Thuthangca Athupitzia – Salai Ayete (Vankau)

Thuthang (news) timi cu a tikcucan khelin thil rung cang tharmipawl mipi zaten theihthei dingin TV, Radio, Thuthangca le Mekazin tivek ih phunsuahmi thuhlapawl an si.

Atlangpi thu in, thuthangca (Newspaper) cu nitin asilole zarhtin pelhlo ih phuansuah ringring a si bik. Cui thuthangcapawl cun thuthar, thilthar an phawrhsuah theu ih nikhua umtudan, lehpannak le thilman tivek phuansuah a si theu.

Culawng siloin, ramthuhla, pursumleilawn thu, art le nunphung, nunthuleng le tawntawk tivek tiangin thuthangca sungah phuansuah ringring an si. Thuthangcapawl ih an sum luhnakbik cu thehlarnak (Advertisement) hi a si bik.

Tuisun ahcun, cahnah lawngin siloin Internet cahmai par khalah thuthangca phunphun phawrhsuah le zemdarh rero a si zo. Hi cahram te thawn, thuthngca a thupitzia run tarlang ve sehla.

Ram dintu (Nation-buliding)

Thuthang phuansuah hnatuannak hi felzet, dikzet le hmarngai-zawnruahnak thawn tuansuah asile rampi pakhat dinsuah rero thawn a bangaw ti a si. Cui hnatuannak cu thuthang zemdarh ih thehlar vivonak a si ruangah a siartupawl thuhla famkim a theihter ih nitin an hnatuannak ah, ding le felzet ih thurelcat theinak tiangin an tulmi thuhla famkim ten a pe thei. Thuthang zemdarhdan (Information Flow) a thatnak ram ahcun a rammipawl khalin thuhla an theihkau thei ruangah an thansoh phah ti a si.

Misenpi Thuruahdan Tuahthattu (Public Opinion Shaping)

Thuthangca cun rammi misenpi ih thuruahdan tiangin a tuahtha thei ti a si. Misenpi duhhrilnak vekih ukawknak (Democracy) ram ah tla cun thuthangcapawl ih an thilti theizia a natsattuk ruangah “Amerika rampi khi a uk rerotu cu Amerikan thuthang media pawl an si” ti tiangin a titu an um. Thuthang a cah ih, thuthangca suahtu an thiam le, misenpi ih thinlung muril tiangah ram duhdawtnak a thlen thei ih mipakhat fingfing ih thiltitheinak tiang a tuahtha thei ti a si.

Ram Kilhimtu Uico (Watchdog)

Thuthangca media pawl ih thilti theinak adang pakhat cu ram kilhimtu uico vek an sinak hi a si. Uktu cozah le kampanipawl in diklozet ih an hnatuanmi le thiltimipawl a phawrsuah ringring dingih rammi misenpi hrangah thudik le thiltha theihter ding hi thuthang media pawl ih hnatuan tumbik pakhat a si ve. Thuthang hnatuahtupawl in watchdog hnatuan hi hmualneizet ih an tuansuah thei asile daan thawn ukawknak, eiruk-doralnak, rampi ih pursum-leilawnnak le democracy ukdan dik tiang a kilhim in a hmasawnter thei ti a si.

Mipi Thurelkhawmnak (Public Forum)

Thuthang media pawl cu mipi hrangah mai duhmi phuansahnak le thurelkhawmnak hmun khal a si. Rampi a thansoh theinak dingah ziangtin, rammi pawl ih harsat buaibainak ziangtin- kan tuahtha in kan remtha thei ding ti’n mipi zaten thuruahkhawmnak hmunpi pakhat khal a si. Thuthangca hi khawruahnak thar phawrsuahnak hmun (Idea Generation) khal a si thei ih khawruahdan le hmuhdan pawl khawlkhawmnak bazaarpi (Idea Supermarket) khal a si thei fawn. Ruahnak tha le hmuhdan dik a tam lawngah rampi a thangso thei dingih cuti ih a tuahsuak theitu ding cu thuthang media hnatuantupawl an si.

Ralrinding Mallai

Thuthang  phuansuah tikah a rung cangdan le a sidan vek cekci in thehlar le zemdarh ringring ding hi a thupizet. Tualsung thil rung cangmi thil fatezet khal hi mipi hipnak ah ti’n tumzet vekin ngan a theih ih cucu, Sensationalism ti a si. Thimnak ah, kawlpa pakhat le chinpa pakhat ih buaibainak an neihmi khi “Kawl le chin karlakah buaibainak a um” ti khalin tumzet vekin ngan a theih ih kawl le chin remawklonak tiang a thlen thei a si. Rampi le khawvel huap ih thil thupizet khal thu fatezet le tualsung thuthang vekih ngan a theih. Cun, thil thupipa a rung thlenmi khal awlaizet le fatezet vekih ngan a theih ih cucu, Oversimplication ti a si.

Ralrinding Tampi

Kum 17 ka si tiang Falam khaw sungah rak thanglianmi ka siih voilekhat ah cazual, mekazin tivek tete siar ding ka rak hmu theu nan voitamzet cu siar ding um lo lawlaw in ka can ka rak hmangliam theu. Tuisun, kawlram sungah thuthangca, journals tivek phun 176 suah ringring ti a si. Cupawl teh kan chinram a hung thlengban maw? Lailam, khawte lamih um kan unaupawl in teh thuthangca hi an siarban ve pei maw? ti tla ka vun ngaihtuah theu. Ram le miphun pakhat hin a parih HUTHANGCA vek tello in teh Thinlung, Taksa le Thlarau a kilkip ih  thansoh ngaingai  a theih pei maw tiah…..?

Sirhsan: Microsoft Encarta Encyclopedia, Premium 2009

The Voice Weekly Journal (Vol.7/No.21)

Salai Ayete (Vankau)

%d bloggers like this: