SALUROP – Cikcawlom

Zan khat cu kan ih zawngah ka nau in a phone hla a play ih it phah cun kan ngai. Tawkfangah Salai Cungpi ih SALUROP a ra suak, a netnakah “THUI” ti’n ih a cem lualli. Sinan ka thinlungah a cem ve mei thei lo, ni dang khalah ka ngai ttheu nan thinhrip nung deuh nawnin ka rak ngai liam ttheu men. Tui tum cu ka thinlungah ziangsimaw hin i kam. Kan pipu san le tui’ kan san karlak ahkhin SALUROP hin thu tampi a relin ka thei.

A hlathluk le music cu mawi ka ti zet, keimah hi music khalah rock lam ngaina deuh ka siih a rock style te hi ka duh nasa. Tui ttum ahcun a hla thu sawn hi keimai bulpak ruahdan lo hlawm ve ka duh, simlam umpawng par bangin. Sinan a tlai hrih cuangin ka thei lo.

Khuahlan kan pupa pawl cu conlam ding le sakap ding an tumtah,

Cui hlei tumtah dang um lo, in roh tak an fahniang, salurop.

Hlan kan pupa pawl ngai kha aw, a tthangso rero mi ram dang le hnam dang thawn suak-lut pehtlaihaw ih fimthiamnak hlawmawk, zirhawk ti um loin anmah ten tlangsang hmun kerkawmah khua an rak sa ih nunnak hrang lo ttuan le sakah, a tumtah sangbik cu khuangcawi conlam, cucu an vawrtawp si mai. Khuangcawi ih conglam thei le sangka tlun pharih sa lu tar tam thei pawl cu mi zah kai, upat ttihzahmi an rak si. Nu le pai’ salurop pawl cu falei’ hrangah hmaihngalnak a rak si fawn.

Asile tui kan sanah teh kan khuangcawi conlam le kan sa luruh ro pawl cu ziang an si ke? Sumpai lennak kan hawlmi le fimthiamnak le zirnak pawl hi an si lo sawm! Kan pupa pawl an sanih dinhmun sangbik conglam thei dingin an rak zuam tento. Kannih teh kan sanih dinhmun sangbik ziangha kan tumtah ih ka zuam ve le? Conlam san kan si nawn lo, IT san kan si zo sikhawh….

Kan pipu conlam duh ah, sun zan ti lo’n an tuan ram an tawi,

An ngah suak an tumtahmi, in rohtak an fahniang, salurop,

Kan pipu cun conglam thei dingin sun zan ti lo’n he le heh ti’n an rak tuan. Ram an tawih tikah sa tlun ding um lo hnak cun a zarh (kar) tel khal an riak mai. Cu lawngah hmin thatnak le saluro falei’ hrangah ro an tan thei ding. Tui san kan nih teh kan fale hrang saluro (degree, fimthiamnak, pumcawmnak,…) rottha tanta thei dingah ziangtluk kan zuam? Sum kan hun tuahih vawi hnihkhat kan hlawhsam ruangah kan beidong mei si lo maw? Zirnak le fimthiamnak kan hun hawlih rual kan ban lo tikah dung kan sip mei si lo maw? Thil pakhat ngahsuak dingah ziang tluk thasuah can pein kan zuam tui san Laimi pawl?

Aw fahniang, na pai ro cu zoh hnik, na bang hlumtu lurop phuntling

Zoh sal hnik ttha a ti maw? Na hrangah tthahnem lo salurop, Awk, salurop.

Kan pupa pawlih in roh tami salurop PHUNTLING khi hun zoh hnik ngai kung uh. Vawi hnih tal kan zoh sal ahcun a tthathnemnak kan thei ding. Ngai ngai ahcun in rohmi cun saluruh ro phenih khai salu ngah dingih a ttuan zuamnak le an tairialnak thinlung le nunphung khi si sawn lo maw? Cui hleiah salu phunkhat lawng si lo, phun tling an si kha. Khawsia le ttihnung sahrang lakah sahrang lu ngah theitu tu Pacangttha ngaingai an rak si. Tui sanih ka pacangttha teh zo vek an si ke? Ruah thiamnak nei cun kan ruat thei thluh ko ding. Kan pupa pawlin in roh tami sawn cu an nun phung,  an tumtahmi parih an tumruhnak le ttuanzuamnak le an diknak le felnak thinlung khi a si sawn ding nan, an tesinfa pawl cun kan tthelh riai a bang. Cui thinlung bu le nunphung cu tui san kan Lai mipi thinlung ihsin an pial hlo thluh thlang si lo maw? Kawl cozah uknak Paradigm Shift ahhin Laimi hla tuk kan rak kat man pang kei! Kawl pawl vekmen ih kan pupai in roh tami an nunphung le lungput dik in format sak sal hi nan siang sawm???!!! Kan pipu sanah tla kha cun inn hngaktu um lo ih lo an feh thluh ding tla cun kangmei cakkhai ttihah an bukkhum rothil ttha pawl hmuah hmuah inn lengah an suah thluh lam si kha! Khualtlawnnak lamzin ih thilri an phurh cawk lo hmanah zin sir lole cawlhhmun ah simaw an tanih ni dangah an ra la sal men ttheu. Tui sanah Laimi vialte umnak hmanah cu vek pawl kan tuah ngam nawn kem?? Ti ci a sin awn lo, Laimi kan thinlung a dang thluh zo. Kan pipu ih in roh tami thinlung kan nei nawn lo. A poi tuk.

Thu kan kat hla vivo pang ding, kan thu ruahawk cemter men kunguh, ca a sau tuk cun ttha lo ding. Kan hla ah lut sal sehla, a netnakih “THUI” timite khan I ruahbet ter. Tenum le luaksuakza cil kan phui dingmi cu kan pipu in roh tami salurop si sawn loin tui san Laimi kan nundan tenum bawrhhlawh le kan lungput bal (thianghlim lo) le siava, kan miphun khur ttawt sungih in dirthlatu pawl hi an si felfai sawn lo mw?

Bulpak mi pakhat cio in kan zuam kei uh, miphun le ram tthangso ding cun innsang tinin kan zuam a ttul vekin innsang tthngso ding cun innsangih bulpak mi pakhat cio in kan zuam a ttu a si kha…

Santhar mino ziang na tum, tesin fahniang ro ttha ding ziang na tuah?

Na ngah suah hlan lo zuam aw, tesin fahniang ro ttha dingin zuam aw.

(Visited 101 times, 1 visits today)
%d bloggers like this: