2009 Lai Kumthar(fanger) Malaysia

Kei Tin Thang – Falam pawlpi Malaysia (Sungtuan)

2009 Lai Kumthar (Fanger) puai cu FGA Hall, Kuchai Lama, Kuala Lumpur Khuapi, Malaysia ah Falam Pawlpi Malaysia ih hoha nakin sunglawi zetin tuahsuak a si.

Kan timlam cia vekin Puai fehtu ding mipi cu Bus thawn tlun feh nak tawlrel a si. Mipi kan suak thahnem zet, LCF Biak-inn in Bus-7, Falam Christian Community (FCC) Biak-inn  in Bus-3, Sakambut in Bus-1, KK restaurant Kuchai Lama in Bus-1 tin feh a si ih a zaaten Bus-12 hman a si. Mah te Taxi ih rak feh pawl thawn minung-700 lenglo in Lai kumthar puai cu hman a si.

Can Hmandan (1:00 PM-6:00PM)

Lai Kumthar puai cu hmun tin ihsin mipi kan thlen kim thluh hnu ah Mai Sui Rem Par in can a kai ih zanlam 1:00 PM in can hman thok a si. Mipi dingin Pu Van Lal Hngak ih phuah mi Hring Dildel Kan Lairam ti mi hla kan sak  ih, thinlung a thar zet. Cu mi theh in Rev. Ral Za Tlung in can ap thlacam nak a neih hnuah FPM Hotu Salai Thang Zau in thu cah sim nak a nei. Cui mi thehin mipi pawlin minute pakhat sung dingin lu kunihkan Lairam Upat peknak  kan neih hnu ah Rev. Run Cung Mang in zaapi hrang thla cam nak a nei. Cu mi hnuah FPM sungtuan in Malaysia ih kan Falam Pawlpi cangvaihnak a rak neihmi pawl leh Lai kumthar tuah danthu thawn  pehpar in report peknak a nei. Cu mi thehin Pastor James Wang in thu cah tawi sim nak a neih  hnuah Salai Siang Mang(FPM sumkiltu) in Laikumthar  thuanthu tawi sim nak a nei.

Fashion show

Falam Nauhak Tlawng (MEC) Tlawngta pawlin Hring dildel Kan Lairam leh Tlangsang (fanger) laam leh Zakhai zuma Taungdan laam pawl in can an hmang. Cui hnuah kan Tlawngta Nauha pawl grade-1 (Kum-7,8)mi tete in fashion show leh model show mawi taktak in an nei ih nauhak tete zei tak leh ngaihno bei zetih an run show cu a zohtu mipi in an lawm tukih an au kio nak ah hall cu a hrum in a hrum durdo. Cui hnu ah Lai fala pawlin fashion show an run nei cu an thiam in an mawi si, Mirang leh ramdang fala kan ngai ce lo. A hlei ce in kan Tlangval pawl in an sun lawih tukih Pangpar pekah an phar an zuang, pangpar in a daih lo ih mihrekkhat  tla cu an kut kai ah an rak phar na sa.

Suncaw ei

Falam Women Committee ih hoha nak in a hlan zarh khat duh ihsin Lu sam manglo’n in timlam sak mi Laisang thaw zet le Lakphak ti cu Puai a ra suak tu minung 700 lenglo in tlai le puar zetin suncaw ei nak kan nei. Mikhua miram ih Laisang fun te rori vun ei cu di a riam nasa.

Lailam phun phun

Cui hnu ah Lailaam a phunphun in a run peh ih (1). Sial Run Tang Laam, Taisun  Pawlkom, (2). Fang zaa aih laam, Zahau Pawlkom, (3). Lailen laam ,Ngawn Pawlkom, (4). Kuh Cangpa laam, Laizo Pawlkom ti in laam mawi zetzet in lam nak an nei ih mipi in zoh nuam an ti zet, a hleice in kan thangthar mino pawl in Lailaam hi an rak hmuh dah lem lo mi a si tik ah zoh man hla an ti zet.

Laksawng pek nak

Cui hnuah FPM in LCF pastor Rev. Run Cung Mang, FCC pastor Rev. Bawi Thian Tling leh FGA hall hmang thei dingih in tawlrel sak tu Pastor  James Wang laksawng pek nak kan nei. Cui hnu ah Lai Kumthar Volley Ball zuamawk nak ih 1st ngah tu Jl. Alor, 2nd ngah tu Cheras, 3rd ngah tu Loke Yew veng pawl leh Lailaam mawi zetzet in laam sak tu MEC Tlawngta leh Tlangkulh Pawlkom pawl hnenah laksawng pek nak neih a si.

Awnmawi Hlasak

Lai hlasak thiam kan neih mi lakih sin Malaysia ih um mi pawl  Mai Rachel Run Hniang Par, Mai Ngen Nei, Mai Te Leuh,Mai Suite, Salai Thangpi, Salai Bawi Hre, Salai Vaite, Salai Thawng Mawi, Salai Kur Bung Bel, Salai Biak Thawng Ceu pawl in ram hla leh lengzem hla mawi taktak thawn mipi in run awi ih mipi lung thin cu an hla ih zir in Lairam a thleng thul, duh mi thinhnem tu hnen a thleng thul kan lung a leng cio.  Awnmawi tumtu pawl khal in an thiam mi hmuah hmuah sup lo in an run thai kual cu kan laimi Awnmawi ah kan rak niam lona sa.

Zaithiam pawl in zaihla thawi hlasak nak an neih ttheh ah Mipi dingin Mawi sinseh Kan Lairam ti mi hla kan sak ttheh hnuah Rev. Win Tin ih thlacam nak in kum 2009 Laikum thar puai cu sunglawi leh hlunghlai zet in zanlam 6:00PM ah sianglo cing ten kan can kan cem ter.

(Visited 72 times, 1 visits today)

Comments

comments

Comments

%d bloggers like this: