Kawlram ah kuak le zu advertise sianglo

Kawlram ah kuak le zu advertise sianglo

Kawlram thuneitu pawl cun khawpitnak hmun, mi lunnak hmun ih kuak le zu advertisements an tuah mi pawl an siatbal theh ding thu an phuang.
Mayor Brigadier-General Aung Thein Lin, cuti an tuahnak san cu thangthar nonawn pawl zu le kuak ih an ciahawk siat thehlo nak dingah a si tin a phuang.

Kawlram cun kan dung December thla 2006 ihsin University campus pawl ah khuak fawh arak khap zo.

May thla 2006 ihsin rittheih thil kilkhawi daan ding tuah zo a si. Curuangah kuak zuar le zu zuar tiih ca tarlan mi pawl cu a rang lam ih balsiat theh ding in kawlram cun tumtahnak a nei.

A ni, ni’n khawte lam ah nunau kuak fawp an tam ruangah, kawlram harhdamnak lam ih hna tuantu pawl in doding in tumtatnak a nei. Hiang khawte ih kuak fawp pawl hi cathiamlo pawl an sivekin harhdamnak lamah an bengver lo ruangah khawpi ih um aicun khawte ih um pawl kilven an tul a si ti thu an phuang.

Rittheih thil thuhla kawlram cun International Framework Convention on Tobacco Control ti in September, 2003 ahkhan ram 192 kawp in an rak namhnget zo.

=======================================================

 

Na Pathian Zo A Si?

Siar:

Daan. 6:1-6

Bawipa na Pathian cu na thinlung zate, na nunnak zate le na thazaang zate’n na duhdawt pei.

Kumkhat Sung Baibal:

- Ezekiel 13-15

- Thufim 11:22-31

Vancung ah umnak ding inn rem cia in a um,

Ngaithiamnak le kumkhua nunnak laksawng;

Rinnak in a cohlangtu hmuahhmuah hrangah le,

Vancung luhnak dingah na theih mi pa zo a si ti a thupizet.

Hi…hi…Hnih caan

Hmatpungttin number zero le tu-ngiah!!!

Kawlram ralkap pawlin putar mibang lemlo cu hmatpungtin(ID) a kenlo ruangah an kai. Ralkap pawlin thawngthlak dingin an hringhro ciammam ruangah a lung phang tuk. Ralkap pawl cun na hmatpungtin number in sim aw an ti? Cathiam lemlo tiah a thei sun Mirang tong in “Zero…0..0..0…0, zero pali” a ti. Ralkap pawl cun cuvek a um kel lo thaten sim” an ti. Putar pa cun “Tu-ngiah-0…0…0…0, tu-ngiah pali” a ti.

==============================8============================

Assam bomb puak ah mi 64 thi, mi 300 in hliam tuar

Thu, Oct 30 11:45 PM: Guwahati bazaar le khawte dang hmun hnih ah bomb a puak ih mi 64 an thi ih mi 300 in hliam an tuar. Police pawl ih simdaan ahcun nazi 11:20 a.m ah a puak ih nazi pakhat sungah bomb vei 12 a puak. An bomb hman mi hi bomb danglam zet a si ruangah nasa zet in a kiangkap pawl a kang.

Assam khaw tlun cu meikhu in a khat ih lamzinpi ih mataw pawl an ding theh ih mipi fehlai khal an cawl theh, culai fangah meisa mittu mawtaw  a thleng tin thu dawn a si. A rei hlan ah curfew an neihtum thu khal an phuang cih bet. A thi pawl sungkua hrangah Rs.100,000 pek ding an tiam.

Assam mi, Delhi ih hna tuan pawl cu an nu le pa u nau sungkhat pawl phone biak ding ah thinbang leh mangbang in an khawsa. Hruaitu pawl cun Hi bomb puah thu ah United Liberation Front of Asom (ULFA) pawl an ringhlel nasa ih Congress Chief Sonia Gandhi khal in a demnak thu pawl a phuang ve.

======================================================

 

Lo theih lo ih thiam le theih tulmi

Lo theih lo ih thiam le theih tulmi

Computer

Basic Knowledge of computer

Unau

Atu san hi kan hmuh le theih cia vekin IT san a siih ‘Mi’ pawl ziangtluk in an thangso, ziangtluk in an cangkang tihi kan thei cio a si.

Atu kan san ah kan nauhak lai ih mang vekih kan theihmi pawl hi atu san ah kan tongtham theih in a um. Ziangtluk in san tiluan hi arang.

Curuangah hih a cakzet le rangzet ih luang rero mi kan san hi kan man theihnak dingah a tulmi tampi sung ihsin LO THEIH LO IH KAN THIAM TULMI pakhat cu Computer thiamnak hi a si.

Globalization san.. leilungpi tla hi khawte pakhat (village) tluk ih ruah a si zo.

Hih san leilungpi khwte pakhat a sinak tep le na theih venak dingah COMPUTER BASIC tal na thiam a tul.

Thiam tum tengteng aw na sir aw lo lawlaw ding.

Cumi COMPUTER BASIC tal na thiam ruangah na hlawknak ding lawnglawng a si.

• Internet na hmang thiam ding.
• Hmundang/ ram hla ih ummi… sungkhat unau, rualpi, fala/tlangval thawn tohmun ihsin lung diriamzet in nan biak aw thei ding.
• Typing na thiam ruangah na umnak pohpoh ah hahdamzet in paisa na ngah thei ding. (Typing lawng si lo na thiamnak a sang vivo ding)
• Na hmunak a kau vivo ding ih khua le ram hrang hna ropi tak na tuan thei ding.
• Calai lam ah na hmuhnak a kau vivo ding.

… e t c …

Curuangah…

BASIC KNOWLEDGE OF COMPUTER

hi theih le thiam tum tengteng aw.

Duhsaknak tumpi thawn

Salai Star

Pathian Hawl (God-ography)

Pathian Hawl (God-ography)

Siar:

Hebru 11:1-4 

Kumkhat Sung Baibal:

-   Ezekiel 10-12

-   Thufim 11:12-21 

  Bawipa ka hawl, ih nehhnu ah ka thei ngah,

Maw a dikmi Runtu Bawipa kei in ka lo tong a si lo,

 

                                                                        Pathian tong dingah Amah hawl duhnak thinlung kan nei ding.

Capoh thianghlim siar in hni ve aw…?

 *Hi a hnuai ih capoh kan ngan mi hi, zohhman kan tisan lo.

Zan lai pa tum ah breakfast ei

Khua pakhat ah putar pawl thu nuam an rel khawm. Leiltun ih milian bik pawl an rel. An lakih putar aa luar deuh cun, “Kei cu milian hmuah hmuah ahcun Bible ih Solomon si ka dawt duahdo mi cu, ziangah tile nupi 700 lenglo a nei, thuamhnaw aduhduh a hruk. A duhduh in a um. A kut hnuai pawl a duhduh tuah ter ding in a fial men. A nun a nuam daan cu zan lai pa tum ah tla breakfast a ei men” a ti.

A sim sual

Thu simtu pakhat cu a thurel a thaw tukih, a thusim mi a porh ngah deuh pang. “U le nau le uh, Joseph kha maw, paisa 100/- in so khaw an rak zuar a ti ngah pang. A kiang ih mipi tlar hmaisa lam khuang kiangih to cun “Aih! Sayapa cuvek Bible ah Joseph paisa 100/- an zuar tivek a um lopi” a hei ti. Thusimtu pa ningzak um ngaihnak theilo cun “Aw! Sum thleng a kai tuk ih cunah so khaw” a ti ve lawlaw mai. 

Pakistan linghnin ruangah mi 100 thi zo

Mani October 28, nazi 5.10 am ah Pakistan ih ling nasa zet a hnin ruangah mi 100 lenglo an thi. Inn thenkhat a cim ih mithi khal an pung vivo ding a zum um. Linghnin a natlam magnitude 6.4 a thleng ih peng 4 aiih kau ah harsatnak a thlen. Pakistan ram ih hivek harsatnak le buainak a thlen hi thil mak danglam cu asi cuang lem lo.

Ziangruangah tile Kum 2005, October thla ahkhan ling 7.6 magnitude in a rak thleng zo ih mi 73,000 lenglo an rak thi zo. Culawng men siloin kan dung kum ahkhan tilian ruangah mi 100 lenglo in nunnak an rak can zo. Provincial Revenue Minister Zamrak ih sim daan vek ahcun a tu ah mi 100 an thi zo ih khawte 8 lai cun harsatnak a hlei in an tuar a ti. Mi tampi in hliam an tuar. Khawte pariat ah hin 50,000 lenglo an um.

Rev. Run Cung Mang thawn hmaiton thusuhnak

Rev. Run Cung Mang thawn hmaiton thusuhnak

 

 

Hruaitu: Na nu le pa hmin suahnak khua in sim thei pei maw?

Pastor:   Ka pa cu Pu Nam Ceu a si ih ka nu cu Pi Cawi Men a si. Ka pa cu in thihsan zo ih ka nu cu in dampi lai. Ka suahnak khua cu Falam peng Laizo uksuh Zalai khua a si.

 

HT : Na inn sungsang dinhmun nupi fanau pawl?

Pastor: Kan nu hmin cu Sung Za Len (Blue staff nurse) a si ih Bualkhua mi Pu Victor Kap Lian ih fanu a si. Pathian in fapa rosunglawi unau thum i thluasuah: Samuel Van Lal Mawi, Peter Dun le Elisha No San Mang tla an si. Samuel hi Yecawng Tetkatu ah B.E first year a kailai. Peter phun 8 le Elisha phun 7 an si.

 

HT:  Zirnak lam ah ziangmi tiang na zir?

Pastor: 1977 kum ah phunhra ka ong ih, 1982 ah B.A (Eco.) le 1986 ah B.Ed. degree ka ngah. Biaknaklam ahcun Zomi Theological College ihsin B.R.E degree (1993) le Myanmar Institute of Theology ihsin M.Div. degree (2001) ah ka ngah.

 

HT: Pathian hna ziangtik in na rak tuan thok, kum ziat na tuan zo?

Pastor: 1978 in 1993 tiang acozah hna, tlawng saya kum 15 ka rak ttuan hmasa. 1993 kum April 1ihsin Assistant Pastor (Youth) dinhmun in Lairam Falam Baptist Church ah Pathian hnatuan hram ka thok. Atu April 1, 2008 cun kum 15 ka kheng zo.

 

HT: Pathian hna na tuan thok ihsin harsa na ti bikmi le na  lungawi bikmi?

Pastor: Pathian hnattuan ih a nomnakbik ka timi cu mipi hrangah thla kan cam tikah kanmai’ nunram ah thlarau thazaang kan ngah. Mipi thlarau rawl fah ding tumtah ih Bible le cabu tampi siar in timtuahnak ka neih tikah hmuhnak le theihnak a kau, thin hna a ngam ih thlarau thazaang a ngah aw. Kan simmi ruangah mipi nun ih thlarau thazaang ngahmi hmuh tikah thin a nuam sinsin. Asinan, tuurual sungah dungtolh le Pathian thu ngaih sak lo, zumtu tisamituk an um ahcun thin a baang duhzet ih a ngaihven daan ding har ka tizet.

  

HT:  FBCY ah Pastor kum ziat na tuan?

Pastor: Falam Baptist Church, Yangon ahhin kawhhran a din hlan deuhte, le a din pekte ihsin ka rak tel ve. MIT ih M.Div. ka kai phah in hlawh-lang (part-time) in 1997 ihsin ka rak tuan ih, hlawh-leeng (full-time) cun 2001 ihsin ka thok. Curuangah kum hra ka ttuan ti’n siar a theih (ka ruat aw).  

 

HT: A lo thei dah lotu pawl in Vankau Arsi Magazine ihsin na hmin kan lotheihmi hi ziangti’n na ruat?

Pastor: Ka lungawi daan a phundang  hleice. Kan Falam ttong in tikcu hmantei’ tuni tiang magazine suakmi Vankau Arsi magazine ah zohfeltu (chief editor) ka ttuannak ihsin le sermon le cahram tete ka nganmi ihsin i theitu an um ih ka lungkimzet. Calai duhtuk mi ka si ih calai ihsin mipi ih theih mi si cu ka lungawi daan a nasa cuang.

  

HT: Kan Calai ah ziangtik ihsin na lut thok in na thei aw?

Pastor: Tlawng saya ka ttuanlai ihsin calai ka rak duhzet ringring ih Pastor ka ttuan hnu 1993 ihsin Falam Chin Christian Literature Society (FCCLS) ah Sungtuan bawmtu dinhmun in ka rak thok. Cumi hnu cun nasatak in ka tithei tawk ka ttuan ve hnohno.

 

HT: Calai le Pathian hnatuan a kalh awknak a um maw?

Pastor: A kalh awknak a um in ka hmu lo, a kop aw sawn in ka thei. Kawlram le Lairam Pathian thu kan theihnak hi Calai in a thok tisehla kan palhtuk lemlo ding. Bible le Cabu phunphun kan neihnak in Pathian hnatuan a cak sinsin.

 

HT: Laica zirnak cabu tiangtiang ngan suak dingah ziangmi in na thinlung a lo tho ter?

Pastor: Laica Zirnak cabu ngan dingin ka thinlung i thotertu cu, mi tampi in “Laica ka thiam lo” an ti ka thei ttheu. Acozah in zir in sian lo ruangah Laica thiam lo an tam deuhdeuh fawn. Kan fanau pawl in kan Laica an thiam lo asile hmailam ahcun kan nunphung: ttong le Calai a hlo ding phaan a um.

 

Culawng si loinm Laica Ngan daan ah thu hmunkhat nei loin, mah duh daan ciar in, danglam hniaihniai ih ca kan ngan rurimi hi ka hnak i dohzet. Magazine, News letter, le internet ih kan Laica nganmi tampi ka siar tikah, an suahpimi thuhla (content) cu a tthazetzet na’n, an cafangkom ngan (present) daan in ka thin i hnaihnok ttheu. Laica Cafangkom ngan daan ah thu hmunkhat neih thei ding ka duhtuk ruangah Laica Zirnak cabu ka ngannak a si. 

 

HT: Laica Zirnak na ngan tikah ziangmi harsatnak na tong? Ziangtluk hlawhtling in na thei?

 

Pastor: Duhkhung takin ngan suah ka tum, Formula chart tiang ngansuah ka tum tikah caan neih lo le thiamtuk lemlo thawn cu ka baangzet paam. A suahnak ding sumsaw Lailun Foundation in in bawm ih lungawi um ngaingai.

 

Lairam Falam peng sung le Kawlrawn LBA le  khua tin ah, Yangon ih “Thaal Tlawngpit Laica Zirnak program” ah Text Book ah an hmang ti ka thei ih ka lungawizet. Ramleeng hmun tampi ihsin tla cabu in cah ciammam tikah bangman ka nei, ka hlawhtling a si hi ti’n Pathian ka thangtthat. 

 

HT: Rick Warren ih cabu “Tumtahnak ih Fehpimi Nunnak ” na let theh tikah ziangtluk na diriam? Harsatnak na tonmi tla in ruah hnik?

 

Pastor: Himi cabu hi ka duhtukmi a si ih Mirang in siseh, Kawlca in siseh ka siar. Kan Laimi tampi in siar ve in thlarau thazaang ngah ve hngai seh timi hi ka thlacamnak a si ih, thiam lo cing te’n ka let tikah, thla 7 rori ka rei. Pastor tuan phah man lo cingin zaan siim le zing thlapit ih ngan a si ih ka baangzet ttheu. Computer keimah te ngan a si ih proof reading le print out, layout design le offset namter thawn kumkhat rori a rei. The Purpose Driven Ministry of Myanmar ih suahsakmi a si.

         

Cabu a suah tikah mipi in an duhzet, an tthathnempizet ti ka thei ih ka diriam nasa. Cabu uk 2000 kan nam ih atu a cem thluh zikte zo. Ram sung ram leeng hmuntin ah zemdarh a si ih bangh manhla ka tizet ih thluasuahtu Pathian ka thangtthat

 

HT: Kan Falam Calai ngan daan bang awk lomi ah rel rem theih vivo a si in na hmu maw?

 

Pastor: Ahlan hnakin atu cu tampi kan relrem thei zo, in ka hmu. A reihlan ah santhar mino pawl cun thu hmunkhat in kan fehpi thei ko ding ti’n ka zum. Kan harsatmi lakah ka hmuh daan ahcun, James Herbert Lorrain (Mizoram ih missionary, Lushai cangan daan tuah saktu) ih zirh daan [a aw b ch .. system) le Joseph Herbert Cope (Lairam ih missionary, Laica in tuah saktu) ih in zirh daan [a b c d ...system] pahnih kan fiang lo ruangah a sibik in ka thei. Laimi cun a b c d (IPA International Phonetic Alphabet) hi thlun sehla, a aw b ch thawn cokpolh (compromised) lo sehla zianghman buainak a um lo lawlaw.

 

HT: Kan Laica kan duhdawtnak hi mai’ hmuh daan ih fehpi a tha maw? Zapi lungrual thei teh a si ko lo maw?

Pastor: Pa Tuan ih hla “Mai’ thu tete sawh” kan ti sung poh ahcun lungrualnak le Laica Ngan daan ih thu hmunkhat neih ding cu kan hlat hrih ko ding. Asinan ruahnak kau le ttha nei in “Laica ih hleicetnak (the uniqueness of Chin)” kan theihthiam ahcun zapi lungrualnak kan nei thei cing ko ding. Ahleice in Kawhhran le Zumtu Pawlkom in Bible le Hla cabu, magazine le thuthangca kan suahmi tete ah “Cangan Daan fumfe (Norm & Consistency) nei thei tumtah vingvo sehla amah te’n “cafangkom ngan daan kalhmang ttha” (standardized word combination) cu kan sersiam thei mai ko ding ti’n ka hmu.

 

HT: Hmailam kum ziat hrawngah kan Calai ngan duh daan ah kan lungrual thei ding tin na hmu?

Pastor: Thinlung thiang neitu santhar mifim le zirsaang tthangthar nonawn san ahcun ol ai te’n Bible le Dictionary zoh le thlun in an lungrual mai ko ding. Atu tiang Laica in Dictionary zoh ding kan neih lomi hin kan Laica tthansonak a fuungter in ka thei. Falam Bible siar tam pawl cun cafangkom daan ah thlunmi daan fekfel an nei thluh cio, an buai lo lawlaw. Laica in Dictionary a suah cun Standardized a si cih mai ko dingih el awk a um nawn lemlo ding.

 

HT: Malaysia ihsin kan Calai hrangah ah ziangtluk tiang hrawng hna kan tuan thei dingah na ruat?

Pastor: Malaysia hi ram tthangso pakhat a si ih Calai hnattuan theinak ding sanman thilri le sinak a kim. Electric le a tthatuk ih Kawlram ka umlai hnak cun Calai  hna a let in ka ttuan thei ding ti’n ka zum. Computer le Internet mah duh tawk ih hman theih a si hi cun kan miphun hrangah Calai hna tampi ttuan theih a si ko ding. Ahleice in Pathian in sunmang (vision) in peekmi “Calai ih Pathian Hnatuan (Literature Ministry)” hrangah a remcaangzet in ka lungawi ce. Nitin Thlarau Rawl siseh, Sermon siseh, Laica Zirnak siseh, online hnattuannak remcaang dingin LCF in computer le internet broadband tla in ngaihtuah sak ruangah hnattuan a remcaang ngaingai. Atu vek a si le cu hmailam ah cak sinsin ding ka zum.  

 

HT: Laica Zirnak na nganmi hi na hnatuannak LCF kawhhran ah zir theih in tawlrel a tha lo maw?

Pastor: Tawlrel dingah a ttha ka ti. Ziangtinkim a semrem vingvo ih caan ttha remcaang a um vingvo ding. Calai cu a hnek ih hnek awk theimi thil a si lo ruangah Calai a duhtu taktak pawl hrangah zirh awk ding daan a um ko ding.

 

HT: Calai lam cu tawk hrih sehla, 2006 ih Malaysia na rak tlawng lai, LCF ih thu na sim rero lai ah LCF ah Pastor na tuan ding ti na ruat dah lo ding ti aw?

Pastor:  Khalai ah zianghman ruah ngaihnak ka rak nei lo lawlaw. 

 

HT: LCF ah Pastor tuan ding in sawmnak ca na ngah tikah ziangtin khua na ruat?

Pastor: Ka cal parah ka kut suangin khua ka ruat ngurngo nasa. Pathian remruah le Pathian ih thupeek a si ko ding ti’n ka ngai. Pathian in kei santlai lo tla LCF hruaitu upa pawl thinlung sungah rinsannak le duhsaknak a umter ih hril le kawh mi ka si cu mangbangza taktak a si ti’n ka ruat. Pathian ka thangtthat ih tawlrel khawkhangtu upa pawl parah tla ka lungawi nasa.

 

HT: LCF ih Pastor na tuan tikah kawhhran pakhat ih hnatuan thawn a danglamnak ziangmibik a si pei?

Pastor: Lai Christian Fellowship ti a si bangin miphun le hrinhnam tinkim, Pawl (denomination) tintian kom khawm aw kan si tikah a phundangzet. Khrih ah pumkhat kan sinak fiangzet in ka zir ngah. Ahlan ah mai’ kawhhran ih thurin (doctrine) kha dikbik le thupibik ih kan rak ret ttheumi a dik lozia ka fiang nasa. Pathian thei le rinsan, Pathian thutak sungih nun le duhdawtnak timi hi atak ih nuncih tulmi a sizia ka thei fiang vingvo.

 

HT: LCF kawhhran member pawl ziangvek dinhmun thlenpi dingah ruahsannak na nei?

Pastor: LCF sungtel zate hi Pathian theitu, a rinsan taktaktu le rinsantlak ih Pathian riantu sithei dingin thlarau-thinlung-taksa ah a kilkip in buk awton ih thanglian pitling dingin Pathian thunung, thuthangtha simphuannak le zirhnak, thlacam saknak le fingkhawi kaihhruainak in cawm thei ding ka tumtahbik. Hlawhtling tuukhal ttha si dingin Pathian hnenah thla ka cam.

 

HT: Kan mipi pawl in midang hnakin mai’ member ngaihsaktu na si ding tin kan lo beisei zet?

Pastor: Mipi ih beisei vekin member pawl thlakung zawn theitu ka si theinak dingah hruaitu le mipilam ihsin thlacam saknak, ruahnak peeknak le zawnruah ttanpi awktonnak tampi ka ttul ve.

 

HT: LCF khawm awknak le kaihhruai awknak ah na lungkim zetmi le rem na ti lemlomi a um maw?

Pastor: LCF member pawl hi zumtu Pathian thu hiarhaal le Pathian duhzettu an si ti ka  hmu ih ka hnangam nasa. Ka thlen ni ihsin tuni tiangah zianghman thin hnaihnoknak le zinfetnak ka nei lo. Kaihruai awknak khal ah pakhat le pakhat duhdaw awte le ttihzah upat awk kan thiam ih nuam ka tizet. Ahleice in zarhkhat hnu zarhkhat Pathian biakkhawmnak ah mipi kan tam deuhdeuh ih ka lungawi nasa. Kan Pathian biak daan tla kan tthangphawkzet in ka hmu ih ka diriamzet. Mipi 500 lai vun um tlang vialvo cu mak ka tizet ih, FBCY ka ttuanlai hnakin kan tamdeuh ih nuam ka ti ngaingai.

 

HT: Member zapi hnenah sawm duhmi na nei maw?

Pastor: Zumlotu acozah ih uknak hnuai ih ummi kan si ti thei in raalringzet ih um daan thiam ding le zumlotu mipi lakah tlangleeng le hnattuanmi kan si ruangah fimkhurzet ih nun daan kan thiam ding a thupizet. A thupibik ahcun, Pathian thuthlun in, Amah rinsan in, thlangam te ih nun ding a ttul. Ziangkim kan tuahnak ah Pathian hmin sunlawitertu si ding tumtah cio uhsi! Mih khua le mih ram ah alaangte ummi kan si ruangah pakhat le pakhat duhdawt aw, zawnruat aw, ngaidam aw le lungrual teih um kan zuam cio pei.

 

HT: Hnatuan dang tampi lakah kan thusutnak in san nak parah   kan lungawi.

Pastor: Kei tla atu vekin tonnak in neihmi parah tampi ka lungawi ve

Hmuhnak

Siar:

Isaiah 40:12-13; 25-31

Leitlun le van leng ah a to ih…A thuai milai pawl cu a mit-hmuh ah sihte tia fang an si. -Isaiah 40:22

Vate cu tlang hnakin a tum dah lo bangin ziangvek buainak khal Pathian hnakin a tumsawn dah lo. Kan hmuh daan ruangah a si.

Nitin kan tonmi buainak cu,

Tuar ding tumtuk an bang men thei;

Amah kan rin hlan lo tiang.

Kan buainak tumbik hnakih tumsawn mi Pathian kan biak.

Ka saya pa

Ka saya pa

 

I rak thawi, I rak thawilo thei ko nan, I thawinak ruangah ka lungzur in thutha ka ruatsuak. Na mithmai ka lo zoh ngamlo theu, ziangah tile na mithmai ah zirding mi hlir a lang. Ka va rak lo hua ta e! Cu cu, ka rak lo theihthiamlo ruangah a si.  Leitlun I thlir tertu ka saya pa nangmah na si. Thuanthu I rak sim. Ka mithli I rak hnulsak. Tha I rak pe. Nun I rak sim. Lamzin dik I khih hmuh. Leitlun ramkip ka fehnak ah mi aa bangih um menlo dingin fimnak le theihnak I rak zirh. 

 Duhsaknak sangpi thawi ca I rak zirh ih I rak thawi lai ahcun, duhdawtnak neilo pa, zangfahnak neilo pa, mi thawi lawnglawng a ruat tu saya aa tin ka lo mawhthluk theu. Ka rak lo theithiamlo. Asinan I thawi I vuak lengah, a thupten ka thinlung na rak taat hrim a rak si. Zir duhnak thinlung I neiter, theih duhnak thinlung I neiter. Fimnak I hawlter. Sangsin, caksin dingin thinlung I pe. Zirnak ih a cem theilo thu khal I rak sim. 

Maw! Ka saya pa, I rak zirhnak ruangah ziang ka thiam ti lo sim ding, ka va hngakhlap em! Zangfahnak I neiter. Mah ai’h upa I tihzah ter. Mi nautatnak thinlung I neiter lo. Mi hmuhsuam lo ding in, in zirh. Mai hrang lawng ruatlo in, mi hrangkhal ah nung ding in, tha I rak pe. Ka saya pa cu tuini tiang nun I simtu a si. A tongkam ka thinlung ih a cam mi a va tam lai ve! Lamzin pial lo dingih nun I simtu ka saya pa. Ziangtluk in mifim, leitlun ti linglet thiam khal vasi ningla, nang ka saya pa ka lo upat ringring ding. Ka nunnak I tuah tha tu. ­Ka saya pa.

======================================================

Hnih caan!!!

Once more

Lai pa cang hlasak thiam ti aw ve nawn cu, rinlopin raltlan si zarah USA ram nuam a thleng ve. A nauhak lai ihsin hlasak lam ih rak pe aw zet a si. Amah tawkten cun tawk ati aw ve nawn. Veikhat cu ruahlopin, a umnak vengah Concert a um. Hlasak paih nawn le phur nawn a sivekin, stage parih hlasak ve dingin a dil. A dilnak cu an siansak ih, a mirang hla theih sun mi te cu, thiam le thiamlo ten a sak, au kio ve ko…!!!

Mipi pawl cun “once more! Once more! Once more!” Tin an au ciamam…. a lungawi tuk a theitawk in a sak rero, mipi pawl cun “Once more” an ti thotho. Ti ngaihnak a thei nawnlo ih “Ziangah hi tluk ka sak hnu ah once more nan ti thotho” tin a sut.  Mipi pawl cun “Na thiam lai hlan lo na sak ding” an ti. 

 

A Biang no te

Fala le tlangval an duh awk tuk ah thizik ten an um. Asinan, an tawng aw thei dahlo ih phone in an be aw ringring. Ni khat cu, a ngaihzawngnu, Mawite cu a Sunday hruk ding thuamhnaw a nawt rero.  Cu lai fangah, a tlangval pa in a rak phone. Thuamhnaw nawt lai leh Mobile awn cun a thinlung a tibuai tuk ih, a thil nawhnak meiling vam herher cu Mobile ah a ruat ih a hna ri, a biangno te ahcun a ret ih ..Hello….a ti theh cun a sam le a biang note kang cu arsa bang in a hmui vervo. 

 

Night dress

Veikhat cu inn tek tei monu a ihkhun khaan ah lawngfangkheh rorin a um. A room ahcun a ninu rinlopin a lut ngah pang. An monu lawngte a um cu a hmu. A mangbang tuk, “Ziangah hitin na um” a ti?. An mo nu cun, “Night dress” a ti. Cu tete tin a ni nu cu lawngten a um ve, an pa a ra tlungih, an nu lawngte a um kha a hmu. An pa in “Ziangah lawngten na um a ti? “An mo nu thu cawngin, “Night dress” ati ve”. An pa cun, “Na night dress a  sur thehzo ual” a ti.

Next Page »