NATO Ralkap in Tapung 53 Kap That

NATO Ralkap in Tapung 53 Kap That

NATO hnuaiih Internatinal Security Assistance Force (Isaf) in a sim nakah Pakistan ramsung Afghanistan ram thawi an ritawk nakah NATO ralkap pawlin raldo nak Vanzam Apache Helicopter 2 hmangin  Missile in Tapung minung 53 an kapthat tiah a sim.

NATO ralkap pawlin Tapung pawl an kahthat mi lakah Civil mi an tello tiah an sim nan theihfiang nak ngaingai cu an umlo. Pakistan ralkap pawlcun  NATO ralkap pawlhi an raldo nak Vanzam thawn Afghanistan ram ihsin an ramsungah an zuanglut tiah an simih, Isaf thupuangtu Sgt Matt Summmers khalin  NATO ralkap pawlhi Tapung pawl kap dingin Pakistan ram sungah an zuanglut ticu a phalo nan khuitawk ihsin Pakistan ramsungah an zuanglut ticu a rellang duhlo.

Venezuela Ram National Assembly Member Hrilawk Nak

Venezuela ram roreltu National Assembly Member  hrilawk nakah  tui President ttuanlai Hugo Chavez ih hruaimi United Socialist Party cun  Seat hmunthum tthenih hmunhnih a hmu banlo. Tui National Assembly Member hrilawk nak an tuah mihin hnakum 2012 ih an ram Presidnet hrilawk nak ding dinhmun a langfiang terzet dingih ruah a siih, an ram National Assembly Member Seat 165 sungah tui an President, ih hruaimi  United Socialist Party in Seat 90 a coban nan  Opposition Party tum  Table for Democratic Unity in Seat 59 lai an lakban ve ruangah leh Party dangdang khalin Seat ziangmaw zat an raklak ve ruangah National Assembly ah hin tuihlan hnakih opposition pawlhi an cak zet dingah ruah a si.

Venezuela ramah hin tui President ttuanlaitu Hugo Chavez ih hruaimi  United Socialist Party in kum reizet lalnak an co ih, Opposition pawlhi an cah lo tukruangah  tui an President, Hugo Chavez hi a duhtawkih lalzet a siih,  Asinan tuittum an hrilawknakah Opposition pawl an tlintam ruangah an ram dinhmunhi an remtha theideuh dingah ruah a si.

Asinan tui National Member an hrilthar mi pawlhi  hnakum January tha ihsi lawngin  National Assembly ih rorel theiding an si ruangah Tui an President leh Cozah pawlhin thil lamdang an tuah ciamco kemaw? tihi  leitlun Politician pawih thlir bikmi a si.

Isreal Leh Palestinian

Isreal in West Bank  Palestian  pawlih umnak hmunih Juda miphun pawlih umnakding Inn a sak rero mi thla 10 sung colhsan lawk hrih dingih thusuah nak a neih micu tihni zan  nazi 12 ah khan a tawp. Asinan Isreal Prime Minister, Benjamin Natanyahu cun  Palestinian hruaitu pawlcu ruamrem awknak hawlih biakawk nak neibet dingin a sawm thotho.

Himi laiah  Palestinian Authority President, Mahmoud  Abbas cun Isreal leh Palestinian karlak rualrem awknak lamzin khamtu bikcu Isreal in West Bank Palestinian pawlih umnak hmunih Juda pawlih umnakding In sakbet vivo a tum mihi rualrem awknak lamzin khamtubik a siih,  Curuangah  West Bank ih Juda pawlih umnakding Insak colhsan nakding thupek a sutsal a si ah cun  Isreal thawi rualrem awknak lamzin hawlih biakawk nak neih in umzia a neilo tiah a simve.US khalin West Bank ih Juda pawlih umnak ding insak colhsan hrih ding thupek suut lo dingin Isreal cu a ngen.  Asinan Isreal cun West Bank ih Juda pawlih umnakding  In sak mihin Palestinian thawi rualrem awknak lamzin a khamlo tin a simve.

Palestinian Authority President, Mahmoud Abbas cun himi thu ah tuithla ni 4 ah khin Arab ram dangdang hruaitu pawlih ngaihdan a la khamw dingih cumi hnuah rualrem awknak lamzin hawlih biakawk nak neih a duh leh duhlo a relleh ding.

Isreal Cozah cun West Bank ih Juda mipawl umnak dingih In sakmi colhsan hrihdingih thu a suah thla 10 a kim ih a cemveten mizan sun ihsin West Bank ah Bulldozer ziangmaw zat a thlahlut ciamco cih ih,Asinan  Juda pawlih puai Sukkot hmanding a si ruangah hna ttuanhi an ttancih theilo dingih zum a si. Bulldozer pawlhin an luh veten In 50 saknak ding hmun  an nawrcih ciamco ih, West Bank thlanglam Ariel leh Adam, leh Oranit hmun pawlah hna ttuan hi an thok rero zo.

Kum 1967 ihsin Isreal in  West Bank leh East Jerusalem hi an luah ih  tuah hin Juda minung tingnga 5,00,000 lenglo an um.

THEOLOGICAL EFFECT

THEOLOGICAL EFFECT

By: Hniangsinpa

Mirang tong hi kan sang lo thei lo, thiamnak lam ih tah ding ahcun in theitu lek a kiang naiih um dahtu cun in hnihsan ko ding. Hmansehla, ka ca ngan duhsannak in a neh deuh ruang sawn ah siin ka thei, ka sang ve theu. Ka hmel theih pakhat cun, “American” tiin America khi sim theu. Ram sim duhnak a si ahcun, ‘America’ vun ti ding a si nan, hitin i ruah theu, “Ka thei lo a si ce lo, hmansehla kan Lai tongih ka rel ahcun, American ka ti ding, cumi cu kan tongah kan la lut sawn ding ih, mirang simaw, tong dangih kan sim le rel ahcun, America kan ti ve mai ding… kan tong cun American a si” tiah hni huahho phah, thungai mitmeng si fawn siin i sim theu. A dik tiin lu ka sut pi lo nan, a cang thei mai ding tiah ka ruat rero. Mirang tong ka rel ve duhnak ah ka rak ngan tam sual man zik si… kei theu len, tar lam tit a fam cu, in theithiam uh law.

Kan ram ah, zirnak tha ngaingai kan nei lo, kan nei thei nawn lo ti sehla, thuphan per zutzo cu kan si zik lo!!! Curuangah, mirang thiam duh le buaih duhah tiin Bible tlawng kan pan ciamco. Thealogical student hi santhar mino ahcun kan tam sawn lo ding maw? tiih ruattu an um khalah dem theih an silo mai thei. Cumi cu a tha lo tiin ka sim lo… hmansehla a effect (rahsuah/hrinsuah) mi hi kan ruat cio dah ko ding ka zum, kei cun ka mi bang lo zawn a si vekin, ka ruahnak, ka ruahdan a dang, beiseinak in pek rualrualin, ‘Pang (If) timi hi in ti thuanawptu silo hram sehla ka duh.

Ka ruah pakhatnak cun, tui kan ram dinhmun ah kan ruat tello thei lo. Tlawng a tam hung tam deuhdeuh, saya an tam deuhdeuh, pastor an tam deuhdeuh ih, tuannak ding a mal fawn ruangah, pawl kekkuai a tul!!! Tlawng bangawi kai le zir silonak cun, pawm dang a bangaw thei lo, mai buaih kan ruataw lo thei lo, curuangah, kan thenawk vivo a tul!!! Pawm dan le, si duhnak in hmun a co kauh tuk ruangah, Hnam feeling luh a tul!!! Cumi cun in ti fiak deuhdeuh, Christianity maw Socialism kan si, ti hman ruat nawn lo in, theology kan zirmi cun in ret!!! Pom dan bangaw lo tuk siri cun Sakhuanak dang tiang ah in hruai!!!

Miphun in kekkuai ter ti tiang hmanih sim ngamtu an um ka zum. Si e, thil cu a se zawng ih kan ruah rualrualin, a khatlam kan ruah a tul. Cumi thawn pehparih, ka rel duhmi cu, kei cun mi rel le sim mi ka theih a si lo, ka lungsung puak/taang sung suak a siih, rel duh mi le khih duhmi minung ka rello. Ngan sau ka tum zet nan, ka sim duhmi ngaingai sawn ka hngilh pangah…

Ka ruah pahnihnak cu Hmailam hrang ah a tha zawng ih rah a suah thei ka beisei. Church History vun rel sehla, a hram thoknak a si cu ka ti ngam lo nan, 1517 ih Martin Luther in ‘The Ninety-Five Theses’ timi ca a suah le European Religious War timi ti cemtu 1648 ih Treaty of Westphalia thawn pehpar khalin, a rak siatnak cu Corruption ruangah a si. Humanism ihsin Protestanism ah, thu dangdang rel bet ka tum lo. An sual, an tha ka ti lo. Germany lenglam ih an buai thoknak khal rel ka tum lo. Rak buai lo sehla, Politician hnuaiah maw kan um dingih, Religiuos hruaitu kut hnuaiah??? Cumi khal a tha ka ti bik lo. Ruahnak hrangih ka ngan tel mi an si.

Ka sim duhbik mi cu, Theological Effect tiih thupi ka tar mi khin, kan ram a rem sal thei kemmaw? Kan sakhuanak lawng kan effect ter pang kem? Kan culture, believe lawng a thleng ban pang kemmaw? Thla a tem zik nan, nonawn an um lai tiah ka thumaw ko. George Whitefield cun Sept. 14,1740 ahkhan a pal dahlo mi leilung pal in, Anglican mi in a tum ruang khal silo ih an pulpit hman a siannak cun, England ram pumpi a tuah tha thei. 1741-1742 cu England ram hrangah sim bet tullo ih kum pawimawh ah a hung cang ta riai!!!

Cumi cu a si ‘Theological Effect’ dik ka ti mi. Kan ram zir sang, Theology sangsang thiam, pawl hi tang khawm sehla, minung pakhat ih thangphawknak in rampi hmailam lamzin a khihhmuh thei ahcun, kan ramah Theological Student kan um si!!! Khuanu malza sawmnak hmangin kan zir theh ta cheng cu, “Let there be Theological Efecct, that can change the Country, Culture, Believe” tiin kan au khawm suak mai lo ding sawm? Secular zir dingah kan ram in in pe lo ta ceng cu, kan Theology zir hmang tal hin, kekkuai lam bawh loin, remthat hna kan tuan tlang khawm thei lo ding sawm… tiah ka sawmaw duh a si.

Ra Kir Saal Aw

September 29

Tlawngkai Nithum

Ra Kir Saal Aw

Siar:

Hosea 14

An parah ka thin a heng nawn lo ding.     – Hosea 14:4

Kumkhat Sung Baibal:

-   Isaiah 7-8

-   Efesa 2

Judah mi pawl an tlukbah ih an dungtolh tikah Pathian in ziangtluk a thin an natter zia Hosea hnen ihsin theihter hngai a duh. Famkim Siarbet

Sersiamnak: Thukam Thar Style

September 28

Tlawngkai Nihnih

Sersiamnak: Thukam Thar Style

Siar:

Efesa 1: 3-6

Leilung a sersiam hlan hman ihsin Pathian in kannih cu Khrih thawn kan pehzom awknak thawngin Amai’ hmai ah mi thianghlim le mawh nei lomi si dingin Amai’ taa ah in rak hril zo.     - Efesa 1:4

Kumkhat Sung Baibal:

-   Isaiah 5-6

-    Efesa 1

Thukam Hlun sungih mangbangza sersiamnak kan ruah tikah Pathian in Famkim Siarbet

Hrilawknak Hrang Phuanzarh Awknak (Campaign) Nei Thok

Kawlram hrilawknak ding hrang, mipi hnenih phuanzarh awknak (campaign) cu acozah theipi ih sian a si thu Radio le TV ah ahmaisabik nak hrang puan suahnak an nei thok.

Famkim Siarbet

UN Lubik In Asia Ram Pawl Kawlram Nawr Ding Fial

UN hotu lubik Ban Ki-moon cun Asia ram pawl hnenah Kawlram ralkap pawl ih tuah an tum mi hrilawknak ah nasa zet ih hmainawr pinak an neih lo ahcun an zumawknak pawl a ti buai thei ding tiin a sim.

UN General Assembly tuisun tlawngkai nikhat niih an neihnak ding khal ah Ban hin Kawlram ih inn hnen ram pawl hnenah tu hnak ih tamsawn tuan dingin a fial. Hi an tonkhawm thurelnakah minung covo, harsatnak ih bawmnak lam le Kawlram hrilawknak November 7 niih an neih dingmi pawl an rel ding. Britain, United State le Canada cun a dokalh lam zawngin thurelnak an nei zo.

Famkim Siarbet

Pathian hmai le Minung hmai ih Mit-hmai ttha cotu

Pathian hmai le Minung hmai ih Mit-hmai ttha cotu

Thuhmaihruai

“Mit-hmai ttha cotu” si ding cu mi hmuahhmuah ih duh ciomi a si. Zumtu hmaisa pawl cu mi hmuahhmuah hnenin mit-hmai ttha an ngah (Tirh. 2:43). Khristian kan nunnak ah mipi hmai ih mit-hmai ttha cotu kan si ding hi a thupi ngaingai. Cuhnak hmanin a thupi sinsinmi cu Pathian ih mit-hmai ttha cotu si ding hi a si. Minung hmai lawngah mit-hmai ttha ngah ih Pathian hmai ahcun hrem-hmun fehtu ding si cu ziangso sullam a neih? Cuvek tthiamtthiam in zumtu si na cingih kawhhran le mipi hrangah zianghman tthathnemnak nei lo, zo hman pawlkom thei lo cu nun man nei lo a si. Tisa nun le thlarau nun buk awton thiam a thupi. Bible sungah “Pathian hmai le minung hmai ah mit-hmai ttha a co” timi hi hmun thum: 1Sam.2:26, Luka 2:52 le Thufim 3:4 ah kan hmu. Tuni CE Sunday ah Pathian hmai le minung hmai ah mit-hmai ttha cotu mi nasa pathum pawl – Jesuh, Samuel le Solomon ih nunnak zoh in thlarau thazaang la tlang uhsi!

1. A kilkip ih a tthang mi Jesuh

Jesuh cu taksa in siseh, fimnak in siseh a tthang vingvo ih

Pathian hmai le minung hmai ah mit hmai ttha a ngah (Luka 2:52)

“Tthanso” hi mit-hmai ttha conak a si. Tisa nun ah siseh, thlarau nun ah siseh a kilkip ih tthangso pawl in mit-hmai ttha an co hleice. Bible thiam pawl in Jesuh ih tthanlen daan hi: taksa (physical), fimnak (mental), mipi hmai ah (social) le thlarau nun (spiritual) ah a kilkip in, buk awton (balanced) in a tthangso an ti. Pathian hmai le mipi hmai ih mit-hmai ttha co dingah taksa-thinlung-thlarau ah rundam mi si a ttul. Kawl pawl in mipi ih hmaizah mi si ding cun mi pakhat in, “balah-nga-ttan: kayah balah, ngianah balah, bawkah balah, mikttah balah, le sarikttah balah” a neih thei a ttul an ti. Mi damcak, mi fimthiam, mi neinung, mi pawlkom thiam le nuncan ziaza ttha neitu pawl cu mit-hmai ttha cotu an si.

Micak, zir saang le thiamnak saang nei ih thiltithei pawl in mipi ih upat an co. Amahlawngte micak le mithiam si cingin nuncan ziaza tthat lo ruangah mi ih ziang siar lo mi khal an um ve. Cule leitlun tisa daan ah mi tawkzet si cingin thlarau nun ah Pathian Thu le kawhhran zianghman ngaihsak lo le nun dawngdah ruangah mipi ih mit-hmai ttha co thei lo khal an um thei. Tulai san tla  ahcun Pathian thu ih nung lo pawl cu ziangtluk milian le mifim an si hmanah, khuatlang le miphun hruaitu ding ahcun mipi in an rinsan thei taktak lo. Micak, milian le mifim, mithiam, mifel, le ahleice in Pathian ttihzahtu pawl cu hmuntin le ramtin ah mipi ih rinsan tlak le mit-hmai ttha cotu an si.

Duhdawtmi zumtu, nitin kan nunnak ah mi harhdam si thei dingin ei-in le nun daan ah thiam uhsi! Tikcu caan ttha kan ngah tinte’n fimthiamnak zir uhsi! Kan innhnen vengpa le kawhhran sungtel pawl thawn duhdaw aw te’n pawlkom thiam uhsi! Ahleice in bulpak thlacam le Bible siar, mibur biakkhawm le thlaraulam cangvaihnak ah taimak suah in caan pe uhsi! Cuticun taksa daan ah siseh, fimnaklam ah siseh, mi pawlkomnak ah siseh, thlaraulam ah siseh kan tthangso dingih Pathian hmai le minung hmai ah mit-hmai ttha cotu kan si thei ve ding.

2. Pathian Hna a ttuantu Samuel

Nauhak pa Samuel cu Pathian hmai le minung hmai ah

mit-hmai ttha co in a tthang vingvo (1 Samuel 2:26).

Samuel in Pathian hmai le minung hmai ih mit-hmai ttha a conak hi Pathian ih hnattuan thianghlim ttuantu a sinak in a si (1Sam.3:1-14). Ahleice in Bawipa ih kawhnak aw a theitu, rin-umzet in nungtu le Bawipa ih umpimi a si ruangah a si. “Nauhak pa Samuel cu Bawipa ih hnattuan in a tthang vingvo” (c. 21b); “Nauhak pa Samuel cu Eli ih kut hnuai ah Bawipa ih hna ttuan in a um” (1Sam 3:1). “Samuel cu a tthang vingvo. Bawipa a hnenah a um ih a simmi hmuahhmuah Bawipa in a kimter ttheh. Curuangah Israel mi hmuahhmuah in, an ram zim le dengih a ummi pawl tiangin Samuel cu Bawipa ih profet a si tiah an thei ttheh. Samuel hnenih a langnak hmun Shiloh ahcun Bawipa cu cat loin a lang ringring. Cule Samuel a ttong tikah Israel mi pawl in an ngai duhzet” (1Sam.3:19-20).

Samuel cu a nu in thlacamnak in a comi fapa te a si ih a nauhakte lai ihsin Pathian hnattuan dingih apmi a si. A nu in Pathian thu a zirh, thla a cam sak ih Pathian hnattuan dingin a ap. Kumtin angkifual a tthit sak ringring. Cubangin tuni ah hringtu nu le pawl kan thupi ngaingai. Nu le pa pawl le zirhtu pawl, kan fanau pawl hrangah thlacam ringringtu, Pathian thu zirhtu le Pathian hna an ttuan theinak dingah thapetu le kaihruai thiamtu si dingin zuam cio uhsi!

Duhdawtmi zumtu, nauhak kan si ah, mino kan si ah, nupi papi upa kan va si ah Bawipa ih in duhsakmi cu a hnattuannak ah mah le ti thei tawk tel ding hi a si. Bawipa in a hnattuannak ah hman theih lo mi a nei lo. Innsungsang ah siseh, Kawhhran ah siseh, khuatlang ah siseh nuncan ziaza mawi le dingfelnak thawn rin-umzet ih hnattuan ttha ttuantu kan si ding Bawipa in a duh. Tuni leitlun ih mi hminthang le Pathian hnattuantu mi maksak pawl ih nunthuanthu kan zirzoi tikah mi zaangzel zohman an um lo. Pathian theitu le Pathian zumhngettu, Pathian hrangah pumpetu le taimazet ih hnattuantu pawl hlir an si. Curuangah Pathian hmai le minung hmai ah mit-hmai ttha cotu an si theinak a si.

3. Fimnak zir le ciingkengtu Solomon

Ka lo zirhmi pawl kha hngilh hlah.

Tuah dingih ka lo simmi pawl kha ciing rinring aw.

Cubangtuk in na tuah asile Pathian hmai le minung hmai ah

duhsaknak le hmin tthatnak na co ding (Thufim 3:1, 4).

Mit-hmai ttha cotu si ding cun fimnak zir le thiamnak neih a ttul ti a fiang. Fimnak kan ti tikah a tlangpi thu in phunhnih: leitlun fimnak le vanlam fimnak ti’n tthen a theih. Khawvel fimnak cu thlarau thawn a raal awmi khuavang fimnak a si ih iksiknak, nahsuahnak, hamttamnak le buainak a suahpi. Vanlam fimnak cu a thianghlim, daihnak in a khat, a lung a neem ih mi pawlkom a thiam. Zaangfah thinpemnak a nei ih hnattuan ttha ih rah a suahter (Jeim 3:15-18). Solomon in, “Pathian ttihzah cu fimnak ih hramthoknak a si” a ti (Thuf.1:7). Curuangah khawvel fimnak si loin Vanlam fimnak a zir ngahtu kan si ding a thupi ngaingai. Paul in, “Khrih cu hlawnthil mankhung bangin thuhmi le khummi Pathian ih fimnak le theihnak hmuahhmuah on theinak tawhfung a si a ti” (Kolose 2:3).

Thufim ngantu in, na zirmi pawl hngilh loin, tuah ding timi pawl ciing ringring awla Pathian hmai le minung hmai ah duhsaknak le hmintthatnak na co ding a ti (Prov. 3:1, 4). “Nangmah le nangmah duhdaw aw awla, fimnak kha na zir thei tawkin zir aw. Cun na zirmi kha ciingkeng ringring awla na thil tuahmi ah na hlawhtling ding” (Prov.19:8). Pathian thu kan zir thei daan hi: thusimmi ngainak (listening), casiarnak (reading), zirzoinak (study), zoh lo ngah (memorize), le ruat thuk (meditate) ti’n (5) in a um. Pathian thu kan theihmi kan thinlung sungah kan ciingken asile kan nunnak a kilhim in a ttuah ttha ding (Saam 119:11).

Fimthiamnak hi zir ding lawng si loin thinlung sungah ciinken ding a thupizet. Bible siarnak in siseh, thuthangttha simmi ngainak in siseh, Sunday School ah siseh, Pastor, Evangelist le Saya/ma pawl hnenin Pathian Thu tampi kan zir. Asinan mi tampi cun hminsin lo le ciingkeng loin kan hngilh cingcing men. Thinlung tak te’n thungai thlak in kan ruatthuk lo ih atak ih nuncih kan tum lo. Curuangah, thlaici vorh thuanthu ih lamzim parih a tlami, lungsiadap lak ih tlami le hlingbur lakih tlami vekin kan zirmi thu tthattha cu an hlolak saal thluh. Cuti si loin kan ngai ngahsun, kan siarmi le kan theihmi thuthangttha cu kan thinlung sungah ngankhum le ciingkeng in kan nuncih asile ram tthatnak ih thlaici kho bangin a let sawmthum, sawmruk le zakhat tiang a karhzai ding a si. Cuticun Pathian hmai le minung hmai ah mit-hmai ttha cotu kan si thei ve ding.

Thunetnak

Duhdawtmi nauhak pawl, mino pawl le nulepa pawl, kan nunnak ttha te’n kan cekfel aw pei. Pathian hmai le minung hmai ah mit-hmai ttha cotu kan si maw? Pathian kawhnak aw thei in kan awi zo maw? Jesuh Khrih cu i Runtu le ka Bawipa a si ti’n kan cohlang zo maw? Nitin kan nunram ah; taksa in siseh, fimnak in siseh kan tthanglian maw? Kan fimnak dingah casiar le zirnak a phunphun thawn tthansonak kan hawl maw? Kan zumnak a hngetkhoh ih a cak sinsin theinak dingah nitin Bible siarnak le thlacamnak in caan kan hmang maw? Pathian biakkhawmnak le Pathian thu zirnak ah kan nuam aw maw?

Zumtu zate hi Pathian hmai le minung hmai ah mit-hmai ttha cotu ding kan si. Khrihfa cu mi ih nautat mi si loin mi ih ttihzah mi si dingah Pathian in in duhsak. Kan bawipa Jesuh Khrih bangin taksa in siseh, fimnak in siseh tthanglian ding; Samuel vekin Pathian ih kawhnak aw thei in, Pathian awi in, Pathian hnattuan rin-umzet ih ttuan ding; le Solomon vekin fimnak zir ih zirmi ciingkeng in ziangkim ah hlawhtlinnak a hmutu si thei dingah zuam cio uhsi!

Rev. Run Cung Mang

Senior Pastor, LCF Malaysia

Mikhual Zoh Ttha

September 27

Tlawngkai Nikhat

Mikhual Zoh Ttha

Siar:

Rom 12:3-13

Phunzai lo tein nan inn ah pakhat le pakhat tlungter aw uh.  -1 Peter 4:9

Kumkhat Sung Baibal:

-   Isaiah 3-4

-   Galati 6

Thukam Thar sungah khual tthat cu Khristian nunzia hminsinnak tacik a si. Famkim Siarbet

Hngilhzomi Hnattuantu

September 26

Nipi Ni

Hngilhzomi Hnattuantu

Siar:

Hebru 6: 9-20

Pathian in mi a thleidang lo. Nan hnattuanmi siseh, Pathian nan duhdawtnak langter tahrat in nan khristian rualpi nan rak bomnak le atu khal ah nan bom reronak pawl hi siseh, Pathian in a ciing ringring ding.     – Hebru 6:10

Kumkhat Sung Baibal:

-   Isaiah 1-2

-    Galati 5

Lung khaampi pakhat parah American President hlun pawl ih lu zuk tumpipi in an suainak South Dakota ram tthen ih Mount Rushmore cu leitlun minung Famkim Siarbet

Iran President, Thu Simmi Ngai Thlak Tlak Lo

Iran President, Thu Simmi Ngai Thlak Tlak Lo

Mizan sunih UN  General Assembly New York khawpi ih an neih nak hmunah Iran President, Mahmoud Ahmadinejad cun thu a simih, kum 2001 September 11 ih New York khawpi ih  World Treda Centre siatsuah tukha mi tampi cum US Cozah ih siatsuah mi a si sawn ding tiah an zumih, WTC siatsuah tu ih Al-Qaida pawl zumtu cu US mipi pawllawng an si tiah a sim.

Iran President, in hiti vekih thu danglam zet leh makzet a sim ruangah hi UN General Assembly ih  kaitu ram dangdang aiawhtu ziangmaw zatcun  ngaithlak tlaklo thuphan thu tiah ruatin an suahsan. Iran President cun WTC siatsuah danih thil umdan thlir rero tikah US Cozah in a sumpai dinhmun tlaksiat ruangih thuhla elbuai awkleh buainak tumpi a tawnding ruangah cumi khuh hliah nakding lamzin hawlih a siahsuah mi asi ding tiah ruah theih a si tiah a sim.

Cumi ih hleiah Isreal a tanduh tuk ruangah lamzin hawlin Meddle East ram do nak remcang lamzin a hawl duh ruanag WTC kha a siatsuah a si thei tikhal a simbet. Iran President, hin tuihlan khalah US ram paisa dollar cu hmantlaklo hnah romro vekmen a si tikhal a simzo.

Iran President, ih thusim himi US, England, European Union , Canada, Australia, New Zealand leh Costa Rica ram aiawh tu pawlcun ngaithlak tlaklo a si tiin an suahsan ih, Asinan Iran President, cun a thusim bansan duhcunglo in a simbet thotho ih, thildik leh thudik cu, thudik leh thil ttha duhlo mibum tum pawlcun an ngaingam lo ding a ti.

Iran President, Mahmoud Ahmadinejad cun Nuclear ralthuam neitu ih Iran puh ringring duhtu an umcu cu a pawizetih, leitlun ram tthangso pawl khalin Nuclear ralthuam leh Nuclear cahnak hmangih thiltuah suakdan an theih thleidang thiam duhlo hrimcu pawi a tithu a simih, hnakum kum 2011 ah cun leitlun hi Nuclear ralthuam umlo nakih tuah dingih hna ttuan a duhthu khal a sim.

China Leh Japan

Theicia zo vekin  tuithla ni 8 ih China lawng leh Japan lawng Red China Sea ih an ttaih awkah khan Japan lawng ralkap pawlin China lawng leh a hna ttuantu minung 15 an kaiih,cumi hnu ah China lawng hnattuan tu minung 14 cu suahsal an si hnuah Lawng Captain, Zhan Qixiong cu suah duhlo in Japan Cozah cun an hreng hrihih, himi thu ruangah China leh Japan karlak hi a se nasa.

Asinan China Cozah in  an lawng Captain, Zhan Qixiong cu suah tengteng dingih Japan Cozah a nawr ruangah leh  China in an ram ralthuam pawimawh retnak hmun pawl zohthup ih zuk tuah puhin  Japan ram mi minung 4 a kaihsak ve ruangah, Japan Cozah Lowyer Toru Suzuki cun China lawng Captain, hi an suahsal dingthu mizan sunah a puangih China leh Japan karlak ih boruak thalo leh huatawknak a suahlo nak dingah Japan Cozah cun  Lawng Captain,  Zhan Qixiong hi an suah ding a si a ti.

Himi thu ruangah China Prime Minister, Wen Jiabao khalin China in a dil vekih an lawng Captain, Zhan Qixiong hi Japan in an suahlo a si ah cun a sawhkhok an tuarngam a ttul dingih, ziangvek thil thalo a suakpang a si khallen  Japan ih duhhril nak a sidingih China in mawh a phurlo ding tiah Japan hi a rak hro rerozo.

US Secretary of State, Hillary Clinton khalin himi thuah a rualrem theibikih thu reltlangih ram pahnih duhdaw awzetih an um tlangding a duhthu a sim.

Teresa Lewis An That Zo

Relzo vekin US Virginia State ih a pasal leh a fahrawn mi thatter tu Teresa Lewis kum 41 micu mizan zingah Greensville Correectional Centre ah thihsi ih dawhthat a siih, a pasal leh a fahrawn kapthat tu midang 2 cu damsung thawngtla dingih an thu relsak an sive.

Tetesa Lewis hin an thah hlanah ei ding thawzet a duhzawng a ngenta ih cumi a ei thluhin an thahnak ding hmunlam ah hruai a si ih, a pasal leh a pasal ih fa an thahmi cu a duhdawt zet thu leh a thil diklo tuahmi ih pawi a tithu a simta.

Gennady Yanayev A Thi

Soviet Union Vice President, hlun Gennady Yanayev kum 73 micu mizan sunah a thi. Gennady Yanayev hi kum 1991 ih President, Mikhail Garbachev ih rorel nak ralkap cahnak  hmangih rak hlawnthlatu kha  siih, himi ruangah Soviet Union rampi kekkuai ter thluhtu ih ruahmi a si.

kum 1991 ah khan President, Mikhail Garbachev kha Ukraine ramih a tlawnsungah a ram rorel nakcu a mai kutsungih a um thuleh a mahcu President, a sithu a rakpuangih, a sinan  amahcu ni 3 hnuah a lalnak  hlawnthlaksal a siih, lehhnu ih Russia rampi a rung kehkuai sannak bikah a mahcu puh a siih, leitlun khalah a hmin a larphahzet nak a si.

Aung San Suu Kyi  Vote A Pe Thei Ding

Mizan sunih Burma ram ralkap Cozah hotu pawlin thu an suah nakah tuikum November ni 7 ih Burma ram hrilawk nakdingah Aung San Suu Kyi khalin Vote a peve theiding tiah an tarlang. tuihlan ih Burma ralkap hotu pawlin dan an raktuah miah Thawngtla laipawlcun  Vote an pe theilo ding timi a umih, Asinan  Aung San Suu Kyi leh an Party hotu midang 2 cu ThawngInn sungih um an silo ih, an mai umnak Inn sung ihsi leng suak theilo dingih khumtar mi lawng an si ruangah an umnak Inn sung ihsin Vote na pe theiding tiah an sim. Suu Kyi hi hrilawk hlan khalah  Vote an thlak ter menthei.

Justin Sanghrinthang (Thangkuk) Le CT Palai Kawm Aw

Chin Nonawn lak ih langsar zet

Chin Star News, Chief Editor tuan rero lai, FCCI Youth secretary tuan rero lai, US Chin New Year Festival (2009-10) ih Biazai ngan zuamawknak ih pakhatnak latu le Hlasak zuamawknak ih pakhatnak latu  US nonawn star pakhat a si mi Justin cu kan CT palai thawn an kawm aw.

Ka thuhla tawi

Justin   : Ka hmin Justin Sanghrinthang (Thangkuk) a si. Ka Pa cu Pen Thang a si ih ka nu cu Sayamah Lian Sung a si.

Naupa pakhat ka nei ih Tha Lian Thang (Thangte) tiah kan ko. March 08, 1990 ah Falam ah ka suak. Tukum hi Perry Meridian High School in high school ka theh pek te.

A tu fang cu Indy Chin Pawlpi, USA ah Public info; Culture and Literature tuanvo ka kai ih Chin Star News ah Chief Editor ka tuan. Cun, Falam Christian Church of Indianapolis ah Mino Secretary ka si.

CT      : Lai Kum Thar Puai, 2010 (Chin New Year Festival ) ih hla zuam-awknak ah pakhatnak ngah ding in ziangtluk na timtuah (prepare) ?

Justin   : Lai Kum Thar Puai ah hlasak zuam-awknak a um ding ti ka thei vete’n “Chin Community” timi Biazai cu thlacamnak thawn ka ngan cih. Cumi Biazai ka ngan mi cu ka u pa Chigaco ih Salai Ngun Nawl thawn aw thluk kan bun. Cutheh in Indy Chin Band pawl ih zuampinak in kan zir (practice) ringring puai thlen hlan tiang. (Indy Chin Band : Lead guitar : Salai Lai Lung Lian, Bass : Salai Ko Aung, Drum: Salai Siang Lian (Siangte), Guitar : Kunrirak (Ukte).

CT      : Himi hla na sak laifang ah ziangmi na feeling?

Justin   : Ka hla ih a ti duh san mi pawl ka feeling phah. Kan suulphumnak ram a si lo mi ram ah kan um na’n sikhawh Chin Community,USA ruangah Chin thangthar nonawn le Chin mipi hizat nuam le hlunghlai zet in Lai Kum Thar kan tuah thei ti’n ka hla uar zet in ka sak.

CT      : Mai hla phuahcop asiih pakhatnak na ngah ding na rak zum cia maw?

Justin   : Ka nu le ka pa, ka sungkhat pawl, ka rualpi tha pawl le saya pawl thawn Pakhatnak ngah ding in Pathian hnen ah thlacamnak kan neih hnu ih zuam-awknak ah tel mi ka si ruangah hnangamnak kim thawn zuam-awknak ah ka tel.

Biazai ka ngan mi a zate in cu 70 a luan zo.

CT      : Tui kum 2010 fang-er puai nan hmannak ih na duhbikmi le na duhlobikmi pakhat veve in sim aw..?

Justin   : Ka duhbikmi cu Laimi tamzet hmun khat ih mai Laitong te thawn vun biak-awk, Laihla sak le mai Lailaam vunlaam tluk ih ka duhmi a um lo. Asinan Laimi hrekkhat Laitong silo a dang tong in an mah le an mah an biak-awk ka theih mi hi ka duhlobikmi a si.

CT      : Nikum Fanger puai Biazai ngan zuamawknak ah pakhatnak na la zo ih Biazai ah ziangtluk na thinlung na rak pe?

Justin   : Singai ! 2009 Lai Kum Thar (Indianapolis) ah Biazai pakhatnak ka rak ngah dah ngai. Hmaisa sawn ah Biazai in thok sehla. Biazai hi ka nauhak laite ihsin ka siar ringring. Burma kan um lai ka phun sarih lai-ah Kawl ka sayapa hnen ah Biazai ngan daan ka rak zir. Cule Biazai bu pawl tampi ka siar. Cun, Falam ih Biaknak lam ih suah mi thuthang ca le cazual pawl ih Biazai khal ka siar ringring. Tong khuun le Lai thuanthu khal tampi ka siar ih cumi pawl nih khal Biazai ngan in bawm zet.

CT      : Hla hi ziangtik in na sak thok ih ziang tluk in na rak paih?

Justin   : Hla lam cu sim ding ka phur zet. Sunday school ka kai thok ihsin hla ka sak thok. Sinan mipi hmai ih keimah te’n pakzai (solo) ka sak hmaisabik cu ka kum 10 lai-ah a si ih Bethlehem Baptist Church, Falam ah a si. Hlasak hi ziangtluk tiang ka thinlung ka peek tile cu hlasak thiam hmin thang pawl ih an kaa caang daan, an kut hawi daan le an mit men daan tiang  in ka rak cawng ih an aw suah daan vek rori in ka aw ka rak suah ciamco. Tu khal-ah hlasak daan le music lam  ka zir rero  lai a si.

CT      : Biazai paziat na ngan zo?

Justin   : Biazai ka ngan mi a zate in cu 70 a luan zo. Hmaisabik ka ngan mi Biazai cu ka kum 15 ramleng kan thlen ni ih ka ngan mi “ Ka Kir Saal Ding” timi a si.

CT      : Hla fingziat na phuah?

Justin   : Hla hicu ka phuah tuk lo. “Ninu Bang Suum Saal Aw” le “Chin Community” hi an si ko. Kei cu a sak lam ka si. Hmailam ah cu Pathian nih rem a ti le a sak tu lawng si lo ih hla phuah vivo khal ka tum.

CT      : Album teh suah leh na tum maw?

Justin   : Pathian nih rem a ti ah cu 2011 sungah Album pakhat suak thei ding in thla kan cam rero lai.

CT      : Mi note na si lai ih na upat tikah ziangmi si na tum?

Justin   : Pathian ih i peek mi ka nunnak hi Khrish le Miphun hrangah ka hmang ding. Ka duhtuk mi hlasak,cangan le lemcang hi ka sunzom vivo ding. Cun , ka hrang ih Pathian nih a tumtah cia mi thil ah lungawi zet ih a cohlang thiam tu si ding ka tum.

CT      : Kawlram (Lairam) ah kirsal na tum maw?

Justin   : Ka kir saal ding ni le thla siar in i hngak rero laitu ka nu Lairam hnenah thansohnak, hlawhtlinnak le nunnomnak thawn a fapa kei in ka pan saal teengteeng ding.

CT      : Kan Chin hlasakthiam lakah zo na uar bik?

Justin   : Pathian hla ah Sangpi le Mai Lal Biak Hnem cun love song ahcun Solomon Menrihai hi ka uar.

CT       : Chinmi hruaitu ah zo na ngaisang?

Justin   : Pu Con Bik ka ngaisang in ka uar a si.

CT      : Na buai thei tuk fawn Chinlandtoday ah na rak leng man ve  maw?

Justin   : Chinlandtoday a um thok ni ihsin tui’ nitiang nikhat veikhat tal a malbik pelh lo ih a zohtu lakah ka tel ve. Ka lo lawmhai zet nan zuamnak parah.

CT      : Chin mino le hlasak, cangan lam a huam mi hnenah cah duh mi na nei maw?

Justin   : Miphun pakhat a thangso theinak dingah thil tampi a tul. Cu mi tampi a tul mi lak sung ihsin awnmawi lam le Calai lam khal hi thansonak kalbak pakhat an si ve. Kan ni mino san ah kan Chin (Lai) awnmawi saang sinsin seh. Kan Calai khal miphun dang hluan in a thum hleicenak lang sin ter uh si.

Atnak sumziing pawl cu cakzet in pah bal ding ah kan zuam ding. Kan tong, kan Calai le Nunphung kilhim vivo uh si ti hi ka cah duh hleiah khui hmun kan um  khal le Chin (Lai) miphun ka si tiah baan phar ngam tu si cio uh si tikhal ka sawm duh fawn a si.

CT : Kan lo naihsin theinak ding ah…

My Website : www.justinthangworld.webs.com
Youtube:  www.youtube.com/justinshthang
CHIN WORLD:  www.chinworld.info
FCCI :  www.falamchristianchurch.net
Chin Bible : www.www.myanmarbible.com/bible/Falam/html/index.html

ID: salaijustin@gmail.com

India Mualpho!

Hmaithla October ni 3 ihsi ni 14 tiang India ram khawpii New Delhi ih  Common Wealth Games neih dingmi ah  Leknak ih telding ramdang mikhual pawlih thlenank ding leh umnak ding hmun len room pawlcu a bawrhhlawh zia leh a ttawpzia  BBC Sport ah tarlang a si ruangah India cu leitlun hmuh nak leh theih nakah a mualpho nasa ih, himi ruangah leitlun ram dangdang ihsi himi leknak dingih teltum mi cak zetzet hmin thang minung ziangmaw zatin tel an tumsal lo thu an puang.

Himi ih hleiah Canada, Scotland, leh New Zealand ram ihsi himi leknak ih teltum pawlkhalin New Delhi an pan nakding tikcucaan  an khawtlai terphah tum.

New Delhi ih CWG leknak ih teltu ding ramdangmi pawlih umnak ding hmun room, ek In, bualawk nak room, ihkhun leh a hmun leh ram hi a balin a ttawp nasa ih a kiangkap ih tidai nawi li pawl leh a rimsia tuk pawl a tamtuk ruangah  ram dang ihsi lek tumtu minung tampi cun an hrisel nak leh a hmun leh a ram a himtawklo ti phuahlam ih hmangin tel an tumlo.

Asinan England ram ihsi lek dingih tel tumpawl cun mizan sunah England ram suahsan in New Delhi an panih, Northern Ireland pawlkhal in hmaizarh tlawngkai ni 1 ah khin an ram suahsna in New Dehi pan an tum. Wales Team Manager, Brian Davies cun thaisunah New Delhi pan a tumve ih, Scotland, Canada, leh New Zealand ram pawlcun ziangtik ah New Delhi an pan ding tithu an simfiang hrihlo.

Relzo vekin New Delhi CWG leknak ding thuhla ah a hmun leh ram a bawrhhlawh leh a rimsiat ih hleiah a thilri tha tawklo leh a ciim leh  asiat a tamtukih, cu ruangah sawisel leh titi thuhla a tamtukih leitlunih India mualpho betnak a si pangding tihi an phangzet.

Himi leknak dingah England rammi leitlun ih Triple Jump Champion Phillips Idowu leh Australia mi Discus Throw ih leitlunih Chiampion Dani Samuels khalin an hrisel nak leh an himnak  ngaihtuah in tel an tumlo thu an puangih, himi laiah England mi Diving in leitlunih Champion  TomDaley kum 16 micun tel tengteng a tumthu a simve thung.

New Delhi CWG thuhla ih sawisel nak leh eiruk nak a tamtuk ruangih thilri leh a hmun leh a ram pawl famkim tei an tuah famkim  theilo ruangah  Prime Minister, Manmohan Singh khalin Sport Minister, M S Gill leh Urban Devolopment, Minister, Jaipal Reddy a relpi ding tiah theih a si.

Next Page »