Santhar Thiamnak Technology le Laimi

Santhar Thiamnak Technology le Laimi

By Piangte (USA)

Kum zabu 21 sungih a tlangleng reromi minung lakah Laimi tla kan tel ve. Pathian remruat maw asilole kanmai’ duhthlannak ruangah maw Laimi tampi cu a tthangsozetmi ram ah kan thleng rero zo. Cutiih santiluan in in fehpi vingvo vekin, tthangthar kan fale pawl le sanman deuh pawl khal mah le ram umnak ih zirin, santhar thiamnak le santhar thilri (IT & Technology devices) pawl hman ve a si. Himi santiluan ih thilri pawl hi hman thiam ahcun, kan hrangah nun khawsaknak le thil kan tuah/ttuanmi ah tampi a olsam ter ih mi bawmtu tthazet an si. Asinan, kan hman thiam lo ahcun, asilole a si lo zawngin hman a si ahcun, kan hrangah thih theinak tur (poison) tumpi vek a si thei ve.

Ramleng cu sim lo, ramsung khal ah, khawpi deuh ih um pawl cun, himi thilri pawl hi hman an si tikah, abik in theihnak le thiamnaklam ih mi dung a dawi rerolai mi, Laimi nu le pa pawl in kan fa le ziangti’n santhar thiamnak le thilri an hmang ti kan theih cio ding a thupizet. Nauhak kum 18 tanglam computer duhtawk in kan hmanter ahcun, mawttaw tampi a feh reromi zinpi parih nauhak feh theipek amah lawng kan fehter thawn a bang aw. Curuangah a tawizawng in kan theih ttulmi tete zoh tlang uhsi.

Ram tthangso zet zomi pawl ih an buaipi zetmi pakhat cu cyber bullying an ti ih, cucu Laittong cun, kan theithiam nak olbik ding cu internet, cell phone le santhar thilri dang (other electronic devices) ihsin mi duh lo zawng ih cangan le mi to, zuk ttha lo thlah, mi relsiatnak ti’n sim sehla a fiang deuh ding. Hivek hmang tampi an um ruangah, USA ah kumtin mah le mah that-aw tthangthar/nonawn (teens) a mawitawk an um ringring.

A tlangpi in cyber bullying ih kan hmuh theimi cu blogs, webpage, my space bulletin, face book wall, chat room etc.. pawl ih midang zuk ningzakza zuk, zahmawh zuk tarsak tivek pawl an si. Cubakah, cell ph thawn ttongkam mawi lo le ca ttha lo, zuk ttha lo, texting le message kuat tvp. Mahta si lomi webpage le blog kha mi va thangsiatnak ah midang hmin hmang in tuah tvp., mah taa si lomi email hmangin hminlem ih cangan tvp., le private ih email, message kuat aw mi, midang hmuh lo dingmi zuk le ca pawl midang hnenih kuat betsawng pawl an si.

Himi pawl hi tthangthar pawl ziangrungah nan tuah ti’n an sut tikah, 81% in nuamnak le umharphen ah an ti, hrekkhat in thil thupi ah an ruat lo, hrekkhat in ziangvek thil `ha lo a rak suak bet thei ti an ruat lo, hrekkhat cu rualpi an tuah ruangah kan tuah an ti, hrekkhat cu zokim an tuah ruangah ka tuah an ti, hrekkhat in in thei cuang lo ding an ti. Cyber bulling cu mi hmuahmuah hmuh ah tuah a si lo tikah prove a harzet `heu. tthangthar tampi lala cu midang in hivek in harsatnak pekmi an um lala ih, thinlunglam harsat le buaibainak nasazet in a tuar phah mi tampi an um.

Thangthar tampi cu, hivek in thil a cang tikah, an nu le pa an simngam lonak san tampi a um. Cu pawl cu;

1) Nu le pa an sim pang le computer le a dang an thilri (electronic device) hmanmi laaksak ding an phang.

2) Tuah thei ciamco dingmi an nei an zum lo.

3) Thil ttha lo sinsin mi a suak ding an phang.

Nauhak le tthangthar cyber bullying a tuartu pawl theih theinak sign pawl cu;

1) Mahte lawngih um an hmang

2) Rualpi thawn caan malte lawng an hmang

3) Tlawng ttha te’n an kai paih lo

4) Riahsia le thinnauzet in an lang

5) Mah le mah that aw ding tivek an sim hmang

6) Internet sung le atak ah, mi biak duh lo mi an nei ttheu

7) Computer an tham hnu asilole phone thawn biak aw ttheh vek ciah tivek ah thinheng in an um.

Mi va siatsuahtu pawl ih signs pawl;

1) Computer an hman laifang ah an kiang ah feh le screen an thlengh lohli asilole program kha an khar ttheh

2) Online account hmin dangdang in an hmang/an tuah.

3) Technology device pakhatkhat hmanter lo asile an thinheng.

A tlunlam ih sign pawl na hmu asile:

1) Ca ttha lo pawl kha ca khirh saal lo dingin fial ding

2) Ca ttha lo le zuk `ha lo an kuatmi pawl “prove” thei dingah ret `ha ding

3) Ca ttha lo ngantu kha hminsin tum ding (hmin dangdang hmang in ngan khal sehla, hivek pawl hawl daan a um)

4) A ttul vekin palik le tlawnginn ih ttuanvo neitu pawl theihter ding.

Kan tuah theimi:

1) Fa le pawl hnenah cyber bullying um zia sim fiang ding

2) Inn ah fiangte’n sim ih, ziangsi cyber bullying le ziangsi a si lo timi sim fiang ding

3) A tthat lonak pawl sim fiang ding

4) Thutakzet in laak dingih ziangti’n an um ti kha `ha te’n zoh fiang thiam ding

5) A ttul daan in zohfel thiam dingih, mi dang ron an `ul le ron ding

6) An tlawngkainak ih `uanvo neitu kha a ttul daan vekin theihter ding

7) An tlawngkainak ah, ziangvek policy an nei ti kha thei fiang ding

8) Inn ih computer hmanmi kha mi tlangpi ih hmuh theihnak ah ret ding

9) Online ah ziang an tuah timi sut ringring ding

10) Online ih an tuahmi pawl zoh saal tum ringring ding

11) Website an duhmi zoh thei lonak tuah sak ding

Sexting:

Himi hi Laittong in cu cell phone ih nu le pa sinak le zahmawh lam zuk, ca kuat awknak ti’n a fiangbik ding. Zuk le cafang in lawng si loin, tulai cu cell phone khal in video laak thei a si tikah, mitlangpi zoh `ha lo le mawi lomi nu le pa um tlanglai tivek tiang kuat aw a si tikah, mitampi in santhar tiluang ruangih an buaipi reromi pakhat a si ve.

USA ah tlawnginn khan pakhat ih tlawngta 25 ummi thusutnak an nei ih a tanglam vekin an sim. 20% tthangthar (teens) pawl in lawngfangkheh culole taksa hrek hnipuan hruk lomi zuk pawl cu text in kan kuat aw an ti. 39% in nu le pa pawl awknak cafang mawi lo kan kuat aw an ti. 48% in hivek ca ttha lo kan ngah ringring ti a si. Sexting ti cu tulai santhar ttongin “na taa in hmuh awla ka taa ka lo hmuh ve ding” tinak a si.

Ziangruangah an tuah timi thusutnak cu, a tanglam vek a si:

1) 51% nunau le 18% mipa tthangthar cun, an fala, tlangval ruangah an ti.

2) 23% nunau le 24% mipa tthangthar cun rualpi pawl ih fial ruangah an ti.

3) 66% nunau le 60% mipa tthangthar cun nomnak le umharphen ah kan tuah an ti.

4) 52% nu tthangthar pawl cun, an tlangval pawl laksawng (sexy present) hrangah an ti.

5) 44% nu le pa veve cun hivek zuk le caa kan ngah ruangah kan kuat sawng an ti.

A tlunlam thil tuahmi pawl in duh um lozet thil a rak suak/cangter thei ruangah

1) Nu le pa in fa le pawl cyberspace ah ziang an tuah ti kan sut/theihpi a ttul. Kum nauhaktuk lai ih nu le pa pawl awknak tuah ttha lo zia le online le cell phone ah ziang an hmang ti relpi ringring a ttul.

2) Zo thawn pehtlaih awknak an nei timi kha theih a ttul. Zo pawl thawn an kom aw ih, ziangvek minung pawl thawn online le phone in an biak aw ti theih tum ding.

3) Santhar thilri thawn pehtlaih awknak (electronic communication) an hman mi kha cinri/bikhiah (limit) tuah sak thiam ding. Inn ah an um asile cell phone kha na kiangah retter aw. Laptop khal zaan an it zik ah an room sungah retter lo ding.

4) Na fa le kha mizapi hmuh theih ah ziangvek zuk online ah an ret ti theih tum ding. Na fa le in My space, Face book asilole online ih retmi an nei le check sak ringring ding.

5) Felfai te’n cin le daan nei in electronic device pawl hman zirh ding.

A tthangsotuk zomi san ih um kan si ruangah, vei tampi cu nu le pa kum upa deuh le ca thiamtuk lem lo mi pawl cun, fa le ziang an tuah ti hman hi theih ban a si nawn lo bakah, fa le in duhtawk in nu le pa an bum san a si. Curungah, kannih Pathian nung a biakmi le Laimi ti aw pawl cun, kan umnak ram ih zirin kan community le biakinn tinkim ah himi thuhla hi zirh awk kan tum cio pei. Culo cun, santhar thil le ri (technology device) pawl in kan tthangthar nonawn, fa le pawl thluak le nuncan ziaza a siatsuah ttheh ding a phan umtuk. A ttha zawngin hman thiam kan tum cio sawn pei.

Zohtthimmi source pawl:

-http://www.athinline.org

-http://www.netsmartz.org

-http://www.ncpc.org

-http://www.stopcyberbullying.org

-http://www.stopbullyingnow.hrsa.gov

-http://www.cdc.gov

Hminsin: LCF Malaysia “Hruaitu Magazine” 2010 taa laakmi a si.

%d bloggers like this: