MI RALTHA – Hniangsinpa

Khawlak ah zilthli fim dawngin ka suak ih, park ih tonak an tuahmi ahcun ka to. Ka ruahnak ka kawm rero laiah, ka kiangah kum upa zet pakhat a rung to ve ih, ka hmeltheih a si lo ruangah biak khal ka rak tum lem lo nan, amah sawn in, “Na thuruah a va khun awm ha? Cu lawmmam ih thuruah cu!” tiah i rak be hmaisa ih, kei khalin, “Ziang dang a si lo, mi raltha an tahnak hi ziang a si pei? tiah ka ruat” tiin ka rak sawn. Anih cun, “Tahnak a dangdang a um ko ding nan, keiih ka tah mi cu, harsatnak le buainak tlansan lo ih, pahtlang ngamtu pawl hi mi raltha ka ti mi cu an si” tiah i sim.

In lamih ka tlun hnu ah, cui putar pai thu i simmi cun ka thinlung i luah zet ih, a si thei ding khalah ka ruat. Mi hrekkhat cun tumtahmi le tuahsuah duhmi an nei ko ih, hmansehla buainak/harsatnak mallai an vun tawn cun, dung siip in an tlansan sal theu. Cu mi cun, hlawhsamnak lamzin lamah mi a hruai sawn theu ih, anmah le mah mangbang vansang in an um sawn theu. Kan Kristian zirhawknak lawng khal va si ce hlah, ziangkim kan tuah kan tuanah, buainak le harnak cu kan tawng cio ko ding, cumi tlansan lo ih, pahtlang ngamtu cun, hlawhtlinnak an hmu tengteng ding a si.

Ca ngantu pakhat cun, ‘Those who dare to struggle always success’ tiah a rak ngan. Buai le harsatnak ka timi ahhin, a hawl ih va hawl lam ka sim duh mi a si lo, kan tawn tengteng ding mi sawn a si ka sim duh. Mah sawn ih tlin sal lo ruangih thleng mi cun hlawhtlinnak lamzin a ong cuang lo.

Curaungah, minung ih kan hring nun cu, Tuarnak a siih, kan tuarsak ngam pei. Duhdawtnak a siih, kan lang ter ding, thinhengnak a si nan, kan suupaw ding. Manglam vek a si hmanah, kan thang phawk dingih, Challenge a si ruangah, kan pahtlang ngam ding, zalennak a sivek in a hmandan kan zir a tul. Mangbang vansang lamnak ram ah kan um nan, kan hlip thla ding a si. Lungawinak na hmuh mi cu, karhzai ter in, natnak kan tawn canah, beiseinak nung kan nei ding ih, thihnak a thlen canah, nungih um kan zir ding a si. Cumi thawn kan nitin nun kan hmanthiam ahcun, mi raltha le hlawhtling si theinak lamzin a ongaw ding tiah ka ruat.

Kataphuatin vun rel bet sehla, mi ram ah kan um ih, mi hrek cun, ‘Kum upat hnu ah tong thiam a har’ tiah mah le mah dawm khelhaw cia in an um theu. Hmansehla, zirnak in tlai a nei lo an ti mi thawn cun tahthim cun, an ti sual a si thei ding. Ziangah tile, a zirih kan zir paih hnuhnu cun, a rei le rei lo thu ah a thum aw dingih, a thiam ol pawl cun, can reilo ah an thiam thei ding ih , thiam har deuh pawl in can an duh sau deuh ding a si. Cumi can hngak thleng thei lo cu, mi raltha kan ti ngam ding sawm? tiah ka ruat.

Cuvek thotho in, ziang tinkim kan tuahnak ah, a men men (Nominal) zet ih kan tuah ahcun, hlawhtlinak in lamzin a ong thei lo ding ih, tihhrutnak sawn in in tuam ding. Raltha ih kan pahtlang ngam ahcun, ziangtinkim hin kan hmai in on sak dingih, lamzin kau sawn le zawh nuam sawn hmun cu in thlen tengteng ding tiah ka ruat.

A cemnak ih ka sim duh bet mi cu, hrekkhat cun rinsan ding mi an neih ruangih raltha an um theu, hmansehla, midang rinsan ih raltha si hlawhsuah hnakin, mah ih tuahsuah le mai sungsuak cingcing cu a tha in, ei khal a nuam sawn ding. Ka tlangval suah pekah, fala pakhat ka thlun ve ih, mipi hmaiih din ningzah nei zet mi a si. Veikhat cu kan pahnih in hlasak dingah in voh. A ngam lo lawk nan, a hnu ah a ngam sal ih, hmansehla a tikcu a hung thleng ih, mipi hmaiih kan vun din ngaingai ahcun a sak suak ngam lo, nan i hun zoh ih, cumin hnu cun ring zet in a sak suak thei. Amah hrimhrim kha ka nautat a si lo ih, ka sim duh sawn mi cu, midang zoh ih ralthat suah hi a tha bik lo, mah ihsin suakmi ralthat nak neih a sunglawi ti ka sim duh a si.

%d bloggers like this: