Falam Times

Falam Times Chief Editor USA ah feh

Salai Francis Lal Uk hi 2009 December thla ih sin  FPM  Committee ih dil nak el siang lo ten Falam Times ah Chief Editor dinhmun in ttuanvo  in lak sak tu a si. A mah hi Calai lam ih thiam zet a si ruang ah a thuthang ngan mi hi sawisel tu nei lo in fak le lawm hlir a co tu khal a si fawn. Hi vek Calai thiam cu a thlen nak ram tin ah kan mile sa hrangah calai thawi miphun cawi sang vivo tu a si thei nak ding ah FPM cun duhsak nak a hlan a si.

USA a feh zawngih a lungkuai  tui hnenih biazai a tanta mi:

Na hrangah ka feh ding

Ka parih na thinlung

A hngetkhoh ding maw?

A cem ral ding?

I ngai ding mw? I hngilh men ding?

Kei ka thei fianglo..

Asinan keicu

Ka feh ding, na hrangah..

Ka lo hngak ding,

na thlen ding ni,,

Caan rei hmanseh,

Kum khat maw..a reilo tuk

Kum hnih maw…ka lo hngak thei tuk..

Kum nga maw..ka lo hngak thei thotho.

Ziangah tile Na hrangih feh mi ka si ruangah..



Kawlram Thuthang


Ralkap daan suah mi ah Su Kyi Lungawi lo

LND party hruaitu Aung San Su Kyi cun tuikum hrilawk nak ding hrang Ralkap Cozah ih daan suah mi ah a lungawi lo thu a sim. Ralkap cozah in election commissioner minung-17 an mai duh mi an hril ih cu pawl in an duh dan in daan an tuah mi a si ruangah pom theih lo thil thu a si ti thu a sem bet. Tui hlan ih sin Kawlram acozah cun mipi hrilawk nak ding hrang ih daan a tuahmi zalen le thianghlim zet ih neihding a si a ti reronan NLD khaipa bik le Kawlram zalennak ding hrang ih sualtu Suu Kyi tel ding cu a siang nawn ta riai lo.

Hi mi thuah USA state department spokesman P.J. Crowley cun Ralkap pawlih daan thar suah mi cu kan pom thei lo a si tiah a sim. Crowley cun tripartite dialogue ( Ralkap cozah, NLD leh Tlangparmi)  Pawlkom pathum  hi biakawk nak um thei dingin   kan nor so vivo ding tiah a sim bet.

An daan tuahthar mi ah NLD party pawl cu ni 60 sungah hrilawknak ih tel dingin hminkhum awknak  le pek awknak nei dingin an ti. Hitiih cepther zet le zalen lo zetih an ti ruangah NLD party pawlin an tel ding maw tel lo ding ti an rel thei hrih lo.

An daan thar ahcun sakhua nak lam ih hruaitu – phungki pawl le hnatuan upa tiangin khamnak an tuah. Hi hi an daan bulhram panga lak ih pahnihnak an tuahmi a siih a pakhatnak ahcun an mah ralkap miuk lala in electoral commission pawl a ruat in, a hril ding ti a si.

Ramsung NLD office on siang

Kawl Ralkap Kumpinu cun NLD party office cu thenthum tthen ih thenkhat (1/3) cu ong siang an si zo thu NLD upa Nyan Win cun a sim.

Nyan Win cun NLD office hi ram sungah 300 hrawng a um ih cu mi lakah 100 cu on sian a si zo thu a sim bet. NLD office hi 2003, May 30 ih Ralkap tantu pawlin Suu Kyi thah tumih an beih hnu Ralkap a cozah pi ih khar sak thluh a si. Tui tum hmun dang tete ih office on sian a si thu hi Rangoon ih NLD head quarter  ah cozah lam in ziang hman sim theih nak in nei lo tiah a sim bet.

NLD thupuangtu cun, tui‘um thlan awk nak ih tel dingah cun in duh ko in kan thei, a sin hril awk nak ih tel ding cun daan an tuah mi ah Thawngtla lai tel thei lo ti a si tik ah kan hotu Aung San Suu Kyi le hruai tu upa dang pawl an tel thei lo ding, cu ruangah hi mi thu ah cun Suu Kyi le hruai tu dang thawi kan rel khawm ta lo cun thil cang thei a si lo tiah a sim bet.

Ramdang Thuthang

Cherawkan laam in World record tuah

12.03.2010 ah Assam Rifle Lammual bualrawn, Aizawl, Mizoram ah mi 10,736 (nunau&mipa) cu 671goup ah thenthek aw in a rualin minute 8-10 sung cherawkan an lam hai. Hitivekih mipum a tahwngtelin a rualih rua hmangih lam hi leitlunah a tambik lamnak a si tin Guiness Book of World record ah a bik sinak ah a hungkai ve ta riai! AR Lammual hi Aizwl khawpi lai takih um a si. Himi ni ah khal himi cherawkan lam zohtu mipi hi tam zet an si. Himi ni ah LuciaSinigagliesi cu Guiness Book of World record palai pakhat dinhmun ih a hmanpi ih capi mawi zet khal a pek cih a si.

Hitivek deuhih mipi runpi lam hi 2009 ah Cebu khua, Philipines an mipum 7,700 lamin leitlun ih mipum tambik lam record a rak tuah dah zo.

Turkey linghnin ruangah mi-57

Ni-10, Wednesday ah Turkey ram saklam, Elazig province-ah magnitude 6.0 ih cak linghnin hnuah,

cu hnak ih tha caklo deuh in vei 40 tlun a hnin bet sal. Hi linghnin ruangah minung – 57 tlun an thi ih

minung tamzet in hliamhma an pu bet.

Hi tawk linghnin can hi zing 4.32 hrawng a si ih cozah thunei tui sim dan in Turkey ramih ling hnin

hin Basyurt le Okcular khua hi a ti se na sa bik. Hi mi khua pahnih hi nasa tak in a siat suah ih inn

cim hnuai ah mi tampi a nen tang bet a si.

Linghnin ruangih hliam tuar pawl cu cozah hospital ah ret an si Inn tlun ih sin dawpthlak ruanih

tuahmawh aw an si tiah thu nei tun an puang.

Remnak Um Thei lo ding

Palestinian Thu neitu in kan ram sungah Israel in a minungpawl umnak dingah Inn a sak bet tum

vivo ruangah remnak thu reltlang dingcu a ol lo nasa ding tiah a sim.

Israel hin Jerusalem khaw saklam ah Inn 1,600 sakbet a tum thu cu, Middle East ah remnak a thlen

thei nak dingih khualtlawng vivo tu  US Vice president Mr. Joe Biden Israel a thlen hlan te ah a rak

puang suak.  Palestinian palai cun BBC hnenah, Israel thusuah hi hnukdawk sal a si lo ah cun

remnak thu rel ding cu a ol lo ding tiah a sim.

Israel leh Palestinian hruaitu pawl in an remawk nak an tuah nak hi thla-17 nak a si thlang ih hi ti

vekih a feh vivo thei ah cun hmailam ah cun rem nak a um vivo thei ding an zum lai ah Israel in Inn

sak sal dingih thusuah a tuah nak ruangah remawk nak cu a um thei lo ding thu zum a si.

Bangladesh in kawlram buhfai lei tam ding

BangladeshFinance Minister AMA Muhith in 07.03.2010(sun) ih sim danin an ram in kawlram

buhfai metric tones 25,000 lei dingih relcah a si thu a phuang.

Himi buhdfai thiarluhhhna tuanvo latu ding cu Singapore ram ih Indo-Sino Trade Limited a si.

Buhfai man hi tone khatah US$395 a si ding. Food Minister Abdur Razzak ih sim dan in a reihlan ah

buhfai metric tonnes 5 million cu an ramih sengluh cing ding a si. Buhfai thiar suksonak ding lamzin

cu Rakhaine ramih Maungdaw-Teknaf lam in a si ding.

2010 Leitlun Milian Bik Hril Nak

Forbest Magazine in leitlun ih milian bikpawl a zingzoi nak netabik ah Mexico rammi Carlos Slim cu

leitlunih milian bikah a tarlang.  1994 ihsi leitlun milian bikih rak tarlang ringring mi Bill Gates cu  Carlos

Slim hin a hunlan a si. Tu ah cun Bill Gates cu a pahnih nakah a cang.

Nikum ih leitlun sumpai dinhmun a tlaksiat ruang ah, kum hmaisa hnakih  leitlunih  milian dollar Billion 1

neiban minung hi 332 in an tla niam. Niikum ah leitlun ah paisa dollar Billion 1 neiban hi minung 793  um.

Asinan tuikum ah cun paisa dollar Billion 1 nei hi minung 1,011 an umban zo.

Forbes Magazine in leitlun milian 10 a hrilsuak mi  leh an sumpai neihzat leh an ram an hna ttuan mipawl cu

a hnuai lamvek in a tarlang.

1. Carlos Slim  (Mexico) $ 53.5 Billion ( Telecom)

2. Bill Gates     (USA   ) $ 53.3 Billion (Microsoff )

3. Warren Buffett(USA)  $ 47    Billion ( Investment)

4. Mukest Ambania (India)$ 29  Billion (Petrochemicals.Oil and Gas)

5. Lakshmi Mittal    (India) $ 28.7 Billion ( Steel)

6. Lawrence Ellison (USA) $28    Billion  (Oracle)

7  Bernard Arnauht  ( France) $ 27.5 Billion (Luxury Goods)

8. Eike Batista        ( Brazil)  $ 27    Billion (Mining Oil)

9. Amoncio Ortega  ( Spain) $ 25     Billion ( Fashion retail)

10. Karl Albrecht     ( German) $ 23.5  Billion ( Super market)

Leitlun Leknak thuthang

Wayne Rooney: Man U striker Rooney(kum 24) in tui season football lehnakah a zatei goal a thunluh zat cu 30 a si.Tui netabik ih Champions League(wed) hrangih AC Milan club thawi an lehnak ah a vawi 8 nak lu ih a goal nak a si. “Ka calkawlh khal hi lu ih goal thunakah a rak remcang zet a si hi” tin hnihsuah a sai ve. “Egland team captain tuan thei ding tlak ka siin ka thei aw. Ni nikhatah cun England captain ka tuan thei lai ko ding” tiah  ruahsannak a neih thu a sim.

Peter Crouch: England footballer Peter Crouch, 6.7 feet ih sang cu an ramih football lektu lakah mipi cawkphur thei bik le hnihsuah tuah theibiktu ah British Sport in mipi ngai dan a lak hnu ah tlawngkai nili ni ah a phuang a si. Kum 2006 ah England ram aiawhih a lehnakah goal a thun thehah “robot(Cetzuk)” lam a tuahnak ihsin a lar zetmi khal a si.

Lionel Messi: Barcelona forward Messi cu leitlun ih Unicef hnatuan hmalaknak hrangah Ambassador ih hriltlin a si tin tlawngkai nili ni ah Unicef in a phuang a si. A nih hi 2009 FIFA World Player of the Year lawman a rak ngahtu khal a si. Unicef hi leitlun ih nauhak miharsa bawmtu UN hnuai ih um pawlkawm pakhat a si.

Michael Ballack: Germany captain ChelseaFC ih kumkhat dang um bet dingah contract a tuah zo. Himi contract vekin kum 2011 tiang Chelsea FC ah a um lai ding.

Didier Drogba: Chelsea striker le Ivory Coast captain Drogba cu tui tlawngkai nili ni ah klhan African football of the year ah phuan a si. Hitivek lawmman hi kum 2006 ah khal a rak lak dah zo. Himi thu phuan ni hi drogba ih kum 32 kimnak birthday ni a si ve ciah.

Man U le Red Knights buainak

Tui zarh tlawngkai nilai ni ih AC Milan tahwi an lehnak ah Red Knights timi huaihawttu pawlin

puan hngawngawrh, a hring le sui hngawng tial cu Man U fan tam zetin an awrh hai. Himi tumah

AC Milan lamih lek ve tu David Beckham khal cu awrhter a si ve. Himi RK hruaitu pawl hi England

ram ih mi lian neinung zetzet pawl an si. Man U hi kum 2005 ah American mi Glazer family in an

rak lei. Tu ah leiba $ 700 million lai an neih ruangah ManU fan tam zet cu lungawi loz etin an um.

Hitivek ruangah Glazer family in ManU club  hrangah leiba an neihmi duhlonak an lang ter ciamco

hai mi a si. Beckham in interview thusuhnak ah “Kei cu ManU fan ka si. ManU in tluangtei an leh

vivo ka beisei” tiah a ti. Cun, himi RK pawl hi a thurualpi lo thu khal a sim fawn. Man U hi Telekom

Malaysia thawn partnership a tuahtu a si.

(Visited 55 times, 1 visits today)

Comments

comments

3 Comments

  1. Dear Falam Times,

    CT ah Falam Times nan tar ih kan ni hmun dang ih ummipawl khalin thaten’ kan rak siar thei, kan lungawi ee.

    CT ih nan tar tinten’ ka rak siar so khaw.

    Nan ti tha ee.

  2. Nan Website hi ka lo zoh ve theuh ih, tha ka ti tuk chanchin thar a siar ding a tam si.

  3. UN thu lam tam pi siar ding un thei seh la ka duh zet, cu le Malaysia ih lai mi leh kawl ram mi hrim hrim kan hna tuan dan leh har sat nak a tawng pawl, hna tuan ding (job opportunity) pawl tla tar lang thei U la kan that pi na sa ding ka zum. Cu tik ah bawm tul mi tla kan um pang a sih len kan in bawm thei ding ka zum.

Comments

%d bloggers like this: