palai sinak in a tel ve ding a si ahcun Pyituhhlutdaw President pakhat dinhmun in lungawi sopar te’n ka hmuak a si ti’n Tu Ra U Shwe Mann cun a sim” tiah a ngan tel bet.

Irrawaddy

Aw ih Hruai sualnak (Part three)

November 29
Tlawngkai Nihnih

Aw ih Hruai sualnak
Part Three

Ka duhdawt mi tla thlarau ka nei a titu poh va zum hlah uh. An neihmi thlarau cu Pathian hnen ihsin a rami a si maw si lo tiah hniksak hmaisa uh.
– 1 John 4:1

Bible Siar Ding: Saam 115

Kan nu thawn cuih unau hnih te cu zung an ttum hnu ah an inn ah kan va leeng. An buainak cu kan va hmu. A dinhmun a ttha nawn lo. Mizia mawi lozet ih a um cun Khawsia thlarau ti a fiang mai. Bible kau awla cuih aw cu Satan aw a si ti’n na nemhnget thei ko ding. Pathian Thu cun tleunak a suahter. Cuih tleunak cu ka hman a ttul, ka hmuh a ttul ih ka neih a ttul.

Zumtu cu fimvar tein kan um a ttul, ziangahtile Thlarau Thianghlim baptism cotu kan si. Pathian fa kan si kan ti awk asile mipawl ih in theihthiam theinak dingah Pathian fahniang bangin nung ding kan si (Tirh. 4:13). Bible in, “Thil ttha tiih na ruahmi kha hminsiatnak phurtu ah canter hlah,” a ti (Rom 14:16).

Cuih nunau nu cu ziang a cang? Raapthlakza aw in a celh lo ding khop in a au. Ziangmi thlarau a si pei, cekfel aw. Pathian cun cuvek in hna a ttuan dah kel lo. Na ruah thei lomi le na uk thei lomi thlarau a lo pe lo ding. Cuti ih a buai tikah khawsia in, “Hih thuthup hi zohman sim hlah, na nau nu lawng sim aw, amah lawngin a lo theithiam ding,” a ti. Cuticun anmah pahnih lawngin an thei. Cumi cu khawsia hnattuan daan a si ti na fiang ko ding, ziangahtile thudik le a thu thianghlim cu thup rero a ttul lo, tlang-aupi dingah Pathian in a duh.

Kan nupa in cu nu cu bom thei kan zuam rero nain kan danglamter thei cuang lo. Nunau nu cun, “Pathian in i sim!” a ti. Khawsia cun a sim bet vingvo, “Na nau nu siar lo midang sim hrimhrim hlah. Tlangleng station ah va feh awla tlangleng rak hngak aw. Tlangleng cu nazi 7 le minit 32 ah a ra thleng ding. Glasgow fehnak ticket lei awla na kut ah pia ruk a taang ding,” ti’n.

Tlangleng cu a ra. An pahnih in tlangleng khatlam in khatlam ah an tlan an zuang. Tlangleng ahcun mi zohman an um lo. Cutikah aw thawm cu a ra thleng saal, “Khatlam platform ah, a neta tlangleeng ah a si ding,” ti’n. Cule annih cu cutawk ahcun an va tlan ciamco lala. Zianghman a um cuang thotho lo. Cuti’n nazi pakua le khuai tiang zianghman si cuca loin an buai rero.

Mi pakhat in amai’ thutitluknak par lawngih a din tum tikah Pathian khuakhannak ihsin a pial a si.

@Smith Wigglesworth

KIA le Kawlram Acozah Palai Tuluk Ram Ah An Tawngaw Ding!

KIA Kachin Independent Army le Kawlram acozah palai cu a ra ding mi kar sung (Nov.29) ah Tuluk Ram, ShweLi khua ah tawngaw ih thu rel tlang dingin khawkhan a si thu “KIA Hotu U Kun Maw” in BBC ah a simthei.

Tawnawk ding can le minung(palai) ziangzat tel ding timi cu relkhawm lai a si ruangah tlawngkai nikhat sun(Monday) lawngah thufiang relcat thei ding a si thu sim phahin, hlanpi ihsin Tuluk ram ih tawngaw ding in tawlrel a rak si dah zo  thu, tukhal hi Kachin ram sungih ral a buai natsat tuk ruangah pehtlaihawknak, feh suksonak a remcang sawn ti’n Tuluk ram kherkher an hril a si thu khal KIA  Hotu U Kun Maw cun a simthei bet!

Raldoawknak Kachin ram sungah a thleng rero ko nan tawnawk khawmnak cu puitlin tengteng ding tiah a rel. Tu, Kawlram ramkhelhnak dinhmun thawn pehpar aw in “KIA Hotu U Kun Maw” cun “Kawlram acozah thar cu thleng aw ding in an zuam rero lawng a si lai” ti’n a hmuh dan BBC ah a sim bet!

BBC News

Kawlram : Hrilawknak Tthulh A Si

Kawlram in hrilawknak a neih tum rero mi cu tthulh a si thu le hnakum 2012 lawngah hrilawknak a um ding thu parliament ukatthah in a rel.

Kawlram cun tu kum 2011 ih hrilawknak neih a tum mi cu daan vek in hrilawknak ni a kim hlan thla thlathum ah theihter ding a si ih mipi le hrilawknak ih tel ding mi party pawl theihter an si lo ruangah hivek ih tthulh a si thu parliament ukatthah, Tu-Rah-U-Shew-Man in thuthanglatu pawl hnenah a sim.

U Shew Man cun November 25 ah thuthanglatu pawl kawmnak a nei ih Kawlram in ziangruangah hrilawknak hi a tuah lo ding ti simfiangnak a nei. Hi thuthanglatu pawl kawmnak a neih mi ah ramsung thuthanglatu lawng silo in ramleng ihsin khal in thuthanglatu pawl an telve ih thuthanglatu 30 lenglo an tel thu khal a hmun ih teltu Kawlram thuthanglatu pakhat in a rel.

“Daan vek a si ah cun hrilawk ni a kim hlan a mal bik thlathum tal ah hrilawknak tuah ding ni cu mipi le hrilawknak ih tel ding party pawl theih ter ding a si ih asinan tu dihmun ah cun theihter an si lo ruangah tu kum sungah hirlawknak hi neih theih a si lo ding.”tiah U Shew Man cun a rel. Suu Kyi hrilawknak ih a tel ding thuthawn pehparaw in thuthanglatu pakhat in thusuhnak a tuah mi khal, “ Suu Kyi cun Pyitu hluatdaw ah khal si seh Amyota hluatdaw ah khal siseh a lut duhnaknak ah a lut ding cu a si. Kan nih Pyitu hluatdaw cun Pi Su Kyi cu ziang tik lai khal ah lungawi sopar te’n kan hmuak ding ih ukatthah dinhmun khal in le bulpak in lungawi sopar te’n ka hmuak ding”tiah a rel bet.

Cuhleiah thuthanglatu pawl cun ramthukhel ruangih thawngtla pawl cu suah an si thluh ding le ding lo thusuhnak an neih mi khal U Shew Man cun ramkhelruang ih tang an si ih thubuai dang nei an si lo ah cun cozah in an thu cu a bik in a ngaihtuahsak ding thu le parliament cun thawngtla pawl suah an si theinak ding ah an ti thei tawk hmuahhmuah an ti zo thu khal a rel. Cutiasiruangah, thawngthla pawl khal suah an si beiseinak eng a um ih Kawlram cun hmasawnak a nei vivo ti khal a lang a si.

Thuthanglatu pawl cun Kawlram ih US secretary of State, Hillary Clinton a rat ding thu thawn pehparaw in thusuhnak an tuah mi khal ah phurzet in, “Kawlram le US hi kum reipi sung zawmawknak tthittha kan rak nei thei lo ih cuhleiah US le Kawlram lakah a bik ih  ruatmi palai khal an um lo ruangah buainak khal tampi a suak ttheu. Asinan, tuah cun US sawn rori in palai an rawn thlah mi hi Kawlram hruaitu pawl thawn kawmawknak an nei ih an kawmawknak a tluang a si ah cun Kawlram in beiseinak a nei in Kawlram mipi hrang lawg siloin leitlun ram dangdang pawl hrangah khal hmual a nei in tthatnak tampi a rahsuahpi ding a si”tiah a let.

U Shew Man cun Tan Shew in political party ah telnak le buaipimi a neih nawn lo thu le Kawlram cun dunglet hawi ttul nawn lo ih hmalam pan vivo ding mi rampi a si thu khal a rel bet.

VOA

THEIHTHIAM A HAR

THEIHTHIAM A HAR

Salai Mazawn

Simthiam um hai maw?..

Duhmi … thinlung,

A cancan ah duh vek,

A cancan ah hua,

Bumnak lawngin kum le can a liam,

Duhnak cun thinlung a neh fawn.

Thinlung in hngak thei na maw?

Duhmi … thinlung,

Theithiam thei hlah e….

Duhmi … thinlung.

Aw ih Hruai sualnak (Part Two)

November 28
Tlawngkai Nikhat

Aw ih Hruai sualnak
Part Two

Ka duhdawt mi tla thlarau ka nei a titu poh va zum hlah uh. An neihmi thlarau cu Pathian hnen ihsin a rami a si maw si lo tiah hniksak hmaisa uh.
– 1 John 4:1

Bible Siar Ding: Isaiah 26:1-15

Cuih nunau nu cu a thinkhur nasatuk ti a nau nu in a theih ruangah a va pan. “Ziang si cang?” a ti. Anih in, “Pathian in ka hnenah thu i sim, khuaruahharza thu i sim a si,” a ti. A luar deuhdeuh ruangah a nau nu cun an hotu hnenah malte sung cawl lawk thei dingin khuan a dil. An pu cun a siangih an unau in innkhan pakhat sungah an lut. A unu cun hihi Pathian ih aw a si ti’n a zum.

Cuvek cu Pathian hnen ihsin rami a si thei lo. Pathian hnen in rami cun thlangam daihnak le thuthlunnak in a khat ih tthenttheknak a um lo, tthatnak le thutak in a khat (James 3:17). Ciing ringring aw, Pathian hnen ihsin rami cu thlangam daihnak in a khat ringring a si. Leitlun thil cun buainak a suahpi ttheu. Pathian ih daihnak cun theihthiamnak a suahpi (Filipi 4:7). Kannih cu rinnak ruangih thiamcotermi kan si ih kan Bawipa Jesuh Khrih thawngin Pathian thawn remdaihnak kan ngah (Rom 5:1). Cuih thlangam daihnak cun a pehzulh in “Pathian ih sunlawinak in ruahsanter (c. 2).

Pathian in caan reipilai ihsin himi hi i hmuhter zo ih ka hnen ihsin a laak saal nawn lo. Ka thlarau cu hnaihnok tuarin thinhar ih a um tikah Pathian ih khawkhannak ka tthelh ttheu. Ziangti’n cumi cu kan tthelh thei tile lamzin pathum a um: A pakhatnak ah, midang ih thilrit na phurhsak tikah. Na thilrit cu Bawipa kehram ah tthum aw (1 Peter 5:7). A pahnihnak, thlangamnak na neih lo tikah Pathian ih duhnak thawn na peeng tinak a si. Thlarau nun ah tthanglian in Khrih bang vingvo ding na si, Bawipa ih Thlarau thawngin (2 Korin 3:18).

Thlangamnak na neih lo ahcun lei tisa daan in a lo uk tican a si ih Pathian ih khawkhannak na pialsan tinak a si fawn. Tisa daan cu siatbal thluh a ttul. Pathian Thu in hiti’n in sim: “Maw Bawipa, daihnak famkim cu nangmah in na pe, an tumtahmi ah a hngetmi le Nangmah a lo ringtu hnen ahcun” (Isa. 26:3).

Pathian Thlarau cun hahdamnak, thapeknak le tthansonak ti’n thil pathum a suahpi. Cumi in na thin a lo nuamter ding (Job 35:10). Saang ah a lo hlir dingih Pathian hnattuannak ah ttihphaannak na nei lo ding. Pathian Thlarau na nun ih a cangvaih tikah “cahnak ihsin cah sinnak ah” a lo hruai vingvo ding (Saam 84:7).

Pathian Thu ihsin na pial a si ahcun mi-aa ah na cang ding.

@Smith Wigglesworth

I Love Myanmar In Thil Maksak Ropi Pahnih Tuahsuak

“I Love Myanmar” In Thil Maksak Ropi Pahnih Tuahsuak

Zaangfahnak In Sunlawinak Ah

Zaangfahnak in Sunlawinak ah

[1 Peter 5:5-14]

Thuhmaihruai

Dungthluntu 12 lakih an hotubik Peter ih nun ihsin tuni khristian pawl in zir dingmi tampi kan nei. Cumi pawl sungin 1 Peter 5:5-14 sungih thil thupizet pathum, phundang deuh in kan sim asile Peter ih thapeknak phun thum pawl kan zoh tlang pei. Hih thil pathum hi kan theih le atak in kan nunpi thei asile Bawipa ih zaangfahnak in rundamnak kan comi hi ni netabik ni ah a sunlawinak a ttawm theitu zumtu rin-um le nehnak nun neitu hlawhtling khristian kan si thei ve ding a si.

Famkim Siarbet

CT Thusuhnak Kuang Awnnak Nei Sal

Pu CT Thusuhnak le Sannak Nov 4th week

[ CT Box hin na harsatnak a lo bawm sinsin theinak dingah hmang thiam vivo aw ]

Q1:

Dear Pu CT,

Ziangtin kim ah kan ni falam mi cu falam mi cu. Hruaitu, calailam, Hlasak lam, Fimnak lam khal ah mi kan bang thei lo,Tin in pa khat le pakhat kan rel siatawk mi in kan falam mi phun thanso nak ape thei pei maw?

Silom Hmuntha

Dear Silom Hmuntha,

Relsiat awknak in ziang thiltha hman a suahpi dah lo. Tappi kawm ihsin hmuansak hmuanthlang, kawhhran lemibur, khaw le ram hruaitu, cozah kumpi le tuanvo neitu pawl relsiat thangsiatnak tongkam in kan san minung pawl thinlungput a siatsuah thehmi asi: hruai theihlo minungah tuisan minung pawl a canter. Asinan, ka pipu, nulepa, ule pawlih tlamtlin lonak, santlaih lonak cu santhar minung pawlin thiltha tuahnak canpualtha ah kan lakih punzai le midang mawhsiat tu siloin a tuantu, hmalatu ah kan cang asi ahcun kan miphun thansohnak cu kanmai kutsungah a um timi kan santhuanthu a thleng aw mi in kanmai san sung lala ah in hmuhter in theihter ding.

Q2:

Dear Pu CT,

Ziang hmuahhmuah na thei thluh maw? Ziang poh poh lo sut sehla na rak sang/let thluh thei ding maw? Cutin ti ruangah na thinheng pei maw?

Ma Mang

Dear Ma Mang,

Na thusutmi pawl pakhat hnu pakhat lo san thei ka zuam ding.

i) Ziang hmuahhmuah na thei thluh maw?

Ziang hmuahhmuah ka thei thluh lo. Na thusuhnak cu naute suak thlapek hnenah “tong phunziat na thiam?” tiah thusut vek asi! Leitlunah, milai um tawk ihsin si lo, a tu rori ah milai 6 billion lenglo a nungmi kan umih ka theihmi cu zatel fang an si. Theih dingmi ziang hmuahhmuah cu tipithuanthum zat sisehla ka theihmi zate kawm cu tikhu fawrkhat hman a tluklo ding. Ziang hmuahhmuah theithluh vekin a um tu cu a theihlomi ziang a um ti a theilo asi.

ii) Ziang poh poh lo sut sehla na rak sang/let thluh thei ding maw?

Ziang pohpoh in sut asile “ziang pohpoh” na timi ih zirin ka lo sang thluh thei tla asi thei, thei lo tla asi thei.

iii) Cutin ti ruangah na thinheng pei maw?

Cutin ti ruangah ka thin a heng lo pei. “Mah ih thinhengnak a sup thei lotu cu, khawkulhnak hauhruang a cim ih a siatmi khua bangtuk a si. Olte in ral an lut ding” (Thuf. 25:28).

Q3.

Dear Pu CT,

Laimi pawlin kan nunphung hi ziangtin kan hmang ding ?.

1, Kan hnipuan hruk dan,

2, Kan sakhua, Biaknak

3, Kan ttong

Tahthimnak..kan nunphungah ,Mipa in Hnakhai an rak khaih maw?

Nunau in ziangtin hnipuan an rak hru ?tivek pawl,

Titus Mang

Sun, Nov 20, 2011 at 1:51 AM

Dear Titus,

Na thusuhmi pawng a cang thei tawk lo san thei ka zuam ding.

Thusuhnak: Laimi pawlin kan nunphung hi ziangtin kan hmang ding? Kan nunphung vek cekci in hman ding asi ko.

1, Kan hnipuan hruk dan,

Laimi pawlin kan nungphung hi kan kenkawh, kan thansohter in kan hman sinsin ding a thupi. Kan hnipuan pawl tla hi santhar milin a phunphun in kan thansohter a tul. A thitdan (design) pawl tla thansohter in santhar minung pawlin mawizet le sunsak zetin kan hman sinsin ding a thupi. Puai tuahnak, ni hleice, caan hleice pawlah tla kan hman sinsin ding a thupi. Biaknak lam siseh ei hawlnak lam thansoh ruangah nunphung tlansan ding timi hi at cikhat asi.

2, Kan sakhua, Biaknak

Kan biaknak hi kan thansoh a tul nasa. Kan pupa rirai bia pawl hman kan thluk nawn lo nak tampi a um. Kan biaknak in kan thinlung in uk lo. Tuisan minung pawl cu cozah in siseh khawsung upa pawl in siseh biaknak lam thurin in siseh a uk lomi kan si. Curuangah kan biaknak, sakhua hin bulpak nun, insang, khawsung, cozah kumpi, fim zirnak, le pursum leilawnnak tiangin kan biaknak thurin hi thurampi ah hmangin kan nunpi thei a thupi tuk. Culo asile, kan pawnglang ahcun laimi vek kan si hmanah kan sunglam cu a zuva, kan siat kan hlo theh ding. Kan biaknak thurin, Bible thu in kan nun kilkip in uk hrimhrim dingmi asi.

3, Kan ttong

Chin mi ka si ti tapoh cun mai tong siar, ngan, zirh thiam dingin kan thiam theh a tul. Kan tong hi calai in nasa ten a thansohter a tul. Famkim lo mi pawl thansoh ter in leitlun calai thatha thawn tlan zuam aw thei dingin kan tong hi calai thawn kan thansohpi a tul tuk.

Q4.

Dear Pu CT,

(1) Chin Mi – Nu Nau pawl in Ziang ha an thun pit ter bik mi (a) Sum Saw – maw ? (b) Duh Dawt Nak – maw ? (c) Sex ?

(2) Ziang ah ha, Bible thlawng theh tam pi in Thu thang tha an sim nawn lo ? (or) Rong an bawl nawn lo ?

(3) Ziang ah ha, Bible Thlawng theh le Koh hran U pa Tuan pawl (mi tam sawn) in  - mah le mah – Mi Fim tuk ah an ruah aw theu ?

(5) Zuu zuar maw – Zuu a in tu ha, Zoh a sia ?

(6) Kan Chin Mi lak ah – Pasal neih cing ih Mi pa dang thawn “PAWNG” aw hmang maw – Nu NAU “Taw Zuar” ha sual deuh ?

(7) Lei Thlun hmun tin ih um – Kan Falam Mi le Sa lak ih sin Nu Nau ” Taw Zuar” ti ih theih mi an um pang maw?

San No Mang (Mang Te), Kum 29

Fri, Nov 18, 2011 at 8:32 PM

Dear Mang Te,

Thu insut ruangah ka lungawi, na thusuhnak pakhat hnu pakhat theitawk lo san thei ka zum ding.

(1)   Chin Mi – Nu Nau pawl in Ziang ha an thun pit ter bik mi (a) Sum Saw – maw ? (b) Duh Dawt Nak – maw ? (c) Sex ?

Chin mi pawl hi social studies ah kan tawtlai tuk tikah statistics ngaingai kan neih lo tikah thlirvelnak (observation) lawngin na thusuhmi thutlangpi thu in lo san asi tikah a zatciah ka sim thei lo mi in rak theihthiam sak ko. Chin mi nunau pawlin an pasal dingah rinsantlakmi, an damsung hngat awk theinak mipi pasal ding an duhbik. Cumi lakah sumsaw hawl suak thei, duhdawtnak ih siseh sex lam khalin diriam ter theitu a tel theh.

(2)   Ziang ah ha, Bible thlawng theh tam pi in Thu thang tha an sim nawn lo ? (or) Rong an bawl nawn lo ?

Thuthangtha sim dingin Bible tlawng an kai lo tinak asi ko ding. Bible tlawngah Pathian thu, Bible zir theh hnu ah Thuthangtha sim lo tu pawl cu Thuthangtha sim dingin Pathian kawhmi an silo tinak asi ko. Pathian kawhmi cu tlansuaknak a um lo, Johnah vekin an tlan asile thlipi le tisuar in a dawi mei ding.

(3)   Ziang ah ha, Bible Thlawng theh le Koh hran U pa Tuan pawl (mi tam sawn) in  - mah le mah – Mi Fim tuk ah an ruah aw theu ?

Mahlemah fimtukah a ruat aw tu pawl cu an fimlo tinak asi. Cuvek thotho in thusuttu tla  nangmah hnakin an fim tuk na cingin na at tuk ruangah an fimnak na thei lo ih anmah sawn kha fim tuk bangin an umah na ruat sual tla asi thei ve ko. Theihnak lawng cun mi  a porh awk ter ih fimnak cun tangdornak thawn theihmi pawl kha a tak nunramah hmansuah thiamnak mi a pe.

(4)   Zuu zuar maw – Zuu a in tu ha, Zoh a sia ?

Voksa bazar um dingin a leitu le a zuartu an um a tul vekin zuu zuartu le a in tu khal an tul dan a bang aw ko. Zo a sual deuh timi cu ziang daan in na tah, cuai na thlai timi parah a hngat aw mi asi.

(5)   Kan Chin Mi lak ah – Pasal neih cing ih Mi pa dang thawn “PAWNG” aw hmang maw – Nu NAU “Taw Zuar” ha sual deuh ?

Jews pawl daan cun uire cu lungto in denthat ding asi. Ziang daan in cuai na thlai timi parah a hngat aw aw. Hmun hrekkhat ahcun Taw Zuar cu sian asi. Uire siannak hmun le miphun leitlun ah ka theihmi a um hrih lo. An pahnih in an sual veve. Ziang a sual deuh timi cu na tahfung parah a hngat aw mi asi.

(7) Lei Thlun hmun tin ih um – Kan Falam Mi le Sa lak ih sin Nu Nau ” Taw Zuar” ti ih theih mi an um pang maw?

Langhngan zetin “ka taw ka zuar asi” tiah zaphuan aw tu Chin mi nunau an um hrih lo, theihban cinah.

Q. 5.

Dear Pu CT,

Kohhran ah mino le bupi buai tivek a um theu…kan kawhhran tla cuvek a um theu…ziangruangah ti ka theilo…kawhhran upa pawlih ruahnak nei mal ruangah maw minopawl ih mawh si pei?

Kawhhran member ;

Mon, Nov 21, 2011 at 11:43 AM ;

Dear Kawhhran Member,

Mino le bupi lakah buainak a suakmi cu a dinhmun ciah hrangah sim theih asilo dingih thu tlangpi thu lawngin sim theih asi ding. Kawhhran upa pawl mawhnak khal a cang thei, mino pawl mawh khal a cang thei mi asi. A pahnih in zo ih mawh khal asile thlarau lam pitlinglo, Thiang Thlarau ih uknak hnuai ah an pahnih in silole pakhat sangsang an um lo ruangah ti cu a fiang. “Ziangah tile Pathian cu buainak le hnahnawhnak Pathian a si lo; remnak le daihnak Pathian a si,” ( I Kor. 14:33). Cutin Pathian Thlarau ih ukhnak, kaihruainak hnuai ah hnatuantu le laireltu pawl an up awk, an nun theh lo tikah milai tisa ihsin a suak theu mi asi. “Cuti a sile hiti in ka lo forh duh: nan ruahnak hmunkhat seh, duhdawtnak khalah pakhat le pakhat duhdaw aw ton uh; nan thinlung le nan tummi khal bangrep aw sehla cuticun lungawinak ka neihmi hi nan kimter sinsin ding a si. Mi nahsuahnak nei in, mahih zawn lawng ruat ih, mahih hminthatnak lawng hawl in zianghman tuah hlah uh. Pakhat le pakhat tangdor awk tonnak thinlung nei uhla midang hnakin ka tha deuh tiah ziangtik hmanah ruat aw hlah uh. Nanmah duhnak lawng si loin midang in an hrangah a thupi bikih an ruahmi kha a hmuhzia thiam ve uh. Nan thinlung put daan cu Khrih Jesuh ih thinlung put daan vekin siseh,” Phi. 2:2-4).

Cuvek thotho in Nubu le kawhhranpi, pastor le kawhhran upa, mino le nubu, tvp, buainak a suah tinte kawhhran laireltu, hnatuantu pawl cu Thiang Thlarau uknak, kaihhruainak hnuai ah an nung in an cangvai lo tinak a langter. Thlarau lamah an nauhak tuk lai tinak khal asi thei.

Q. 6.

Dear Pu CT,

Tufang ka duhmi ka fala hi, kan umtlang ih kan leng tlang kan ei tlang theu. Nupa sinak vun hmanpi ding ka tum tikah a nihcun  ,kan neihawk tik lawngah kan hmang ding tilam si sawn loin, fate rai sehla ziangtin saw na ti ding, na harsat ding le na zawnzaih ding ka lo siang lo inti ringring. Cucu ,i duhdawt taktak ruangah maw asilole nawmnak men ah i duh men saw asi ding ti cu ka theithiam thei lo.

Pu/Pi CT in sim hram aw..Himi hi duhdawtnak taktak a si thei pei maw?

Salai Tah Ben

Mon, Nov 21, 2011 at 9:28 AM

Dear Salai Tah Ben,

“Salai” timi cafang le “tahben” timi a kawpin nganmi ka hmuh hmaisak bik asi. Na thusut mi ka lo sannak in tap nawnlo hram aw.

Nan pahnih karlak thu in simmi zat lawng thei in na fala nu ih a lo duhdawtnak cu duhdawtnak taktak asi thei pei maw ti ah lo sang dingin nan karlak thu in simmi a mal tuk lai, na sutmi sang thei ding khawpin nan thu hla theihmi ka nei hrih lo. Asinan ziangtin a lo saang tla asile nupi pasal neih awk hlanah nupa sinak hmang lo dingin a lo el mi cu thiltha asi. Zumtu pawlin kan nuncan ziaza ding asi. Nupa sinak hmang tlang lo dingin a lo el ruangah a lo duhdawt taktak lo, a lo duhdawt taktak tiah sim theinak a um lo. Nupi pasal nei aw loin fate neih ding a phang mi tla cu nunau hmuahhmuah in an phan mi le an duhlo mi asi ko ding. Lungthiang ten sunzawm vivo ko aw, nangmah na lung a thianding kha a thupi sawn.

Q.7.

Dear Pu CT,

Hivekin thusuh theinak nan on ruangah lungawi. Suhduhmi le theihduhmi tampi lakah pakhat te lo suh duhmi ka nei.

“Kan miphun(Falam) thansonak dingah ziangmi a thupibik, phundang deuh in sim sehla

ziangmi no.1 ah ret in kan tuan a tul? timi a si.

Lungawi,

Chin Vapual

Fri, Nov 25, 2011 at 2:49 AM

Dear Chin Vapual,

Na thusuhmi hi fiahciami (facts based) in lo san theih asilo ruangah khaikhawm (observation based) in lo san ding asi ruangah ruahdan, a thupibik tiah ruahmi a dangdang a um thei ruangah ka lo sannak vek ciah hi na hmuddan pomdan asilo tla le na palh, ka palh ti awk ding asilo ti ka lo sim hmaisa duh.

Kan miphun thansohnak ding hrangah a thupibik pakhat nakah Pathian thawn kan pehzawm awknak athat a tul. Kan zummi kan nunpi ih a kilkip nunah kan Bible in a simvekin kan nunpi thei cio ding hi kan miphun thansohnak hrangah a thupibik asi. Sunglam nun pitlinnak um loin pawnglang thansohnak cun miphun a siatsuah sawn asi. Pathian thawn pehzawm awknak tha timi cun milai bulpak nun, insang, khawsung, vengsung, sumpai lennak, ram le miphun, hrin le hram, kumpi cozah, leitlun khawmual le sersiammi ziangkim parah ziangvek dinhmunah ziangtik cu caanah ziangtin kan nung dingih kan pehtlai ding, ziang a bur in kan tuah ding, zo in ziangvek tuanvo a kai ding, zo ih thu kan ngai dingih zo  hnenah ziangvek upatnak pe in a dung kan thlun ding, tvp, milai pehtlaihnak, thansohnak, le hnatuan tlang daan ziangkim a huap tel theh. Kan khua le ram a rawp duahdo nak khal hi kawlram cozah a thatlonak lawng si loin kan zumnak thubulcawng kan nunpi ruang khalah asi tiah sim theinak kan nei. Insang, khawsung, kumpi cozah, mibur umkhawmnak ah Absolom a lalih a lam rero lai caan poh cu siatnak in in hngak cia ti theih a tha.

Ziang kan tuah ding?

“Ka hmin in kawhmi ka minung pawl in ka hnenah lungsiir in thla an cam ih ka mithmai an hawl ih an thil ?ha lo tuahnak ihsin an kirsal a si ahcun van in an thlacamnak ka thei ding ih an sualnak ka ngaithiam ding ih an ram cu ka damter ding,” ( II Sansiarnak 7:14).

Kan society hi cancer natnak vekin a damlo mi asi. Minaa damlo pakhat cu a natnak damter hmaisa loin rawl tampi kan pek khal asile a thihni a naiter sawn theu. Pathian in kan ram a damter lawngah kan society hi a dam in a thangso ding.

++++++++++++++++++++++++++++++++++++++++++

Cakuatnak le Thusuhnak: chinlandhornbill@gmail.com

Aw ih Hruai sualnak (Part One)

November 27
Zarhpi Ni

Aw ih Hruai sualnak
Part One

Ka duhdawt mi tla thlarau ka nei a titu poh va zum hlah uh. An neihmi thlarau cu Pathian hnen ihsin a rami a si maw si lo tiah hniksak hmaisa uh.
– 1 John 4:1

Bible Siar Ding: Thutthentu 6:36-7:22

Kan Pathian thuthangtha phuan pumkhawmnak hmun pakhat ah fala unau hnih te cu rundamnak an co ih Thlarau Thianghlim thawn an khat. Anmah cu mi mawi le duhnung an si. Nun thianghlimnak an nei, thutak an thei, ih dingfelnak nun tla an nei. Zokhal hi teih unau hnih upa hmaizah lotu an um lo.

An unau hnih in pumcawmnak hrangih an hnattuan cu ciinaan (telegraph) zungah a si ih an unau hnih rori in ramthar nortu (missionary) ttuan an duh. Anmah hi missionary si duhtuk an si ruangah paisa an khawl ih ramthar ih mission hnattuannak hmun ah pumpe ih feh dingin timtuahnak an nei.

Mi pakhat deuh cu telegraph cet thawn hna a ttuan rerolai ah aw (voice) pakhat a thei. Cuih aw cu, “Ka thu i thlun maw?” ti a si. Ka thu na ngai asile missionary lakih hminthangbik ah ka lo tuah ding. Duhdawtmi, hih aw hi thlun tum aw, thlarau co tum aw” ti a si. Cu cu Satan ih bumnak aw a si. Sikhalsehla a theithiam lo. a duhhiarbikmi cekci cu a si. Curuangah hih aw in a nun a nehtuk thlang. Cuih aw cun, “Sumsaw ziangzat na ttul ti tla ka thei” a ti bet. Hivek khihhmuhnak cu atak in a cang ti ka thei dah ngelcel lo, na nun sungah a cang dah lo ding.

Thutthimnak ah, mi pakhat ka hnenah a ra ih, “Ka kut sungah rawl phun khat a um, himi hin missionary cawmnak hrangah dollar million tampi a karhzaiter thei,” a ti. Kei in, “Cuvek thil hrangah zianghman ti ding ka nei lo,” ka tisan mai. Cuvek cu ziangtik hmanah a hlawhtling thei dah lo ding. Pathian in cuti vekin hna a ttuan dah kel lo. Pathian in sui hlawnthil neihter a lo duh asile a lo pe thei. Neih lomi le tithei lomi zianghman a nei lo. Amah in sui tampi a nei ih hramlak ih ramsa zate le siar cawk lo tlangpar ih ttilva khal a taa an si (Saam 50:10).

Mi zokhal in vancung uknak kauter ding tumtah ih thuthangtha an sim ahcun, Pathian in thluasuah a pe tengteng ding. Pathian lawng hawl hmaisa aw, cule thluasuah ruahpi a sur ding. Thlarau Thianghlim ih huham neihternak cu a thi theimi hih na leitisa ruangpum ahhin atak in a langhngan ding.

Nangmai’ hrang lawng ah si loin midang riantu si theinak ding tumtah in Thlarau Thianghlim thawih khah nun cu hawl aw.

@Smith Wigglesworth

Thlarau Thianghlim vs Bumnak Au-aw

November 26
Zarhte Ni

Thlarau Thianghlim vs Bumnak Au-aw

Pathian thlarau a si le si lo hi ti’n nan theithiam ding: zokhal Jesuh Khrih cu minung in a ra tiah a phuangtu cu Pathian hnen ihsin a rami thlarau neitu a si. Sikhalsehla zokhal cuti’n a phuang duh lotu cu Pathian hnen ihsin a rami thlarau neitu a si lo. – 1 John 4:2-3

Bible Siar Ding: 1 John 4:1-6

Minung tampi cu au-aw (voice) in thinbuainak a pek. Mi hrekkhat cu an thinbaangtuk ih thinhar natnak (stress) an nei cih. Mihrekkhat cun thil maksak ah an laak; cumi cu hminsintlak a si ti’n an ruat ih an lampeeng ah an feh cihcih. Mi tampi cu a dik lomi aatthlak profet thuphuanmi in lamzin peeng ah a hruai. Cule mi tampi cu hriat lo ttong le cumi a tican leh theinak kan nei ti’n an zum ih ziang ka tuah ding timi ka sim thei ti’n an ruat aw. Himi hi Pathian ih timtuahmi thawn a kalh aw verver ih mi hnaihnoktu le mi ih relsiat tonnak men an si.

Keimai’ ruahnak men in thuthangtha ka sim dah lo. Ka ruahnak men ka sim lonak san cu, mi tampi khal in khua an ruat thei thluh ve ti ka theih ruangah a si. Ka nun ih ka theihfelmi thu lawng ka lo sim. Curuangah nan ttulmi cu kan simmi thu hi ttha te’n ngai ding le theihthiam ding hi a si. Curuangah Pathian hnen ihsin zirnak na neih a ttul tinak a si. Cuti’n midang hnenah dikzet in na zirmi na sim thei dingih annih khal in na hnen ihsin zir duhnak thinlung an nei ve ding.

Satan huham cu ziangti’n na dawisuak thei ding? Khawsia khuavang cu ziangti’n na tuah pei? Pathian ih aw a si le si lo ziangti’n ka thei thei ding? A si, hih hmun ah keimah cu ka um, keimah cu a dikmi hmun ah ka um ti ka thei aw ih Pathian Ttongkam ih huham cahnak thawn ka lo cawm rero a si.

Hnattuan hotu pakhat cu director pawl hnenah an suahmi thil ziangkim sim theinak thu neitu a si. Cun leitlun pumpi ih a ttulbikmi cu Thlarau Thianhlim a si. Tuni ah Amah cu kan thinlung, kan khuaruahnak thawn pehtlai aw dingin in bawmtu a si. Curuangah Thlarau Thianghlim cu a thianghlimmi le thuneitu a si. Amah cu kan sungah a nungih mangbangza thu pawl a ttongsuaktu a si.

Hmuntin ah mi tampi cu hih au-aw ruangah raapthlakza dinhmun ah an um. Pathian au-aw le Satan au-aw cu ziangti’n kan thei in kan thleidang thiam ding? Ca Thianghlim in dikzet in a lo simfiang a si (1 John 4:2-3)

Na ttulmi hi zirhtu saza tampi an si lo, asinan Pakhat lawng a si, ih amah cu Jesuh a si. Amah cu ziangtinkim mi simtu a si.

@Smith Wigglesworth

« Previous Page — Next Page »