Pathian Hnen Phone Cakuatnak

March 22

Tlawngkai Nikhat

Pathian Hnen Phone Cakuatnak

Siar:

Kolose 1:3-12

Hi bangtuk in nan thuhla kan theih vete in nan hrangah thla kan cam ringring. – Kolose 1:9

Kumkhat Sung Baibal:

-   Joshua 10-12

-   Luka 1:39-56

Washington Post timi thuthangca ih cahram pakhat ah, kum 15 nute in thla khat sungah telephone sungin ca (message) a kuat suakmi le cakuat a ngahmi 6,473 a kim thu a ngan. Cu nute cun a rualpi pawl thawn cat loih an pehtlaih awk ringringnak parah, “Himi locun ka thi ding,’’ tiah a ti. Amah lawng si loin thu zingzoitu pawl in US ih mino tleirawl tete pawl in a tlangpi thu in thla khat ah telephone message ca vei 2,200 an kuat aw, tiah an sim.

Hivek phone thawn biak awk thei vekin Jesuh zumtu pakhat cio khal thlacamnak thawn Pathian kan biak thei ve ti in theiter. Paul in cat baang loin midang hrangah thlacamnak a nei: “Nan hrangah thla ka cam ringring’’ (Kol.1:9). “Thlarau ih a lo hruainak bangtuk in ziangtik caan poh ah thlacam uh’’(Efe.6:18). “Thlacam ringring uh” (1Thes.5:17). Ziangti’n kan tuah ngaingai thei ding?

Missionary Frank Laubach cun nitin a hmuhmi pawl hrangah thlacam saknak a nei ih, thlacamnak in “mikaptu” a si. Midang hrangah phone ca Pathian hnen kuat sak reronak in, Pathian thawn cat loin pehtlaihnak a nei. Laubach in, “Ka hrang ahcun Pathian thawn cat loin thinlung muril thawn biak awknak nei ding le A Thu vek cekci ih nun ding hi a si” a ti.

Thlacam ringring uh. Paul ih fialmi a si.

Thlacam paihnak thlarau in pe aw, maw Bawipa,

Cuti’n Nangmah thawn kan pehzom aw ringring thei ding;

Ka nunram lamzin bingbo ih ka feh lai ah,

Nang ka hnen um camcin hram.

Thlacamnak hi thawthawt zat in cam ringring ding a si.