Kir Saal Um Lonak Hmun

December 31

Tlawngkai Nili

 

Kir Saal Um Lonak Hmun

 

Siar:

Daanpeksalnak 11:7-12

 

Bawipa nan Pathian in hih ram cu, kum a thok ihsin a net tiang, ttha tein a zoh a si.

– Daan. 11:12

 

Kumkhat Sung Baibal:

-   Malakhi 1-4

-   Thuphuan 22

 

Kum Thar hmuahnak kan tuah lai ah thil dang hnakin kum le caan hi kirter saal a theih lo thu hi kan mangbik cuang.

     

A laim cia zomi caan pawl cu zoh saal in kan ciing thei nain, caan khat te hman kirter saal theih a si lo ti cu California ih Pastor reipi ttuantu Ray Stedman in a kawhhran mipi hnenah a sim.

     

Stedman cun Israel pawl ram ttha le ram nuam ih an lut zik caan thu kha a sim. Kum 40 sung nelrawn ramcaar ih an feh hnu ah tiamkammi ram co thei dingin zumnak le ngamnak hi an nei ngaingai pei maw ti hi tulai minung pawl hrang ahcun ruahpi ding tlakzet a si.

     

An hotu Moses in, “Bawipa ih tuahmi thilmak a hmuh zomi pawl (Daan. 11:7) siseh, Bawipa in hih ram cu a zoh ih a kumkhua in a kilveng a si,” (c.12) ti a theihter hngai.

     

Kum Thar hmuahnak ah a liam cia caan ih a cang zomi pawl ruangah hmailam caan hrangah ttihphannak kan nei men thei. Asinan cumi pawl cun in ttemttawn ringring ding a ttul lo. Ziangahtile Pathian lawng zoh phah in ke kan kar vingvo thei ruangah! Pathian in a mipi le a ram a zoh tthat vekin cat loin in zoh ringring.

     

Kum Thar khal ah rinsan tlak Pathian ih kilvennak cu a tam sinsin ding. Cuih thukam cu kan ring thei ve a si.

 

Hmailam caan pawl cu Pathian kut ah a um,

Nitin A zaangfahnak khopkhamzet in;

Siatnak le tthatnak lakah neem te’n in hruai,

Amai’ in hruai ding kan sian awk lawngah.

 

            Kan hmailam ih “ziang” timi kumkhua neitu “zo” in thu a tthen.

Leitlun Thuthang Lawkhawm…SBT

US in Russia Thu A Let

US State Department in thu a suah nakah Mizan sunih Russia Prime Minister, Vladimir Putin in thu a simmi, US in Europe ram dangdangih Missile khamnak ding Missile Defence System a bun vivo ruangah Nuclear ralthuam ti mal vivo dingih US leh Russia in rualrem nak thutiam kan neih micu pehzawm vivo leh fehcak pi theih a silo ding a timi cu  thil diklo a si tiah an tarlang.

Famkim Siarbet

Ruahnak Ttha Lo A Si Maw?

December 30

Tlawngkai Nithum

 

Ruahnak Ttha Lo  A  Si Maw?

 

Siar:

Hebru 10:22-39

 

Curuangah thinlung tak ngai le zumnak fel thawn Pathian cu naih uhsi! Mawhnak thinlung thianfaitermi le tidai thiang thawn tlengh faimi kan taksa pum thawn Pathian cu pan uhsi!   – Hebru 10:22

 

Kumkhat Sung Baibal:

-   Zekhariah 13-14

-   Thuphuan 21

 

Khuahlan deuh ih lehpannak ah a rak zuam dahtu pa cu caan reipi daithlang in a um hnu ah ahlan ih cangvaihnak a rak tuah ttheumi kha a thar in a thok saal. Ni khatnak ah arms band malte le tlan in a thok. A thaizing cu arms band le, ding le to le tamdeuh in a tlan. Ni thumnak cu leknak tam deuh le peng hrek lai a tlan. Ni linak cun  cangvaihnak nasadeuh in a tuah.

