A LANGDAN VEK A SI THLUH LO

Milai zaten kan hmuhdan vekih kan sim ringring mi “ni a suak, ni a tla” ti mi hi kan mit ih kan hmuhdan vekih kan sim mi a si nan a ngaingai ah thudik a si lo.

Ni a suak lo, ni a tla dah lo, kan umnak leilung sawn hin ni a hel kual rero ruangah ni hi suak le tla rero vekin kan hmuh ih kan ruat sawn mi a si.

Leitlun thuanthu kan sim rero mi khal hi a theitu le a hmutu le a ngantu pawlih hmuhdan le theihdan ih ngan mi le sim mi a tam sawnih, thudik an si thluh lo. Curuangah leitlun ralbawi le uktu hminthang French siangpahrang Napoleon cun “Thuanthu timi cu a si tiih pawm tlang mi phuah cawp thu men a si (history is a fable agreed upon)” a rak ti dah.

Zovek mi ropi nuntudan le thuhla khal a sinak diktak in an lehhnu ah run theih le run ret thluh an si lo. A zumtuin kan duhdan cio in kan zum a si menih mah le zumdan cio cu a dikbik in kan ret a si men. Thimnakah Pathian fapa Jesu Khrih rori hman kannih a dungthluntu Khristianpawl zumdan le pawmdan cu a zumlotupawl hmuhdan le pawmdan thaw cun lei le van vek a si, an bangaw lo lawlaw.

Hi pa cu a niam a sang, hi nu cu a mawi a hmelsia kan timi khal hi a hmutu ih hmuhdan men a si. Sinak diktak a si lo. Ziangahtile a niam kan timi khi a hnakih niam mi pakhat thawn kan zoh tlang ahcun mi sang ah a cang thei thotho.

Hmelsia kan ti mi khal a hnakih se sin lak ahcun hmel tha a si thotho. Mawi zetih kan hmuh mi khal midang mit ahcun hmel duhnung lo zet a si thei thotho. Curuangah milaipawl ih kan hmuhdan le ruahdan tam sawn cu mai dunglam bawp hmuh tum rero nan hmu thei lo vek kan si.

Kum zabi 20-nakih mifimbik ti mi Judah hnam Albert Einstein cun, “a thawkpek ih umze nei lo bang mi thil lawng thutakten buaipi tlak a si” a rak ti dah.

A sim duh mi cu,_ milaipawl in thil tam sawn sinak diktak cu kan hmuh pek le kan theih pek ahcun umze nei lo, thil dik lo ah kan ruat thluh… asinan cuvek thil cu thungai thuten buaipi tlak an rak si sawnih cutin vun hliakhlai hnu lawngah kan rak ruah le hmuh vek a si lozia kan thei suak sal, a tinak a si.

Tulaiah Falam pawlin kan buaipi theu mi thu tete khalah a langdan men lawng pawnlang zetih hmutu le zumtu hrangah bawp thak hiat a cu zo. Ka hawi ku khaw ka ku ve titupawl hrang khalah kan hawi le hnakin kan ku ring theu pang maw ti cal dawmin ruat tlak a si.

By- NTK

%d bloggers like this: