Mawinak Ngaingai

March 19

TlawngKai Ninga

Mawinak  Ngaingai

Siar:

Thufim 31:21-31

Iang nei cu mi a bum thei ih mawinak khal a ziam thei; Asinain Bawipa a ttihzahtu minu cu lom le porh tlak a si.    – Thufim 31:30

Kumkhat Sung Baibal:

-   Joshua 1-3

-   Marka 16

Hanghnah hangrah zuarnak dawr ah thil lei in paisa pek ding ka hngak phah ah   magazine an retmi ka zoh ttheu. Nunau mipa pawl-awknak thu, paisa thu, rawl ei-in daan, mawinak, damnak tivek taksalam thu pawl hlir an ngan. Thlaraulam hrang cu a um lo.

A poimi cu mi in magazine ttha lo an siar ttheu. Himi pawl cu lenglam nun hmel mawinak a si an ti ih mibumnak in a khat. Hivek ca pawl cun mi an hnaihnok ih  ttihnungza siatnak tiang an thlenpi thei.

Kan dung nai ah ka rualpa in duhnungzetmi, mah le mah rinsan awzetmi tleirawl fala pakhat thawn an biak awknak thu i sim. “Nang cu mahte rinsan aw tlakzet mi na si, ziangti’n si ti in sim thei pei maw?” tiih a suh tikah fala tleirawl nute cun, “Aw, sim thei ko,” ka mawinak ruangah,” a ti. A suttu pa khal cun raalring lem loin, “Ah!, a si thei lo,” a ti. Fala nu te cun mangbang nawn in, “Ziangruangah maw?” tiih a suh saal tikah, anih in, “Ziangruangahtile kumkhua in na mawi ringring thei lo ding,” a ti.

Thufim 31 kan siar tiakah “Iang nei cu mi a bum thei ih mawinak khal a ziam thei,” timi kan hmu. Taksa mawinak cu a rei hlan ah a ziam thei, kan kilkhawi awknak tla a tlamtling lo thei. Asinan kumkhua a hmun dingmi pakhat cu sunglam mawinak, Bawipa ttihzah nun hi a si (c. 30).

Jesuh ih mawinak keimah ah lang seh,

Mangbangza A zaangfahnak le A thianhlimnak;

Nang vanlam thlarau, ka sinak i tleuh fai aw,

Keimah ah Jesuh ih mawinak hmuh a si tiangin.

Thinlung sungih dingfelnak in nuncan ziaza mawinak a suahter.