Sabek le Cumkheng Santhar Tlan Zuamawknak – Salai Ayete (Vankau)

Sabek le cumkheng tlan zuamawk thu hi kan sentet lai ihsin zo cio in kan rak thei in kan zirdah cio ding nan, tui kan santiluan thawn milaw in an santhar tlan zuamawknak thawn zirkhawm ding thar, kan neih mi tete run tarlang sehla.

A Voikhatnak

Hi zuamawknak cu kan theihcia a si ruangah run simfiang nawn lo mai sehla. Tlan a cak zettu, Sabek a itthah ruangah ti hniamhno ten hmai a nawr tentotu Cumkheng cun a rak neh ta riai.

Hi tawkih kan zir dingmi cu “Nuamhnai te’n kan zuam tento asile kan hmuitin tumtah kan hlawhtling thei” ti hi a si.

A Voihnihnak

A voikhat zuamawknak ih a sungtu, Sabek cun azet ruangah a hlawhtlinglo ti theiaw in Cumkheng hnenah tlan zuamawsal ding cun a vung sawm. A voikhat zuamawknak ih a nehtu, Cumkheng khal cun mizepa Sabek cu awlai ten ka nehsal mai ding ti’n a rak lungkimpi mai.Sabek cun cawl huahhi le it mai loin nasatakin le a tha neih suah tahratin a tlan ruangah Cumkheng cu awlai ten a neh mai.

Hi tawkih kan zir dingmi cu “Thungaithlak suah le ti hruthro ih a zuamtu cun nuamhnai te’n ti tento ih a zuamtu a neh thei” ti hi a si.

A Voithumnak

Sabek bangih rangzet le cakzet ih tlan theilotu, Cumkheng cun ahlan vekin a zuamsal le ziangtilam khalin a nehsal thei nawn lo ding ti a theiaw ngah. Cuticun, Sabek inn ihsin pengkhat hlatnak hmun ih a ummi, amai inn thlen tiang tlan zuamawsal ding cun Sabek cu a vung sawm ve. Sabek khal cun mah le mah zumaw zet cun a rak lungkimpi mai. Sabek cu Cumkheng ih inn lam pan in cakzet cun a tlan lala. Asinan, rinloparal ah tiva tumpi pakhat a vun hmuh cun a cawl dukdi. Tivaral ih Cumkheng  inn cu a hun hmuban nan ziangtin tiva ka kan thei ding ti, tivakap ah cawlphah in a ruat cuahco. Tingaihnak a thei nawn ta lo. Culaifangah, Cumkheng cun Sabek vun tan tahratin le tivapi cu vun leuh tahratin a hmuitin a hlensuah ta riai. Sabek a sung lala!

Hi tawkih kan zir dingmi cu “Kan talent, kan thiltitheinak kan theih ding a thupi. Cun, cui kan thiltitheinak cu a tikcu teih a hmandan kan thiam a thupi fawn

A Voilinak

Sabek le Cumkheng cun zo in ziangvekin thiltitheinak a nei ti fiangten an theithiam veve thlang. Tuitum cu Sabek inn ihsin Cumkheng inn thlen tiang kan pahnih ten kan tlan tlang le can ziangmawtawk sungah kan thleng tlang thei ding ti’n zuamaw ding cun an lungkim veve. Cuticun, Sabek cun tiva thlen tiang Cumkheng cu pawk phah in a tlan. Tiva an thlen veten, Cumkheng cun Sabek cu a liang parah phur phah in tiva cu a kan ve. Curuangah, an pahnih ten an hmuitin tumtah cu rangzet le cakzet in can reilo te sungah an hlensuah thei mai.

Hi tawkih kan zir dingmi cu “Mipakhat fingfing in kanmai tawkten thiltitheinak kan neih cio hi a tha. Asinan, pawlkawm pakhat neihkhawm in le kutkaiaw derhdo ten kan zuamkhawm lo asiah cun kan thiltitheinak famkim ten kan hmangsuak thei lo. Ziangruangah ti le, kanmah ten kan tuahsuak theilomi thil hrekkhat hi, midang cun an tuahsuak thei ruangah a si” ti hi a si.

Hminsin: Nyi Nyi (Thanlwin) ih nganmi, The Voice Weekly Journal sungih ta a remdan in lehmi a si

%d bloggers like this: