$ 191 million neitu David Beckham a lek thei lo

$ 191 million neitu David Beckham a lek thei lo

David Beckham cun a ke ruh hliamhma (archillis tendon) ruangah hmai November thla tiang bawhlung a sit thei lo ding thu a sim. World Cup ih lek dingin hril a si hnu ah US ram Los Angeles ih Galaxy Club ihsin AC Milan ah a thawn ih, March thla ih AC Milan le Chievo an lehnak ah Backham cun hliamhma a tuar a si kha. Milan in 1-0 ih an neh vete’n Beckham cu Finland ram ih siibawi thiam hnen ah a feh cih ih, a tha theibik ih an rak zohkil hnu ah ‘a malbik thla (3) sung lek thei nawn lo ding” ti a si.

Beckham cun World Cup sung hmuahhmuah ah England hrangah lek thei lo hman sehla, an ram aiawhtu ‘team’ pawl fehnak kip ah thlun vivo a duh thu a sim.

Culaifang ahcun Wigan (EPL ih football club pakhat) chairman Dave Whelan cun tulai santhar ih lehnak lamih eihawltu pawlin sumpai ziangzat lai an nei timi thu a rak zingzawi ve rero ih, David Beckham cun British sterling pound 125 million (US$ 191 million) hrawng a neih ding ruangah ‘neinungbik (2) nak’ tiah a rak hminsin.

Asinan, Dave Whelan cun Blackburn ih a rak leh ringringnak ihsin sterling pound 190 million (US$ 290 million) hrawng a khawl ruangah ‘neinungbik’ cazin ah a ret aw. Cun, Formula One (mawtaw cakbik pawl) mawngtu Lewis Hamilton cun sterling pound 35 million a nei ih, neinungbik (3) nak a si. Manchester United ih striker Wayne Rooney cun sterling pound 33 million hrawng a nei ih, (4) nak a si.

Football Club (Premier League) sunglam thu lawrkhawm

1. Liverpool striker Fernando Torres cun tui’ season theh vete’n club dangih thawn a tum. Spanish Club ih a feh lo ahcun Manchester City, Chelsea le Barcelona pakhat khat ih a luh a zum um zet. Chelsea cun mankhungzet in a lakluh a zum um ih, sterling poud 70 million tiangin a pe ngam ding.

2. Tui’ season theh vete’n Chelsea midfielder Joe Cole cu club dang hrangah lakluh thei a si dingih, Liverpool cun an beiseizet. Liverpool boss Rafael Benitez cun Serbian International striker Marko Pantelic (Ajax Club) ih lektu khal hmailam caan hrangah a ham cia.

3. Leiba tampi neitu Manchester United cun tui’ kum sungah manager Alex  Ferguson hrang sumpai hman ding a um thei tiah Chief Executive David Gill cun a sim. Ferguson cun Real Madrid striker Gonzalo Higuain (Argentina) cu ha-hiauzet in a thlir rero lai.

4. Tottenham cun Ipswitch striker Connor Wickham (kum 17) cu sterling pound 6 million ih lei dingin a timtuah. Cun, Israel ihsin Liverpool Club ih ra lut pek te, Yossi Benayoun khal lei a duh. Tottenham cun an striker Robbie Keane cu Everton hnenah zuar an tum ih, Everton ih midfielder Sreven Pienaar cu lakluh ve an tum. (vorhlam zuk: Connor)

5. Stoke City cun Arsenal le Liverpool ih rak lek theutu Jermaine Pennant cu hmai season ihsin lei an tum. Jermaine hi Spanish Club pakhat Real Zaragoza ah kum khat a lek hnu ah England a ra thleng sal. Cun, Stoke City cun Ipswitch ih midfielder (captain) Jon Walters cu sterling pound 4 million in lei an tum.

6. Birmingham cun Manchester United goal keeper Ben Froster cun an hnen ih lek ringring dingin sawm an duh. Birmingham cun goal keeper ih a hman rero lai Joe Hart cu Manchester City ah kuat a duh ih, Manchester City cun Portsmouth goal keeper David James (ahlan ah Aston Villa ih lektu) cu lak luh an duh.

7. Arsennal in striker ra si ringring theu Thierry Henry cun tulai ih a umnak Barcelona ihsin USA lam ih thawn a duh ih, cutawk ih um lan ta khal a duh men thei.

8. Arsenal cun goal keeper thazet tlaksam ruangih harsatnak cu an khopzet ruangah West Ham ih Robert Green le Man City ih Joe Hart cu lakluh ve an tum. Westham cun ‘West Brom’ ih midfielder Graham Dorrans cu sterling pound 5 million in a lei tum. Dorrans hin West Brom ih a leh sungah sterling pound 10 million a hlawh ban.

9. Hamburg striker Ruud Van Nistelrooy cu an ram (Netherland) aiawh ih World Cup lektu ding mi 26 cazin ihsin a cawl.

10. Manchester City ih lektu pawl cu an hotu pawlin hmailam (tui’ season) ih an lehnak ding ‘puai (2)’ ah nehnak an co ahcun an hlawh ding cu sterling pound 70,000 tiangin bonus pek an si ding tiah thu an kam.

11. France Club ihsin Portsmouth ih a ra certu striker Frederic Piquionne cu Wolves, Birmingham le Blackburn cun hmailam caan ah lei an tum cio dingih, sumpai nei tam deuh in an co ding.

12. Ahlan ih Tottenham boss rak tuan dahtu Martin Jol cun hmailam caan ah English club pawl zohkil saal a duh thu a sim. Martin hin tui’ dinhmun ahcun Ajax Football Club a zohkil. “England ah tuan theh lomi ka nei cuang lo na’n, ahlan vekin an lakih um saal ka duh” tiah a ti.

13. French Striker Karim Benzema cu hmailam caan ah Manchester United ih a um a zum. Asinan Benzema cun a umnak keel ‘Real Madrid’ ih um ringring thei a duh thu a sim.

(1 sterling pound = US $ 1.6)

{Ruah khawm ding: Football hin thlarau a nei teh a si pei maw? Atpitu tampi kan um thlang. Thlacam le Biakinn ih khawm caan khal ah Football leh caan a si ruangih kan tel lo phah phah a si ahcun, a thlangrau kan co a si ding. Nomnak men a si ti thei aw la, thupizet in ruat duh hlah, na eihawlnak a si lo ahcun!}

(Visited 125 times, 1 visits today)

Comments

comments

Comments

%d bloggers like this: