Obama in Isreal Leh US Peh Tlaih Awk Nak Siat Thei Lo A Ti

Leitlunih Nuclear ralthuam nei tambik ram 2 US leh Russia cu an Nuclear ralthuam neihmi pawl timal nakding thu reltlangin Russia khawpi Moscow ah an be aw lai.

US Under Secretary of State, William Burn in a sim nakah US leh Russia hi kum 1991 ah khan an Nuclear ralthuam neihmi pawl timal dingin remnak thutiam  Strategic Arms Reduction Treaty an rak ngan zoih,  Asi nan khai remnak thutiam an rak ngan mikha kum 2009 December thla ah khan a caan a cemih,  Cu ruangah hi  Nuclear ralthuam timal nakding thutiam thar ngantlang sal danding thu relin hi ram pahnih aiawhtu pawlin Russia ram khawpi Moscow ah an be aw lai a si tiah a sim.

Hi an biakawk nakah hin US ram ai awh in Under-Secretary of State, William Burn a telih, US Secretary of State, Hillary Clinton khalin himi thu relnakih telding in Russia ramhi a pancing zum a si. Hillary Clinton hin himi biakawk nakah Russia ram aiawh tu  Sergei Lavrov leh Russia President, Dmitry Medvedev khal a kawm dingih, Nuclear ralthuam timal nakding thutiam khal an ngan thei cingkhal zum a si.

Fox News in a kom nakah US President, Barack Hussein  Obama cun  Isreal Cozah in a minung pawl umnak dinghrangih East Jerusalem in Inn 1.600 sakbet a tum nak ruang menah  Isreal leh US pehtlaih awknak leh laicin awknak a siat theilo a si  ti.

Obama cun US leh Isreal cu pehzawm awknak leh sihcih awknak thukzet neimi kansiih,  Cu ruangah tui naite ih Isreal Cozah in West Bakn ih ram kau nawr vivo a tum nak leh, East Jerusalem ih Inn sakbet vivo a tum mi ah ruahdan leh ngaihdan a bangawklo nak lai tete um hman sehla  US leh Isreal sihcih awknak leh rualrem awknak leh pehtliah awknak a ti siat banlo tiah a sim.

Relzo vekin Isreal leh Palestinian pawl karlak ih rualrem awknak hawl dingih  US Vice President, Joe Biden in Middle East a pan hlante ih Isreal Cozah in Palestinian pawlih huatzet ding zawngih East Jerusalem ih Inn 1,600 sakbet a tumthu a puan ruangah US cun rualrem awknak lamzin hawl rero laiih, rualrem awknak duhlo leh vekleh buainak suak theiding zawngih Isreal in thil a ticu zah lo awk hna a si tiah an rak mawhthluk zet zo ih, Isreal leh US karlak sihcih awknak tianghman siatding khawpin an rak sawisel.

Tui hiti vek boruak sia a um rero laiah European Union  Foreign Policy hotu,Catherine Ashiton cun  Middle East ih rualrem awknak hawlin Mizan sunah  Middle  East rampawl a tlawng kualih, Isreal Prime Minister, Benjamin Natanyahu  thawi an komawk nakah  Isreal,PM cun East Jerusalem ih Isreal pawlih umnak ding Inn 1.600 sakbet kan tum micu Isreal Cozah cun kan tuah dingmi thil hrimhrim a siih, Palestinian  pawlin anram sungah ruat hman haisehla  Isreal Prime Minister zungpi ihsi Minute 5 sunglawng fehnak hmun asi ruangah  Palestinian pawlih ruahdan cu thildik a silo tiah a sim.

Himi laiah  Mizan sunah Gaza ih Isreal pawlih umnak hmuncu Rocket ih kah a siih, Minung 1 a thiih midang ziangmaw zatin hriamhma an tuar, hi Rocket kap tuhi Isreal Cozah cun Palestinian  Tapung Hamas pawl an si an zum.