Kumthar Hmang Hmaisabik, Sydney Australia

By        : Pu Sum

S          : SBT

31 December, 2008

Israel leh Hamas Do awk nak ah Palestinian 374 thi Zo 

Israel leh Hamas pawl do awknak titawp tumih  Leitlun ram dangdang palai pawlcun theihtawp suahin hma anla rero ih. Middle East ih rualrem nak a suahthei nak dingah Israel leh Hamas pawl cu Ceasefire tuah dingin an nawr rero.  Mizan sun ah Israel ram hruaitu lu pawlcun to khawmnak an nei ih.

Nazi 24 sung Ceasefire tuahdingah lungkim tlangnak an nei zik a bangnan. Foreign Minister Tzipi Livni leh Defence Minister Ehud Barak cun ni hnih sung Ceasefire tuah ding asi khallen.

Himi sungih Hamas pawlin Israel ram sungih Rocket an kaplut asi ahcun  Gaza luhcilh dingih Ralkap thlah an duhthu an sim.  Hiti vekih thutiam kamnak hnget khohzet a umta loah cun Ceasefire tuah an duhlo thu Israel ram hotu pawlcun an sim. 

Franch in  Ceasefire tuah dingih a nawrnak cu Israel cun a pawmlo ih Hamas pawlin Rocket hmangih Israel kah bansan an tum cuanglo tiah an tibet. Himi lai ah Egypt hoha nak hnuaiih Israel leh Hamas pawl karlak ih banphar tum ram dangdang palai pawlcu. Cairo khawpi ah an tawng aw khawm ding.

 Israel in Gaza hi ni 5 sung a kapzo ih. relzo vekin Gaza khawpi ih Building tha zetzet tampi leh Egypt thawi an palkai awknak leilungsung lamzin khal an kapsiat thluhzo ih Palestinian 374 an thizo ih.Hamas pawlih kahmi Rocket khalin Israel mi 4 a kapthat ve.  UN cun kandung zarhte ni ihsin tuisun tiang ni 5 sungah Palestinian 62 hnakih mallo an thi tiah asim. 

Israel vanzam in Bomb a thlak rero nak lakah Palestinian mi rethei zet pawl bawmnak hna khal ttuan rero lai asi ih. Tui dinhmun ah ei- in ti le rawl, sii leh thildang ttul pawimawh cu Gaza bialah a um nawnlo tiah UN cun asim. US, UK, EU, Russia pawlcun Palestinian ih mire theipawl an thihmai lo nak dingih bawmnak pek zamrang a ttul ruangah Israel cu supaw hram dingin an dil.

Iraq, UK, Australia Thu Thlung Tuahbet  

Iraq ram cozah cun UK leh Australia ralkap pawlcu Iraq ramih an umbet nakding can tisau dingin thuthlung a tuahpi.

An thuthlung tuah tlang mivek asilen UK, leh Australia ralkap pawlhi Iraq ram ah kumthar July thlacem tiang an umding. Relzo vekin US, ralkap siarlo ram dang ralkap pawlhi Iraq ramih an umthei nak tikcu cancu thaisun ah cem ding asi.

US ralkap cu Iraq thawi an thu reltlang vekin 2011 tiang  Iraq ah an um ding. Tu ah UK in Iraq ah ralkap 4,100 a ret ih Australia cun 1,000 lawng a ret. US cun kum 2003 ih Iraq a siim ihsin ralkap 100,000 lenglo a ret ringring ih.

Tu ah hin Iraq ah US ralkap 140,000 an um. hi ram pathum tlunah El salvador, Estonia,leh Romania pawl’n malte fingfing anretve.

Iraq Defence Ministry thu puangtu Mohammed al-Askari  in a simnak ah hi ram pathum pawl thaw khalin ralkap ret vivo danding thu ah thuthlung an tuah cing ding thu asim. 

PM Hlun Khaleda Zia in Hril awknak Result Pawmlo 

Bangladesh ram hril awknak ih caklo tu Prime Minister hlun, Khaleda Zia cun hril awknak ih Vote thlak dan ah thildiklo cingpen a um ruangah result hi a pawmlo thu asim.

Khaleda Zia cun hril awknakih vote tla diklo zet cu Polling Station  tampi ah theih fiangnak thazet a neihthu asim ih. Hril awknak resul cun mipi duhdan thutluk nak dikzet a puangsuaklo a ti.

Relzo vekin Bangladesh Election Commission cun hi hril awknak ah Prime Minister hlun  Sheikh Hasina ih hruaimi, Awami Laegue Party cun nehzet in Cozah nak an tuah thei tiah a puangzo ih.

Hi hril awknak hi Media dangdang  ramdang ih si hril awknak thlirtu leh leitlun ramdang palai pawlcun  hi hril awknak cu a dik ih a thianghlim tiah an fakzet. Khaleda Zia ih hruaimi Bangladesh Nationalish Party cun  hi hril awknak Polling Stattion 200 lenglo ah thil diklo a umtiah Election Commission hnenah  an lungawi lo thu an thlen. 

Kumthar Hmang Hmaisa Bik, Sydney Australia 

 Nazi reilo te ih thlengding kumthar 2009 cu leitlun mipi in hngakhlap zet’n kan thlir cio. Leitlun ih kumthar hmang hmaisa bik Australia ramih Sydney khawpi khal ah kumthar hmuak dingin mipi tamzet an pungkhawm.

Australia ram ih Sydney khawpi hi leitlun saklam leh thlanglam tahnak rin kiangih um asi ruangah  leitlun hmundang hnakin hi khawpi cu kum a thar hmang hmaisa bik asi.

Australia khawpi dang  Perth, Brisbane, Melbourne leh khawpi dang khal ah minung thawng tampi pungkhawm in kumthar hi an hmang uar zet ttheu.  Taiwan ram Taipei khawpi khalah in sawng sangsang zetzet tlun ah halzit mawi phunphun hmangin  kumthar hi ropi zetin an hmuak ttheu. Tui kumkhal ah London khawpi London Eye kiangah pungkhawm in ropi zetih kumthar hi lawmtum asiih. Scotland ramih Edinburgh ah khal ropi zetih hmuah tum asi. Britain ram khawpi dang Liverpool, Glasgow, Leeds, Manchester, Newcastle leh Birmingham pawl khalah Uar zetih hman tum asi..

 

Kumhlun mangtha damten ! Kumthar sunglawi kanlo hmuak cibai!

Tikcu Le Caan

December 31

Tlawngkai Nithum

 

Tikcu Le Caan

 

Siar:

Thusimtu 3:1-8

 

Ziang hmuahhmuah in caan an nei ih leilung tlun thil tinkim hrangah tikcu remcaang a um. – Thusimtu 3:1

 

Kumkhat sung Baibal:

-          Saam 119

 

Rev. Gardner Taylor cu American thusim thiam hminthang a si. Amah cu Louisiana ah 1918 kum ah a suak ih a pu cu sal a si. New York khua ih mipi tamzet hruaitu Pastor a si theinak le hrinhnam thleidannak um lo dingih cangvaihnak ah hruaitu a si theinak hi a no lai ah mahte lawng a dang teih umnak a nehsuak ruangah a si. Kum 60 leng lo leitlun khuazakip khualtlawng in thu a sim.

 

Kum 89 a kim tikah a harhdamnak a ttumsuk ih thusim an fialmi pawl a sim thei nawn lo. Rachel Zoll thuthangca ih a simmi cu, “A thok ahcun ka tha a sia. Hmanseh ttuan ding tikcu le caan an um. Kan tithei tawk a tthabik ih kan tuahmi pawl kan hmu elh ding, kan tuahmi sungah thil ttha kan hmu leh ding,” a ti.

 

Kan nunnak ih kan tonmi sawmngiarnak (challenge) pawl in Solomon ih ttongmi in vun mangter. “Ziang hmuahhmuah in caan an nei ih leilung tlun thil tinkim hrangah tikcu remcaang a um (Thusimtu 3:1). Thungaite cun, kan ttah caan hnakin kan hnih caan a tam sawn, kan riahsiat caan hnakin kan lungawi caan a tam sawn, kan sun caan hnakin kan miat caan a tam sawn (c. 4, 6).

 

Tikcu le caan tinte ah kan hrangah zir dingmi le caan ttha kan co tikah, “Pathian cu kan beunak le kan cahnak a si” (Saam 46:1) ti’n ka ti thei. Ziangvek tikcu caan ih kan um khal le Amah rinsan ding kan si.

 

            Thaal cu thlatang ih a thlengh awk vekin,

            Kan nunnak khal a thlengh aw ve;

            Thimnak caan ra thlen hman sehla,

            Pathian in na hrangah tumtahnak a nei ti hngilh hlah aw.

 

Kan nunnak ih ziangvek tikcu caan khal ah

kan lungput in thil a danglam ter thei.

 

Thailand Prime Minister A Buai Pei Maw?

: By-Pu Sum

: SBT

: December 30, 2008.

 

Israel In Hamas a Kap rero Lai, Minung 320 Lenglo Thizo 

Israel raldo nak vanzam cun nili sung Gaza ih Hamas Building leh thil pawimawh dangdang pawlcu a kap rero lai ih Palestinian minung 320 lenglo an thizo.

 Tuisun khal ah Israel ralkap vanzam pawlcun Gaza an kapsal rero lai ih. Palestinian minung 10 an thibet ih minung 40 lenglo in hriamhma an pubet.

 Himi lai ah Hamas pawlin Rocket hmangin Israel cu an kaplet ve ih  Israel ralkap pakhat telin mipali an thi tiah UN cun asim. UN Secretary General Ban ki-Moon cun Israel leh Hamas pawlcu an do awknak titawp dingin  a ngen ih  an pahnih ih a mawhthluk veve thukhal a sim.

Ban Ki-Moon cun Israel cun a ram humhim nakdingah thil a ti cu thiang hmansehla  hiti vek law mam nasa tukih thil ati cu adiklo asi ati.Mipi vangtlang tamzet an thih leh in le lo tamtuk a siatbal cu pawi ati thu asim. 

Israel hin ralkap ttuan lailawng silo do awknak ih fehthei mai reserve tamzet ralkap ih lut dingin a ko khawm rero lai ih. Israel cu Gaza dodingah a timtuah aw sinsin tiah BBC cun asim.

Redcross ai awhtu pawlcun Israel in a kahmi Palestinian minung hriamhma tuarpawl tuamhlawm nakding sii zung leh thilri ttul mi in a daih nawnlo ruangah harsat nak tampi an tawnthu an sim.

Gaza mipi pawlin nitin thilttul mileh damlo hriamhma tuarpawl tuamhlawm nak thilttul mi an tlasam zet ih. Egypt cun a ram fehtlangih Gaza hmanding sii pawl lakluh siannak a pe ih. European Union khalin Gaza bawmnak ding leh an bawmcia mi hnakih tam  bawmbet nak dingthu an relding. 

Kan dung zarhte sun ihsin Israel cun Gaza a kah nak ah Hamas cozah building pawimawh zetzet leh Gaza leh Egypt pehzawm awknak leilung sung virhkua mi lamzin khal an kapse thluhzo ih.

Hiti cingin mizan sun lawng hmanah Gaza lam ihsin Israel ramsungah Rocket 40 lenglo an kap lutve tiah Israel cun asim.  US cun nidang vek thotho in Israel hi an ttan hngal ih hi buainak cu Hamas pawlih kawhsuak mi rori asi tiah  sim’n Hamas pawl’n Israel an ti buai ringring cu an bansan a cu a tibet. 

Bangladesh Ram Hril Awk Nak Ah (ALP) An Cak 

Bangladesh ram hril awknak Vote siarlai rero mi ah  Bangladesh Prime Minister hlun, Sheikh Hasina Wajed, ih hruaimi  Awami League Party (ALP) cun nasa zet’n nehnak anco.

Hril awknak thu puangtu  S M Asaduzzaman ih sim nakah, Awami Laegue Party in  Seat zaa ah 75% an co felzo ih   Parliament Seat 299 sungih vote tla siarfel zo micu Seat 295 asiih. Himi sungah Awami Laegue Party cun Seat 229 an lazo tiah asim.. Awami Laegue Party hin Party dang thawi kawm aw lo’n Cozah nak an tuahthei ticu a fiangzo. 

Kum 7 sungih Bangladesh ram hril awknak hmaisa bik ah hin. Awami Laegue Party, leh Bangladesh Nationalist Party hi Party tumbik cuh aw tawk ding bikih zum mi ansi ih.

Asinan Bangladesh Nationalist Party, cun Awami Laegue Party, cu a nehlo nasa ih  Bangladesh Nationalist Party cun zaa ah 10% hrawngfang a hmuban.

Bangladesh Nationalist Party thupuangtu cun an party an cahlo naksan cun hril awknak ah thildiklo cingpen nasazet a um ruangah tiah asim.  Tui bangladesh ram hril awknak ih nehnak cotu Sheikh Hasina  ih Pa hi  Bangladesh ram zalen nak sualsuak tu Sheikh MujiburRahman asi ih. bangladesh ram zalen nak a ngah hnu deuh 1975 ah khan  General Frshad in a Cozah nak a nawrthlak sakih a mahkhal khaithat a rak si. 

Thailand Prime Minister A Buai Pei Maw? 

Thlali sung ih Thailand Prime Minister pathum nak, Abhisit Veijajiva, cun dodal tu tamzetih nawrnak hnuaiah  PM asi hnu ih a vawikhat thusim nakcu  an ram foreign Ministry in pi ah a nei ih.

PM in thusim a tumnak hmun Parliament inpi cu  Dodal tulam mipi in an kulhbuai ruangah. PM hin rorel theiding tlak MP pawl a kokhawmih  hmundang ah Session hmaisa bik hi neih asi.

PM cun an ram Economy tuahthat nak dingah thil ttul tuah thei dingmi cu zamrang zetih tuah dingah thutiam nak anei. 

Thailand Prime Minister hlun ramdang ih tlan relhlai Thaksin Shina Watra thlawptu mipi pawlcu Parliament tualah lung awilo nak langter in an pungkhawm ih. Cu ruangah PM thar  Abhisit Veijajiva in  Parliament  hmun hnih ko khawm ih hmundang ih Session hi a tuahnak asi.

Himi laiah MP tampi cun hiti vekih thil fehpi hin zianghman  umzia a nei cuanglo dingtiah an rak sawisel. A mah duhlo tu pawlcun Prime Minister thar Veijajiva hi  PM dingah mipi zohman ih pawmi asilo ih  Court in PM dingih a ret ruangah mipi in an pawm tinak zianghman a umlo  cu ruangah a bangding asi tiah an nawrve. 

Ruang Pariat hmu suakzo 

Tui kan dung Colhni sun ah khan Canada ram ih Rocky Mountain ih Vur motor, Snowmobile mawngtu, Vur tawlh cim in a khuhmi pawlih ruang 8 cu hmuhsuak sal an si.Hiang pawlhi an zaten minung 11 an si ih Snowmobile mawngtu minung 7 cu Vur tawlhcim in a khuh ih cumi vungrun suak tumin minung 4 cu vurtawlhcim in an mah a rak khuhbet ih minung 3 cu nungdam in an suakthei hramih minung 8 cu an thithluh.

 

 

Thufim 35 pawl

1. Muvanlai in thuro nunnemte a deh dahlo.
2. Muvanlai in thauthe a hum theilo.
3. A rilrawngmi pum cun hna a nei lo.
4. Siangpahrang cun mit tampi a nei ih theihnak hna khal tampi a nei. Famkim Siarbet

Kei cu fate 10 ka nei duh

30-12-2008: Fala pawl hin tlangval an duhzawng cu ziangtluk leer ti thei khal sehla an duh thotho, mizei, hmel tha; pa deuh mai cu an uar tuk lawmmam.

Leitlun mipa hmeltha le zei lam ih hmin thang Tom Cruise cun mangbang thlak zetin fa nau (10) ka nei duh a si a ti ta riai.

Tom hin a nau nu Suri ih fa pawl kum reipi a rak daw zo. Curuangah fate neih a duh tuk.

Tom cu kum 12 a ti ihsin a pai enkawlnak kuthnuai ah a rak um lo ih pai duhdawtnak a tlasam deuh ruangah ka caan tam sawn cu ka fate hrangah caan ka pek thlang ding.

Ziangruangah tile, pai duhdawtnak ka khawp lo ruangah ka fate pawl cun pai duhdawtnak an khawp ding a si a ti.

Tom cun aipuang zetin an nu khal a fak. “Kan nu Katie Holmes hi a hmel le tha, capoh le a duh, cun kan thinlung tla a bang aw tuk, ka tuah duhmi thil lolam tete khal I phurpi tuk ih kan nuam thei ngaingai; romantics lam tla a paih tuk”a ti.

Kan nu Katie hi nunau danglam zet a si, a thluak a tha; a capoh tuah daan pawl khal a thianghlim tuk a ti. Nu thathum, nu cakvak khal a si.

Ka suang lawlaw a si a ti bet. Zanlam rawl ei hlan ah hla mawi le awnmawi ngai in kan nuam aw theu tin a thusim a tawp.

 

 

 

 

 

 

Mero ruangah mi 6 an thi zo

30-12-2008: India ram cu mero sahzet in a tuam khat theh. Mawtaw to pawl cun zinglam nazi 2:00 ihsin 11:00am tiang an mawtaw mit vang phah in an mawng ko nan, cucing cun mi (6) an sawh aw that.

Sunlai fang cu zan vek zikzik in a thim khat theh.

Mawtaw to pawl cun mangbang em em in an fehnak ih kip ah (horn) an pe phah vivo cumi bet ah an mawtaw mit an vangbet cu hman ahcun thihnak thlan kap ih dingvek an si.

Air Port khal zinglam 2:00 ihsin 11:00am tiang an khar.

Vanzam 19 cu zam theiloin a um. An zam caan khal nazi 1-2 tiang an ti tlai bet. Pilot pawl khal hna tuan ding nei loin an ding men.

Culawng siloin tlangleng pawl khal mero sapzet ruangah cun harsatnak an rak tawng ve. Tlangleng a feh thei nawnlo.

An sawh aw that theh tum ruangah tlangleng 96 pawl ih an fehcaan cu thawnsal a si ih bet ah 13 pawl cu tlan thei nawnlo dingin phuan a si.

India ram ih a cengtu mipi cu khawdai nasa zet an tuar. Khaw thim veten cun mero in khawlak a tuam khat theh.

Nikhua lam zohtu pawl cun a dai vivo ding an ti. Mithi khal an pung vivo ding thu phuan tel bet a si.

An sualawk ruangah cawhkuan

30-12-2008: Liverpool captain Steven Gerrard cu bar ah a feh ih mi thawn an buai ih, mi kut a thlak natdeuh ruangah cawh a kuan.

Hi England midfielder Gerrard hi zinglam 2:00 ah mi pakhat thawn an thawi aw ih nasa zetin a kut a thlak ngah pang.

An buainakbik cu an ti lang duh hrihlo, an thuhla cinfel a si hnu ah an simfiang leh ding.

Gerrard le a rualpi (5) pawl cu an bawhlung sitnak ih lungawinak an tawnmi ruangah lungawi puai tiih bar ih feh cu an si nan ruahlopin buainak an tawng a si.

Beckham 2015 tiang a kel a awh thei ding:

England midfielder Beckham cu 2015 tiang a kel a awh thei ding tin bawhlungsit thiam upa pawl cun an sim. Beckham cu May thla ah kum 34 a kim thlang ding.

Red card hmu rangbik:

Na rak thei ngah ko lo maw? Na rak zoh ngah in ka thei ta!

Brishtish bawhlungsit thiam striker David Pratt (21) cu leitlun red card hmu rangbik tiih hminsinnak a ngah ta riai.

A ngah rang nasa. Bawhlung an sit thawk ciah a skan (3) nak ah red card cu a hmai ah sen zet in an hmuh.

HNANGAMTE’N

December 30

Tlawngkai Nihnih

 

Hnangamte’n

Kum Thar Sungah

 

Siar:

Marka 6:45-52

 

Maw Israel, nangmah a lo tuahtu Bawipa in, zianghman ttih hlah, ka lo hum ding, na hmin ka lo ko zo, ka taa na si, a ti. – Isaiah 43:1

 

Kumkhat sung Baibal:

-          Malakhi 3-4

-          Thufim 31:10-31

 

2007 a luh hlan nazi malte ah UK ih kan rualpi hrekkhat cu lawng parin kumthar an hmuak ih thlisia in a nuai hngai ciamco. Thuhla in theihtermi cu, “Lawng tthazet Norma parah John le Linda an to. Lungawinak cu kan zaten kan himdam. Thli cu nazi pakhat ah peng 45-55 lai in a hraang. Nan zatein kumthar lungawinak le thluasauh nan ngah cio ding ruahsannak kan nei,” ti a si.

 

Jesuh dungthluntu pawl khal Galilee tili parah thlipi in a nuai hngai dah (Mark 6:48). Hih tili thu ttha tein a theitu ngakaitu an si nain an nunnak hrangah an ttihzet. Asinain Jesuh a ra ih a ruun hngai.

 

Kum thar ah mi hmuahhmuah thlisia kan tong ding ti cu kan thei cio nain ziangvek thlisia a si ding cu zohman in an sim cia thei lo. Hmanseh Jesuh Khrih a neitu cu an him ding. A liamcia caan ih in humtu Jesuh in kan hmailam caan khal ah in humhim ding.

 

Lewis Edgar in a hla sungah kan dinhmun a langter mi cu:

 

Jesuh parah hram ka bun, nunnak tisuar ka ttih lo,

Jesuh parah hram ka bun, thli le tisuar ka ttih lo;

Jesuh parah hram ka bun, ruun theinak huham a nei,

A fek lungpi parah hram ka ttoh!

 

Kum thar tisuar ziangti’n na hmuak ding? Jesuh parah hram na bun ahcun ttih ding le phaan ding zianghman a um lo.

 

Khrih rinsannak in a thlengh awmi tisuar sungah in himter ding.

 

 

Mi 300 an kap that thlang

By- Pa Sum

December 29, 2008.

SBT 

Israel In Hamas Pawl a Kap Minung 300 Zikte Thi 

Israel raldo nak vanzam cun tui zarhte sun ihsin tuisun tiang Gaza ih Palestinian pawlih umnak Hamas pawlih umnak hmunpi Gaza khawpi Islamic University cu vawi ruk a Bomb ih. A thuptei thil tawl ruknak leilung kua leh thawng in khal a Bomb tel. Cui tlun ah Tank leh ralkap ziangmaw zat khal Gaza lamah a kuatbet rero.

Israel thilti dan duhlo ruangah Arab ram dangdang mipi cun an duhlo nak langter nakah mizan sun ah  an khawpi cio ah lamzin an zawh rero.

Himi laiah Israel ih rualpi ttha khawthlang lam ram pawlcun Israel leh Palestinian cu an kah awknak bang dingin an ngen.  US cun Hamas pawlin Rocket hmangih Israel an kah hmaisa ringring ruangah himi buainak hi a suak asi tiah Hamas pawlcu himi buainak suak tertu ah a puh.  

Israel Foreign Minister Tzipi Livni cun  Gaza ih thil umdan cu danglam zetih tuah tengteng a ttul ih. Israel in Hamas pawl hnenah Rocket hmangih Israel kap nawnlo dingin a ngen rero nan Hamas pawlin Israel  ih ngennak tongkam cu a theihsak duhlo ruangah Israel khalin  an mah vekih kah letve mailo cu tiding dang a neilo ati. Hamas pawlcun Israel in Palestinian a kah ruangah Palestinian minung 300 lenglo an thi ati.

Asi nan UN cun Civil mi 56 an thi tiah asim.  Israel cun a ralkap ziangmaw zat a kuatnak hmun Gaza bialcu ralkap umhmun ah a retih midang zohman palkai theihlo dingin a puang.

Mizan zanlai ah  Palestinian cozah Interior Ministry umnak ah Bomb tumzet a puak ih cumi hlante ah Islamic University ih Science Building khal Bomb siat asiih. Hi University hi Hamas hotu pawlih cazir suahnak hmun pawimawh asiih hithu ngan laiah ziangvek in a cangti thu fiang theih man asi hrihlo. 

US President thar Barack Obama ih thupuangtu David Axelrod cun  tu nai ih Israel leh Hamas pawl karlakih buainak suaksal cu Obama cun pawi atizetih Middle East ah rualrem nak tluantling a umsal koding tiah a tiamkam ati.

David Axelrod in a simbet nak ah Egypt palai nak hnuai ah Israel leh Hamas pawlcun rualremnak ceasefire  thlaruk sung an rak tuahmi cu tui kan dungkar ah khan an titawpsal ih.  Nimalte sungah Hamas pawl cun Rocket 50 lenglo leh Mortar ziangmawzat in  Israel cu ankap cih ih. Israel PM Ehud Olmert,  Defence Minister Ehud Barak, leh Foreign Minister Tzipi Lvni pawlin Rocket hmangih Israel kap nawnlo dingin  Hamas pawlcu an rak ngen rero ttheu ih .

Asinan Hamas pawlin an lungduh lo ruangah Israel thin hengin a kaplet salve asi tiah  Obama ih thupuangtu Axelrod cun asim.  Israel leh Hamas pawlhi kum 60 hnu lamih an kah awk natsat bik ttum asiih . Himi laiah Obama cun Middle East ih thil umdan cu tthazet in a zoh ringring ih Secretary of State Condoleezza Rice khalin Middle East ih thil umdan hi Obama hnen ah a sim fiang ringring asi tiah Axelrod cun asim.. 

China In Pakistan A ngen 

China Deputy Foreign Minister, Ha Yafei cun a rualpi tthazet ram Pakistan cu India thawi an dodar awknak ti tawp dingin a sim. Pakistan Foreign Secretary Salman Bashir thawi mizansun ih an kawm awknak ah Minister, Ha Yafei cun misual pawlin Mumbai an siim ruangih India leh Pakistan karlak boruak sia sosang  cu pawi ati thu sim in  India leh Pakistan buainak ruangah Asia saklam ram tampi ah ralmuan lonak nasazet a thleng rero tiah asim. Himi laiah Pakistan cun Mumbai siimtu misual pawl zingzawi dingin leh hawlsuak dingah India thawi lungrual tei ttuantlang a duhthu asimve. Misual pawl cu an kaih asi ahcun ramdan vekih nasazet ih hrem a tumthu khal asimve.

China Deputy Foreign Minister, Ha Yafei hin Pakistan Foreign Minister Shah Mahmood Qureshi khal mizan ah a tawngih President Asif Zardari leh Prime Minister Yousuf Raza Gilani khal a tawngding ah zum asi.Pakistan leh India karlak thu sosang ruangah China khal in rualrem nak tuah dingin theih tawp a suah ve. 

Himi lai ah News Agency pawlin an simnak ah Pakistan a cozah in Taleban pawl doding ih ralkap a kuatmi  Pakistan North leh South Waziristan ih Bajaiur leh Mohmand ih  a ralkap pawlcu  an ralthuam hriamnam pawl thawn a hnukkir thluh ih India ramri tluan ah a kuat tiah an sim.  Ralkap hotu pawlin an simbet nakah Bajaur Agency ih um Ralkap Division 2 ih pakhat tusawn khal kawhkirsal an si tiah an simbet. 

Taleban hotu Baitullah Mehsud ih umnak North Waziristan ih Razmah ihsin khalin Pakistan ralkap tamzet hi kawhkirsal an si ih . Asinan ralkap bawipawl cun himi hmun ihsi cun Ralkap malte lawng asi kawhkirsal mi tiah an sim.  Hiti vekih India ramri ih Ralkap a kuat bet rero lai ah Pakistan President, Asif Ali-Zardari leh PM Yousuf Raza Gilani cun India thawi do awk an duhlo thu an sim ringring ve thung. 

Pakistan hin 2003 ih India thawi ceasefire an tuah hnu in a ralkap pawlhi Taleban dodingah ralkap 100,000 lenglo cu Afghanistan ramri ah akuatih. Tu ah cun a kokir salih India ramri ih a ret ciamco tikah India leh ramdang tampi in India thawi do aw dingah timtuah  awk nak anei tiah zum nak an nei. 

              Afghanistan  Bomb Puak ah Minung Pasarih An Thi 

 Afghanistan khaw thlanglam Kosht Province Ismail Khan ah thihcilh Bomb a puakih minung 7 an thi ih minung 30  in hriamhma an pu. Police pawlin an sim nakah hi thihcilh bomb tipuak tuhin Cozah zung hmun pawimawh ah luhtum in Car in a fehih Police pawlin an rak kah buai ruangah a Car sungah bomb hi a tipuak ih a kiang ih um minung 7 cu an thi ih nauhak 30 in hriamhma hi an pu tiah an sim.

Hi mithi lakah nauhak 4 an tel ih hriamhma tuar pawl lakah bese zetzet an umlai ruangah mithi hi an umbet menthei tiah ansimbet. Ismail Khan District Police pawlcun Bomb tipuak tuhi Jamal ti lawngin an thei.

                                                 Bangladesh ram Hril aw 

Bangladesh ih ralkap bawmnak ih  a laangtei Cozah tuahtu cun mipi Cozah dinding ah hril awknak a tuah ih humhim naklam nasazet hnuai ah hril awknak hi  tuah asi. Humhim nak hna ttuantu ah Ralkap 50,000 leh Police 60,000 ret an si. Himi Bangladesh ram hril awknak ah hin, Sheikh Hasina, ih hruaimi Awami League leh  Khaleda Zia, ih hruaimi Bangladesh Nationalist Party (BNP) cu Party tumbik leh langsar bik ansi. Himi party hruaitu pahnih hi ei ruk nak thubuai ruangah cozah in thawng a thlak zo mi veve an si ih.

Himi cing in Bangladesh mipi ih ngaisan mi lakah an tel ban thotho. Himi hruaitu pahnih cun Cozah nak an cothei asi ah cun Eiruk nekleh misual pawl tihlo leh thilman ti niam an tumthu an sim.. Bangladesh ram ah hin minung Million 144 hrawng an um ih  an rethei tuk ruangah eiruk nak hi a nasazet ih leitlun ih eiruk luar nak ram hmin cazin sungah an telve. 

Hril awknak ah ramsung Observer minung 200,000 leh ramdang Observer 2,500 pawlin an kil ih cumi cing in Polling Station hrekkhat ah buainak asuak thotho.Tui ttum Bangladesh hril awknak ih vote neimi pawl lakah mithi leh mivai Vote diklo minung Million 11 hlawn ansi ih  Minung million 81 hrawng lawngin Vote hi an thlak thei. Politics thlirtu pawlcun Party pakhat lawngin Cozah nak tuahthei an um an zumlo. 

 

[  Tikcu can hi hmang dik hram aw, Nikhat sungah nazi 24 a um, Nazi 8 sung hna ttuan aw, Nazi 6 sung it awla, Nazi 3 sung cazoh/ Siar/ Thuthangzoh/ Minute 15  tetal cu thlacam nakah hmang hram aw, tikcu can lawng nanei tamtuklai.

88888888888888888888888888888888888888888888888888888888888888888888888888888888888888888888

 

 

 

Salai Thangte & Mai Tialte

Thangte in Tialte hi a caan caan ah a rak hmu ih vei hnihkhat an inn ah a rak leng nan duhnak thu a rak sim ngamlo. Simnak ding caan remcang khal a um theilo. Tialte khalin Thangte hi a hua lemlo nan, duhvek ih biakawknak caan an nei theilo. Veihnih khat khaw lak ah an tawng aw ih an tawnawk caan ahcun an mit la kirsal thei nawnlo in an zoh aw theu. Caan reipi an pehtlaihawk nawlo hnu ah vanthatnak ah “G-Talk” ah an tawng aw. (Fiction)

====================================

 

Thangte        : Hi

Tialte              : Hi

Thangte        : Na dam maw?

Tialte              : Zo si na si ta kha, ka lo theih ciah lo ih cunah si…?

Thangte        : Ziangah theilopi cun I rak accept?

Tialte              : Ka rualpi pakhat khat a si ka zum deuh ih pan teh…!

Thangte        : Na rualpi cu ka si.

Tialte              :  Cu cu, zo si na si, Malaysia ih um mi Mawite na si ko lo maw?

Thangte        : Ka si lo so khaw.

Tialte              : Na mail ID le maktuk si ka theithiamlo pi, I sim ko aw, zo na si…?

Thangte        : Thangte famteh…

Tialte              : A! Zo Thangte maw, Thangte tampi an um si?

Thangte        : Tialte, I ti daan hi naa ka ti nasa, theithiamlo bangin um hlah aw.

Tialte              : Aaa! Nangtla le ka lo thei fel lo mi cu.

Thangte        : Asile, Tialte thu ka lo sut ding, Thangte paziat na thei?

Tialte              : Aw aw! Sorry sorry U Thangte ti na si….? ( A thei fel cih ko).

Thangte        : Ka si lawn maw….ziangah theilo vek in, na  um?

Tialte              : Hei Hei, cuvek silo, mi pa cu biak sual le a tha lo ih cunah ka ralring tuk.

Thangte        : Tialte cu aw! Na thinlung cu a kel lai si si maw. Hi..hi..hi..

Tialte              : UThangte in ngaithiam aw maw.

Thangte        : Cuvek men ah ngaithiam dil tul lo pi, sualnak na tuahmi tla asilo. Nangtla le.

Tialte              : A tu khawi nah ram in….?

Thangte        : A tu hi Pathian zarah US in so khaw ka lo chat…kan dung Malaysia ka fehzikte ah khan ka lo biak tum nan, a remcang theilo. Nang le na buai ve thei tuk fawn. Refugee an timi raltlan sinak ka dil ih USA ah in kuat ih a tu ahcun US ah zir phah tuan phah in caan ka hmang so khaw…

Tialte              : Aw, si ngai. Lungawi um tuk ual.

Thangte        : Tialte a tu khawi nah na um…?

Tialte              : Aw, a tu hi Yangon ah si.

Thangte        : Yangon ah ziang na tuah?

Tialte              : Si. Ram harsa ah kan buai theh ih ram dang ah hlawhawknak ka hawl ve tum ih cuvek ah passport le ViSa vek buaipi in Yangon ah ka cam hrih a si hi.

Thangte        : Aw! Si maw….um lawk ah, Tialte malten, na online rei pei maw? Caan ka neilo nan lo biak rei ka duh.

Tialte              : Um ngah ko si.

Thangte        : In mang nawnlo ti…? In ngailo nasa ti aw…kei cu ka thinlung ten ka lo thei ringring si. Kawtthler na vah lai khal ah ka lo zoh thup rero theu. Pasal a nei zo pei maw, tin ka lo ruat rero si.

Tialte              : UThangte, cuvek in na vel men in I ti duh hlah aw. Online a si ih na duhduh in na tongmen silo maw…? Kan khua ih kan um tlang lai ah hmuah hivek in na tong dah lo kha,,,…?

Thangte        : Tialte, cuvek in I ti sianghlah aw, a thupten ka lo uar tuk ih ka tuar tento ti tla na theilo. Na pa le a strict tuk ka lo leng ngamlo.

Tialte              : Zum theilo. Mipa cu mi bum nan hmang tuk. Ram nuam na thleng zo si, na duh duh na order thlang pei cu, parcel an timi tla laar em si….

Thangte        : Tialte, mipa dang vek ka silo ti na thei maw? Ka duhlo mi cu ka order in ka parcel lo ding. Khavek ka duh lo.

Tialte              : US tla cu a nuam em lo maw? Na duh le na in ding ih na duh le na ei ding si ko lo maw…? Fala mawi mawi tla an tam em pei cu, ziangah mirang fala tla..?

Thangte        : Tialte USA na thleng lo ih na theilo si kha, US hi kan ruah le kan theih vek a si lo. Fala felte tla cu an um lo, cathiam lo hrang ah tla cun nupi ding an um lo tuk si….

Tialte              : Asi le cu, kan khua ah fala mawi tete an tam em si, ka lo cahsak pei cu, na duh mi tete rak sim aw la….hi..hi..zangfak na um ual.

Thangte        : Tialte, ka thin naa ding zawngin um hlah aw…khua ahcun kan biak aw dahlo, kan leng aw tuk dahlo nan ziangvek mi nung ka si ti na theih kha…ka lo thei ve si…hivek in in tihrim hlah aw.

Tialte              : Thangte hlavang cun na ral tha ko. Na leer ve zet si lo maw..?

Thangte        : Oooooo! Ziangtin ka lo simfiang thei ding. Aaaaa.

Tialte              : Adik ko si, ram dang thlen hi cun zo cio khal tongkam hman mi a danglam si.

Thangte        : Tialte, ka lo sim ding, na par ah hin ka duh aw dahlo. Na par ih ka thinlung put a kel ti thei aw. Ka thinlung pawl tla na thei theh ko ding ka zum.

Tialte              : UThangte, na sinak cu ka thei ve theh ko nan, kan um nak kaar a hla tuk lo maw…? Thinhar ih caan hman ka paih nawnlo.

Thangte        : Kei mai mawh a si. Mipa tuah ding mi le simding mi ka lo duhdawt timi ka rak lo sim ngamlo mi hin kan dinhmun a derthawngter ih bet ah ziam lam a panter tum theu a si hi. Hmasehla mipakhat ih ruahnak na theihthiam pi ahcun lungawi um tuk ding.

Tialte              : UThangte nu nau ka si hi.

Thangte        : Ka thei tuk ko si.

Thangte        : Thei aw dahlo tla kan silo, hmu aw dahlo, be aw ruai le chat aw ruai tla kan silo, timi ruat aw. Tlangval dang bangin a lo bum tum zawngin le a zawl tum zawng in ka cang lo so khaw…aw! I thei ko si.

Tialte              : um

Thangte        : Hiti ka lo ti hi, na thinheng maw…? Ziangah na ca ngan na cawl…hello, Tialte. Na thinheng nak ding ka tongpang maw…?

Tialte              : Ka ngai ko si. Na cangan mi ka siar. Mi thinlung na buaiter tuk Thangte.

Thangte        : Tialte thu pakhat ka lo sut thei pei maw?

Tialte              :  Sut ko hme.

Thangte        : Ngaihlo ah rak ngai hlah la, a tu hi kan khua lam ah uarmi dang na nei pang maw?….

Tialte              : Haa…aa…cuvek men a…

Thangte        : Hei, Tialte in sim ko aw. Ka thei duh si.

Tialte              : UThangte, kan biak aw leh men pei maw?

Thangte        : Ziangah cumi ka lo suh ruangah na thinheng maw?

Tialte              : Phone sung le online tivek ah hivek thu rel ka duhlo. Kei cu nunau dang bangin kha vekmen ih ti ding ka duhlo.

Thangte        : Tialte cuvek silo.

Tialte              : Duh taktak le cu awkam in si, hmun le hmun ah sim aw ding si. Hivek cu thalopi. Keimah cu mi dang vek silo pi ti zo kha…

Thangte        : Asile cu, ziangtin ka tuah ding?

Tialte              : Duh tak tak le cu lamzin dang a um ding si.

Thangte        : Ka lo ngai tuk Tialte.

Tialte              : Lo ngai ve ko si.

Thangte        : Nan phone no tla in pek aw la, ka lo call ding si.

Tialte              : Aaaa, tul lo.

Thangte        : (disconnect)

phone in ka lo biak ding. Cun thil dang tla lo sim ding ka nei si. Hello…hello…

Ziangah na rak ngan nawnlo…connetion tla maw…

 

Hello

Ziangcang si…???

 

Ca ka ngan mi na hmu thei maw…

Hello…na thinheng maw…

Aih a va mak ve….

 

( Peh lai ding…)

 

 

 

 

 

 

 

 

 

 

 

 

 

 

 

 

 

 

THINLUNG LE BANJO

December 29

Tlawngkai Nikhat

 

Thinlung Le Banjo

 

Siar:

Saam 85:1-7

 

Kan thazaang cakter saal awla na minung pawl hin kan lo thangtthat ding. – Saam 85:6

 

Kumkhat sung Baibal:

-          Malakhi 1-2   

-          Thufim 31:1-9

 

Tlawng ih zirhtu hna ka ttuanlai ah hri nga a simi banjo tum ka zirh. Cuih hnattuan in tuah tharmi le pum cawm awknak tlakmi awnmawi thilri a man hrek ih lei theinak covo ttha ka ngah ve.

 

Kum 30 a rei thlang nain, cuih Banjo cu Pathian hnattuan in leilung tlun khual ka tlawnnak kip ah ka keng ih a tthahnem thotho. Kutzung tthazet ih tuahmi asinain a rei tikah a thar ih tuah saal a ttul. A rem saaltu pa in tuah ttulmi tete in sim ih ka rem ttheh tikah a thar hnakin a aw a ttha sawn ding ti’n rin awzet in a ti.

 

Ka bei a dong lo. Ka lei lai hnakin a tum a nuam ih a aw a ttha sawn ti’n ka ruat.

 

Ka nunnak khal hi awnmawi thilri vekin Pathian sunlawinak ding tumtahnak in sersiammi ka si (Efesa 1:6). Asinain kan rethei tikah kan tha a cem. Kan thinlung tharthawh a ttul. Saam cangantu in, “Kan thazaang cakter saal awla na minung pawl hin kan lo thangtthat ding,” (85:6) a ti. Hebrew ttong in tharthawh timi cu remtthat saal lawng si loin a hlan kel vekin tuah saal tinak a si.

 

A thupimi cu remh theitu Pa hnenah kan nunnak a kel vekih tungding saal dingin kan ap awk a ttul. Ziangruangah thlarau tharthawhnak le kan thinlung remh dingin Bawipa kan dil lo?

 

In tthangphawk ter saal aw,

Thinlung hmuahhmuah ah na duhdawtnak khatter aw;

Nunnak hmuahhmuah ah meisa vang saal seh,

Vanlam meisa thawn.

 

Khrih kan ren caan cu tharthawh caan a si a ttul.

 

Maria Carey nau a pawi maw?

Mariah Carey cu nau a vawn a si tin zumnak a um. A umnak hmun Los Angel ih a office kainak theu ah siseh a suak duh nawnlo.

I’ll be there timi hla a sah lai ah kha cun sukso ah lungawi aipuang in a vak nan, a tu nau a pawi taktak cun a suak ngam nawnlo riai.

A innsangpa bik actor-rapper Nick Cannon khal in a nau pawi thu a rel deuh nan fiahzet cun a rel ngam hrihlo.

Cuti nuamzetih ihkhun ih caan an hman tlangnak a rei tuk lo nan duhdawtnak hei ti pan cu, thil a rak ti thei a si.

Cu ruangah a rei hlan ahcun Maria Carey hlasak thiam hminthang cu nuate nu ah a cang thlang ding.

Amah Maria khal cun nau ka pawi ti cun a phuang aw duhlo nan, nau a pawi zia cu a lang zet.

Next Page »