Bawmnak petu ahmaisabik nak luhsiang

Xinhua, May 28

United Nations Children’s Fund (UNICEF) ihsin mi paruk pawl cu Kawlram siatralnak hmun Izawadi phairuam ih bawmnakpe dingih a lut hmaisabik tu pawl an si thu UN palai cun a sim.

UNICEF bawmnak hna tuantu pawl hi ASEAN-UN pawlkawm leitlun ram tin pawlkawm pawl thawi bawmnak thutiam tuah dingih thurelkhawmnak an tuah hnu ih Kawlram ralkap miuk ih siannak a pek hmaisa mi pawl an si.

UN Secretary-General Ban Ki-moon le Senior-General Than Shwe an biakawknak ah cun ram tin ihsin bawmnak pe tu dingpawl cu siangzet in a ramsungah luhsiannak a pe dingih Yangon International Airport cu bawmnak bungrua pawl lakluhnak hmunpi ih hman a si ding tiin thutiam awknak a nei ta.

+++++++++++++++++++++++++++++++++++++++++++++++

Suu Kyi ruangah bawmnak cu pe tho tho ding

AFP, May 28

UN secretary general, Ban Ki-moon, khal cun ramtin pawlkawm ih Aung San Suu Kyi inn thawngthlaknak kum khat ti sausak bet a si thu, an duhlonak an aupinak cu a pawmpi ve ih Ban cun a palai Ibrahim Gambari in hi thu thawn pehpar in Junta pawl thawn reltlannak an nei ding tiin a phuang.

United States, European Union le Britain pawl khal cun nasa zet in tiletnak an tuah ve. Singapore, tu ih Association of Southeast Asian Nations Chairman khalin a mangbang thu a sim.

US President George W. Bush, in ‘nasa tuk in buainak intuah’ tiin Aung San Suu Kyi an khuahkhirhbet nak thu ah a sim ve.

” United States in Nargis thlisia ruangih siatsuah mipawl tuamdam salnak dingah hnatuan kan bawm ding, mipizalennak an ngah theiding tiang khal in tumtahnak saupi nei cingin cawllo in bawmnak kan pe ding’ tiin a sim bet.

Suu Kyi khuahkhirhnak kum 1 ti sausak bet

Reuter, Tuesday May 27, 10:30 PM

Kawlram ralkap miuk cun Suu Kyi kumkhat a inn sung khuahkhirhnak an ti sau bet thu an phuang leh sal.

Kawlram ralkap cun Aung San Suu Kyi inn kiangih kilven hna cu nasa sin ih hngetkhoh dingin a tuah bet.

Thlisia ruangih a harsatnak bawmdingih ramdangpawl in paisa tampi pek antum ruangah cun Kawlram in thilziangkim tuah in kum 62 ih upa Sukyi a suah ding cu an zum lo cia.

Reuters ih a hmuhdan ah cun zanlam sml 2 ih hunserh hmannak ah ralkap mawtaw 6, thlawngthla pawl phurnak mawtaw le meikang thelhnak mawtaw pawl cu Suu Kyi inn kiangah ralring thep thep ih an um thu a phuang.

Kawlram Palik pawl in SuuKyi a tantu pawl cu ciangzet ih an kaih thu khal thuthang cun a phuang. Hiang an kaih mi pawl hi NLS party misa pawl an siih an hmunpi ihsin Suu Kyi intiang lam an zawh ruangih kai in a sim.

Tlawngkai ni hnih sunlam deuh ah palik pawl in National League for Democracy (NLD) thalai mi 20 lenglo Suu Kyi inn lamih lamzawh an tum ruangah an kai tiin Reuter thuthang cun a sim.

+++++++++++++++++++++++++++++++++++++++++++++++

Kawlram in bawmnak hnatuantu lut siang hrih cuanglo: Costello

ABC , Tuesday May 27, 12:24 PM

World Vision CEO Tim Costello cun mithiam pawl a ramsungih bawmnak siatralnakhmun ih pek ding cu a sianghrih lo a ti.

Ramdang bawmnak petu pawl cu bawmnak an pek hnuah Rangoon ihsin kir siannak an pek zo nan, tidai le thianhlimnak lamih mithiam pawl cun Irrawady Delta ih luh siannak hngak in an um lai tiin Reverend Costello cun a sim. ” Hi tin Ralkap miuk in a thutiam a ti hlawhtlin ke maw ti zoh in kan hngak lai” tiin thuthang la khawmtu pawl hnenah cun asim.

+++++++++++++++++++++++++++++++++++++++++++++++

Kawlram hrangah bawmnak ding tiamaw

US cun Kawlram bawmnak ding hrang ah $ 20.5 million cu ninghangtuar pawl an mah hnenih pe dingih a tiam mi a siih, hi hnak ih tam sin sin ding zuam a tum thu khal a phuang.

European Commission aiawh, Bernard Srajner cun harsa bawmnak a tuldan ih zir in tui an tiam awk cia zo mi 46 million euros ($72.5 million) ihsin adang 17 million euros ($26.8 million) khal Irrawady phairuam um pawl hrangah titam ding an tum thu ram hruaitu pawl thurel khawmnak ah cun a sim ve.

Britain, Denmark, France, Germany, Netherlands le Sweden pawl cun Irrawady phairuam ih harsa bawmtu ding ramrikhiah nei lo ih siannak pe dingin le a ramsungah mithiam pawl hmangih bawmnak pek ding Kawlram Ralkap miukin tiamcin neilo ih siannak pe dingin an ngen bet.

Australia in $25 million a tiamve, asinan hi a tiammi khal cu mithiamsang ih bawmnak a tul taktak mi hnenih pek ding a silo ah cun a cangthei lo ding a ti.

China cun bawmnak ziangmawtizat pek ding atum lawng si lo in mipizalennak khal hnget khoh zetih a um a hmuh duh thu a sim. Hi a thu sim mi cun a suakkhawm tu hruaitu pawl a ti mangbang zet.

Cawlhnisun ih Kawlram bawmnak dinghrang tiamawtu pawl:

The European Community $72.5 million tiamzo ih a dang $26.8 million, China $11 million, Australia $25 million, Philippine in $10 ml ihsin $20 million, South Korea $2.5 million, United States $20.5 million.

Hi an tiamawk mi pawl khal a ramsungih siatralnak hmun ih ninghangtuarpawl hnen rori ih pek a si lo ah cun a cangthei lo ding ti khal cun an ti.

+++++++++++++++++++++++++++++++++++++++++++++++

Daan bulhram pawm fel ver ver

AAP, May 27

YANGON, MYANMAR: Kawlram Daan bulhrampi cu mipi zatek 92.5 tluk ih lungkimnak in pawmfel a si thu Kawlram a cozah cun siatralnak hmun ih ninghangtuar pawl May 24 niih me an thlah hnu ah ramsung thupuangnak in a phuang.

Mitlingtlak mi 27.4 ah mi 26.8 cun me an thlak ih lungkim nak zatek 98 a si. Hi voihnihnak me thlaknak neih si hlanah May 10 ih me anthlak laiah zatel 92.4 tluk ih lungkimnak thawn pawm fel a si thu ramsung radio cuna phuang zo.

Hi Daan bulhrampi hin 2010 ih mipi hrilawknak a kai hruai dingih, ralkap miuk in lalnak hmun 25 a nei ding.

“Daan bulhrampi cinfelnak dik zalen ih tuah a si lo ah cun, pawmtlak dan le a dikmi daan a ti si lo” tiin NLD thupuangtu Nyan Win cun a sim. Nyan Win ih a simvivo nak ah cun khawte hrekkhat ih me thla tu ding pawl hnenah “NO” ih me thlak ding cu daan kalh a sitiin hringhronak an ton thu khal AP thuthang lakhawmtu pawl a sim hai.

+++++++++++++++++++++++++++++++++++++++++++++++

Bawmnak titam theinak dingih thureltlangnak ah

“Hi tawnkhawmawknak cu Cyclone Nargis ruangaih ninghang tuarpawl hrang tanrualnak ding le leitlun pumhuat pumkhat kan si ti langter nak ding a si” tiin U.N. humanitarian chief John Holmes cun a sim.

Hi thurelkhawmnak cun mi phun ziangvek khal Kawlram in a ramsungih bawmnak pe dingih siangdingih hmalaknak an neih ding thu khal an rel thu Ban cun a sim.

Ban hin siatralnak hmun – ahlei ce in Irrawaday phairuam cu tlawngkai nili le ninga ni ah a veh ih zohfelnak a nei.

Ramtin pawlkawm in Kawlram a sawiselnak bik cu aramsungih bawmtu a luh sianglo mi hi a si. Ban cun kawlram general in “mipi cang hruaitu pawl hmaiah thusuah a tuah” a tiih a thlun tengteng dingih a zum thu khal a sim tel.

Bawmnak petu pawl ih thatnak leh zangfahnak hman tanta in Kawlram a cozah cun ramdang lawng, helicopter pawl a ramsungih luh cu a siang lo ding. Asinan Yangon vanzam kirawn ihsin bawmnak lakluh a si ding thu khal Ban cun a sim.

IRC pawl cun siatralnak hmun ihsin runsuahnak le khamlawknak tuah dingin Kawlram in mithiamsang a tla sam ih a deihawk ding a zum lo thu le natnak siava kai sawng thei pawl tidai tithianghlim lo ruangah a suak ding ti khal an phanpi zet.

+++++++++++++++++++++++++++++++++++++++++++++++

Daan bulhram hrang vote thlaknak siatralnak hmunah

By The Associated Press

YANGON, Myanmar - Kawlram a cozah cun thlisia ruangih ninghang tuarpawl cu a rampi daan bulhram hrangah vote thlaknak a nei tir.

Ninghang atuartu pawl cun hi daan bulhram tuahnak ding thu hnakin an nunnak ding, ei le in ah an buai sawn thu an sim. Ralkap mi uk cun mipi ih mamawh mihman phuhruk lo in a ralkap uknak ti hngetkhoh sin dingin hi vote thlaknak a tuahtir sal.

May 10 niah mipi in vote thlakna cu a nei zo ih, tui mipi vote thlanak an neih hlan ihsin Daan bulhrampi cu pom fel a si thu a phuang zo.

Dan thiam Myint Maung tei sungkua nga cun daan bulhram duh lo lam ih vote an thlak thu an sim. Myint Maung khal cun Sanchaungih vote an thlak nak hmuh ih a sim nakah mitlingtlak 2000 cun zarhte niah an thlak ih a hrek hnak ih tam sawn cun ‘No’ ih an thlak thu thuthangla khawm tu pawl a sim.

+++++++++++++++++++++++++++++++++++++++++++++++

Cangvai ding cun thutiamnan, thlengdanglamnak um hrih lo

May 24, 2008

CYCLONE siatraknak ih a tuan tu pawl cun Kawlram in $US11 billion ramdangih bawmnak ding a ngennak Kawlram hrangih pek thluh ding le dinglo thu an don hrih lo thu an phuang.

UN Secretary General Ban Ki-moon cun Than Shwe cu thlem neh in ramdang bawmnak lakluh siangdingin a tuahnan, ziangtikah an ngahthei ding, ziangzat tluk voikhatah an siang ding ti cu fiangfelfai te ih theih a um hrih lo a ti.

Ban cun kawlram acozah in a thutiam-ramdang mi pawl ih bawm nak pek a si dingthu cu a thlun ding ka zum ko ih himi hi ramdang hrangih hmalam karnak tha a si ti khal cun a sim.

Bawmnak hna tuantu pawl ih an sim danah cun thlengdanglam awknak cu a um hrih lo, cangvai dingih thutiam cu a um konan, cangvaihnak lam hnak in harsatnak rawl lo le natnak siava an harsatnak bik a si lai thu an rel ve.

Bawmnak thawhtu le Kawlram in tuandan dangdang in

By Patrick Worsnip

YANGON (Reuters) – Ramtin pawlkawm bawmnak pektu le Kawlram ralkap miuk cun ruahdan dang dangih tuahrem salnak nei dingin thurel nak cu Cawlhni sunah Yangon ah an nei.

Siatralnak hmun ih mipi 134000 lenglo thi le hlo pawl hrang le a nungdam lai pawl hrangih tuannak dingah $11 billion cu Kawlram a cozah in ramdang pawl kawm pawl thawn tuantlang dingin dilnak a tuah.

UN le ASEAN kawm aw ih an tuah mi hi hruaitu thurelnak ah ramtin in palai mi 44 pawl cun ni khat sung thurel nak an nei ding. UN lu Ban khal a tel ve. Hi conference ih a tumtah bik mi cu Kawlram ih bawmnak a luh tamthei nak ding hrangih reltlang nak a si.

Kawlram le China hrangih khawmnakah Laimi in thusim

CT, Melbourne| May 23
Zuk : 1- ninghang tuar pawlhrang Rev. Don Ikitoelaqi inthlacam, 2-REv. Micah Tawk Kap thusim, 3-Upa David Tai Sai Lo bawmnak thawhhlawm hlan, 4- Salai Ngun Hre Lian, Mai, Parte, Mai Ngunte, Salai Liante, Mai Monica, cazemhna an tuan.

Melbourne khawlaili nak hmun Wesley Uniting Church ih Kawlram mi le China ninghang tuar pawl hrangih thlacamnak le khawmnak hmunah kan laimi in thuthangtha simnak, bible siarnak le thlacam nak in hunserh hman nak an vei ve.

Rev. Micah Tawk Kap cun, a rasuak tu mipi ziangmaw ti zat hmaiah ‘ziangraungah Pathian in hitluk in Burma le China a tuartir, ziangmi a duh san a si?, a mah Pathian theihtir a duhnak ruangih a tuartir mi a si, kan ni zumtu pawl in bawmding kan tuanvo a si’ tiin ninghang tuartu pawl hnemnak dingah le thazangpek nak ding a sim. Salai Tuan Hre Lian (Lian Lian ) in Thusimtu 3:1-8 nak cu khawmthok nakah a siar.

David Hickey, Director of community appeal in sumpai bawmnak, China hrang A$ 520 millions le Burma hrang A$ 43570 an rak ngah zo thu le May 22 sun ah Adelaide le Canberra ah Kawlram hrang A$ 43058.30 le China hrang A$41006.50 anngah thu a sim. Bawmnak co hlang rero lai a si thu le hi bawmnak pawl cu National Council Church Australia feh tlangih pek a si ding thu khal a rel tel.

Ninghang tuarpawl le mithi pawl suunnak le thlacamsaknak neih a siih, a rasuak tu pawl cun meifar (phazawngdain) cu pulpit hmaiah mimal cio in vannak neih asiih thawhhlawm leh bawmnak mah le sian tawk khalcu thawhnak nei a si. Bawmnak thawhhlawm pawl cu Upa David Tai Sai Lo in Pathian hnenah apnak a nei.

China tawng, Mirang tawng le Lai tawngin hi program hi hman a siih thilthleng pawl zohkirnak zuknung in suahnak khal neih a si. “Zuknung nanzoh tikah nanmithli tla a luang ko ding, na mit khal in zoh ding a ngam nawn lo men thei, a sinan nan thinlung, nan theihnak mit cu rak singsiang hlah uh, na unau tuarnak khi theih pi aw, Pathian thu pek a si” tiin Rev. Dr. Douglas Miller cun riahsia lungkuai zet in a ra suak tu mipi pawl cu a sim.

‘In hruai aw, Maw Jehovah Pathian ropi, Na kut cak kan lo ring ding’ ti hla cu thinlung tak te in Pathian sunlawih thangthatnak neih ih sak asi hnu ah Rev. Don Ikitoekaqi in Bawipai thlawhsuah pek thlacamnak in khawmnak cu ban asi. Hi khawmnakah bawmnak ziangzat an hmu ti lawngte an puang felfai theih hrih lo.

A suak khawmtu lak in ninghang tuartu mi ziangmaw ti zat cun mitthli thawn hi khawmnak an hmangih, Laimi (falam) mino pawl in mipi pawl hrang cate rak zem hna le hmuahnak hna an tuan pi ve.

+++++++++++++++++++++++++++++++++++++++++++++++

Delhi Thuthang tawi

Delhi ah Ruah a sur vi vo lai ding

Vairam khawpi Delhi ah mangbang thlak zetin toruah May 14 ihsin tuini May 23 tiang, cat banglo in a sur. Thal can ih ruah maksak zet ih a sur mi cun mipi a ti mangbang zet. Asia ram ih thilthleng hi ruah ah cun mangbang thlak a si ti khal cun nikhua tahtu pakhat cun a sim. Nikhua zohtu pawlin ruah tui zarh sung a sur vivo lai ding tin an phuang bet.

+++++++++++++++++++++++++++++++++++++++++++++++

Delhi ah Lamzawhnak nei:

Delhi ih raltlan thenkhat pawl cun kan kawlram ih cyclone thlisia ruangih harsa a tuartu pawl hrang acozah in bawmnak paisa pek asian lo ruangah Delhi um kawlram raltlan pawl cun lungawilonak tilangin May 17 ni ah Bus pahnih khat in lamzawhnak an nei.

+++++++++++++++++++++++++++++++++++++++++++++++

Next Page »