Ca siar Ngainatu Miphun

Ta Hniang Ùk

Judah pawl hi ca siar teima zet miphun an si. Israel ramsung ah kum 14 mi tlunlam pawlin cawhrual in thlakhat ah cabu pakhat an siarsuak ti a si.

Israel ram ah mikip deuh thawin calai bük luhnak card (library card) an nei cio. An nauhak pawl lungfim cin an hung si le veten an nu le in ca siar dingin an forhfial theu. Cabu sungah fimnak a phunphun lak ding a um thu, sui le lungvar hnak ih khung sawn a si thu, cui fimnak cu mi ih ruk le siatsuah theih a si lo thu pawl cu an fanau pawl an zirh theu.

Judah pawl cu leitlun ih cathiam lo zohman an um lo an timi miphun an si. An kutdawh pawl tiang hmanin cabu thawn hlatawk an siang lo ti a si.

Ramtamhuap casiar zat (rate) an zingzoinak vek asile, Korea mi pawl ih casiar zat cu cawhrualin kum khat ah mipakhat hin bu 11 an siar ih, French mi pawl in bu 8.4, Japan pawl cun 8.5 tiah an tarlang.

Kum tinten casiar rate dinhmun sangbik a cotu cu Judah miphun pawl hi an si. A tlangpi thuin mi pakhatin cabu 64 tiang an siar hai ti a si. Curuangah leitlun ih upat mi miphun le mi hlawhtling tampi an suah phah.

Kannih Myanmar ramsung ahcun phunsang tlawng kai tiaw ve cin pawl hman hin kum khat ah kan zirlai bu (text book) hman siarsuak lo kan tam vio men ding. Lai miphun hizat kan um hman hi cabu copy 500 zuarsuah ding cu thil harsa tak a si lai. Kan zumnak hrampi Bible hman kan siar lo tuk ih mi thusim tapoh kan rak lung luailo vivo hi kan mawh lo maw kan mawh tuk lam sawn ha?

German ramsung lamlak ih mi veivak pawl, mi kharvar zet suakthuan pawl in siseh, nuamten a fehtu kum upa lam pawl in siseh, pianmawi le mi hmel tha zetzet pawl le an zungkai form hruk pawl hmuahhmuah khin an kut ah lole a zak hram ah cepin cabu an keng fekfek theu. Curuangah German pawl ih kutsuak thilri cu leitlun in an upat hlawh zetmi a si. Cui an thilri cu an fimnak le thuamthil ihsin a ra. Cui an thuamthil (technology) hrampi cu ca an siarnak ih rahsuah a si.

Casiar hi a mankhung zetmi thil hrangih man olten hram kan phum theimi pakhat a si. Kan vei khat phone top-up man zatin cangantu ih fimnak thuk zetzet kum tam hram a phummi kan lei thei a si.

Ca siarnak hrang na can pe aw. Na man can ah ca siar theu aw. Cabu sungah thil sunglawi tampi a phum aw a si. Ngaingai ten vancung ram hi a rak um ngaingai a si ahcun cumi cu calai buk vekih hmun duhum zet cu a si ko ding.

Hram: Nine Nine Sani ih စာဖတ္တဲ့လူမ်ိဳး timi a remcang dan ih lehmi a si.

(Visited 1 times, 1 visits today)
%d bloggers like this: