Leitlun thuthang lawrkhawm..SBT

28th November, 2009

IAEA In Iran Thu A Pe

United Nations hnuai ih, Nuclear thilri leh ralthuam pawl zoh fiangih kil khawitu International Atomic Energy Agency (IAEA) cun Iran ramcu a thuptei Uranium tuah nak a rak neih ruangah nasa zetin a sawiselih, a thil timi bansan dingin thu a pe.

Himi thuhla rel khawmnak ah hin ram member 25 in Iran hi an sawiselih,  ram 3 in Iran sawisel nakhi an thlawplo, ih ram 6 cu ziangih lam an ngaihdan rel lang duhlo in an um. Tui  ttumih IAEA thu rel mihi Russia leh China khalin an thlawp ih,  Asinan Iran parih hremnak pek ding taktak ah hin hi ram 2 hin IAEA thu hi an thlawp vivo ke maw ticu theihfiang a si hrihlo.

Famkim Siarbet

Obama Ih Innsangnu Zawng Ah Tuah

Leitlun mipi tamzet ih thil hawlnak google.com ih zuk retmi ah US president Barak Obama ih innsangnu Michelle Obama zuk mawilo zetih an tarlang  ruangah Michelle Obama duhdawttu pawl in an lungkimlonak an tarlang ve ih google.com pawlin ngaithiam an dil sal. Tulai ramkip ih an zohmi google.com ih zuk laarbik cu michelle Obama a si.

Ziangtivekin an tuah tile “zawng” hmel an pu ter. Obama mipi pawlin thate nan tuahsal lo asile daan lo ih nan tuahmi zuk pawl thu ah action kan la ding an ti. Asinan google.com pawl cun Michelle Obama zuk zaten google.com ihsin hlawn theh an tum cuanglo thu an sim thei sal bet.

Mithenkhat cun hivekih zuk an tuahnak san hi midum pawl duhlonak langternak a si ti tiangih a rak la sawngtu an um.

Kum 20 hnu ah Lianbik Ding

Siangpahrang cithlah cu siangpahrang an si vivo. Milian cu milian an si vivo. Hmahruaitu cu hmaihruaitu an si vivo ti ciangter sinsin ding ah Madona le David Beckham tei fa an suak a si. (Zuk : kehlam Rocco, vorhlam; Cruz)

Madona le David Beckham cu leitlun mikikp ih theihmi laar zet veve an si. Zuknung suahtu pawl le zuknung cangtu pawlih tawnawknak ahcun Madona ih fapa Rocco le bawhlungsithiam David beckham  ih fapa Cruz cu kum 20 an kim ahcun leitlun celebrities lianbik an si tengteng ding tin an sim cia a si.

Leitlun hlasakthiam hminthang le laamnak thawn mipi huaihawttu Madona ih fapa Rocco Ritchie (9) le leitlun bawhlungsithiam hmingthang David Beckham ih fapa Cruz Beckham (4) cu an thanglian vivo ding ih leitlun mi hminthang langsar nasabik ah an cang ding a si tin leitlun celebrities pawlin an phuangcia a si.

Nunau Pawl Ceiawknak Ah Rapthlak Um

Nunau Pawl Ceiawknak Ah Rapthlak Um

Leitlun mifimthiam pawl cun nunau a hleice in fala pawl ih nitin zantin an thuh theumi ceiawknak thilripawl lakah bal-thalo (chemicals) 500 lenglo a um tin an sim. Hmelthatnak ding ah tin ceiawknak phunphun hmai ah culh/thuh a si theu nan hmelthatnak le zoh nawinak hnakin taksa ti setu a si zia cu kum reipi hnu lawngah theihsal a si tin an sim bet.

Ramcangkang ih um fala pawl ih thuhmi ceiawknak phun 13, nikhat ih an thuhmi sungah chemical bal-thalo 20 a um tin an sim. Cui, balthalo (chemicals) pawl cun hmelmawi ter hnakin natnak thalo a phunphun taksa thak tivek pawl a suahter ih a netnak ih a thlengmi cu cancer nat tihnung a si.

Famkim Siarbet

Hman Theih Lo Lethmat pawl

November 30

Tlawngkai Nikhat

 

Hman Theih Lo Lethmat pawl

 

Siar:

John 14:1-6

 

“Rundamnak cu Amah ih sung lawngah a um; ziangahtile Pathian ih rundam mi kan sinak dingah leitlun pumpuluk ahhin minung hnenih pekmi hmin dang zohman an um lo,” tiah a ti.   – Tirhthlah 4:12

 

Kumkhat Sung Baibal:

-   Ezkiel 37-39

-   2 Peter 2

 

Khui hman feh thei lomi vanzam ticket kan nei. Jamaica ah thuthangttha sim dingin kan feh ih kan ttheh zo. Inn tlung ding kan si nain kan ticket leimi vanzam harsatnak a ton ruangah Montego tikel ihsin kan pok thei lo. Atu le tu, “Nan fehnak ding vanzam a ttul a si,” ti’n an than. Vanzam ticket cu rinnak thawn kan lei nain an tiamkam vekin in phur thei saal lo. Vanzam dang pakhat a ra thlen tiang a hlei in nikhat kan um ta.

           

Ruat hnik, vancung na feh rerolai ah na ticket a dik lo ti na thei saal. Cumi cu thil cang theimi a si. A dik lomi tumtahnak na rinsan sual pang ahcun vancung sangka tiang na thleng ding nain a sungah Pathian thawn kumkhua um tlang dingin na lut ngah lo ding.

           

Peter in, “Rundamnak cu Amai’ sung lawngah a um…Ruuntu dang le ruun theitu hmin dang zohman an um lo, tiah a ti” (Tirh. 4:12). Jesuh in, “Keimah cu lamzin le thutak le nunnak ka si. Keimah ihsin siar lo zohman ka Pa hnenah an thleng thei lo,” (John. 14:6) a ti. Vancung fehnak ticket cu Jesuh in kan sual man pe ding in thinglamtah tlun ih a thihnak a zumtu lawng in an ngah.

 

Mi hrekkhat in lamzin dang le ticket dang an tuahmi cu alak an si. Jesuh lawng lamzin a si, fiang te’n rinsan aw.

 

            Bawipa, mahte ruun aw thei lo misual ka si ti ka thei,

Rundamtu ah ka lo ttul. Ka ai ah thi in na tho saal, ka lung a awi;

Ka lo zum, ka sualnak i ngaidam hram aw,

Ni khatkhat ah Nangmah thawn vancung ah um ka duh.

 

Jesuh in ka thihnak ding thinglamtah parah a thi ih

Vancung ah  hmun i pe.

 

Galati Kawhhran

November 29
Nipi Ni
 
Galati Kawhhran
 
Siar:
Galati 3:1-12
 
Hi tluk lawmmam in nan aa maw si! A hram nan thok lai ahcun Thlarau thawn nan thok; a netlam atu ahcun nanmah ih cahnak thawn netter nan tum maw si?        – Galati 3:3
 
Kumkhat Sung aibal:
-   Ezkiel 35-36
-   2 Peter 1
 
Khawte lam ah mawttaw mawng in ka feh. Biakinn pakhat ka hmu ih, “Galati Church” tiah a hmin an nganmi in ka mang i bangter, ka thinlung sungah a taap. Ziangahtile a hmun le ram ih pek lo ahcun zohman in himi hmin hi an hmang thei lo ding.
           
Galati cakuat zoh tikah Paul ih thinhengnak a langbikmi cakuat a si. A luarkai ih daan uarnak, mahte zuamnak rinsan, Pathian ih zaangfahnak thuthangttha an pom hnu ah thuthang dang an pom saal ruangah Paul in a kawk hngai. Galati kawhhran cu zohtthimtlak kawhhran a si lo.
           
Galati pawl cu Pathian rinsan hnakin anmai’ zuamnak in Pathian lungawiter ding an tum. Paul in, “Hitluk lawmmam in nan aa maw si? A hram nan thoklai ahcun Thlarau thawn nan thok; a netnaklam ahhin nanmai’ cahnak thawn netter nan duh maw si?” a ti (Galati 3:3).
           
Pathian thawn pehtlaih awknak cu ttuannak in kan hlawh thei lo bangin thlaraulam khal ah kanmai’ thazaang thawn kan tthangso thei lo ding. Paul ih Galati pawl ralrinnak a pek hngaimi cu: “Kan nunnak ah Thlarau ih hnattuannak in Pathian rinsannak cu Khrih thawn kan feh tlangnak ih thuhram a si.
           
Zuamnak in Jesuh bangtuk si ding ruahnak kan nei asile Galati pawl vekin mah le mah bum aw kan si ding.
           
Na zuamnak thulolak hlon aw,
Jesuh kehram ah;
A sungah ding, Amah sung lawngah,
Sunlawinak a famkim.
 
Thlarau Thianghlim cu Khristian pawl huham neihtertu a si.

Hnawm Phur

November 28

Zarhte Ni

 

Hnawm Phur

 

Siar:

Thufim 26:20-28

 

Zanthing a um lo asile meisa a mit; A thupte in mi relsiat hmangtu a um lo asile tawh awknak a dai.        – Thufim 26:20

 

Kumkhat Sung Baibal:

-   Ezkiel 33-34

-   1 Peter 5

 

Khristian cetzung neitu le thil thar tuahtu R.G  LeTouneau cu leilung thiarnak cet tumpi pawl tuahnak in a hmin a thang. A thiltuahmi pakhat cu, “Model G.” tiah hmin a sak. A lei duhtu pakhat in, “G cu ziang tican so,” tiah a sut.

           

A zuartu in, “G cu mi thurel hmang katam gossip tican a si hmang. Ziangahtile  himi cet hin hnawmbaal tampi zamrang te’n a thiar hlo thei,” tiah a sawn.

           

Thufim in mi siatnak rel katam thu tampi a sim. Katam pawl in thuthup an phuang ttheu (Thufim 11:13). Mirel a hmangtu kha va kom hlah (Thufim 20:19). Mi relsiatnak in harnak a suahter ih rualpi ttha hman a tthen awter (Thu. 16:28). Meihol in meiling a vamter ih thing in meisa a alhter bangtuk in mitawh a hmangtu pawl in tawh awknak an suahpi ttheu (Thufim 26:21-22).

           

Hebru ttong in “gossip” asilole “tale bearing” ih tican cu, “Dimte’n ttongmi in mi a siatsuah,” ti a si. Dimte’n kan relsiatmi in mi a siatsuah lo tiah kan ruahmi cu mah le mah bum awk a si. Mi relsiatnak in siatnak tumpi a suahter, mi pakhatkhat a tuahmawh ringring. Curuangah, “A thupte in mi relsiat hmangtu a um lo asile tawh awknak a dai” (Thuf. 26:20). Hnawm thiar cu cet tumpi ih ttuan dingah kan ret pei. Relsiat awk um lo nomnak puai tuah uhsi!

 

Midang ih relmi hmuahhmuah,

Kan sim ding a si lo;

Kan lei ralrin ding in bawm aw, Bawipa,

Ttha te’n kan kil a ttul a si.

 

An relmi ngai lonak in mi relsiatnak cu siatsuah aw.

Duhdawt Tthazet

November 27

Tlawngkai Ninga

 

Duhdawt Tthazet

 

Siar:

Efesa 3:14-21

 

Nan zumnak thawng in….Pathian ih minung pawl thawn thinlung khatin Khrih ih duhdawtnak a thuuk ih a saan zia le a sau ih a kauh zia kha theih theinak nan nei ding….. a famkimmi Pathian a sinak thawn nan nunnak cu a khat ding.       -Efesa 3:17-19

 

Kumkhat Sung Baibal:

-   Ezkiel 30-32

-   1 Peter 4

 

Kan innsang in Lungawithusimnak zaanriah einak kan nei ih lungawinak thu sim duhtu in pakhat hnu pakhat kan sim cio. Kum 3 nauhak pa Joshua in, “Awnmawi hrangah” a ti ih kum 4 nauhak pa Nathan in, “Rang hrangah” tiah a ti. Kan zaten kan dai khepkhep laiah kum 5 kimzik te Stephen in, “Jesuh in i duhdawt tthazet hrangah ka lung a awi,” tiah a ti. A tluangtlammi a zumnak in Jesuh ih a pumpak a duhdawt zia theithiam in a lung a awi. Jesuh in thinglamtah parih a thihnak in  a duhdawtnak in hmuh, tiah a sim.

           

Paul in Efesa kawhhran ih zumtu pawl kha ziangtluk ttha in Pathian in a duhdawt hngai ti theihter a duh ih thla a cam. “Khrih ih duhdawtnak hi ziang tlukin a thuuk ih a saang, ziang tlukin a sau ih a kau ti kha theihtheinak nan nei ding hi a si,” (Efesa 3:17-19) a ti. Paul in zumtu pawl duhdawtnak sungah an hram an bun dingah thla a cam sak.

           

Pathian ih duhdawtnak sungih hram kan bunnak dingah himi Bible canghril hi siar saal ringring le zoh lo khal in siar thei sehla a tthahnemzet ding. Pathian ih in duhdawtnak a langtermi parah nikhat ah tikcu caan malte sung lungawi-thusimnak nei ding kan si. Hitivek tuahnak in zumnak ah kan tthanglian dingih Stephen bangin lungawinak thawn “Jesuh in i duhdawt tthazet” kan ti thei ding.

 

Pathian ih duhdawtnak, ziangtluk a lian in a thiang,

Ziangtluk tah thei loin a cak;

Kumkhua in a hmun ding,

Mi thianghlim le vancungmi pawl ih hla.

 

Khrih na duhdawtnak tharthawh dingah

Khrih ih a lo duhdawtnak zoh saal aw.

Leitlun Lehnak lam Thuthang

Sualphuannak Le Lungawithusim

November 26

Tlawngkai Nili

 

Sualphuannak Le

Lungawithusim

 

Siar:

Nehemiah 9:32-37

 

Na thluasuah peknak thawngin siangpahrang in na minung an uk. Na pekmi ram kau le ram ttha sung an umlai ahcun. Asinan sualnak sungin an kir lo ih na hna cu an ttuan lo a si.    – Nehemiah 9:35

                  

Kumkhat Sung aibal:

-   Ezkiel 27-29

-   1Peter 3

 

Nipi Ni ih biakkhawmnak ah mipi in hiti’n sualphuan thlacamnak kan nei: “Zaangfahtu Pathian, kan hlan ih zumtu pawl bangin kan duh vekin thil a cang lo tikah kan phunzai. Kan nunnak hrangih a daihmi hnakin thil hmuahhmuah tampi kan duh. Atu kan umhmun hnakin hmun dang ih um kan duh sawn. Kanmah in pekmi thil hnakin midang na pekmi laksawng pawl tamsawn kan nei. Kanmah ih lo ren hnakin Nangmah ih in rian ding kan duh sawn. In pekmi parah  lungawinak kan neih lomi in ngaidam aw” ti’n.

           

Tampi neih hi lungawinak le lungawithusimnak dingah tiamkamnak a si cuang lo. Neihsiah hi kan thinlung Pathian thawn in hlattertu tla an si sawn thei men.

           

Nehemiah le Israel pawl ih sual ngaidam dilnak: “Kan pupa le kan siangpahrang pawl thok in kan hotu pawl le kan puithiam pawl tla in na Daan cu an thlun lo a si. Na thupekmi le na ralrin pekmi cu an ngai duh hrimhrim lo. Na thluasuah peknak thawngin siangpahrang in na minung an uk; na pekmi ram kau le ram ttha sung an umlai ahcun. Asinan sualnak sung ihsin an kir lo ih na hna cu an ttuan lo a si,” an ti (Nehemiah 9:34-35).

           

Sualphuannak cu lungawithusimnak hrangah huham thawih a khatmi thlacam hramthawhnak a si. Thungainak cu lungkimnak a si.

 

Bawipa, in pekmi hmuahhmuah hrangah 

lungawi thu kan lo sim ttheu lo cu kan mawh a si.

Kan nunnak hrang khalah lei kan lo baak a si.

 Na thangtthatnak thawn khat dingin in bawm awla,

Na thungai in lo rian dingah kan feh ding. Amen

 

Sualphuannak in lungawithusimnak sangka a ong.

Leitlun thuthang lawrkhawm… SBT

PM Singh US A Tlawng

Ziangtluk Khualtlawnnak!

November 25

Tlawngkai Nithum

 

Ziangtluk Khualtlawnnak!

 

Siar:

1 Thesalon 1

 

Ziangahtile Bawipa ih thu cu nanmah hnen ihsin Masidonia le Akhaia peng khua zakip ah a thlen lawng si loin Pathian nan zumnak thu cu khuaza ramkip ah a thang a si. Kanmah ih sim rero hman a ttul lo.       – 1 Thesalon 1:8

 

Kumkhat Sung Baibal:

-   Ezkiel 24-26

-   1Peter 2

 

Francis Asbury cu rang to in kum 50 zikte sungah peng 6,000 lai khual a tlawng. A dam lo nain taimak in baang loin a tlawng rero. Reipi khual a tlawnnak hrangah ol tein a siat lo dingmi zukneng sa caar a keng ttheu. America ram Methodist kawhhran tthansonak hrangah khualtlawng in Khrih thuthangttha simzirhtu a si. Khuate pawl ah kawhran thar din in Jesuh hrangah hmual neizet in hna a ttuannak cu ciingman ringring a si.

             

Hnattuan a cawlh tikah a zirh ngah zomi khualtlawng thu zirhtu 700 hnak in an tam sawn.  Asbury a thlen kum 1771 ah America ram ah Methodist mipum 600 lawng an um. A thlen hnu kum 45 a rei tikah 2,00,000 an kim.

           

Asbury le Paul ih kawhhran din daan an bangrep. A dinmi Thessalonica ih kawhhran ah Paul in, “Bawipa ih thu cu nanmah hnen ihsin Masidonia le Akhaia peng khua zakip ah a thlen lawng si loin Pathian nan zumnak thu cu khuaza ramkip ah a thleng a si” (1Thes.1:8; Tirh. 17:1-10) tiah a ti.

           

Khualtlawng ih thuzirh hi a hramthok in a um zo. Rualpi, sungkhat, le innhnen pawl hi kan ramthar an si. Tusun ah mi pakhatkhat thuthangttha theih ttultu a um ti na ruat dah maw?

 

Bawipa, thlarau hlo duhdawtnak thinlung i pe aw,

Ka sungin cuih thlarau cu duhdaw aw;

Keimah lam ih ttuan ttulmi ttuan ve ning,

Na hrangah cuih thlarau ngah dingin.

 

Khrih duhtu pawl cun a hlomi pawl tlun ah duhdawtnak an nei.

Next Page »