Kan Falam A Rop Maw, Ziangruangah? – Prof. Dr. Cumkheng

Kan Falam khawpi a rop maw?

Kei cun rop ka ti ding. Ziangruangah ti le?

Kan thlawh nawn lo mi kan lo thlam te khi kum hnihthum a rung rei cun a rop mai. A umzia cu, cuih kan lo hlun te cu kan thlo nawn loih, kan lo thlam te khal remtu nei nawn lo’n a rung rop supso mai. A hlumtu milai um in, hnawmbal phiat faitu um in, remthatu um ringring sehla ol-ai ten a rop mai ding maw? Sunhrul in a ei hluahhlo thei mai ding maw? Leiram tha hawl in lo ramtha va thlawh le a tul ringring.

Tui sun, Falam khaw sungih a piang mi Falam mi a ti-awtu Chinmi khawvel huap in mi paziat kan um? Falam khaw sungah mi paziat kan tanglai? Santiluan an timi, upa pawl ih khihhmuh mi lamzin dawi le thlun in mi paziat in an suahsan hrih ding? Hlumtu nei lo khua pakhat cu zo in a duh vekin a remtha thei ding? Nitin zalen lo takin laihlumtu pawl khin ziangtik tiangso an kilkhawi in an remthat thei nawn ding?

Asile, ziangruangbik ah kan laicin semnak kan khua kan ram suahsan in hmun dang le ram dang ah maw, asilole kawl rawn lam ah maw, lai hlumtu um nawn lo ding khawp ih kan tlanhloh thluh, kan vakvai thluh? Kawl rawn, Mizoram, Malaysia le Amerika tiangih Chin khawpi kan din tum rero hi teh Cung Pathian in Isreal miphun vekin RAM ka lo pe ding ti’n in tiamkam ruangah maw?

Milai cu kan suahthlak le veten, nui’ hnawiti kan hal. Cucu, kan tulmi Basic Needs a si. Kan lei tisa nunnak ah milai in kan tulbik mi pawl cu:(1) Ei-in (2) Sinfen (3) Inn cuisin fimthiannak, nunnomnak le leitlun thansohnak phunphun kan tul vivo. A pakhatnak a thupibik ih kan mamawh mi ei-in khopkham kan neih lo ruangah ei-in hawl in kan vak kan vai rero a si lo maw?

Ziangruangah ei-in khopkham kan nei lo? Kan ram rori ah leisung thil mankhung kan nei ve lo nan, kawlrampi ih natural resources liangluang kan tep ban ve maw? Hi tawk zawn ah, kan theih dingih ka duhmi cu Pathian in, in pekmi kan ram neihsun cu chinram lawng hi a si.

Cui ram cu kan pupa pawl in fei le nam thawn an ralthiamnak thawn an rak kilkhawi ruangah tui sun ah ram nei miphun pakhat si’n khawvel miphun pakhat kan si theinak a si ti hi a si. Cun, in uktu cu kawl cozah an siih, an si ringring lai fawn. Hnangam daihnak neih hmaisa lo’n taimak suah ih mahte tohdelh awk teh a theih maw?

Cozahpi ih ngaihsak lo mi ram le miphun cun ziangtin a thangso thei ding? Zalennak neih lo’n mi kuthnuai ah ziangtin kan ram cu kan kilkhawi thei ding? Kan unau Chin pawl thawn teh cozah ih thansohnak Project in tuahsak mi parah kan lungrual in kan tuan tlang derhdo dah maw?Ei-in khopkham a tumaw thei lo mi khua pakhat in ziangruangah a rop lo ding?

Ram cangkang ah duhduh ih khawsa thei kan upa hmaisa pawl teh Falam ah kirsal in kampani tivek teh paziat in dinsak zo? Kan mithiamsang pawl ih fimthiamnak teh Falam sehvel khawte ih um kan unau pawl hnen thlen tiang kan zirhsal dah maw?

Cozah siannak tello in mi paziat kan tlung kirsal thei ding? Miphunpi sinak cuh in miphun tenau cimit thluh dingih miuk cozah kuthnuai ah kannih miphun, mipum titham lo te cun, ziangtin kan khua rop lo dingin kan kilkhawi thei ding? Kan chin miphun huap in Plan tumpi nei in kaihruaitu paziat kan nei zo? Ziangruangah Falam a rop lo sapbai ding?

(Visited 107 times, 1 visits today)
%d bloggers like this: