2010 Ih Parliament Thuneitu Thenkhat NLD Ah Lut Tum

BDC | January 12

U Ong Cein Thu Rel Lai

Kum 2010 parliament reorelnak ih Lah-Ta Township aiawhtu U Ci Myint le Yangon aiawh ih upper house ah hna tuan rerotu Dr. Myat Nga Nah Soo te’i pahnih cun NLD party ih telve an duh ruangah lutdilnak ca an thehlut zo a si.

U Ci Myint cun January 10, tlawngkaini hnih ah Lah-Ta Township ih NLD zung(Office) ah NLD party ih tel ve ding in dilnak ca a rak thehlut zo ih NDF ih member hlun rak sizo Dr. Myat Nga Nah Soo khal in Ta-Hmuai Township ih NLD zung(office) ah dilnak ca a thehlut ve.

U Ci Myint hi kum 1990 ih hrilawknak ah Lah-Ta Township aiawhtu si ding in rak hriltlin mi a si ih kum 2010 khal ah NDF aiawh in Lah-Ta ah hriltlin a si leh a si. U Tein Nguan ih hohami party thar ah lut in kum reipi sung cu rinum zet in ram hna a rak tuan zo nan NLD party ih kirsal a duh ruangah luh dilnak ca  thehlut a si.

Dr. Myat Nga Nah Soo hi cu NDF part member ah kum reipi sung ram hnatuantu a rak si ih tuahcun NLF ihsin suak in NLD ih hohanak hnuaiah  Kawlram mipi hrang hnatuan a duh ruangah NLD ih luh dilnak ca a thehlut thu thuthanglatu pawl hnenah a sim.

Dr. Myat Nga Nah Soo cun, “ NLD in kan dilnak ca in pawmsak lo asi hmanah lenglam ihsin theitawk ih NLD bawm ding in kan pumpeaw ding a si.” tiah a rel.

NLD mithar lakluhnak lam ih thuneitbik U Tin Oo cun NLD party in hremnak an rak pek zomi pawl le party thar ih luhsantu pawl hmuahhmuah cu awlai te’n an rak dawnsawng ding thu a rel ih Party dang ihsin NLD lut duhtu pawl hrangah khal NLD cun lungawi sopar te’n a rak dawnsawng ding thu U Ong Cein in  a rel.

U Ong Ceing cun, “ Kan NLD ihsin suak in party thar din ih hrilawknak khal rak telzotu Ko Ci Myint vek hrangah cun thusutnak le zohhliahnak tha zet hnuaiah lawng kan la lut thei sal ding. Kan party daan le dun pawl pahbal ruangih kan party ihsin kan rak suah ter mi pawl hrangah khal zohhliahnak huaiah lakluh an si ding.” tiah a rel bet.

Central Election Committee in NLD party cu January 5 ah hrilawknak ih tel thei party ah a phuan hnu ihsin U Tin Oo cun NLD ih luhdilnakca an thehlut zomi pawl cu ting khat( 100000) a si zo thu a rel tel bet.

(Visited 42 times, 1 visits today)

Comments

comments

Comments

%d bloggers like this: