Falam Le A Sehvel Khua Ah Thlisia Hraang
March 31, 2010 by youthlife
Filed under Laitlang thuthang, Lawrkhawm
Bawhlungsit zohnak tiih sahmi innte
Kan Laitlang hrut le Lairawn sehvel inn kang rapthlak zetzet ih a nuai hnuah tuini March 31, 2010 zinglam nazi 1:00 AM ah Falam sehvelih khuapawl cu thlisia, ruah le rial in a nuai ciamco ih inn pawl an siat.
Zinglam nazi 1 ihsin thli hrang le rial tlapawl cun Falam bawhlungsit zohnak ding ih tuahmi inn pawl an tuah reromi cu a siat ter theh ih bet ah Mahyahkhah innpi cu a kiang ih thing pawl in an nen ngah tiah thu kan dawng.
Mahyahkah Zung Inn (pic BNF)
Thlisia hrang cu cawl lohli thei loin zinglam nazi 5 tiang a hrang ih Falam zato rangva tlap (7) lenglo a hawk ih hleiah inn (5) lai a siat phah a si tiah CT palai pakhat hnen ah Falam khawsung a betu in kan palai hnenah a sim sawng.
Falam kiangkap khuapawl cu nasa zetin hi thilsia hin a nuai ve hai. Laizo ih inn luanglu (3) lenglo a siat ih bet ah mucyu tlawng tiang in a hawk theh tiah thu kan dawng bet. Zalai khalah inn hnih lai a siat bet.
Kan palai ih a phone daan thu a sim daan vek asile, Laizo ih Mucyu tlawng siat cu tui zing lala ah khaw-hlum teima theipawl in an tuah tha sal tiah thu kan dawng. A then khat inn siat a tuar pawl cu tuiziang lala ah tuahthat a si ko nan, a tuah tha thei lo ziang maw ti zat an um ih a tu ah hmuan ah umnak inn te sak ih khawsa pawl khal an bo cuanglo.
Zalai ah inn (60) lenglo an um ih inn khat ih (5) umnak cu a siat theh. Laizo ah inn (60) lenglo an um.
Afghanistan Ah Obama A Tlawng Duk Di
March 31, 2010 by Khuang Lian Sum
Filed under Surbung Tlang Thuthang, Thuthar
US President, Barack Hussein Obama cu relcia nak leh theihcia nak zianghman umlo in tihni zanah ah khan Afghanistan ram a tlawng dukdi. President, Obama hi US ih Andrews Air Force Base ihsin cawllo in nazi 12. leh minute 46 sung a zuangih, Colh nizan Afghanistan ram tikcu zanlam nazi 7:25 ah Afghanistan ram khawpi Kabul saklamih Bagram Air Force Base ah a ttum.Butlak In Linghnin Ding Thei..
March 31, 2010 by CT
Filed under Lawrkhawm, Theihkauhnak
Linghnin ding theitu Butlak pa
Hlan pupa san thuanthu ihsin nikhua um tu dan ding hi ttilva le sumhnam pawl in an rak thei ih an rak hminsin ttheu. Kan pupa nunphung ih an neih ttheumi hi thilhman cu a rak si . Tu santiluan ih IT san khalah a thar in an hmusuak thar bet vivo.
Linghnin ding leitlun thiamnak le tahnak ih an theih fiang lo mi rak hminsin tu le thil cangding rak ti lang tu cu Butlak pa pawl an si thu zingzoitu le zirsang pawl in an hmusuak.
Jesuh Hmel Taktak Hmusuak..
March 31, 2010 by CT
Filed under Lawrkhawm, Theihkauhnak
Jesuh hmel taktak a si tiih an hmusuah mi zuk..abc
American computer thiam sang pawl cun Jesuh an tuamnak puan (Shroud of Turin) hmang in Jesuh hmel taktak an tuahsuah zo thu an phuang. Studio MacBeth pawl hin thlaruk sung lenglo Jesuh an tuamnak tiih an zummi puan te hmangin tuangtimnak an nei.
Jesuh hmel a tak ih lan ternak ding hrangah cun an tuamnak puan te lawng a tul tin computer zuk thiam Ray Downing cun a sim. Abraham Lincoln hmelfang computer ih ngansuak tu khal a mah a si.
Jesuh an tuamnak tiih an zum mi puan te..
Mi tam pi cun tui an zing zoinak ih an hmanmi puante hi Jesuh tuamnak a si ding tin an zum ih a then hrek khat cun khuahlan lai ih ta a si ruangah zumtlak taktak a si ding an zum lo.
An hmuahsuah dan pawl le a hmel pawl cu The Real Face of Jesus timi thupi hmangin Historical Channel ah suah a si.
Mr Downing ih a simnakah cun an tuamnak hi sompatom deuh ih a um ruangah a hmai khal fiangten kan hmusuak thei lo, a taksa le a thisen pawl thawn a rawi cawk aw tin khal in a sim. A sim bet vivo nakah cun tui kan hmuhsuahmi ih zirin a hmaifang khal kan hmusuak thei vivo ding a ti. Mit hmul le taksa vun umdan hi hmuhsuah ding a har bik tikhal cun a sim bet.
=========================================
US thawhhlam zatek 40 lenglo tlaniam
US ram ih zumtu pawl ih an thawhhlawm cu zatek 40 lenglo in a tla niam tiin Christianity Today International (CTI) zingzoi tu pawl cun an sim. Hminsin tlak ding tiang ih an thawhhlam a tlakniam veikhatnak a si thu khal Matt Branaugh, thuhla suah tu le cangan tu cun a sim.
CTI pawl ih suahmi Youth Church Magazin zohfel tu Branaugh hin hiti vek tiang ih a tlakniam nak khal hnanei lo an tam tuk ruangah a si tikhal cun a sim bet.
Zingzoi tu CTI pawl hin US hmun tin ih biak inn 1000 lenglo ah zingzoinak an nei. 2007 ih zingzoi nak an rak neih mi ahcun US hi zatek 80 lenglo cun Zumtu tiih a sal aw mi an si ti a si. AFP
Zalemrawn Kai Ka Thai
Zalemrawn Kai Ka Thai
Piallei daiih ruun rem, ka thai nunnem
Zattial kaiih len tlang ka khop lo cing
Khuiah an um, ka ttah cangah i lem
Lo len ? Ttapin pawk ning ka pawn sawlthing.
Vun dawn thul ing, hlan kan nunte ka ngai
Tlingraw zauih zan khua thin hnangam tei’
Mitthli le kan sunmang tla kan siar lai
Hrinthar awiin sunvu hu ngai lo lei.
Keimah Ih Uknak Ram
March 30, 2010 by Rev Run Cung Mang
Filed under Nitin thlarau rawl
March 31
Tlawngkai Nithum
Keimah Ih Uknak Ram
Siar:
1 Peter 3:8-17
Nan thinlung in Khrih cu ttihzah uhla Bawipa ti’n upat uh. Nan thinlung sungih nan pommi nan ruahsannak kha a lo suttu pakhat- khat an um ahcun an thusuhmi let thei dingah ralring cia in um ringring uh. -1 Peter 3:15
Kumkhat Sung Baibal:
- Thutthentu 9-10
- Luka 5:17-39
1977 kum ah, kum 15 mi Kevin Baugh le a rualpi pakhat cu mahte nom awknak ah ram din ding an tum. Ram hmin ah “The Republic of Molossia” ti’n an sak ih ramzuk an suai, cahnah paisa le thantaar tla an tuah. Tuni tiangBaugh cun nom awknak ah ram fate cu a tuah rerolai. Acre 1.3 kaumi a ram cu Nevada nelrawn ah a um ihChicago Tribune thuthangca ih thuthang petu Colleen Mastony a va leen tikah Baugh in ramdang bomnak tiah a kawhmi US siah (tax) a pek thu a sim. “Mahte ram neih hi ka nomnak ah ka tuah,” a ti.
Mi tampi cun cuvek in mahte ram neih ding kan tumtah lem lo men ding. Asinan zo in a uk ding tiah kan relcat ttulmi thinlung sungih mahte ram cu kan nei cio. Peter in, “Nan thinlung in Khirh cu ttihzah uhla Bawipa ti’n upat uh,” a ti (3:15). Ttihzah upat timi cu Khrih cu kan nunnak Uktu le Bawi ah ret ding tinak a si.
Mikip in kan nun uktu dingah kan sungah thil pakhat kan ttul. Cuih thil cu, kan thlarau a tthum awknak hmun fate, midang zohman ih theih lo, mah lawngih theimi a si. Khrih cu kan thinlung uktu ih kan ret tikah zalennak taktak kan ngah. - David McCasland
Keimah timi thi ding hi ka hrilmi,
Tho saal nawn lo dingin;
Khrih ih bawi tokham naih ding ka duh,
Ngamzet in ukter aw. – Christiansen
Khrih in kan thinlung a uk ahcun kan ke cu Amai’ lamzin ah a feh.
Ka Lung A Awi Bawipa
March 30, 2010 by Rev Run Cung Mang
Filed under Nitin thlarau rawl, Thuthangtha
March 30
Tlawngkai Nihnih
Ka Lung A Awi Bawipa
Siar:
Saam 105:1-5
Bawipa ih hnenah lungawithu sim uhla A hmin cu aupi uh; A thil tuahmi cu miphun zate hnenah sim uh. -Saam 105:1
Kumkhat Sung Baibal:
- Thutthentu 7-9
- Luka 5:1-16
RBC Pathian hnattuannak ah human resoures team cu hnattuantu pawl thawn pehpar in ahleice ih ttuanvo latu an si. Hnattuantu pawl lungawi aipuang ih um dingin thapeknak program an tuah.
Cuih program cu “Thank You Card” timi lungawithu simnak card an rak tuah cia. Hnattuantu pakhat in zung sungah thil ttha a tuahmi kha a dang pakhat in a hmuh tikah cuih Thank You Card cu a laak ih a parah lomnak ca ngan in a cabuai ah a ret sak. Zung ra kai tikih cabuai parah cuvek lomnak ca ra hmuh cu ziangtluk in a nuam!
Hnattuan pakhat tthazet in ttuan ttheh tikih lungawinak cu a mak lo maw? Thinlung takte ih lomnak cun sunnihlawh mi a nuamter lo maw? Midang na pehtlaih daan a phundangter deuh lo maw? Na hnattuanmi a ttha ti men lawng si loin midang ih theihmi si na hlawh lo maw?
Mikip in lungawithu sim ding cu an duh cio. Pathian khal in a duh. A hnenih lungawinak kan langtermi parah kan Pathian a lungawi. A hnenah, “Ka lungawi” kan ti ding a duh. Paul in, “Ziangvek dinhmun khalah lungawithu sim uh, cumi cu Khrih Jesuh sungih nan nunnak ah Pathian ih a lo duhsakmi a si,” a ti (1Thess 5:18). Hebru cangantu in, “Pathian hnenah lungawinak langter uhla, a lungawi zawngin Amah cu upatnak le ttihzahnak thawn biak uhsi!’’ a ti (Hebru 12:28).
Pathian thawn pehtlaihnak ttha nei dingin lamzin hawl aw. Lungawithu sim cu Amah biaknak hrampi a si kha hngilh hlah. - Dave Branon
Amah cu biak in sunloih uhsi!
Sunlawinak le huham zatet, fimnak le cahnak zate;
Sunlawinak le thluasuah hmuahhmuah, vancungmi tlunah,
Cem thei lo A duhdawtnak lungawi thusim a dai lo ding. -Wesley
Pathian ih cohlan tlak biaknak tthabik cu lungawinak thinlung in a si.
Thu Fim Pawl
- Fate a tlang (pok) nak ruangah laawng tumpi a pilter thei.
- Tongkam thlumte’ mi a sangtu cun thinhengnak pawl a hloter sal.
- Thinlung a that le taksa khal a rak tha ve.
- Vansiatnak timi cu na in laimi na lakphak khuat sung khal ah a um.
- Sehal le Sehal an theihawk bangin rukru le rukru cu an theithiam aw.
- Mi dokalh cu rukruk hnak in a se sawn lai.
- Thingthei cu a rah in a hliah aw theu.
- Mifim pa cun a tulnak ah a thinlung a thleng thei nan mi aa pa cu a thleng duhlo.
- Mifim hrang ahcun tongkam a duh tawk.
- 10. Tongkam aicun tuahtuannak in thu a rel tam sawn.
- 11. Ruahsur theh ah nikhua tha sal.
- 12. Thlisia ih napi mi a nuai hnu ah dainak a thleng sal theu.
- 13. Tha te in be tu hmuahhmuh hi rualpi an si lo.
- 14. Meithal a keng hmuahhmuah in sa an kap cuanglo.
- 15. Lamnak hmun ih a lam hmuahhmuah in an lungawi cuanglo.
- 16. Biakinn ih khawm hmuahhmuah Pathian fa an si cuanglo.
- 17. Sursungih awhmi tamsawn cu ngate an si.
- 18. Zo vek khalin hruaitu hna a tuan theihlo.
- 19. Thudik hmuahhmuah phuansuah ding a si lo.
- 20. Kan fiang hlan ahcun ziangkim a mak ih a harsa fawn.
- 21. Kut lawng cun muvanlai zawl a theihlo.
- 22. Hma cu a dam sal thei nan, hminsiatnak cu a dam thei ve lo.
- 23. Uico tar cu a tul lo ah a bau rero dahlo ding.
- 24. Caw khal a ki thawn a siatsuahaw ih minung khal a lei thawn a siatsuahaw.
- 25. A lenglam mawinak men cun mi a bum thei.
- 26. A suak hrihlomi nausen bang in thianhlim aw.
- 27. Uico mi bauh ciamco pawl in mi an keu lo.
- 28. Nuamten tiamkamnak tuah awla kimter ding ah zamrangten tuah aw.
- 29. Mualpho hlir ih dam sung caan hman aicun sunglawi zetih mual liam a tha sawn.
- 30. Na hmuhmi zaten zum hlah, na theimi thu khal zum theh hlah.
- 31. Thaisun ih ar ai cun tuisun ih arti a tha sawn.
- 32. Rualpi sual neih aicun ral neih a tha sawn.
- 33. Rualpi sual thawi kawm awk hnak cun mahte um a tha sawn.
- 34. Milian si aicun mi van tha si dingih suah a duh um sawn.
- 35. Uico lu si aicun tlangvang mei si a tha sawn lai.
- 36. Ding phah ih thih hloh aicun khukbil ih dam a tha sawn.
- 37. Tlai ih thleng aicun a tuan lam ih thlen a tha sawn.
- 38. Vei hnihkhat tlai cu tlai dahlo aicun a tha sin lai.
- 39. Tongsual aicun bahpang a tha sawn hrih lai.
- 40. Sim that aicun tuah that a tha sawn.
- 41. Hell ram ih uktu si aicun vanram ih riantu si a tha sawn.
- 42. Zirlo aicun nui pum sung ihsi suah lo a tha sawn.
- 43. A se zawngih zirh aicun zirlo a rak tha sawn.
- 44. A dai mi uico le a luanglo mi tidai ah ralrin a tul.