ZAIHLA – S. Kei Uk/Klirlungz

William Blake (1757-1827)  hi lar-awknak hmu phahphah le hmailam thu simcia thei vekih rel a si. Kum 4 a ti ah Pathian a hmu ih a raak tthuttthi dah an ti. Cun a kum 8 kum ah thlawh-lai ah vak in, vancungmi hlirih khat mi thingkung  a hmu.

Cui thingkung ih hngettekpawl cu vancungmipawl ih a tleu mi thla ruangah arsi bangin a tleu ttheh si hmang. Rethei sungsuak ti fam cu, tlawng a kai thei lo. A nauhak laiin, a pa in lungkherthiam hnenah ret in lungkher hna a ttuanter. Zuk khal a suai phah. Kum 12 a ti ihsin bezai ngan a thok.

Cazirlo a si nan, khawruahnak hriamzet le fimzet nei mi a si. Kum 26 ah, fala hmeltthazet, Catherine Boucher cu nupi ah tthi. Cule, a nupi ih bomnak in Songs of Innocence ti mi bezai bu, kum 32 a ti ah a suah. Cui hnu kum 5 ah Songs of Experience ti mi bezai bu a suah lala. Asinan, a biazai hi, amai damlai ah mi ih theih a hlawh ban lo. Lehhnu ih an run lakkhawmsal hnu lawngah a rak ropitzia theihsuahsal a si ih, a biazai cu a sung ihsin phorhsuah mi rothil sunglawizet bang tukah an hung cangsal.

Song

How sweet I roamed from field to field,
And tasted all the summer’s pride;
Till I the prince of love beheld,
Who in the sunny beams did glide!

He showed me lilies for my  hair,
And blushing roses for my brow;
He led me through his garden fair,
Where all his golden pleasures grow.

With sweet May dews my wings were wet,
And Phoebus fired my vocal rage;
He caught me in his silken net,
And shut me in his golden cage.

He loves to sit and hear me sing,
Then laughing, sports and plays with me;
Then stretches out my golden wings,
And mocks my loss of liberty.

He bezai hi kum 14 a kim hlanih a ngan mi a si an ti. A pawnlang tei’ zoh cun vate pakhat ih thu rel mi men a si. Vate cu, tthal ih mawinak le hmuinak hmuahhmuah ceen in lo fing khat hnu fing khat ah nuamzet in a tlang. Cuti’n, duhdawtnak siangpahrang fapa a tong. Cui’ siangpahrang fapa cu vak menmen si lo’n, sun ni tleu mawi lakah vate pel phunih vak a si. Cule, Liliy le Rose pangpar thawn vate cu a leem. Lily cu a sam ih ton dingah, Rose par cu a mittlang ceinak dingah a si.

Siangpahrang fapa cun vate cu a aipuannak phunkim an keuhnak par hmun mawi sungah a hruai. Cui’ a hmuan sungih keuh mi, siangpahrang fapa ih aipuannak pangparpawl ih daidaw ruangah vate thla cu a ciin ttheh. Ni ling in a thinhengnak awhro khal a puakkuaiter. Cuti’n vate cu duhdawtnak siangpahrang fapa ih surthang in a awk. Vate cu cir ah khum tahratin a hlasak lai cu to in a ngai ttheu. Cir sungih a um lai cu lehpi in a hnihsan ih vate cu thla a  pharh ve ih zalenzet in a zuang thei nawn lo ti a hmuh tikah siangpahrang fapa cun zokzetin a sisiau men.

Nauhak ngan mi bezai ah cun a tawk nasa. ‘Vate’ khi ‘Fala’ relnak a si ih, falapawl pasal an neih ih an zalennak hlo thluh ko rekbet an si thu relnak a bang. Tui sun ni tiangah nupa karlakih minu dinhmun a siatzia rel ding tamzet a um ko ding.

Eden hmuan sungih sia le ttha theihnak thingrah ei hmaisatu Evi kha Pathian in a cam bese deuh cuang maw, mipa hnakin dinhmun niamdeuh ih a sersiam hrimhrim ruangah henha, minu dinhmun hi mipa hnakin a niam hrih lai nasa. Minu le mipa tluktlanawknak thu khal nasazetih ausuah rori a si. Kan Laimi minupawl khal hlan san thawi’ tthim cun tui san ah right (nawl)  an nei tamzet ding nan, mipa thawi’ tahtthim ci a si hrih cuang lo. “Nunau fahranih a va zak lo ve,” “Nunau ah cun a tawk nasa,” tivek ttongkam kan hman tikah, theihthiam lote’n, minu dinhmun kan ret niam lai tinak a si. Ziangruangah minu hi mipa hnakin an hminsiat a ol. Mihur ciocio, ziangruangah mipa hur hnakin minu hur kan ngainep cuang? Thutthentui’ thinlung ruangah a si ko ding.

Jesuh Krih hmaiih uirenu an rak hruai laiah khan, ziangruangah uirepa kha an rak hruai ve lo? Mipa a si ih a cakvak deuh ruangah an kai man lo maw, mipa hi uire ah an rak siar ve lo? A san a um ko ding. Tui san ah nupi nei cingih minu dang ihpi rero mipa an um ko nan, mak kan ti tuk lemlo a bang. “Mipa a si si,” ti san men an si. Amahlawngte, pasal nei lai minu cu mipa dang thawi’ an ihtlang thu theih a si tikah thubuai a ol-ai nawn lo. Uire ciocio, bangaw ding a bang nan! Bible sung, Thukham Pahra sungih ‘Uire hlah’ ti mi hi minu hrangih pek hleice mi a si kei maw tiah ka ruat.

Cun, nupa karlakah thubuai a um ih tthenawknak a suah tikah, kan Lai daan cun, minu hrangah covo a um lo. Minu cu amai’ thu ih a tlan tikah a ken mi thingkuang le hnipuan pawl lawng tlunkirsal ding a nei. Mak mi a si le a  man khirhsal a si. Kum hnih-thum sung pasal tei’ innsang hna a ttuan man co mi a nei lo. Sumpai le thilri a co lo cu thuhran, a tikcu-caan cem liangluang, a lak menih cang dingah a ui-um tuk. Kum hnih-thum sung hnattuan in bom man ti in awmang tawk sumpai lole thilri pek ve an phu in ka thei. Kan pe siang ngai maw cu?

Zalenzet mi fala, pasal a neih tikah a zalennak hrekkhat hrawng cu a hlo a si. A pasal cu a duhduhnak ah vak in fala a hawh rero thei laiah, minu hrangah cun tlangval lehpi le duhduh caan ih lenvah a thiang nawn lo.

ZAIHLA

Lai ni zungceu sungih leng mi,
Duhnak lal fa a hmuhngah tiang;
Tthal ih hmuinak ceen ih len khi,
Thlawh-lai tin fang detdo’n nuam sing.

Mittlang ceinak ah Rose sen mawi,
Lili i hmuh ka sam hrangah;
A par hmuan mawi hrawh in i hruai,
Hlimnak hmuah an keuhnak sungah.

Thla i hnawnter Thawilak daidaw’n,
Ninu’n a mut ka hrosuan aw;
Hreng ah i awk sur pat thawn,
A sui cir ah i khum ngan maw.

To in ka zai theih lai a  hiar,
Hnihsan menih lehpit i cak;
Ka sui thla te pharh in ka zar,
Ka hloh zalenh i sisiau tak.

%d bloggers like this: