India in Russia Ralthuam A Lei Ding

India leh Russia cun ram pahnih peh tlaih awknak tha sinsin ih an neihthei nakdingah rualrem awknak thutiam Point 19 an ngan. Hi rualrem awknak thutiam an ngan tlangnak hi, tihni sunih Russia Prime Minister, Vladimir Putin in India ram a tlawn nakah India ram khawpi New Delhi ah India ram hotu pawlthawn an tuah mi a si.

Hi an thutiam ngan tlangmi pawllakah Russia leh India  Civil Nuclear Energy thanso ter nakdingih point 3 tuantlang nakding thu, Russia raldo nak Vanzam MIG- 29 pawl India in a leiding thu, leh Russia raldo nak Lawng tumpi Gorshkov Aircrafft Corrier pawl leinak ding thupawl khal a tel.

Hi Russia raldo nak Lawng tumpi hi kum 2004 ah khan  lei awdingin an rakrel tlangzo ih,  an dawr awknak hmaisa ah cun  dollar Billion 1 leh Million 500 man ih miti a rak sizo nan, thilman khung vivo ruangah Russia in dollar Billion 2 leh Million 900  a ngensal.

Hi Russia raldo nak Lawng tumpi hin raldo nak Vanzam MIG 29 pawl 16 a phurthei ih, himi pawlih tlunah Global Navigation Satellite System (GLONASS) hman thei nakding ceet bun tlang nakding leh India ram Tamil Nadu ih Kudankulam khua ih Nuclear reator pahnih Russia in a bunding thu khal a tel.

Civil Nuclear thuhla ih rualrem awknak thutiam an ngan tlangmi ah Russia in India ram  Tamil Nadu ih Kudankulam khauih  Nuclear reator 6 leh  West Bengal ih Haripur ah Nuclear reator 6 a bunding thukhal a tel. Himi ih tlunah Russia PM, Putin leh India Prime Minister, Manmohan Singh cun misual Terrorist pawl donak ah ram pahnih tantlang an tumthu khal an reltlang.

US, Alaska State ih Tlawng Saya pakhat Candice Berner kum 32 micu ziangpit ih taksa sawizoi awknak hrangih lamzin ih a tlan laiah Cinghnia rualin an keu that. Alaska Palik bawipa Col, Audie Holloway in a sim nakah Candice Berner ih ruanghi lamzin kapah hmuh a siih, a taksa ah ramsa Cinghnia ih keunak neh nang tampi hmuh asi tiah a sim. A ruang zohfiangtu mithiam  pawl khalin ramsa Cinghnia ih keunak asi tiah an theifiang a ti,  Cinghnia rual pawlhin  Berner hi a tawka  pheiphawng leh a pum a hngawng hranwgah nasa zetin an kei tiah a sim.

Isreal Cozah in Jerusalem khawpi saklam  Palestinian pawl umnakih Isreal pawlih umnak ding Inn sak bet vivo a tumthu a puan  ruangah US Secretary of State, Hillary Clinton cun Isreal Prime Minister, Benjamin Natanyahu cu Phone in Minute 45 sung ah bia ih, Hillary Clinton cun Isreal PM  Benjamin Natanyahu cu an thilti dan a duhlo thu simin nasa zetin a kawk. Hillary Clinton cun Isreal in himi Inn sakbet vivo a tum ruangah  US leh Isreal ram karlak hman nasa zetin a tibuai thei a si a ti.

US State Department Thupuangtu, PJ Crowley khalin  Isreal Prime Minister, Benjamin Natanyahu cu  rualrem awknak lamzin hawl duhlo ah leh, Middle East rualrem awknak lamzin hawlih feh US Vice President, Jeo Biden khal hmaisong lo leh zahlo ah a puh.

US in Isreal himnak dingih rualrem awknak lamzin hawlih thil a tawlrel rero laiih, Isreal in thu awi duhlo ih buainak suak ding zawngih thil a tidan cu US cun ttha a tilo ih rualrem awknak hawlih biakawk nak ih hleiah thiltuah mi khalin ruamrem awknak an duhzia an langter a ttul a si a ti.

Isreal in Jerusalem khawpi saklam ih Inn sakbet vivo a tumhi US ih hleiah Russia, European Union leh UN khalin an sawisel nasa ih, Tui thla ni 16 ih Russia ram khawpi Mosco ih ram tinkim ai awhtu pawl an tonkhawm awknak khalah Isreal thiti danhi an sawisel zum a si.

BBC in a sim nakah Pakistan ram thlanglam Swat Valley khawpi Mingora kiangah thihcilh bomb a puakih minung 10 an thiih, Midang 34 in hramhma an tuar tiah a sim. Palik thupuangtu, Qazi Jamil in a sim nakah Rickshow ih to minung pakhat in  ralkap Chekpoint kiangah a bomb paimi a tipuak ih a tumtah nak a thlen hlanah a bomb hi a tipuak tiah asim.

Hi Bomb puah tupa hin a tumtah bimi cu  Saidu Sharif ih Palik leh Ralkap pawlih um khawmnak hmunpi ih puah a tum nan  ralkap Chekpoint kiangah ralkap pawlin Check an tum ruangah a tipuak a si  a ti. Kandung tlawngkai ni 5 khalah Pakistan ram kahwpi pakhat Lahore ah Bomb a puak ih minung 45 an thiih midang 93 ih hriamhma an tuar zo. Hi Bomb puah tuhi zoti theihfiang nak cu an neilo nan Taliban pawl an si ding tiah zumnak an nei.