     

Cupa cun cangvaihnak tuah hi thil ttha lo a si ti’n a baang. Thawsam ko ih ka leknak in natnak i pek ih ka hrangah thil ttha a si thei lo a ti.

     

Thuanthu dang pakhat kan zoh saal hnik pei. Khrifa pakhat cu Pathian thawn an pehzom awknak a daithlang ti a thei aw ih, nitin Bible siar le thlacam a thok saal. Asinan, malte caan a hung rei deuh tikah buainak a parah a thleng. Himi pa in ziangti’n thu a ruat pei? Lehpannak zuamtu pa vekin a nitin Bible siar le thlacam hi thil ttha lo a si, a ti ve pei maw?

     

Thlacam le Bible siar hi thil ttha ngahnak dingah a si lo. Thil pakhatkhat kan cangter duh ruangah a si lo. Pathian kan thlunnak cu Jesuh thawn kan pehzom awknak ding lawngah a si. Thil ttha kan tuahmi in buainak in thlenter ttheu ko ding (2Tim. 3:12). Sikhalsehla Pathian Thu thlun in thil ttha kan tuahnak cu (Heb. 10:22) ziangvek thil a thlen khalah ruahnak ttha ringring a si.

 

Pathian thawn nitin caan kan hmannak,

Thlacamnak le Ca Thianghlim siarnak in;

Ziangvek thil thleng khal in tuarter thei dingih,

Pathian thawn in pehzom awkter ding.

 

Hngetkhohnak ih thu hrampi cu

Pathian Thu Bible siarnak le thlacamnak in a ra.

Khui Hmunram Ah Na Um?

December 29

Tlawngkai Nihnih

 

Khui Hmunram Ah Na Um?

 

Siar:

Rom 8:1-10

 

Ziangahtile Khrih Jesuh thawn pehzomnak thawngin nunnak in petu Thlarau ih daan in sualnak le thihnak daan sung ihsin in luatter zo.   – Rom 8:2

 

Kumkhat Sung Baibal:

-   Zekhriah 9-12

-   Thuphuan 20

 

Singapore ih Petrol Company pakhat ih hna ka ttuan lai ah ram dang ihsin cekfeltu pakhat a ra. Culai ahcun raalbuai rero lai a si ih, an ram sungih phurh dingmi Lawng sungih thilri pawl cek dingih ra mi a si. Culaifang ah, tlunlam ihsin raaldonak vanzam awn malte a theih cun, a ti daan ttheu vekin himnak ding hrangah tiah a tlan ciamco. “Ai, sorry, kan inn lam ih um ah ka ruat aw pang,” a ti ih ningzak phah nawn in a sim. Raalbuai caan ih an ram sungih a tuah daan vek in a tuah pangmi a si.

     

Khrihfa pawl tla cuvek in, hih leitlun bumnak le thlemnak pawl ruangah kan rak tuah dah ttheumi tthat lonak pawl cu rin lopi in tuah saal pang a olte. Rom 8:1 ih in sim bangin, “Jesuh thawn kan si ko nain a caancaan ahcun sualnak lakih nung vek kan si ttheu.”

     

Pathian in a Fapa rori minung vekih cangter in kan sual tlen dingah raithawinak ah hmang in thil mankhung zetmi in pek zo (c.3). Atu cu tisa daan si nawn loin, “Thlarau daan” sawn in uk ding mi kan si. (c.2). Paul cun, “Thlarau ih duhmi pawl” lawng tuah ding in fial.

     

Na nun daan hlun ttha lo pawl ah kir saal dingin sualforhnak le thlemnak na ton tikah hngetkhohzet ih ding thei dingin na kiang ih a lo umpi ringringtu Thlarau Thanghlim in lo bawn dingah na siang aw pei maw?

 

Tisa thawn ka suak, sualnak in i pai,

Cun Thlarau ih hrin saalnak, nunnak tharthawh dingah;

Jesuh thiisen thawn i kholhfai zo, ka hrangah a tawk,

Thangtthat siseh Pathian, A fa ka si, veihnih ka suak!

 

                        Hrin saal mi na si tikah vanram mi ah na cang.

KEIMAH LAIPA SING NGE

KEIMAH  LAIPA  SING NGE

Pu Sen Ling

A. Khuhlan Pipupawlih Tikcu Hminsindan

1. Ni

Ni a suak zik, tlang zulim ni in a kah hmaisabik khi sakhi ni an ti. Cuisin ni a suak, thaithawh ei cu, lomi feh cu, lomi feh reh, a `ausang, naurawl pek cu, sunno, sunder, dunhnuher, serai thah cu, vawl thah cu, phianghnam suan cu, rawlthing sat cu, zanriah suan cu, lomi tlun cu, ni a tla, tlangkam ah ni a um lai, khawza ni mit, thimrei ai tin an rak ko.

Famkim Siarbet

Taimak Suah Theinak Thazaang

December 28

Tlawngkai Nikhat

 

Taimak Suah Theinak Thazaang

 

Siar:

Jeim 5:1-11

 

An tuar thei ruangah mi lungawi an si, kan ti. Job ih thinsaunak kha nan thei zo ih Pathian in a netnak ah famkim in a pek ti khal kan thei. Ziangahtile Pathian cu zaangfahnak le lainatnak neitu a si. -Jeim 5:11

 

Kumkhat Sung Baibal:

-   Zekahriah 5 – 8

-   Thuphuan 19

 

Golf lek thiamzet Paula Creamer cu LPGA tour a netnakbik lek zuamnak a simi 2008 AOT championship ah hmun ttha ngah dingin kum khat sung a zuam. Creamer cu a lek thok ni ah a pum a naa. An lek caan ni 4 sung hmuah cu nat tuar in le rawl ei thei loin a um. Culawng hman si loin siizung ah zaan khat a um. Asinan taimak suah in a zuam ih a cem tiang a tuar ttentto. A pathumnak ah a ttheh. A tumtahnak a hlensuah ruangah uartu tampi a nei.

     

Hi pa vekin zuamnak kan neihlai ah harsatnak in kan thazaang tampi a cemter ih baansan mai kan duh ttheu. Asinan Jeim in Khrih dungthluntu pawl hrangah   hmuh daan dang in pek. Kan nunnak hi raal lak ih a um khal le mi thluasuak kan si a ti. “An tuar thei ruangah mi lungawi an si,” kan ti. Job ih thinsaunak kha kan thei zo. Pathian in a netnak ah famkim in a pek ti khal kan thei. Ziangahtile Pathian cu zaangfahnak le lainatnak neitu a si” (Jeim. 5:11).

     

Job vekin harsatnak pittawp kan tonlai caan ah Pathian ih duhdawtnak le zaangfahnak sungah tuar theinak thazaang kan hmu. Harsatnak tam hmansehla Pathian kan hnenih a um ruangah kan tuar thei. A duhdawtnak cu kumkhua in a hmun (Saam 136).

 

Ka thinlung zate in thei dingin ka hawl,

Pathian cu a rak um ngaingai;

A zaangfahnak in Amah lam ah a langter,

A duhdawtnak, lainatnak le kilkhawinak.

 

                        Pathian in taimak kan suahnak ding thazaang in pek.

Hlonfai Uhsi!

December 27

Nipi Ni

 

Hlonfai Uhsi!

 

Siar:

2 Korin 12:7-10

 

Asinan i run let ih, “Ka zaangfahnak cu na hrangah a tawk a si; ziangahtile ka ttontaih caan hi ka cahbik caan a si,” a ti. -2 Korin. 12:9

 

Kumkhat Sung Baibal:

-   Zekhariah 1-4

-   Thuphuan 18

 

Kan dung kum December thla ni 28 ah New York khuapi ih cahnah tampi cu ca tannak cet in an tan siat ttheh. Hih cangvaihnak hohatu pawl in 2008 kum sungih harsa an tuarnak le an hngilh thei lomi ni siava pawl cu ca ah ngan in Times Square ah rak keng ding le a vei hnihnak thil ttha lo siatbal ni ah thlek ih hnawm pennak ih hlon dingin tha an pek.

     

Cutawk hmun ih an rak kenmi ca pawl sungah Stock ih thilri man pawl, ‘cancer’  thuhla nganmi thuthangca pawl, Bank tangka cazin pawl le a tthen aw zomi fala tlangval pawl ih email kuat awkmi ca pawl tla an si.

     

Thil ttha lo le harsatnak kan tonmi le midang in kan parih thil ttha lo an tuahmi pawl hi thinlung ah taangter ringring loin hlohter ttheh kan duh. Paul khal in a tuarnak le a cah lonak ihsin luat ding a duhzet (2 Kor. 12:7-10). Asinan Bawipa in hiti’n a sim, “Ka zaangfah lainatnak cu na hrangah a kim, ziangahtile na ttonttaih caan ah kei ka huham a cakbik a si.” A harsatnak laaksak sawn loin Pathian in a zaangfah lainatnak a pek bet.

           

Harsatnak hi kan thinlung sungah kan khatter tikah midang thawn kan pehtlaih awknak a siatter. Khrih a zumtu cun kan phurrit retnak ding kan nei. 1Pet. 5:7 ah, “Nan donharnak hmuahhmuah cu Amai’ hnenah tthum uh, ziangahtile Amah cu nan zawn a lo ruatbiktu a si.”   

 

Nitin phur rit in a lo nen tikah,

Hniksaknak tamtuk na ton tikah;

Na thazaamg a mal caan ah,

Pathian cahnak huham mang aw,

A huham le zaangfah lainatnak a lo pe ding.

 

Kan hmuhtonmi kip ah

Pathian in A zaangfah lainatnak cu tlasam loin in pek.

Kan Chin In Capoh DVD A Suak Zo

Falam ih kan neihsun hnihsuaksai DVD cu Malaysia khalah lei a theih zo. A hnihsuak sai mi khal le mi huat thu rel lo. Bul pak huatnak ding khal tel lo. Bulpak (personal) thu a tel nan huat ding zianghman a um lo. Keimai thuhla khal a tel.

Keimai ti mi si loin i phuahsak men mi a si. Khaw thufim a rel mi khalle ngai mawh ding um lo hnih suak tlaitluang le ngai nuam emem a si. Interview tivek tla um. Ararat tlang ih ramsa pawlih meeting tivek, Leilungtlun si-puazi a ciah tukih nga pawl ih thurel khawm mi, Dr. Cumkheng Mu-cu tlawng saya a ti mi ziang si maw kei cu ka thluak a ?ha lo tukih ka thei fiang lo. Ramsa pawl thuhla tampi a tel.

Hnihsuak sai men lawng si loin an hlasak mi hrimhrim khal ngai a nuam in hnih a suak duh nasa. An hlasak mi malte in ka lo hlawm ke. Lai rawl ih ziang mi na duh bik? Lai rawl ah Arsa ka duh bik,…… Zai hla ah ziang na duh bik? Zai hla ah Banhla ka duh bik. Tlun zuangah ziang na tih bik? Tlun zuangah Kawngsang(mosquito) ka tih bik.

Ramsa ah ziang na tih bik? Ramsa ah Hnahfa ka tih bik ( Hihi cu Malaysia ih um pawl cun a dik tuk kan ti thluh. Malaysia ah hin hnahfa a tam ngaingai, kawngsang cu a um tuk lem lo)
Malaysia cu thaisun (20-10-2009) in kan zuar thawk thlang ding. Falam khawmnak pawlih na khawm cun na lei ngah ding a si mei. Na khawm man lo khal a si le keimah Alfred Paro lole u Valte hnenah sut hlam theih a si.
Ngah theinak hmu:
Malaysia ah:
Lai Christian Fellowship (LCF)
Falam Christian Community (FCC)
Alfred Paro (0173588901)
Pu Thang Zau ( Valte) 0176240166
USA ah:
Pu Hre Mang hnenah a rei hlanah nan rak sut hlam thei.
Australia ah:
Pu Mang San Lal le Pu Mang Hlei Sawn
Europe ram le Canada lam cu a rei hlanah kan lo than lehsal ding.
Thailand lam cu Cherry hnenah nan rak sut thei. A rei hlanah Cherry hnenah kan rak kuat ding.

By- Alfred Paro (0173588901)

Ruahsannak Umlomi A Hlohtertu Ruahsannak

December 26

Zarhte Ni

 

Ruahsannak Umlomi

A Hlohtertu Ruahsannak

 

Siar:

Filipi 2:5-11

 

Kei ih hrang ahcun ka bawipa Jesuh Khrih thinglamtah siar lo uar ding dang zianghman ka nei lo. Ziangahtile Khrih thinglamtah ruangah leilung hi ka hrangah khenbet a si zo ih kei khal leilung hrangah khenbet ka si ve.    – Galati 6:14

 

Kumkhat Sung Baibal:

-   Haggai 1-2

-   Thuphuan 17

 

Pathian zum lotu Communist pawl in leitlun an rak nehzet lai ah “Pathian a um lo” an ti ih, Pathian a um ti ih a zumtu pawl cu hmailam hrangih bum awknak men a si, ti’n an au ih an rak hringhro ciamco. Cumi sanlai ih Soviet Communist ram uktu cu Leonid Brezhnev a si. Anih hi Pathian um lo titu Marxist pumhlum ih zumtu le nasatak ih dinpitu a si. A thi ih a ruak vuinak ah US ih hotu sang George H .W Bush tla Amreican rampi ai-awh in a rak feh ve.
     

Bush in cuih ruak vuinak ih a hmuhtonmi thu pawl a sim saalnak ah, mithi ruak kuang an khar ih an khenbet hlante ah Brezhnev ih nupi cun a pasal ih ruak cu a zoh rero. Ralkap pawl in thingkuang sin an khuh hlante ah a nupi cun an pa ih awm tlunte ah Thinglamtah (Cross) pianhmang a kut in zuk a hun suai. Ziangtluk thu maksak le mangbangza so a si! A pasal in a rak zum duh lomi thu hi thudik sawn a si ding ti ruahsannak a nei.

     

Hih leitlun kan nunnak, kan san a cem hnu khal ah ruahsannak kan neih theimi hi Pathian zaangfahnak ruangah a si. Kan sualnak ruangah Jesuh Khrih in kan hrangah thinglamtah ah thihnak a tuar. Amah thawn kumkhua nunnak kan ngah theinak dingah thihnak neh in a tho saal. Kan tuah dingmi cu Thinglamtah ih thuthangttha zumnak ih cosaan ding hi a si. Cumi cu na zum maw? Tirhthlah Paul thawn, “A nungmi Pathian kan zum. Leitlun mi hmuahhmuah runtu a si. Ahleice in a zumtu pawl hrangah a si a ti (1Tim.4:10)” ti’n phung ve uhsi!

 

Cross cu kumkhua hranhgah ka ruahsannak,

Keimah te cu tlinnak zianghman ka nei lo;

Khrih ih thii thletmi lawng ka rinsan,

Ka ruahsanmi cu Jesuh lawng ah a um.

 

            Calvary Cross cu kumkhua nunnak hrang lilawn umsun a si.

Mary Ih Christmas

December 25

Tlawngkai Ninga

 

Mary Ih Christmas

 

Siar:

Luka 1:26-33; 2:4-7

 

Mary in hi thu hmuahhmuah cu tthazet in a ciing ringring ih thukzet in a ruat.      -Luka 2:19

 

Kumkhat Sung Baibal:

-   Zefaniah 1-3

-   Thuphuan 16

 

Dai ziarzi caan Bethlehem khua zaan dai ah fala note pakhat ttihphang phah in bawi hmuahhmuah ih bawibik ding naute a nei. Mary cu a ham ciatu Josef ti lo cu zohman bawmtu tla a nei lo ih tuar naazet in naute cu a nei. Tuukhal pawl cu hramlak ah vancungmi pawl ih naute thangtthat hlasak cawng in hla an sak thei men, asinan Mary le Joseph cu rannung awn-au, nausuah naatuarnak aw le Pathian naute ih a rak cannak ttap aw lawng an thei. Innlenglam cu van ih arsi tumpi in a run cerh na’n caw rawl einak kuang kiang ahcun mikhual a simi mi pahnih lawng an um.

           

Joseph in naute cu Mary ih baan parah a hun ret tikah mangbangnak, natnak, ttihphannak le lungawinak cokrawi in a thinlung ah a khat ttheh. Mary in a cawimi naute cu a zoh fel ih Joseph cu a hun zoh. Luka 1:32 ah, “Cungnungbik Pathian ih Fapa” tiih vancungmi in thu a rak tiammi cu a vun thei. Mary cun cuih naute ih mit cu a zoh fel ih Joseph cu a hun zoh. A uknak a cem thei lo dingmi naute cu ziangti’n kilkhawi in ka cawm thei ding tiah a mang a bang.

           

Cumi zaan ah Mary ih thinlung sungah thu ruah harmi tampi a um ding. Atu kum 2000 luan hnu ah kan zate’n Jesuh ih suahnak, a thihnak, a thawh saalnak, a rat saalnak ding a tiamkammi thu pawl hi napi in kan ruat ve a ttul.

 

Cungnungbik Pathian cu minung ah a cang,

A niambik le tangdorzet in a suak;

Mari cun a lung sungah man neizet in a pom,

Ka phu lomi laksawng a si ti’n.

 

Pathian cu kanmah thawn um tlang dingah a rak suak,

Culawng ah Amah thawn kan um tlang thei ding.

Pathian Ih Hmun Hleice

December 24

Tlawngkai Nili

 

Pathian Ih Hmun Hleice

 

Siar:

Luka 2:1-7

 

A fatir ah fapa a hring ih puan in an tuam hnu ah rannung rawl einak kuang sungah an hlum; ziangahtile riahbuk ah riahnak khaan an co lo.       -Luka 2:7

 

Kumkhat Sung Baibal:

-   Habakkuk 1-3

-   Thuphuan 15

 

1920 hnulam ah fala note Grace Ditmanson Adams cu missionary ttuan a nu le a pa thawn Taluk ram sungih khual an tlawn thuhla ca a ngan. An khualtlawnnak ah: zaan an riahnak, khua pakhat an thlennak inn ahcun mi an tamtuk,  mi hrek cu an khuhkhuh, an hahthio, kuak an fawp, nauhak hrekkhat an ttap, an raak an kio, cuvek pawl um khawmnak tapthlang laifang ah an tangphah puan an phah ih an it ve tivek thu pawl mit-thlam ih cuang thei dingin a ngan.

     

Daitlak zaan, thim bepbep zaan zaan khat ahcun mikhual khat ttheptthep zonak khual-inn ah an va thleng. Khual-inn kiltu pa in a hmaisongtuk ah, “In thlun uh” a ti ih Lo hnattuantu pawl umnak le thilri pawl retnak hmun ah a hei hruai hngai. A rem daandaan in cuih hmun ah an riak.

     

Caan reinawn hnu ah Grace in, “Mari cu fapa a hring ih puan in an tuam hnu ah rannung rawl einak kuang sungah an hlum, ziangahtile riahbuk ah khaan an co lo,” tiah a siarmi in a hmuh daan a danglamter. Mi hrekkhat cun riahbuk kiltu pa in a ngaihsak lo, misual rundamtu ding a rak hnong tiin an tilai ah Grace cun, ‘Cungnungbik Pathian in mipi thawmvang um lonak, harhdamnak thawn a kaih awk deuhnak hmun, dai teih an um theinak dingah riahbuk kiltu pa a hmang ti ka zum a si,” a ti.

     

Zumnak mit thawn ka zoh asile Pathian in Mari hrangah hmun hleice khua a khan sak ti kan hmu. Pathian in na hrangah ziangti’n lam a lo sial sak ti ruat aw.

 

Nitin Bawipa hngak aw,

Amah in thazaang a lo pe ding;

Donhar a ttul lo, ttih a ttul lo,

Amah cu kan Pathian a si,

kan kiangah a um ringring.

 

                        Pathian ih pekmi a cotu cu an di a riam ding.

Piahra Te Na Hleiter Thei Maw?

December 23

Tlawngkai Nithum

 

Piahra Te Na Hleiter Thei Maw?

 

Siar:

2 Korin 9:6-15

 

Mi lungawi si na duh ahcun mi farah va zaangfah aw;

midang hmuhsuam cu sualnak a si.      - Thufim 14:21

 

Kumkhat Sung Baibal:

-   Nahum 1-3

-   Thuphuan 14

 

Amity Shlaes in a cabu “Hngilhsanmi Pa (The Forgotten Man)” timi sungah US ih pursum leilawnnak tlaksiazettlai caan ih mi tampi nuntu khawsak daan pawl thukzet  le theih hiarza in a ngan. Cumi “Hngilhsanmi Pa” cabu a ngansannak cu hnattuannak ihsin an suahmi siar cawk lo minung pawl thu a si.

     

Tlaksiazetlai caan ih thil umtu daan fiangzet ih langternak hla fing khat phuahmi a um: “Daihnak le sunlawinak thawn a khatmi inn ka sak rero ti’n an sim ttheu. Sanghlom zakhatte ngah ding men ah ziangah ka daansi ve? Tlangleng zin ka tuahmi ah tlangleng an tlan, san tiluan manzet ih tuahmi a si. A hlan ah tlangleng zin ka tuah, atu ah tuah ttheh a si zo, piahra te na hleiter thei maw?”

     

Hih hla in nunkhuasak a tlaksiatnak ruangih hnattuan zuamzet nain hnattuan ngah nawn lo pawl ih nun a thlengh siatsak thu in theihter saal. Cuvek caan ah kan tuahsak theimi pawl va tuahsak ding kan si.

     

Galaiti 2 sungah Paul le Barnabas in mifarah pawl hngilh lo ding le thuthangttha sim dingah in fial (c. 10). Paul in thuthangttha sim le mi tlasam pawl bomnak pek dingah thazaang a pek (Tirh. 11:29-30; 1Korin. 16:1-3).

     

Sumpailam harsazetlai caan ah thlaraulam le taksalam ih mi harsa pawl hnenah duhdawtnak thawn bawm ding kan si. Paisa piahra cun tulai ah zianghman a tithei nawn lo nain tirhsiannak thinlung cun a ti thei.

 

Khuitawk khal ih mi farah le tlasam pawl,

Pathian ih duhdawtmi le zawnruahmi an si;

Asinan beidong in an um ringring,

A duhdawtnak kan hlawm ve lo ahcun.

 

Thinlung hrangih cangvainak tthabik cu

tangdor te’n midang bawm ih tundin khi a si.

Next Page »