Duhdawtnak Tahfung

Sepetember 30

Tlawngkai Nithum

 

Duhdawtnak Tahfung

 

Siar:

Johan 15:9-17

 

Mi pakhat in a rualpi pawl hrangah duhdawtnak tumbik a neihmi cu

an hrangih a nunnak pek hi a si.   – Johan 15:13

 

Kumkhat Sung Baibal:

-   Isaiah 9-10

-   Efesa 3

 

October 2, 1954 ah raal bawi James O. Conway cu Boston Logan vanzam colhnak ihsin raal hriamhrei pawl phur in a pok suak. Van parih a zam ngah hnu Boston tikel tlun a thlen tikah rin lopi in a vanzam a siat. Cuih caan ah hril ding a neihmi pahnih cu: vanzam ihsin parasut thawn dawp ih a nunnak humhim awk maw? asilole tipi sungah a vanzam tlakter ih amah khal thih cih timi a si.

           

Vanzam ihsin a dawp hlo ahcun a vanzam cu inn tampi le innsungsang tampi umnak Boston khua ih Nisuahnaklam vengah amahte tla ding a si. Mangbangza a simi cu mi maksak Conway cun a nunnak liam in midang pawl ih nunnak humhim dingah a vanzam kha ti sungih tlakter dingin a hril.

           

Jesuh in, “Mi pakhat in a rualpi pawl hrangah duhdawtnak tumbik a neihmi cu an hrang ih a nunnak pek a si” (Johan 15:13) a ti. Midang nunnak humhim duh ih pumpeknak in mai’ ttulmi hnakin midang ttulmi thupi sawn ih ruattu thinlung picang a langter.

 

Mi pakhat ih a sim dahmi cu, “Duhdawtnak tahfung cu cuih duhdawtnak hrangah mi pakhat in ziang tluk a pe aw ngam” timi hi a si. Pathian in in duhdawttuk ruangah A Fapa neihsun in pek. Khrih in in duhdawttuk ruangah a nunnak pek in kan ai-ah thinglamtah ah a thi.

           

Pathian ih in duhdawtnak cu a tumtuk. Cuih duhdawtnak cu na cohlang zo maw?

 

Jesuh in A nunnak i pek tikah,

Harsatnak phunkim a tuar;

Calvary tlang ih thinglamtah parah,

Pathian ih duhdawtnak a langter.

 

Khrih ih thinglamtah hnakin Pathian ih duhdawtnak

fiang  sawn ih sim theitu ziang hman a um lo.

Moulmein Ih Nauhak kumkimlo Pawl Kawl Ralkap Tuan Ding ah Fial

News - Independent Mon News Agency

Moulmein ih tleirawl kum 18 hnuai pawl cu an duhlo cing in ralkap ah luh ter rero an si thu South East Comman (SEC) in a tarlang. Kawl ralkap pawl cun Moulemein, Arakan State, Pegu, Irrawaddy sehvel ih nauhak kumkimlo pawl leinak dingah nauhak pakhat hrangah Ks.2000,00 an hmang.

Nu le pa tampi cu sumpai neilo an si vekin Ks.2000,00 cu an cohlang. Thenkhat leh thung cun an fate pawl ralkap an luh tikah sumpai tampi hlawhsuak thei dingah an ruat bet.  

Moulmein khua mipi pawlih sim daan vekin nauhak kumtlinglo pawl hi leilo khalin a ruk khal in an ru ti a si ih, kan dung naite ah nauhak pa (10) pawlih tlawng feh lai an ruk hlo thu khal an tarlang bet.

Tui kum January ihsin kawlram ralkap thuneitupawl cun nauhak duhlo cingih kai vivo dingin tan an la timi thu khal tarlan bet thotho a si.

July 22,  ah Yoma thuthang latu pawl cun  “Child Soldiers Burma’s Sons of Sorrow” timi report an tuah ih, himi sungah ziangtin kawlram ralkap pawlin nauhak ralkap si ding in an kai timi pawl  tla fiangten an tarlang. Cun kan dung 2008 ah  Kawl acozah cun ralkap 500,000 tluk ih an pun duh thu an sim tel.

Human Right Education Insititution Of Burma in Kawlram ralkap nauhak a lakluh daan le upa pawl ralkap tuan ding ih afial daan pawl zohfel dingin UN pawl a sawm ih kan dung August 14 ah khan UN team tamzet kawlram ah an lut thawk a si.

A Toma thuthang report nak vek asile thlatin ralkap tuan lai mi 20-30 hrawng 14^th Commander Division ihsin an tlansuak theu ti a si. 

 

Khukbil Dingin Zuam

September 29

Tlawngkai Nihnih

 

Khukbil Dingin Zuam

 

Siar:

Kolose 4:1-12

 

Epafras in cibai a lo buk. Amah cu nan Pawl sungtel a si ih Khrih Jesuh riantu a si. A thinlung takte in nan hrangah thla a cam ringring; hngetzet ih nan din theinak ding, Khristian nun pitling nan neihnak ding, zumnak thu nan theih fiang theinak ding le Pathian Thu famkim ih nan thlun theinak dingah Pathian hnenah a dil.      -Kolose 4:12

 

Kumkhat Sung Baibal:

-   Isaiah 7-8

-   Efesa 2

 

US Senator ttuanvo a laak hlante ah John Ashcroft cu a innsang le rualpi pawl kha thlacam sak dingin a tong taa hngai. A kiang ih an khawm awklai ah a pa cu a tokham ihsin tho dingin a zuam rero kha a hmu. A pa cu mi damtuk lo a si ruangah Ashcroft in, “A poi lo ka pa, thla i cam sak dingah na din fekfek a ttul lo,” tiah a ti. A pa in, “Ding dingah ka zuam reromi a si lo, khukbil dingin ka zuam reromi a si sawn” a ti.

           

Himi in zumtu dang hrangih thlacam sak dingah thazaang suah a ttul zia i mangter. Paul in Epafras thu hiti’n a ngan:  Amah cu nan sungtel a si ih Khrih Jesuh riantu a si. A thinlung tak tein nan hrangah thla a cam ringring; hngetzet ih nan din theinak dingah le Khristian nunlam ah pitling nan sinak dingah, nan zumnak thu nan theih fiang theinak dingah le A thu famkim in nan thlun theinak dingah Pathian hnenah a dil ttheu a si (Kol.4:12) a ti. Thinlung takte in timi Greek ttong hin buan zuam awknak ah neh ding rori in natnak tuar tahrat in ttan an laakmi khi a sawhkhih.

           

Kannih teh Epafras vekin kan duhdawt mi pawl hrangah thinlung takte in thlacam kan zuam ve maw? 

 

                              A thianghlim le a sunglawimi hnattuan a um,

Hmunkip ah hnattuantu pawl a ttul;

A saangbikmi hnattuan a si,

Cumi cu thlacam hnattuan hi a si.

 

Midang hrang thlacam cu nunnak ih hnattuan taktak a si.

German Ram Hrilawk Nak

Thuthluknak Tuah Raalring

September 28

Tlawngkai Nikhat

 

Thuthluknak Tuah Raalring

 

Siar:

Joshua 22: 10-34

 

Olte in na thinheng hlah; olte ih thinheng cu mi aa pawl ih daan a si.

-Thusimtu 7:9

 

Kumkhat Sung Baibal:

-   Isaiah 5-6

-   Efesa 1

 

Kan kawhhran ih ka tel venak commitee pakhat sungih lungrual lonak a um laifang ah ka theihthiam lemlomi mi pakhat hnen ihsin ka e-mail sungah Bible caanghril in rak kuat. Thubuai a zate’n thei hliah lo piin Bible caang hmang in i dodal tiah ruat in a parah ka thin a hengzet.

           

Ka lehrul hlan ah ka pasal Jay in ka lunghrinnak hi a sialam zawngih zum hnakin hlawknaklam ih la sawn dingah ruahnak i pek. “Ruahnak sia tel lomi simfiangnak a si men ding” i ti. Ziang a cang ding ti cu ka ruat baan lo na’n ruahnak i pek vekin telephone in ka biak. “I biak ruangah ka lungawizet. Ka computer ah virus a lut ih Sunday School pawl zirh dingih ka timtuahmi Bible caang pawl e-mail address ka neihmi hmuahhmuah hnenah amah te’n a kuat thluh” tiah i ti. A si lonak hmun ah thubuai tuah ngah lo dingin ka pasal Jay hmang ih i khamtu Pathian ka thangtthat.

           

A si ngaingai nain a dik lomi thil ruangah a ttul lozetmi buainak ka tuah zikte. Israel pawl khal cutivek in an cang ve. An unau pawl ih biakttheng sakmi kha Pathian dodal ding tumtahnak thawn an sak tiah an ruat sual ih raaldo dingin an timtuah (Joshua 22:9-34). Thutthennak sual kan tuah lonak dingah thudik theih hmaisa taa ding kan raalrin a ttul. 

 

 Na ruahnak pawl na finkhawm tikah,

Raalring tein, nuamte’n tuah aw;

Zamrangzet ih tuahmi thutthennak pawl cu,

Sir awknak in a thlun ttheu ti ka thei .

 

Thinlung hnaihnoknak hrial thei dingin

cemnetnak sual sungah dawp aw hlah.

US In Pakistan Bawm Ding

NUP 2010 Hrilawknak Ah Tel Ding

China in kawlram hrang refugee camp 3 tuahsak

China pawlin Kawlram raltlan (refugee) pawl hrang ah a ram le Kawlram karlakah Refugee Camp pa (3) a tuah sak ih tuini tiang zohman cunah an um hrihlo tin thu kan dawng. China Border ih thusuak kan dawn daan vek asile, raltlan mi 5,000 Manghai ah le mi 6,000 Pengjiazhai ah le Xiaozhai ah mi 3,000 pawl cu China ram in raltlan a lak tum thu ramri ih raltlan buaipitu pawl in an rel.

National Unity Party 

Rangoon (Mizzima): National Unity Party  (NUP) pawl  cu kum 2010 hrilawknak ah thinsen luannak thawn an teltum thu party Joint Secretary Khin Maung Gyi cun Press Conference zing ah a sim a si. NUP pawl in nonawn 500 lenglo an nei ih cui pawl in hrilawknak ah nasa tak in tan an la ding.

Thinglamtah Ah Khenbet

September 27

Nipi Ni

 

Thinglamtah Ah Khenbet

 

Siar:

Kolose 2:9-17

 

Hlanlai ah nan sualnak ruangah le Daan leng ih a ummi Gentile mi nan si. Sikhalsehla atu cun Khrih thawn hmunkhat ah Pathian in a lo nungter zo. Pathian in kan sualmawhnak hmuahhmuah cu in ngaidam zo a si.        -Kolose 2:13

 

Kumkhat Sung Baibal:

-   Isaiah 3-4

-   Galati 6

 

Kan Kawhhran biakkhawmnak cu mi thinlung a khoih ngaingai. Pastor in Jesuh cu kan sualnak phur in kan tuar dingmi cawhkuan tuar in kan ai-ah a thih thu a sim. Sual ngaidam lungawinak co hrih lo pawl sualphuannak nei dingin a dil.

           

Kan sualnak le kan mawhnak pawl cu cahnah pakhat parah ngan in, Biakinn hmai ih thinglamtah parah va khen ding a si. Mi tampi an feh ih minutes tampi an va khen rero. Cu tiih an tuahmi in sual ngaidamnak in pe lo nain Jesuh Khrih in thinglamtah parah khen le thih tuar in kan sualnak in laaksak zo a si ti in theihter saal.

           

Kolose kawhhran ah Paul ih a zirhmi thu khal cuih thu a si. Kolose zumtu pawl cu “Khrih thihnak hi nan ttulsammi hrangah a daih lo” tiah zirhtu sual pawl ih zirhmi in a nehkhuh hngai. Curuangah Paul in, “Kan sual leiba ngannak cazin cu a sungih ummi, mi a ttemttawntu daan terek pawl thawn thinglamtah parah khencih in a phiat fai ttheh zo” (Kol.2:14) tiah a ti.

           

Pathian hnenah kan sualnak phuang in ngaidam kan dil ahcun in ngaidam dingih in thianter ding (1Jn.1:9). Jesuh in kan sualnak hmuahhmuah laak in thinglamtah parah a khenbet zo.

 

Bawipa, sualphuang ngam dingin thazaang i pe aw,

Ka thinlung sung sualnak Na hnenah ka phuang;

Na ngaidamnak famkim ka theithiam ding,

Sual phurhrit ihsin ka luat thlang ding.

           

Sualnak cu Pathian in a faale pawl

phurhter a tum dah lomi phurrit a si.

Duhdawtnak In Ziangkim A Zum

September 26

Zarhte Ni

 

Duhdawtnak In Ziangkim A Zum

 

Siar:

1 Korin 13

 

Duhdawtnak cu a bei a dong dah lo; ziangkim a zum,

ziangkim a beisei ih ziangkim a tuar thei.       -1 Korin 13:7

 

Kumkhat Sung Baibal:

-   Isaiah 1-2

-   Galati 5

 

A liamcia kum 40 lai hrawngah ka rualpi pakhat in duhdawt tlak lo tiih ka ruah mi pakhat kha a duhdawttuk. A cemnak ah riahsia le beidong in a thinlung a siat pang ding ka phan sak.

           

Ka thinphanmi ka sim tikah ka rual pa in, “Ka Bawipa hmai ih ka din tikah mi malte si loin mi tampi na duhdawt hngai tiah i ti ding ka zum,” tiah a ti. A ttongmi ka hngilh thei dah lo.

           

Paul in, “Duhdawtnak in ziangkim a zum” (1Kor.13:7) a ti. Duhdawtnak in mi a zum. An sungah thil cang theimi a hmu. Pathian in mihiip lo le duhdawt tlak lo pawl kha mi mawi le zaangfahnak nei ah a canter hngai thei. Duhdawtnak a peng ahcun rinsantlak sinak le ruahsannak a peng ruangah a si ding.

           

Ttihnung thil a rat tikah rul vekih fimkhur (Matt.10:16) in kan theihthiam a ttul. Kil awtuk, ralringtuk, mi zum lo hmang kan si thei men nain ttuanvo poisa lo pawl le sia-ttha thleidang thiam lo pawl lehrulnak tthabik cu duhdawtnak a si.

           

Mi hrokhrawl le mibum si ding tiang in siatsuah thei lotu mi pakhat zum cu a ttha sawn (Matt. 5:38-48). Thinlung neih lo remrem hnakin a kekkuaimi thinlung neih a ttha sawn. Mirang biazai ngantu Alfred Tennyson in, “Duhdawtnak nei dah lo hnakin nei dah ih hloh a ttha sawn,” tiah a ngan. Ka lungkim ve.

 

Bawipa, midang zum ngam dingin in bawm aw,

Ziangkim anmah sungin Na tuah thei;

Cuti’n mi tampi ka duhdawt kan ti thei ding,

Mi malte duhdawt hnakin.

 

Duhdawtnak in mi ziang vek an si timi hnakin

mi ziangvek an hung cang thei timi a zoh sawn.

Midwife Vek Zirhtu

September 25

Tlawngkai Ninga

 

 

Midwife Vek Zirhtu

 

Siar:

Galati 4:12-20

 

Ka duhdawtmi ka faale pawl, nunau in nauhrin nat a tuar vekin Khrih hmuihmel nan sungih a seem hlan lo ka tuar saal hrih ding a si hi!    -Galati 4:19

 

Kumkhat Sung Baibal:

-   Solomon Hla 6-8

-   Galati 4

 

Khuahlan Greek mifim Socrates ih nu cu nausuah bawmtu sayama(midwife) a si. Curuangah Socrates cu a nu in nau hringtu pawl kha leilung tlun ah nunnak thar ra thleng dingin a bawm hngai daan zoh hliah phah in a tthanglian. Cuih a hmuhtonmi in a thuzirhnak a nehkhuh thluh. “Nausuak kan tuamhlawm daan a tlangpi thu cu a bangrep nain ka minaa pawl cu nunau an si lo, mipa an si. Ka tuamhlawm mi cu taksa ruangpi a si lo, thlarau nauhrin a si,” a ti.

      

Socrates in a tlawngta pawl khi thuhla theihter vek men in a zirh hngai lo.  Anmahte thuruat suak dingin thusuhnak har zetzet a sut hngai. Ruat suak dingin thusuhnak ih a zirh hngaimi hi a caancaan ahcun nauhrin nat tuar vek a si. 

           

Paul khal in zumtu pawl dungthluntu an sinak ding thu a sim hngai tikah, “Ka duhdawtmi ka faale pawl nunau in nau neih zik pumnat a tuar vekin Khrih hmuihmel nan sungih a seem hlan lo ka tuar saal ding a si hi!” (Gal.4:19) a ti. Paul cun zumtu pawl thlaraulam ah pitling an si ih Khrih an bang ding a duh (Efe. 4:13).

           

Khrih bangmi nunnak cu nun sung tthanglian reromi nun a si ih thinsau a ttul. Sawmngiarnak le beidonnak a phunphun kan tong ding. Amah kan rinsan ahcun thlarau nun tthanlennak le nun tleutertu ziaza kan nei ding.

           

Pakhat le pakhat kan ttul awk zia thei dingin in bawm,

Khristian nunnak lamzin kan feh lai ahhin;

Tta le far, u le nau vekih pawlkom awknak ah,

Nikhat hnu nikhat in tthanter vingvo hram aw.

 

Lungthlenghnak cu caan khatte ih mangbangza thilcangmi a si,

pitlinnak cun nun sung caan saupi a rei.

Lung Diriamnak

September 24

Tlawngkai Nili

 

Lung Diriamnak

 

Siar:

Matthai 6:24-34

 

Zokhal in Bawi pahnih a rian thei lo.         -Matthai 6:24

 

Kumkhat Sung Baibal:

-   Solomon Hla 4-5

-   Galati 3

 

Hnawm hlonnak hmun ih a tomi nutar nu ih zuk in ka thinlung ah thu tampi i ngaihtuahter. Cuih zuk sung ahcun nutar nu cu hnawm-pung sung ihsin a sarmi rawl-tthing kha hni  siamsi te’n a ei.  A diriamtertu thil hi a fatetuk.

           

Nun a har zia le khawsaknak hrangah paisa cem tam daan tampi an simrel ttheu. Mi tampi cu nunnak hrangah thinbaang in an um. Jesuh in, “Cuti a si ruangah nan nunnak hrangah nan ttulmi ti le rawl le nan ruangpi hrangih hnipuan pawl thu ruat le donhar in um hlah uh. Thungai ti ahcun nunnak hi rawl hnakin a thupi sawn lo maw? Hnipuan hnak khal in taksa ruangpi hi a thupi sawn lo maw?” (Matt. 6:25) a timi hi a si thei ngaingai maw?

           

Jesuh in hnattuan a ttul lo, rawl ei a ttul lo, hnipuan hrangah poisat a ttul lo tiah  a ti duhmi a si lo. Hih thil pawl hi thupituk ah an ra cang ih Amah rinsan loin tangka ih sal kan si lonak dingah raalrinnak in pekmi a si sawn. “Minung pakhat cu Bawi pahnih ih sal a si thei lo ding” (c.24) a ti.

           

“Pathian uknak le a dingfelnak hawl hmaisa ding” (c. 33) timi ih sim duhmi cu ziangtluk in kan nunnak le kan innsang hrangah kan zuam rero khal asile kan ttulmi taktak in petu cu Bawipa Amah a si. Pathian cu van ih kan Pa a si ruangah kan ttulzat cu in pe dingih kan nei ko ding.

           

A thluasuah kut thawmlianpi sungah thup in kan um,

Raal in in thlun thei lo, zuarthlaitu in in neh thei lo;

Thinharnak tilet le donharnak phenthlam in,

Zo hman in in namnuai thei dah lo ding.

 

Pathian hnen ihsin kan ngahmi asile

paisa cun ttha tein in rian ding.

Julie Ih Thlacam

September 23

Tlawngkai Nithum

 

Julie Ih Thlacam

 

Siar:

Johan 14:12-14

 

Cule Pa ih sunlawinak cu Fapa sung ihsin a langnak dingah ka hmin in nan dilmi hmuahhmuah cu ka lo tuah sak ding.     -Johan 14:13

 

Kumkhat Sung Baibal:

-   Solomon Hla 1-3

-   Galati 2

 

2008 ah Day of Discovery zuknung ih a teltu pawl cu Tuluk ram ah missionary ttuan dahtu Eric Liddel ih thuhla zingzoi dingin an feh. Eric cu 1924 ih Olympic leh zuam awknak ah sui laksawng ngahtu a si ih Chariots of Fire hi a thuanthu zuknung ah tuahmi a si. Tuluk ih a fehtu pawl lakah Eric ih fanu pathum Patricia, Heather le Maureen an tel ih upa pahnih hi Taluk ram ih suakmi an si. An ninu pitar Louis khal a tel ve.

           

Beijing khuapi an thlen hnu ah hmun hlat nawn an thilri thawn ke ih an feh bet tikah Louis cu a thawthawt a tawi deuh vingvo. Cutikah Day of Discovery sungtel Julie Richardson cun a kiangah a to ih a khuk parah a kut ret in, “Duhdawt mi Jesuh, Aunt Louis hi  a thawthawt nuam dingin bawm hram aw,” tiah thla a cam. Hmakhatte ah a thawthawt a ttha saal.

           

Julie ih thlacamnak in a zumnak a alhter saal thu Heather in a sim saal. Julie ih thil tuahmi in zumnaklam ah a daithlangmi Heather kha Jesuh thawn kumkhua pehzom awknak kan neih thu a sim fiang.

           

Pathian kan kiangah a um ti in mangtertu kan ttul ttheu. Harnak a thleng ih Pathian cu hlatpi ah um vekin na ruah caan ah Julie ih thlacam mang saal aw. Pathian thawn pehzom aw dingah thlacamnak pakhatte lawng a hlat (Jn.14:13).                  

Pathian in thlacamnak a let, a sangbik thuneihnak thawn,

A thluasuah pawl nikhat hnu nikhat alak in a pe;

Thungaithlak ih dilmi, Vancung Bawi tokham ihsin a let,

A minung pawl ih thlacam Pathian in a thei.

 

 

Pathian in A minung pawl ih thutak ih thlacammi theih a duh.

Next Page »