Vanzam In Brake A Nei Maw? – Steven R Sunthang

Pilot training ka theh zawngih Rangoon ka va tlun laiah, kan kohhran Falam Baptist Church ah ka training umdan leh ka tonmi relnak caan in pe ih mallai relnak ka nei.

Cumi zarah ka lennak pohpoh leh in ra lengtu a tam sawn in thusuhnak in neihmi cu:
Ziangtin vanzam zam phah ih vur ih a lo tlak thei?
Vanzam in brake a nei maw?
Vanzam mawng si dingah ziangtluk ih fim a tul? tivek pawl tla an si.
****************************************************************
Rrrrrrring… ringring…..ringring….
Ihhmuh thawt laifang ih phone run awn ticu paihlo na cing cun phone cu ka vun kai ih, “Hello..Good morning”. “Good morning. This is your wake up call………”(Na tho tha maw, lo thangnak telephone awn a si. 1998 July ni 28 zingpit nazi 4:30 a si zo) tiih Mirang fala aw mawi kelko teih tong cu ka vun thei. Vun biakbet ciamco tha asinan, thun (record) ciami aw a si ti vun theisal in phone cu ka thlaksal ko.
Aw cukel! Pilot pawl dante’n sangkate khuh kau in aleng vun zoh hnikkhaw, handah nawnlo ding vekin ruah cu a sur thlurthlo. Uniform ka vun hruh theh hnuin coka lam pan in ka pawk. Zingpit khawvang hlanih thawhlam vun ei ding cu a phurum lo nasa. Sihmansehla ei a tul. Khualhla tlawng ding kan si tikah ziangtikah rawl kan ei ngah ding ti theih a si lo.
Ka nui’ umnak hmun sisehla ….sehla.. sehla tikhin ka vun ruat ih, ka nui’ tuah ciami ka ei men ding sikhawih maw tikhin…
Airport lam pan cun ka hei pawk ih, zung ka thleng tikah, nikhua tahnak hmun ih nikhua an tahmi (Aviation weather forecast) cu thate’n ka zoh. A buaithlak nasa. Antarctica lamihsin rami cold front tumnawn cu kan umnak Western Australia parah a thleng zo.
Australia ram hi continent tumpi asiih Equator hnuailam 10 41S leh 43 39 S lak, Lattitude 113 09E leh 153 39E lakih ummi a si. Continent tifam cu a kiangkap ah ramri leilung nei loin Indian Ocean leh Pacific Ocean tipi thuanthum in a kulh. Kan Lairam umnak Asia cu Northern Hemisphere ih um a sivekin, Australia cu Southern Hemisphere ih ummi ram tumbik a si. January thla hi thal nisatbik caan asiih July thla cu thlatang (winter) tiih kawh asinan  Antarctica lamih a rami nikhua ruangah ruahpi a sur ciamco theu.
July thla ahhin Lattitude 75 Degree South thlanglam cu ni hmu loin khua thim in a khuh. A daitukmi thli cu a hung hrang ih Western Australia hnuailam Leilung umnak a thlen zik hrawng in, leilung cu tidai hnakin hlum awl,dai awl a si vekin, thlidaizet cun leilung leh a kiangkap ih ummi thli hlum deuh cu a vun kaan (or) rawi tikah front timi nikhua makzet ah a cang. A tlangpithu in front phun hnih a um: warm front (thli hlum in thlidai a kaan) leh cold front tiin an si. Thli hlum leh thli dai an vun rawiawk tikah thli umdan (air mass) a thlengaw. Thli sungih a ra tel mi water molecules pawl kha an aipuang ciamco ih mero phunphun ah an cang murmo. Cumi cold front sungih a tlangpithu ih ummi mero pawl tla cu:
Cumulus (Cu), cumulonimbus (Cb), Altocumulus (Ac), Altostratus (As) leh Nimbostratus (Ns) tla an si.
Kan theih awlbik ding cun, Cumulus (Cu) mero hi patpar humkhawmmi vek sah leileih mero a si. Cu mero cu a hlumdan (temperature) a vun thlengawk ciamco cun nimtlakau-tertu leh rial tlatertu CB mero ah a cang. Rial a tlak hnu cun CB mero cu a tthendarhaw thluh ih Stratus mero phun ah a cang sal. Stratus mero cu a rung dum khuikho ih Ns mero tiah an ko. A tlangpithu in himi mero in ruah a sur.
Ka zam dingmi F-33A Bonanza single engine vanzam cu ruahsur lak ahcun duhthusamte’n ka vun check. A ke umdan, mero sungih zam tikih kan hman theumi Nav- aids leh anttena pawl leh a mawnnak hmaiih nazi vekih tikhepkhep ih ummi instrument metre tahnak pawl tla ka zohfel nasa. Vanzam lampang cu zam ding a man a si. Nikhua ..lampang.. ka Captain pa ih thu ka ngai a tul. Keimai’ thu sisehla ka cancel vuarvi mai ding !! Vanzam hman ka check lo ding.
07:00 AM cun ka Captain pa cu a ra thleng ih, van dum kheikhei leh ruah sur thlurthlo hmu nacing cun nikhua ziang a bang tiin in sut.
Kan zam suahnak ding Jandakot Airport cu sea level pii 99? asiih, a tufang ahcun mero pit mermer in a khuh theh. Kan fehnak ding lamzin cu pii 7000? ah Freezing Level (0 degree centigrate) a si. Kan va tumnak ding Airport cu Sea level  pii 800? sannak hmun ih khua pakhat a si. Falam khua hi sea level pii 5200? hrawng ih sangah a um.
Captain pa cu thil umdan simfiangnak (briefing) ka pek. Regulation (Daan) vek asilen kan feh thei ko. Sihmansehla, kan fehnak ding vanzam hi single engine asiih, rinlo piin engine sia pang sehla cakkhai tumnak (Emergency Landing) hmun kan neilo ding tipawl tla cipciar zetin ka sim. I zoh khuokhi ih kan feh pei i ti vete’n vanzam lam pan cun kan pawk mei.
Vanzam mawn si dingah fim ciamco a tul lemlo ti sehla a sual lo ding. Asinan a tikcu caan milih a zamrangbik leh a thabik ih decision tuah theitu si a tul.

Vanzam in brake a nei maw?

Taikhap pawl kan vun khap theh hnu leh a tulmi kan tuahtheh hnuin, engine cu ti vungvo in kan ti awn ih, handbrake vun phelh cun motor vekin  a hranih gear thut tul loin amahten a pawk mei. Lei parih feh asilen vanzam brake cu motor brake vekih pal cutco a si ve ko. Asinan, boruak ih zam laiahcun, a ke hman sinawn hlahkhaw, a pal ih palmi brake cu hman a theih nawn lo. A zamlai ahhin brake tiih kawh ding rorimi cu a neilo nan, a speed ti nuamnainak ding ih hmanmi thliri cu tam nawn a um. Flap, slap, spoiler etc pawl tla an si. Vanzam nan to tikah, a sangkate kiangih to ngah pawl cun hmuh a theih. Vanzam a tum zawngah, keh leh vorh lamih parhaw diadiami a thla khi, a sozawng ih tung-aw na, a sukzawng ih thlaiaw na in an phelhaw ciamco nan hmu ding.
Cu pawl khi vanzam a zuan laiih ti nuamnai tertu pawl cu an si.
Van ah vur a um mawsi?
“.. Siera India Bravo, you’re cleared to take off..” tiih control tower ih tongka cu fiang kelko teih ka theih hnuin… Truckpi pawl nawpaw tungto ih Varso an so vekin, a engine cu rak pa thei tawp ka rakter ih, ti puangpoin boruak ahcun kan zam thok mei. Pii 300 kan vun thlen cun boruak hmuh theih ding um nawn loin mero lakih zam thawk a si thlang.
A mawnnak hmaih Instrument pawl cun ziangtin kan zam rero ticu fiangten in sim rero ko. A sannak tahnak Altimeter ahcun pii 5000 kan thleng rero thlang ticu kan thei. A cangcang len kan vanzam cu a rung khur ciamco theu. Aare!! ziangcang tiin instrument pawl cu kan vun chek ih Vanzan parah vur (icing) a um ti kan thei mai. Hmakhatten kan tum ih pii 2500 kan thlen cun propeller (pangka) ih a rak kaimi vur pawl cu a kharkhar piin windscreen (hmai thlalang) ah an run dengaw ciamco cu zohphah khin minit hnih-thum hrawng zam bet nungna himi a tilh in kan til ding sikhawih!!
Vanzam a zam laiah vur a bet theinak san phun (6) lenglo a um nan, tuiih kan tonmi lawng hi a tawizawngin run ngan sehla:  A thawknak ih ka nganmi vekin moisture tamtukmi ti molecule (mero) pawl kha speed thawn a rami vanzam thir ah an bet tahratin an khal lanta vivo ih a zam rei sinsin len molecule pawl kha an bet tam sinsin ih cutin, vur kan timi ah a cang.
Perth International Airport lam pan in kan tum vivo ih ILS (Instrument Landing System) (Tui’ ca ka ngan rero laiah Kawlram ahcun Mingaladon Airport lawng ah ILS hi a um.) hmangin (ILS hman tikah a leng zoh tul lo.) ka tum rero lai ahcun Captain pa cun control tower thawn damten kan tum ngah zo thu an simawk rero aw cu ka thei. “Kum riat sung vanzam ka mawng zoih tuvek nikhawsia hi ka tawng hrih dahlo” tiin Capt pa cun tiphurpho ih in sim rero laiah Vanzam engine cu ka phih ih a sangka ka vun on hnu lawngin, kha vek nikhua lakih damte’i vanzam i mawntertu Pathian cu sunglawi sin koseh tiin.

PS: Siannak lo in himi cahram hmun dang ih suah sian a silo.

Hram: fimnak.com
Steven R Sunthang

%d bloggers like this: