Israel Ram Thar Din Daan IV

Juda mi pawl cu kum Zabi 20 -nak a thawklam ihsin Palestine ram ah vaih an thawk ciam co. Kum 1909 ah Juda mi pawl lawnglawng umnak Tel Aviv khua cu an din ih, tu khalah hi khawpi hi Israel ram ih khawpi tumbik ah a rung cang. Letlun Ralpi veikhatnak a cem hnu ih Turk pawl British pawl ih Palestine ihsin an dawi hnu ah British pawl hin Juda pawl hi an mahte uk-awk theinak ram pek an tiam. Cucu Belfour Declara-tion in thu an suah.

Juda mi pawl cu an phur sinsin ih Palestine ah an vai ciamco. Hivek ih vai nasa dingin Juda pawl ih Zionist pawl in an tuan ciamco. 1930 hlan tiang cu Europe ih Poland ram ihsin Juda mi pawl an vai tambik. Hihi Poland ram ih ei le in hawl a harsat ih tlunah Poland mi pawl ih Juda mi pawl an thlei dan ruang khalah a si. 1920 hrawngah  Palestine ah mi 700,000 (Chin State hnak tam ) lai an um zo, cutawk ahcun Juda mi cu 70,000 lai lawng an si hrih. Hitikah Arab pawl an thin a phang ve ih ram dang ihsin Palestine ih vai dingin an fawrh aw ve.

1921 ah Arab Palestine pawl in lang tham in lungawi lo-nak an langter. Juda pawl khalin anmah le mah hum-awknak ah Jews Agency ti pawl an din ve. Meithal kaih ih ral do vek tla an zirh aw aw. 1923 ah British acozah cun an uk mi ram, Jordan tiva ihsin ni suahnak lam cu ram pakhat ah an tuah. Hih ram hi a hnu ahcun Trans Jordan ti ih run koh a si, tulai ahcun Jordan ti in a rung um. 1925 ah Hebrew University of Jerusalame ti an run din. 1929 ah Arab(Palestine) pawl an lungawi lo ruangah an hel ih, buainak nasazet an tuah. Juda mi pawl an tibuai, acozah hrangah an run hnokzet. 1936 le 1939 karlak tla ahcun civil war ti tlakin buainak a suak ih, cunah ahcun British acozah tla an tibuaizet. Juda mi pawl cu mimal sawn le um daan thiam tum an si.

Arab pawl cun British acozah in Juda mi a duhsak ih a lalut tiin an puh ruangah British acozah khal an do phah. Himi kum 3 lai sungih buainak ah Juda mi za tampi an thi. Palestine Arab pawl cu thawng tampi an thi. Palestine in ram remnak ah 1937 ah Peel Commission din a siih, cule 1939 ah British acozah in White Paper a suah.

Himi ah British pawl cun Palestine ah kumtin Juda mi 15,000 in  kum 5 sung an lut thei tiin an ti. Himi thusuak hi Juda mi pawl le Palestine pawl in an lungkim lo veve. Juda mi pawl a luhmi an mal tuk an tilai ah Palestine pawl cun an lut tamtuk an ti. Cutiih ih an el-awk celcel lai ah World War-II a thleng ih himi hin leitlun ram tampi a ti lamdang vekin Palestine khal a ti lam dang.

By- Dr. Run Bik ( New Delhi)

Na Thei Fiang Maw?

NA THEI FIANG MAW?

By: Pi Hrang Tin Sung

Lalpa’i  hril hnam Israel miphun,
Nelrawn ramcar ah rak vakvai hai.

Acuih hluan in kannih Laimi,
Kan khua le ramte suahsan in;
Leitlun hmuntin ah kan darhdai.

Ram leng hla deuh thleng theithei,
Bawipa’i thlawsuah kan dong kan ti;
Hla sin ih feh kan tum cio.

Rual duh thaten vun ruat ta hnik,
Rampi khawnuam na thlen hlanah;
Mitthep karih na ton theimi
hmun a um.

Cuih hmun in na fehsinnak ding,
Na kumkhaw hmun ding
na thei fiang zomaw?

Thihnak maw? Nun nak?
Hell ram maw? Van ram?

Dr. Martin Luther King Jr. Ih Thuanthu Tawi

January thla ih zarh thumnak tlawngkai ni khat ni hi Martin Luther King Jr. (1929 – 1968) kha America rampi in upat sunloihnak an pekni a si. Curuangah, Dr. King ih thuhla hrek khat te le a ttongmi kam khat hnih te amah sunloihnak ding hrangah ngan ka duh. Prineton Theological Seminary ah 2004 ah khan, Dr. King ih Theological Ethics timi kan zir ih cumi ihsin, a lungput le a nun daan hi ka nunnak ih ka zoh tthimmi le ka thuruahnak ii silhkhuhtu bik pakhat a si.

Dr. King hi January 15, 1929 ah Atlanta Georgia ah a suak. A pu hi 1914 in 1931 tiang Atlanta ih Ebenezer Baptist Church ah pastor tuanmi a si. A pu thehhnu ah a pa in pastor a run tuan ih Martin Luther King a thihnu reipi tiang a run tuan.

1960 in Dr. King khal hi EBC Church thiamthiam ah a pa bawmtu ah co-pastor a tuan ih a thihni tiang a tuan. 1948 ah Morehouse College in B.A a ngah. 1951 ah Crozer Theological Seminary, Pennsylvania in B.D a ngah. 1955 ah Boston University in Ph.D a ngah. Boston ih tlawng a kainak ah fala mawi zet le fim zetmi Coretta Scott thawn an tong aw ih an tthi aw. Fapa pahnih le fanu pahnih an nei.

1954 ah, Dexter Avenue Baptist Church, Montgomery, Alabama ah pastor a tuan. Pastor a tuan phah ah, midum pawl tthanso theinak rampi huap pawlkom tiah timi National Association for the Advancement of Colored People (NAACP) ah hruaitu E.C sungtel sungah a tel ve. 1955 ah Negro pawl in midum le mirang thlei daannak ummi hi hriamnam hmang lo in lamzin ah kan duh lonak kan lang ter ding tiah an ti tikah, Dr. King cu hruaitu ding ah zaangfah an dil. A rak el zet nan, nangmai’ in hruai lo ahcun tiah an ti tikah a rak cohlang.

Bus sungah midum pawl cu dunglam ah, mirang pawl cu hmai lam ah, mirang an rat le midum pawl in tonak nan kian ding ti pawl ih thleidannak ummi kha an duh lo ruangah, midum hmuahhmuah bus hrimhrim nan to lo pei tiah thu an suah. Bus zo hman to lo rori in midum pawl khal lungrual zet in ni 382 sung an um. Bus a totu tam bik cu midum pawl an si theu ruangah, bus tampi cu totu an um nawn lo ih bus tampi an cawl.

Curuangah, December 21, 1956 ah Supreme Court rori in, midum le mirang bus sungah thlei dannak a um nawn lo pei tiah thu an relcat ih an than. Cu ti ih, midum pawl in lamzin ah a rual a rual in an feh ih midum le mirang thlei dannak an do laifang ah, Dr. King cu thlawngthlak a tuar. Casia a phunphun kuat a tuar. Zaan laifang khal ah phone in an ko ih, “Negro pa, na thil tuahmi na colh lo ahcun, nangmah le na innsang zate in hmai zarh sungah kan lo that ding” tiah an hro. Culai ah, Dr. King ih a timi cu, “Ka ttih tuknak ah ka tthia thluah thlo. Ka nufa le pawl cu ziang thei lo in ihhmu thaw zet in an it that. Cui’ lai caan ahcun, ka zirmi theology thuk zetzet pawl in hnangamnak in pe thei lo. Hnangamnak cu ka pi ih ii rak sim theumi ‘Pathian cu na kiangnai ah minung bang in a lo umpi ringring sokhaw’ tiah ii timi minung bang in ii umpi tu Pathian timi te cun, ka hna ii ngam ter” a ti.

Cu ti ih ka ttihtuk lai ah thla ka cam ih, Pathian ih ii umpi zia ka tep ngah a ti. Mipa khat in hi ti in thu ii sim vek in ka thei a ti, “Dingfelnak le thutak hrangah ding aw. Pathian cu a kumkhua in na lam ah a ttang ding” tiah ka hna thlam ah ka thei a ti. Zaan thum hnu ah, an sungte in an sung khat te ih inn ah an riah lai ah, a inn cu bomb in an puah sak. Asinan, thil dik lo hmuahhmuah do ding ah hmai ah ka feh thotho ding a ti ih, Negro pawl hruai in a feh thotho.

1957 ah civil rights cangvaihnak caksin dingah tiah tuahmi pawlkom, Southern Christian Leadership Conference (SCLC) ah president ah an hril. Hi pawl kom in an do betmi cu midum pawl rampi hril awknak khal ah bangraan te’n vote tuah thei ding in an nor pi. A thuruah daan le a ttannak hrampi cu Christian zumnak ah a bun ih, an sandahpiah daan cu Gandhi feh daan a zoh tthim. Kum hlei khat sung, 1957 in 1968 tiang midum pawl a hruainak ah, peng ting sawmruk khual a tlawng, vei thawngkul hluannga thu a sim.

Khua kip ih a feh tikah, ‘kan khua lam ah ziang na ra tuah, kir aw’ tiah an rak ti tikah, “Thleidannak le diklonak um hlah sehla ka ra lo ding” tiah a sawn. Cutluk ih a hnatuan a tam lai ah, ca-uk panga a ngan man lai h, cahram ti cawk lo a ngan man thotho. A thusimmi lak ih a hmin thang bikmi cu “I have Dream,” “Sunmang Ka Nei” timi a si.

Cumi sung ih a sunmang a tawi zawng cu, “Ka fale pali hi nikhat ni ahcun, an taksa rong (color) ruangah silo in, an nuncan ziaza par ih zir in thu a tthentu ram ah an tlangleeng leh ding ti hi ka sunmang a si” tiah a ti. Mirang in, “I have a dream that my four little children will one day live in a nation where they will not be judged by the color of their skin, but by the content of their character.” Vei kul thawng thlak a tuar ih veili hnak ih mal lo thawi le vuak a tuar.

Upat sunloihnak degree panga a co ih, 1963 ah Time magazin in “Kum Khat Sungih Milangsaarbik” ah a hril. A kum 35 ah, Noble Peace laksawng a ngah. Noble Peace Prize ngahtu lakah mino bik a si. A laksawng ngahmi $ 54,123 cu civil rights cangvaihnak ih hman ding ah a hlu. April 4, 1968 ah Memphis, Tennessee ih riahbuk motel pakhat ih a um lai ah, an rualpi hrek khat thawn an veranda ih an din laifang ah, a mah a huatu pawl ih mithal in a nunnak a liam ta. A tongmi hrek khat:

Thimnak cu thimnak in a dawi hlo thei lo; tleunak lawng in a ti thei. Huatnak cu huatnak in a dawi hlo thei lo; duhdawtnak lawng in a ti thei. Zokhal in duhdawtnak khuatleu sungah ka feh ding maw, mai hrang lawng ruatmi siatralnak khuathim sungah ka feh ding timi a hril tul.Mi pakhat in hih thu cu ka nunnak liam in kan ttanpi ding timi thu pakhat khat tal a hmuh hrih lo ahcun, a nun daan man a nei hrih lo.Minung nunnak ah ziang tluk a nun a sau tihnak in ziangtluk man nei zet in a nung timi hi a thupi sawn.

Mi pakhat ih man taktak cu nun nom lai ah khui ah a ding timi ah a si lo. Thubuai a um caan le dotu an um caan ah khui tawkah a ding timi ah a tthum aw sawn.

Kuakuai Anka (New Delhi) ta lakmi a si.

By: Pu San No Thuan

Pathian Zaangfahnak Hnong

January 31

Tlawngkai Nikhat

Pathian Zaangfahnak Hnong

Siar:

Matthai 7:13-23

Sikhalsehla nunnak sungih luhnak kotka cu a fiak ih a fehnak lamzin khal a har; curuangah a thleng suaktu cu mi malte an si.  -Matthai 7:14

Kumkhat Sung Baibal:

-   Suahlannak 25-26

-   Matthai 20:17-38

A hnokzetmi Asia khuapi pakhat ih zinkap feh minung tampi cu ka mang a bang. Cutluk minung tam tthawn theinak a um lo hmang ti na lakah mi tampi Famkim Siarbet

Cak Sinsin Uh!

Cak Sinsin UH

- Rev. Run Cung Mang

Khrih Jesuh cu kan Bawipa a si ti ih nan pom ngah zo ruangah Amah thawn pehzom aw in nung uh. Amah sungah nan hram cu thukzet in bun uhla, nan nunnak cu Amah sungah inn bangin sak uh; zirh zo mi nan si vekin nan zumnak ahcun cak sinsin uh; cule lungawinak in khat uh. – (Kolose 2:6-7)

Thuhmaihruai:

Zumtu kan thlarau nun tthanglian pitling sinsin dingin tharthawh ringring a ttul. Daithlang le zaangzel ih um ding kan si hrimhrim lo. Jesuh Khrih – lamzin thar le lamzin nung (Hebru 10:20) sungah nun tharnak le nun thlengh awknak taktak nei dingah ka lo sawmngiar duh a si. Paul in Kolose 2:6-7 sungah zumtu thlarau nun cak sinsin dingih a forhnak ihsin thlarau thazaang la tlang uhsi!

1. Khrih thawn pehzom sinsin uh (Kolose 2:6)

Paul in: “Amah thawn pehzom in nung uh,” (c. 6) a ti. Khristian cu Khrih thawn pehzom aw ringring ding kan si. A sungah kan um ih kan sungah a um ringring a ttul. Jesuh in, “Keimah thawn pehzom uhla kei khal nanmah ka lo pehzom ve ding. Sabit hnge cu amahte lawngin rah a rah thei dah lo; sabit hripi thawn a pehzom awk lawngah a rah thei a si. Cubangtuk in keimah thawn nan pehzom awk lo ahcun nan rah thei hrimhrim lo ding” a ti (John 15:4). Khrih thawn  pehzom aw sinsin dingin thlacamnak le Bible siarnak ah taimak suah uhsi!

2. Khrih sungah nun hram thuk bun sinsin uh (Kolose 2:7)

Paul in, “Amah sungah nan hram cu thukzet in bun uh” a ti. Kan thlarau nun Khrih sungah thuk sinsin ih kan bun lawngah a tthanlian ding. Paul in thlarau nun cu engineer ih innsak thawn a tahtthim. Inn saangpi sak tikah innhram (foundation) thukzet a ttul. A foundation a thuk lo asile innpi a fek lo ding. Jesuh in vutnel parih innsaktu le lungto parih innsaktu tahtthimnak a sim (Matt. 7:24-27). Pathian Thu a thei ih a thluntu cu lungpi parih innhram ttohtu bangin ruahsur le thlisia hrang lak khalah a sawn lo a ti. Thlacamnak le Bible siarnak thawn Khrih sungah hramthuk sinsin in bun uhsi!

3. Khrih parah thlarau nun inn bangin sak sinsin uh (Kolose 2:7)

Paul in, “Amah sungah nan nunnak cu inn bangin sak uh” a ti. Khristian nun cu tthareh nun a si lo, amah kel ringring a si lo. Kum khat hnu kum khat thlarau nun sang deuhdeuh in sak sinsin ding kan si. Khrih thawn pehzom sinsin in Khrih sungah hramthuk bun sinsin ih thlarau nun saangsin ih sak sinsin ding kan si. Zumtu sinak ihsin dungthluntu ah, cuihsin Khrih hrang ih thlahmi dinhmun ti’n Khristian nun ah a dotdot in tthanglian pitling vingvo ding kan si.

4. Khrih nan zumnak ah cak sinsin uh (Kolose 2:7)

Paul in, “Nan zumnak ah cak sinsin uh” a ti. Zumtu thlarau nun cu cak deuhdeuh le fek deuhdeuh ding a si. Thlarau nun ah tthangso thei loin amah kelte si ringring ding a si lo. Khrih thawn pehzomnak, Khrih sungih hramthuk bunnak le Amah parih thlarau nun saknak in zumnak thazaang cak sinsin ding kan si.   Bible le Nitin Thlarau Rawl siar, Bible zirzoinak nei tam sinsin, thlacam taima sinsin Khrih hrangah pumpek sinsintu si dingah in sawmngiar.

5. Lungawinak in khat sinsin uh (Kolose 2:7)

Paul in, “lungawinak in khat uh” a ti. Zumtu nun cu ziangtik khalah lungawi ringring ding kan si. Zumtu tisa mi si loin zumtu thlarau mi taktak cun a nitin nun ih a hmuhtonmi parah Pathian hnen lungawi thusim thei ding hi a si. “Cat loin nan lungawi uh. Thlacam ringring uh. Ziangvek dinhmun khalah lungawithu sim uh, Cumi cu Khrih Jesuh ah Pathian ih a lo duhsakmi a si” (1Thes.5:16-18). Jesuh a pakhatnak ah ret, midang a pahnih ah ret ih mah le mah netabik ah ret awtu pawl nun cu ziangtik khalah lungawinak in a khat ding.

Thuneitnak:

Duhdawtmi zumtu, kum zabu 21 ih kum hrabu hlun (2001-2010) cu kan taanta zo ih kum hrabu thar (2011-2020) sungah kan lut zo. Calendar, Diary le Notebook thar kan thlengh bangin kan vision le kan life style tla a thar in kan thlengh thluh a ttul! Jesuh Khrih cu i Runtu le ka Bawipa tiih kan zumnak fekter sinsin ding, Amah thawn kan pehzom awknak thukter sinsin ding. A sungah hramthuk bun sinsin ding le kan zumnak cak sinsin dingin thlacamnak le Bible siar, khawm le tettikhan, pumpek cangvaihnak in zuam sinsin ding kan si. Cule khawvelmi bangin phunzai hmangtu si loin, ziangtiklai caan khalah Pathian thangtthatnak le lungawinak thawn khat sinsin ding kan si.

Khrih le miphun hrangah rinsantlak zumtu ttha si dingin zuam sinsin uhsi!

?

Zohnak le Zirnak

January 30

Nipi Ni

Zohnak Le Zirnak

Siar:

Daan. 11:18-21

Nauhak kha nun daan dik zirh aw, a tar tiangin cuih lamzin ihsin a pial lo ding.      -Thufim 22:6

Kumkhat Sung Baibal:

-   Suahlannak 23-24

-   Matthai 20:1-16

Nunau pawl soft ball leknak ih refree ttuantu pa cu leknak dunglam ih a dinlai ah a lektu pakhat pa ih nu in, “Refree dang kan duh, refree dang kan duh,” tiah Famkim Siarbet

Billy Graham Sirawknak Malte

Billy Graham cu Christian Today (CT) in interview nak tawite  a nei. Anih hi tula leitlun thuthangtha simthiambik ih ruahmi a si hleiah thusim nung bik khalih pom a si.

Cangthei sehla, na caan liamcia kokirsal in ziangmi na thleng ding?

Asi rori. Ka nupi fanau pawl hnen ah caan tamsawn ka hmang ding. Zirnak lam ka uar sawn dingih thu malte ka sim sawn ding.

Cu lawngsiloin lo theihlo ih ka ruahmi mithivui, innthar lawm, neihawknak kutsi pawl hi tu ahcun tul tukin ka thei nawn lo.

Curuangah midang hnen khalah thil ziangkim tuah theh dingih kan tum, thupi tukih kan ruahmi zaten tuah theh lo dingah ka sim theu.

Cun khat lam kau ah, Pathian in mi ropi le ram hruaitu milian pawl hmai ah thuthangtha sim dingah in duh ih theitawk suah in ka rak sim. Asinan thuthangtha sim ih ram hruaitu pawl ka kom caan ah ka duh aiin ka rak lut thuk deuh theu. Curuangah ka caan kokir leh thei sehla, politics ah fate hman ka tel lo ding.

Solomon Hnen Ihsin Ttongfang Paruk

January 29

Zarhte Ni

Solomon Hnen ihsin Ttongfang Paruk

Siar:

1 Siang. 10:23; 11:1-10

Hih thu hmuahhmuah ih tlunah sim ding pakhat lawng a um. Pathian ttihzah awla A Daan thlun aw. - Thusimtu 12:13

Kumkhat Sung Baibal:

-   Suahlannak 21-22

-   Matthai 19

SMITH magazine, online community in, thuanthu sim ih lungawinak puai (celebration of the joy of storytelling) an tuahnak ah casiartu pawl hnenah Famkim Siarbet

Lebanon Ram PM Thar

Lebanon Ram PM Thar

Lebanon ram Prime Minister, ttuan dingah Hezbollah pawlih duh hrilmi Najib Mikati cu an ram President, Michel Suleiman in a puangfel. Europe rampawl leh America in a huatzetmi Hezbollah pawlih duh hrilmi Najib Makati PM tharih puan a si veten PM, hlun Saad Hariri ih lamttang pawlcu  an duhlo nak langterin an ram khawpi Beirut ah an pungkhawm cih.

Relzo vekin Lebanon ramah hin   Shia, Sunni leh Hezbollah Muslim pawl  covo zemaw in Cozah nak an tuah tlangkhawmih, kum 2005 ih PM Rafik Hariri an thahnak thuhla ziangzawitu UN aiawh tu pawlin  PM, Rafik Hariri cu Hazbollah pawlih thahmi a si tiih an puan ruangah an Cozah ttawmawkmi cu tuithla ni 12 ah tthiahbal a si,

Cumi hnuah Hezbollah pawlcun an ram PM dingah Najib Makati cu an hrilih, President, in a pawmpi ding ti phangin PM, Saad Hariri ih lam ttang pawlcun  an duhlo nak langter in an ram khawpi hmun dangdangah an pungkhawmih, Europe ram pawl leh America ram khalin  Hezbollah pawlih duhmi hi dodal zet hman hai sehla cumi cingin an ram  Presidnet, Michel Suleiman cun  Hezbollah pawlih duhmi hi an ram PM, dingah a pawmih a puang thotho ih, an ram sungah buainak sosang a suak menthei tiah zumnak a um.

Egypt Ram Buai Nak

Egypt ram Cozah tthiahbal tumtu Opposition pawlin buainak an tuah ruangah minung 3 an thi. theihcia zo vekin  Egypt ram Cozah dodal tu pawlin Tunisia ram mipi tidan zirzawngin Internet hmangin an ram Cozah tthaihbal tumih an sawmkhawmaw ih, an ram khawpi Cairo ah an pungkhawmih, hi Opposition pawlhin Cozah tthiahbal a si hlan sungcu hmundangih tlan an tumlo thu an sim.

Cu ruangah Palik pawlin an dawidarh tumih Opposition mipi pawlkhalin  lungtum leh hriamhrei dang phunphun thawn Palik pawlhi an do ciamco veih curuangah Palik 1 leh Civil mi 2 an thi.Hiti vekih Opposition pawlin Internet hmangih thuhla an tawlrel ruangah Cozah cun Internet a phitih, Cumi hnuah Opposition pawlcun an Cozah cu mipi palbet leh harsat nak tuahtu an puhin an au ciamco ih an President, Hosni Mubarak ih zuk khal an ur kang.

US Secretary of State, Hillary Clinton cun  Egypt ram buainak ah America cu President, Hosni Mubarak in lamah a ttang ringring ding tiah a simih, Egypt ram Cozah hngetkhoh leh mipi hrangih hamtthat nak tawlrel ih ruattu a si ruangah Egypt ram Cozah cu a fehnek kelte ah hngetzetih feh ringring dingin America cun a duh a si tiah a sim.

Pakistan Ram Bomb Puak

Pakistan ram Lahore leh Karachi khawpi ah thihcilh Bomb a puakih, minung 15 an thiih, midang 80 lenglo in hraimhma an tuar. Palik pawlin an sim nakah  Lahore khawpi ih Bomb puah tuhi nunau thleirawlte a si tiah an simih, Shia Muslim pawlih hmun thianghlim pakhat an thlacam khawmnak Karbala Gamay Shia a luhtum zawngah Palik pawlin rak zohfiang an tumih cumi zawngah a bomb paimi a tipuak tiah an sim.

Cumi hnu reilo te ah Karachi  khawpi Malir vengih Shia Muslim pawlih tomi Bus siahsuah tumtu minung pakhat ih Motor cun Palik Pawlih Motor a tttaih ih cumi zawngah a Bomb paimi a tipuak cihih, a hmunah Palik 2 an thi cihih, midang 5 in hriamhma an tuar a mahkhal a thicih.

Linghninnak Khua

January 28

Tlawngkai Ninga

Linghninnak Khua

Siar:

Tirhthlah 16:23-34

Rinlopi ah nasazet in ling a hnin ih thawnginn cu a tawhram tiangin a hnin ttheh. - Tirhthlah 16:26

Kumkhat Sung Baibal:

-   Suahlannak 19-20

-   Matthai 18:21-35

Simon Winchester in A Crack in the Edge of the World timi ca-uk sungah California ramtthen ih linghnin ttheunak Park field thu a ngan. Famkim Siarbet

Tony Blair in Iran Do A Duh

AFP News Agency in a tarlang nakah Bristh PM hlun Tony Blair cun Europe ram pawlcu ralkap leh ralthuam cahnak hmangih Iran do dingin timtuah awknak neimai sehla a duhthu a sim tiah a tarlang.

British PM hlun Tony Blair cun Iran thilti dan leh umdan zoh tikah thil tthalo leh thil ttihnung a thleng rero ih, Terrorist pawl a bawmnak khal a bansan duhcuanglo ruangah ralkap cahnak hmangih domai tilo cu lamzin dang a har a si  a ti.

Tony Blair hi Meddle East rampawl lakih daihnak leh rualrem awknak um dingih tawlreltu ttuanvo neitu a si vekin Meddle East ram pawl a tlawn vivo nakah Iran thil tidan a ttihnun zia a hmu vivo ih, Iran thiti dancun buainak tthih nung tumzet a hringsuak dingih, Cabuai par ihsin rualrem nakding thuhla relkhawm dingih tawlrel rero laiih, Iran in thinlung danglam a rak putcu zohliam menmen dingci a silo a ti.

Himi laiah zumcia vekin  Iran Nuclear Programme thuhla ih leitlun ramlian 6 leh Iran ram Cozah aiawh tu Turkey ram khawpi Istanbul ih an biakawk nakcun a tluangzawngih ngaihtuah ding thuhla zianghman relsuak theihmi an neilo ih, Iran hi Nuclear ralthuam ziangmaw zat tuah tumih ramliam 6 pawlin an puh ruangah a Nuclear tuahnak thilri pawimawh ziangmaw zatcu caang theilo ih retsak an tumih, hihi Iran cun a pawmduh silo Asinan himi thuih biakawk nak neihcu a duh hmunhma ih an buaipi zet.

Lebanon Ram Politics Din Hmun

Lebanon ram ih Hezbollah Tapung pawlin an ramih rorel nak co dingih timtuah awknak an neihthu an theih ruangah tui Prime Minister, ttuanlai Saad Hariri ih lam ttangpawlin an duhlo nak an langter rero lai. Lebanon ramah hin tui Prime Minister, ttuanlai ihpa Rafik Hariri kha kum 2005 ah thah a siih, Himi thuhla zingzawitu UN aiawh tu pawlcun Rafik Hariri thattu ah Hezbollah pawl an rak puhzo.

Cumi hnuah Cozah pahnih ttawmaw in Cozah nak din a siih, Cui Cozah ttawmaw dinmi cu tuithla  ni 12 ah khan tthiahbal a siih,PM Saad Hariri in PM sinak cu a co vivo theinan Hezbollah pawlin an ram PM dingah Najib Mikati an hrilzo ti theih asi ruangah PM Saad Hariri ih lam ttangpawlin duhlo in an lungawilo nak hi an langter nak a si.

US Satae Department thupaungtu, PJ Crowley cun himi thuhla hi US Cozah in a ngai pawimawh zetih, US Cozah in Hezbollah pawlcu Terrorist ih a ret ruangah Lebanon ramih rorel nak an co a si ah cun  US leh Lebanon ram phehtlaih awknak cu a se zetding tiah a sim.

Next Page »