KA RAM UMDAN – Pu No Than Kap

KA RAM UMDAN

(Saicangpi pahnih)

By- Pu No Than Kap

2010 November Election ah Party din in, hrilawknak ih telve kan tum laiah ramsung le ramleng Chin mipi hnenin thusutnak phunphun a suak. Cutin, “Ziangruangah Election ah telve kan tum” timi ka rak ngan dah. Hi thu thotho hi Hakha unau lam khalin vei thum lai in sut ih hrilawknak ih lut ve ka duhnak san cu, “Thlengawknak hmuh ka duh tuk ruangah le cui thlengawknak ah keimah rori telve ka duh ruangah a si (Because of my burning desire to see change and to take part in that process)” tiin ka sim hai. Chinlandguardian ah Mirang in an suah hngehnge. A siartu khal nan um ko ding.

Khalai ih sim rero mi zum thei loin, “hrilawknak a um taktak lo ding, ralkappawl zum ngam ding an si lo, bumawknak men a si, thuneihnak khal hril mi hnenah an pe lamlam lo ding, tvk” in a phunphun in kan upa tampi le kan MP hlun pawl tiangin an hmuhdan an simsuak ve. Zum thei lonak ruangah ramsung ih MP cuhtu ding kan hawl tik khalah kan harsat phah zet.

Tui ni ah ziang a ra thleng taktak ti cu kan mit in hmuh theih a si. Khatlamah, thlengawknak cu saduhthah a si hrih lo.

Rak ruah ban loin Danhrampi (constitution) duh lo ruangih 2010 hrilawknak ih tel duh lo, party registration khal tuah duh lo NLD khalin, tu ahcun register tuah in by-election khalah telve a tum thlang.  NLD hin 2015 hrilawknak ah nehnak co a tum ti cu zapi theih a si. Cutin kan rampi ah Saicangpi dang pakhat a suak thlang!

Pi Suh (ASK) ih politics leh dan khal, kan dung kum kul lai hnakin, a fimthiam, a takih thil umtudan a hmu thiam, can remcang a hmuh mi pohpoh a kai fuh thiam. Thimnakah, rampi pakhat ah thukhat kengin hngetkhoh zet ih ding Army (ralkap), asilole Labours Union, tivek hmanthiam ih  lungawiter thiam lo a si le, zovek hotu hrang khalah thuneihnak neih rei a theih ti a zirsuak. Curuangah, 1990 laiih “ralkap hotupawl cu mipi duh dan in an thu ?hensak a si ding” tivek sim nawn loin, tu ahcun “ralkappawl khal ram duhdawtu an si, kan ?uan tlang thei lonak ding san a um lo” tiin a sim thiam thlang. Election Commission Chairman Tin Aye (ralbawi hlun) rori in, 1990 ih ralkap in thuneihnak NLD hnenih kan pek lonak cu in kaih ih in thah thluh kan phang rori a si ko, tiin a sim.  Pi ASK hi tuvek tlukin 1990 laiah rak fimthiam zo sehla aw! ka ti rero theu.

Mipi tam sawnin, tunaite ihsin ziangah tui kan Cozah in Tlangparmi ralthuam kai pawl thawn biakawknak neiin, Naypidaw ah 2nd Pinlung Conference hnakih nasa kan nei ding ti tiangin an sim, ti mi hi kan ruat cio ka zum. A san dangdang lakah, a fiang zet mi pakhat cu, kum 60 leng lo ramsung buainak reh tertu le kumkhaw daih remnak le daihnak thlentu si duh ruangah a si. Himi remnak le daihnak thlentu cu ralkap lole SPDC an si ahcun, tu hlan sung hmuah leitlun le ram mipi ih hmuhsualnak cu a rehter thei thluh lo hmanah, nasaten a rehter thei ding ti ruah ban a si. Culawng a silo, remnak le daihnak thlentu cu 2015 election khalah mipi in an hnawng lo ding ti rel theih a si. Hithu ah, Pi ASK lamin, 2nd Pinlung Conference neih a ?ul thu a rak ausuahpi hmaisak fawn tikah, zo sawn hmaisa deuh kan si ding ti ih zuamawk cu fim thlak zet a si. Rampi kumkhaw ?hatnak hawlin Saicangpi pahnih, NLD le SPDC in, tlan zuamawknak thianghlim an thawk thlang a si bik.

SPDC hotu hlun ralbawi pakhat cun, 2010 election lai ah kannih cu 80% cak dingin kan ruahman cia, asinan 2015 election ah cuvek a um nawn lo ding, tiin a sim tlunah, Election Commission Chairman thar khal in, zalen zet “free and fair” election neih a si ding thu a simbet ruangah, 2015 lam pan ih Saicangpi pahnih tlanzuamawknak cu zoh nuam ngaingai a si ding. Tlanzuamawknak zoh nuamter sinsintu ah “Lairam Secang” a telve ding maw ti cu, Lairam tlangsang ah Saicangpi an kaiso veve ding maw, ti mi parah a ?humaw ding. CPP EC member Pu Manga cun, Laitlang ah Secang tlukin Saicangpi an vak sukso thei zik lo! tiin a hmuh dan a sim.

NTK (peh lai ding).

%d bloggers like this: