KAN TLUNG PEI

KAN TLUNG PEI

Kianghrol/Klirlungz

Pathian in hnattuanlotu a bawm dah kel lo.
Sophocle (c. 496-406 BC)

Laiking pinu pakhat in sai (vui) umnak kiangah tii a ti ih (anmai’ danten) a tlanhloh san men. A rei hlanah laiking fate an rung keuhsuak. Cutikah anmah le anmah zo, ziang kan si ti an theiaw lo. Kan mei a sau, kan vun a ttial hngiarhngiar fawn saicangpi kan si ko ding an ti ih an uangaw zet. Culaifangah nauhakpate in, “Aize! Laiking fate pawl khi, kan sai pei uh,” a hun ti. Cuveten laiking an si kha an theiaw ih ningttih tawsupin an tlan ciamco. Innsang ih thupitzia hi!

Khristian innsang ‘cawntlak nun’ a neitu kan ti mi khi phunhnam hlo rak si ta sehla Pathian a lungawi kem? Thlalang na zoh laiah nangmah si l o’n caw le naa rung lang ruairo sehla na lung a awi kem? “Miphun a hlo, ziang sulhnu hman a taang lo. San thunthu khalin a phorhsuaksak thei lo. Hipawl ih bulhrampi cu miphun pakhat si tlak an si lo ruangah a si” tin Rudyard Kipling (1865-1936).

Si ko, ram pakhat ih hlawnthilri diktak cu sui le ngun, sum le pai si lo’n, a ramsungmipawl ih ralthatnak, thupom le nuncan ziaza a sisawn.  Innsang hi kan nundan sersuahnak hmunpi a si. Kan sinak, kan phunhnam a hloh hmaisabiknak khal innsang lungput (thupom) ah a si theu. Na sungkhat unau piangtharlopawl tanta in ramthim ah feh awla teh? Mai unau hman duhdawtlotu cun a hmuh lo mi Pathian cu a duhdawt thei kem? (Missionary thlah lo ding tinak cu a si lo). “Zianghrangah ka nun ka pe ding ti hman theifianglotu cu nungtlak a si lo” (Martin Luther King, 1929-69).

America ramsung ral (civil war) buai laiah ralkap pakhat in Abraham Lincoln kha, “President, Pathian kan lamih a ttan cu na zum ko ti aw?” a ti tikah, Lincoln cun, “Pathian cu kan lamah a ttang cia, kanmah sawn hi Pathian lamah kan ttang maw ti kha a thupi sawn,” a rak ti. Kan suahthlak ihsin Laimi kan si cia, Laittong (Lai tongue) kan hman le hman lo, Laimi vekih kan um le um lo kha a thupi sawn ti khalin a ruah theih ding. “Kan ram in ziang in tuahsak ding ti si lo’n, kan ram hrangah ziang ka tuah ding ti kha ruat sawn uh” (John F. Kennedy, 1917-63).

Jesuh in a sungah khawsia tampi um mi pa khawsia a dawisuaksak tikah, cu pa in, “Bawipa, na fehnak kipah ka lo thlun ding,” tin a dil ciamco. Asinan Jesuh cun, “Inn ah va tlung awla, Pathian in na hrangih a tuah mi hi va sim aw,” a ti sawn (Luk. 8:38-39). Kannih teh ….. nn ah kan tlung theu maw???

N.B: Lailun Thuthang, December 2008 ih ta lak mi a si.

%d bloggers like this: