Chindwin Today Thuthang

 

NASA IHSIN THLAPI PARAH SETZUK AN THLAH DING

American pawl tlunzuang le boruak lam thu neitu NASA ihsin boruak zirthiamsang Engineer pawlqhen khawl minung (setzuk) pakhat cu thlapi parah rocket hmangin thlah an tum thu Nov. 2 ah an than. Hi vekih khawl minung thlahnak ih sumpai liamkuan cu rocket hrangih liamkuan dollar million 250 thawn zate khawmin  million 450 hnakih mal deuh cemin minung thlahawknak ih liamkuan US dollar ting 1500 hnakih tam a ziaum men ding ti a si.

A liamcia kum 40 hrawngah Apolo boruak lawng pawl cu thlapi parih an qum hnu cun American pawl cu thlapi thawn an hlataw ta. Thlapi par khawl minung thlah cu sumpai liamkuan a malin a ziaum hleiah minung thlahnak ih qulmi tirawl, thli tivek ken a qul lo. “Robonaut 2” ti hmin pu khawl minung cu “discovery” rocket parah ret a si zo. Cui’ Robonaut 2 cu NASA le General Motors company qang kopih tuahmi a si. Hi hi minung vek (minung pian keng) khawl minung boruakih an thlah hmaisa bik a si. Pyi Myanmar 11.11.2010 Cah.24

Chindwin Today Thlatin thuthang hi Lairawn sehvel le Laitlang Falam peng pumhuap hrangih tuahmi a siih tu ahhin copy 1000 thawngkhat leng tuahzo a si. 201o November ihsin thehdarh thok a si.

A tuahtubik hi Saya Hngak Lian Eng Tahan ih um a si. Hivek lam ih a thaw nan um asilen thuthang a phunphun le cahram, cazikno pawl in rak kuat ding ah kan lo dil.

Pehtlaihnak>: chindwintoday@gmail.com


October 31, zan 11:42 pm ah

America ram ih pa pakhat in anmai’inn, ihnak khan cu mawqaw thawn a qaih. Cule a nupi kum 19 mi le a fanu naute suakpek (ni 6) te cu an thi cih. Mawqaw cu ihnak khan sungah cun pi 6 tiang a lut. Los Angeles  police pawlqhen kum 20 a simi mipa cu tipangih a qaih si loin a nupi le a fate a that a si tiah an ruatih an kai. Ref. Pyi Myanmar 11.11.2010 Cah. 30

An san a Tha hleice tuk

Bristol (UK) ih um Bartletts tei’ unau cu 5 an si ih, an kum betkhawm cun 474 a si. An unau cu Kathleen kum 102, Gladys kum 100, Lialian kum 94, Leonard kum 92 le Covrtney kum 86 pawl an si. Leitlun ih unau sanqha bikqhen hminsin (record) an si.                                                      Ref. Lengzem, Nov. 2010 cah. 8

Hni fen cing tuk siang lo

Italy ram Naples khawpi kiangih tipi kap khua,

Castellammare distabia Mayor Luigi Bobbio cun mipi umkhawmnak papar hmuan (people park) ih thuamhnaw mumal lo tuk hruh le bawhlung lehnak ah le thildang lehnak ah an siang nawn lo. An khawtlang nunphung a mawi sinsin duhnak le pawngsual (rape) a mal vivo thei beiseinak (ruahsannak) thawn tu-ah hin lamzin, khawlak ih nunau hnicing lutukih kaih pawl an kham leh zo. An dan tuah hi an khua Kawhhran hruaitu pawl khal in an lungkimpi. Hni cing tukih kaihpawl cu Euro 500 (kan ram tangka cun ting 6 hrawng a si) kuantir an si ding. Hi hi nunau  humhual ruangih tuah a si ko na’n, hi khua ih nunau hrekkhat cun nunau zelennak dodal nan si an ti ve. Lamqang an ngah zet.

Ref. Lengzem, Nov. 2010 cah. 8

Thil tinkim ih hman theih kilhimawknak thilri

Kan ram ah kilhimawknak thilri hmantheih in a thleng zo. Kilhimawknak thilri ah cun thlalang khuainak, tohkham le taikhap tannak nam, theihternak meifar tleu le detmei ti vek pawl an um. Thlalang khuainak cu Diamond ha vek sobul a si ih, model sang mawqaw sangka on theih loih rak kalhawhngetin harsatnak ton pang a si len hman theih a si. Theihternak meifar cu rong sen ih tleumi a si. Khuitawk khal ah bomnak dil ding le zan canah mawqaw a siat pang le mawqaw dang veivak hnenah zin ah kan ding/um a si ti theihternak ih hman a si. Tohkham tannak nam le mawqaw mawn canih tohkham taikhap phoih/phelh theih loh in nam menmen le bakceh thawn olai te’n tan a theih lo ruangah taikhap tannak hman theih a si  tiah Tun Thit Oo company ih hnaquantu pakhat in 2.11.2010 ah a sim.

Kilhimawknak thilri cu Tuluk ramih tuahmi a si ih, thil tinkim ih hman theih a si. A man cu K. 15000/- hrawng a si ih Bio Disc tithiang zuarnak dawr ah lei theih a si.       Ref. Pyi Myanmar 11.11.2010 Cah. 18

Siteberia vanzam ke retnak ah minute 50 rei a thuptei’ rak cuangtu tleirawl mi pakhat an run

Kum 17 a simi mipa tleirawl pakhat cu Russia tuahmi Aantonoftavo vanzam pakhat ih keretnak  ah hnipuan menmen hrukin minute 50 lenglo a thupte’n a rak cuang. Cui’ Siteberia vanzam qumnak an thlen hnu lawngah an hmu. An kaihmi thu hi October 30 ih a cangmi a si. Cui’ vanzam keretnak cu a hlum tahnak  -30o C a si ih, tidai a khangnak number hnakin a let tampi a daihnak hmun a si. Cui’ tleirawlpa cu mi fa lakmi a si ih, inn ihsin tlansuak a si. Vanzam a cuan hlanah a kiangnai ih thilri dawr pakhat rak siatsuahtu khal a rak si. Cu tivekih a thup tei’ vanzam a rak cuannak ah a daihnak ruangih a cangmi “Hnin kaih na” (Frostbite) nat cu enkawl lai ding a si.

Tui’ kum, kum thok lam khal ah kum 20 mi Romaniami cu Vinea ihsin London lampan ih zuang Boeing vanzam ih keretnak ah a thupte’n a rak cuang dah zo. Kum 2007 khal ah Moscow vanzam qumnak ah cutivekih vanzam keretnak ih a thuptei’ rak cuangin a ke a thlak tikih tla si awm takin a thup tei’ vanzam rak cuang tui’ ruang cu sar a si.

Ref. Pyi Myanmar 11.11.2010 Cah. 30

Vansia vannei

October ni 25 zing lamah khan, China ram simlam (south) ah, inn sawng 20 nak ihsin nauhak kum 10 mi a tla ih, mangbangthlak zetin, a thi lo. Guizhok people’s sizung ah tuamhlawm rero lai a si ti’n sizung sibawi pawl in an sim.           Ref. Lengzem, Nov. 2010, cah. 7

Mino leh zirnak sakhan Tuhvuanah cu minung (a zohtu) 50000 tlem tiang an sak bet ding

Yangon khawpi ih mino leh zirnak sakhan (Tuhvuanah) bualrawn cu a zohtu minung 20000 tlem ihsin 50000 tlem tiang picang deuh le kaudeuhin an sak bet ding. Hi hi tui’ dinhmun ah a zohtu minung 20000 tlem ihsin a qhangso rero lai mi minung thawi’ mil-aw dingin minung 50000 tlem in picang takih sak tum a si.

Ref. Flower News Tues, 9-15 Nov. 2010 C.H. 7

Nga a nu ihsin a pa ih thlengaw ci an um:

Angel Fish (vancung nga) hi a nu ihsin a pa ah an letaw qheu. A lehawk (thlengawk) dan cu, Angel Fish hi (a group) a burpi ih umkhawm an si. An group ih a pa cun a kilkhawi ringring qheu. Asina’n a pa a thih tikah kiltu an nei nawn lo (group khat ah a pa pakhat lawng an um qheu). Cuiruangah a nu cu a pa aiawhtu dingah a nu ihsin a pa ah an letaw qheu. A nu hi an rong a eng (yellow) ih, a pa cu an pawl (blue) an si.        Ref. Sulhnu, cah 119

UN ah India vote hmu tam bik

2011 kum ih UN Security Council member ding hrilnak ah ram 190 lai ihsin me 187 hmu in India cu hriltlin a si. India hi UNO dintu lakih mi si hman sehla, 1992 tiang lawng a tel. Member thar pawl cu S.Afirca, Colombia, Germany le Portugal ram pawl an si. India hin permanent member si thei dingin hmai a nor dingih, a hlawhtlin khal an zum.

Ref. Lengzem Nov. 2010 cah. 7

Honda an cangsual:

USA ih Honda company cun mawqawte (car) an zuarzomi 528000 cu a berek (brake) a dik tuk lo ti an theihfiang ruangah an lakirsal. Hi mi lakih tambik 435000 cu minivam odyssey model a si. Hi vek thotho in Toyota khal in China ram sungih a zuarmi mawqawte (car) 134000 cu a lakirsal.

Ref. Lengzem, Nov. 2010, cah. 8

Leitlun misang bik

A hmaisa bik leitlun misangbik a rak sidahtu US ram Illonois state ihsin Cen Wordlo a si ih 1918 kum ah a suak. Amah hi pi 8 le inches 11.1 a sang. Asina’n a nih hi a san a sau lo 1940 kum ah kum 22 ah mual a liam.                             Ref: NlM 21.11.2010

Leitlun nupa sangbik

Leitlun nupa sang bik cu California state ih um Wayne le Lorry tei’ nupa an si. Annih nupa hi 2010 November 18 ah leitlun nupa sang bik ah puan an si. Wayne hi pi 6 le inches 10.4 a si ih, an nu hi pi 6 le inches 5.9 a si.                    Ref. NLM 21.11.2010

Rinloparalih a cangmi khur

Nov. 2, zing ah Germany ram (Shamo Caldin) khawpi minung cennak hmunah rinloparal ah khurpi a rak um. Hi khurpi hi zanvar te’n lei a tla ih zinpi cu qhenhnih ih a qhen hleiah mawqaw pakhat a tla tel. Mawqaw a dang pakhat cu khurpi kapte ah a rak um. A kiangkap ih a ummi pawl cun zing khawvang zawngah an hmu.Cui’ khurpi cu lung tumpi ih tlak bangtuk a si ih a thuk lam cu 20 m (66ft)  le a tan tlang tahnak (diametre) 40 m (131 ft) a si. Cui’ khur kiangkap ih um inn 23 ih minung pawl cu an umnak qhawnsak an si ih ziangruangih hi thil a cang ti zingzoi rero lai a si.

Ref. P. Myanmar 11.11.2010, Cah.24

Vui (Sai) kum ziangzat tiang an dam thei?

Vui thuhla zirmi pawl International Scientists team cun vui nu damrei zawng an zingzoi ih   sahmuan ihvulhmi hnakin ram ih tlangqheu pawl cu an dam rei deuh ti an hmusuak. Africa khawmual ih vui le Asia vui 800 cu kum 40 an zingzawi. Cu mi ih an hmuhsuah cu ramsa hmuan ih khummi vui nu cu kum 16 le thla 9 hrawng an dam thei. Hi hi cangvai an lak mal ruangah a si an ti. Ram ih vui pawl cu kum 56 hrawng an dam thei an ti.                                   Ref. Sulhnu, cah. 123

Tuluk ram Dawrpi or Bozaar a kang ruangah minung 19 an thi

Tuluk ram nisuahnak saklam Tilin khawpi ah Shopping Centre pakhat ah Nov. 5 tuluk tikcu 9:15 zinglam ah meisa a kang thok ih minung 19 an thi ih mi 27 in hliamhma an tuar. Hliamhma tuar lakah mi 24 cu sizung ih ret an si. Meisa cu nazi 10 sung an qhelh rero ih Nov. ni 6 zinglam tiang runsuah hna an quan rero. Sawng 5 ih sang shopping centre cu sawng 4 nak ihsin a kang thok ih sawng 4 nak cu innsaknak thilri retnak a si thu kan thei. Sawng 5 nak cu lehnak hmun a si ih hi hmun khal hi a siat thluh. Inn a kang laiah shopping ah cun store dawr 64 a um ti a si. Shopping center ih General Manager cu police pawl in cekfel dingin an kai.  Ref. Pyi Myanmar 11.11.2010 Cah. 34

Mizoram ah Call Boy an um:

Mizoram ah Call boy 5 ihsin 10 tiang lai an um. Call girl kan ti cu duhduh tikih nunau kawh theih, an neih sumpai thawi umpi theih an si. Cuvekin Mizoram ah call boy an um zo. Call boy khal hi nunau pawl in an duh tiktik ih kawh theih in an zuaraw ve. A theifiangtu in an rel dan cun Officer nupi le fala leng u (Senior) lam deuh le nuthlawi (lengleh) hnenah an zuaraw bik. An zuarawk dan hi sumdawnnak vekin Agent an nei ih, cui’ pawl feh tlang cun kawh an si bik. Zankhat ah pi hnih pi thum an kop thei. Vei khat umpi man ah Rs. 3000/- an siaraw. (kan ram tangka cun Ks. 60000 hrawng a si). An tifuh deuh zan phei ah cun Rs. 9000 lai an hlawh can khal a um. A theifiangtu in hiti’n a sim “Aizawl khawpi ah Officer nupi pawl in an duhduh ih an kawh thei call boy an um ih, hi pawl hi kum lam khal upa tuk lo, hmel khal sia tuklo an si ih, cala (vairam) ihsin ra pekte an si. Officer nupi pawl in an duh tiktik ah an ko qheu ih, zankhat ah Rs. 3000-6000/- tiang an hlawhsuak thei. An pasal pawl um lo lai (an tlawnsuah tikcu) cu an ko tikcu a si bik. A qul dan vekin Hotel lam khal ah an feh mai qheu” ti in a sim. (Nuam hlawk a si bik kei cu!)             Ref. Sulhnu, cah. 113

Fridge (Vur bizu) fimkhur a qul:

Hygiene council ih India aiawh Dr. Naremdrasaini cun India ram sungih natnak KHUR a tarlan lakah thil retdaihnak (Refrigerator) hi thupi bik a si a ti. Acancan ih a sungih thil um kan laksuah ih kan tifai lo ruangah Vur bizu sungah baal a bet ih cu cun hrik ci dangdang mit ih hmuh theih lo (bacteria) a hring suak ih, ei ding ah an lut, pum le ril lam fel lonak, thawbang, vun natnak le ei huatnak pawl thlen thei natnak kan kaiphah thei. Vur bizu vek ciah in, coka ih kut le belkheng nawtfainak ih kan hmanmi puansia khaii hi natnak hrik kaipherhawk-nak a si a ti.                                                       Ref. Lengzem, Nov. 2010, cah. 7

Cambodia ah  palthataw celcel

November ni 21 ah khan cambodia ah an pathian puai an hmang ih mipi an tam tuk ruangah an pahaw celcel. Cun,lilawn a kiak ih a hrek ti hak na, khan sungah thli khop lo na in mi 378 an thi. Tui’qum tifai toih puai hi rambuai hnu riahsiatnak tum bik a si. Ref: VOA/ BBC

Fapa in Nu tong:

Kawlram Democracy hruaitu Pi Aungsan Sukyi le a fapa Kim Aris @ Ko Htin Lin, kum 33 mi cu Kawlram ah ra lutin an tongaw. Ko Htin Lin hi Britain ah a um ih a nu suak ding ti a theih ihsin Thailand ah a ra ih a nu ton a beisei na’n Visa a ngah thei lo. November 22 ah visa a ngah ih ni 23 vanzam hmaisa bik ah a ra. A nu in vanzam qum hmun ah a va tong ih kum 10 hmuaw lo zo, nufa cu lungawi zetin an pomaw. Ref: VOA/ BBC

Thisen O Group  naupai har

Thisen group ‘O’ nei nunau hrimhrim cu an vanglai can bul lamih nau pai har an si deuh thluh ti an hmusuak. Naupai le thisen group hin pehawknak an nei. USA, New York ih Albert Einstein College of Medicine cun nunau 560 ‘O’ group ihsin  a zir. Hi mi rual hin Yole University (UK) ih researcher pawl cun thisen group ‘O’ nei nunau kum 35 tlunlam naupai dan an zir ve. Cu mi ih an hmuhsuah cu thisen group ‘O’ nei nunau cu an naupai a har cuang ti a si. Hi thu hi Denver khawpi ih American Society of Reproductive Medicine Conference ah an rel khawm. UK (England) nunau 44% cu thisen ‘O’ group nei an si.                                                           Ref. Lengzem, Nov. 2010 cah. 9

CDMA 450 MH2 Mobile Phone

CDMA 450 MH2 Mobile Phone pawl cu November thla sungah myo 23 ah line 22000 tuah bet an tum thu an phuang. An tuahnak ding hmun pawl Bago, Mandalay, weomF&D, Mon, Karen, Kaya, Kachin, Shan thlanglam pawl ah an si ding.                                                                                                Ref. Myanmar Time Nov.

Leitlun ih quan rang bik super computer

China ram Tianhe IA an timi cu second khat ah 2.57 billion a quan man ti a si. Hi hi leitlun ah 36 nak a si ih, US ram ih tuah (ray _Ts Taguer hi second khatah 1.75 trillion a rang ve. Tianhe IA super computer hi China ram saklam Tiyan Xin ah a um ih, thuanthu zingzoinak le nikhua tahnak ah an hmang qangkai nasa tum.                                  Ref. NLM 17.11.2010

Hlawhhlang kor (Uniform)

Spain ram ah cun hlawhhlang zuarawk sian a si ih, a dawrtu le zuarawtu lakih, a miat hawl ih rak telve (sipuazi tuah) cu sian a si lo. Spain ram pumpi ah hlawhhlang ting 3 hnakih mal lo an um ih, Spain ah mipa pali lakih pakhat cu hlawhhlang thawi’ dawraw qheu an si. PM Jose Luis Rodrigue cun media ih hlawhhlang faknak (porhnak) suah ti tawp a tiam cu a hlawhsan. Lirthei ih cuang pawl rak lem dingih hlawhhlang zinpi kap ih ding qheu pawl cu an kham neh lo ruangah lirthei in an qaih (sut) pang lo nak dingah hlawhhlang pawl cu a hrantein hlawhhlang kor hruh (reflective vest) dingin thu an pe.  A hruhlotu  cu Euro 40 kuantir an si ding.

Ref. Lengzem, Nov. 2010 cah. 9

S. Korea ah

Kum 2011 ah S. Korea ram ah kawlram ihsin hnaquan a theih ding thu HRD (Human Ressources Developement) Director Mr. Lee in a rel. Kum dang ah cun Shwe Inwa in quanvo an la ih, tu cun cozah labour ministry in quanvo a la thlang ding. Ngaihven ci a si men thei.       Ref. Myanmar Time Nov.

Indonesia ram ih meisa tlangpuakkuai ruangah minung 91 an thi ih, minung ting 13 in umnak an nei lo..

Indonesia ram Java tikulh laiih um Mirapi meisa tlang cu November 5, zing ah a puakkuaisal ih, October 26 ih a puakkuai hnuah a nasa bik puakkuainak a si. Minung 54 ai ih tam an thi ih mi 66 in hliamhma nasa zet an tuar. Curuangah meisa tlang puakkuai ruangah mithi 91 an um zo ih, minung ting 13 hrangah umnak ding hmun hawlsak an si thu thuneitupawl in Nov. 5 ah an sim. 2968 m ih sang Mirapi meisa tlang cu Nov. 5, Indonesia tikcu (standard time) zing lam 12:00 am ihsin a puakkuai ih nazi pathum sung a rei. Vutsa pawl cu a sanglam  km 8 tiang a kai ih hmun tinkimah a darh qheh. Vutsa pawl cu a hlatnak  km 45 tiang a thlen ruangah thuneitu pawlin hmun ralmuang lo cu mipihimdamten an umtheinak dingah km 20 a kauh bet. Yugiyakaqa ram qhen ih um Disusipato vanzam qumnak cu Indonesia tikcu (standard time) zing lam 6:00 am ihsin an pit. Cui’ vanzam qumnak khal Indonesia ram sungih a ropi bik a si. Meisa tlang ihsin suakmi vutsa cun vanzam qumnak cu a khuh thluh tiah Indonesia Transportation Minister, thu rel theinak neitu, in a rel. Yugiyakaqa khawpi le Suleman district pawl cu meisa tlang vutsa ruangah an hna ah harsatnakan tong. An kauhbetmi hmun ralmuanglo kiangkap km 20 ah minung 1298406 an um. Cui’ pawl cu qhawnter dingin umnak an ngaihtuah ding tiah an sim. Meisatlang puak ruangih harsatnak tong pawl cu lehnak inn, phunsang tlawng University, cuih hmun uktu zung, tlawng inn le Bali tivek ah umter an si.                                    Ref. Pyi Myanmar 11.11.2010 Cah. 31

Leitlun politics hruaitu nunau pawl-

(1)   Brazil president Delmarshusef

(2)   American Union Foreign Policy hruaitu (Foreign minister) Hillary Clinton

(3)   Europe Union Foreign Policy hruaitu Catherinc Esthern

(4)   Germany PM Angel Lamarkel

(5)   Australia PM Julia Gilet

(6)   Argentina President Christina Fernandetz de cachana

(7)   India President Paratiba Pati

(8)   Kyrgyzs President Roser Autanberyeva

(9)   Corstahrica President Lourachin Chila

(10)      Ireland President Mary Mat Elysy

(11)      Finland President Tajahalonan

(12)      Island PM Juhannasy Gadadota

(13)      Lyberia President Elin Junsinserlief

Ref. Pyi Myanmar Nov. 2010 Cah. 37

Korea Buai

Remnak hmin ngan lo North Korea le South Korea cu November 22 sun ah buai an thok lala. Anni hi 1950-53 hrawng kha do-awknak nasa zet an rak nei. Communist pawl in North Korea an bawm ih America in Democracy ram South Korea a bawm ve thung. Remnak hminngan loin UN Security Council in ramri a khamsak. Tu hi an ramri kiang tifinriat ah Southlam ih raldo lawng zohsinnak an neih ruangah North lamin an kap a si. Ralthuam tumpipi an hman ruangah leitlun ram tum pawl an thla a phang nasa. US cun South Korea an hum ding thu an phuang. Tu hi South lam Marine ralkap 2 an thi zo.                       Ref: VOA/BBC

AIDS Million 33

Tu hi leitlun hmun tampi ah AIDS nat nei a karhnawn mumal lo. Africa ram laili pawl khal ah 25% in a tla niam. A liamcia kum 7 hrawngah AIDS nat nei million 38-40 an um an tina’n tu hi million 33 hrawngah an tla niam.                   Ref: VOA/ BBC

Nisa hmangih ruang nawh:

Hindu pawl in an daan vekih ruang-nawh cu a khungkhai tuk an ti ih, nisa hmangin ruang-nawhnak an tuah. Vadodara khawpi ih leilung quanvo latu pawl qhahnemngainak in Rs ting 75 cemin ni zung caknak hmangin ruang-nawhnak an tuah. Mithi kuang tiat hrawng bawm sung cu 700 degree centigrade tlukih sa in ruang cu an urkang thei. Electric a umlonak khawte, ni a sat qhat lo can ih hman dingah biogas hmang thei dingin an ruahman cih. 

Ref. Lengzem, Dec. 2010 cah.5

Nunau Dam rei san:

Leitlun ah mipa hnakin nunau a tlangpi in an dam rei deuh. A san hmuhsuah tumin University of Newcastle ih gerontologist cuangmuar zet professor Tom Kirkwood cun rei zet a rak zir. A thil hmuhsuah cu nunau hi naupai ih, hring ih cawm pitling vivo ding ih sersiam an si ruangah an (nunau) cell hi mipa cell hnakin a qang ih a daih rei sawn. Natnak hrik a do cak deuh ih, a daih rei sawn a si. Thahri ah cak lo sawn si hman seh la an taksa umtudan hi a rinum sawn ti in Tom Kirkwood cun a sim.

Ref. Lengzem, Nov. 2010 cah. 9

Favang laiih nau piang le Eihuatnak

Journal of Epidemiology and Community Health cun, findland simsak (south east) lamih nau piang thawng 6 zet ihsin an thilzir an suah cu “Favang thla ih nau piangsuak cun ei huat (allergy) an nei ngah ce” an ti. April le May thla hrawngah hin nui’ hrangah vitamin D tlaksam a ol hleice ih, hi can lai ih nui’ pum sungih naute zarh 11 hrawngih upa pawl cu favang (October le November) laiah an piang qheu a si.

Ref. Lengzem, Nov. 2010 cah. 9

Nauhak lai ihsin ci  malte ei ding

Nauhak lai ihsin cite (salt) hi supawk deuh a qha. Nitin ci 3000 Miligram tluk ei in supaw thei a si ah cun, kum 50 kim hnuah lung thu zin pit 7% – 12% tiang, lungna 8% – 14% tiang, zeng 5% – 8% tiang, thisen sang 30% – 40% tiang a rak kham thei ti ah US Science mithiam pawl in November 14 ah an puang.                                                            Ref. NLM 17.11.2010

Arthau (Kyatsu)

US $ 100,000/- man ar thau rialnak cet cu Japan Jisen Kenkiyo Kenkiyushiyo Company in an tuah thok ih a hmin ah DSS machine an ti. Cui’ DSS cet cunarthau kg 500/ in nazi pakhat ah litter 150 a suakter thei. Meicet pakhat in nazi pakhat ah liter 3 lawng a hman ruangah kan ram in nasa zetin kan sor dingah zumnak a um.  Ahleicein tu ah meisa ngah lo khawte 60000 an um ih, cui’ mi sungin khaw 1000 tluk cun meisa an ngah thlang ding tiah ruahmannak an nei.

Ref. Myanmar Times Nov.

LADY GAGA cingcing:

Leitlun zaithiam pawl zuamawknak bik cu zo in You Tube ah zohtu an ngah bik ti a si. Lady Gaga le Justin Bieber tei’ pahnih hi zotu sawn in zohtu tankhat an nei hmaisa sawn ding ti cu an zuamawknak bik a si. You Tube ih zohtu member Billion khat nei hmaisatu cu Lady Gaga a si ti October thla tawpah a fiang ta. A pathumnak cu Michael Jackson a si ih, zohtu tan 962 a nei man.

New York Tleirawl le Sex:

Kum 2005 ih New York khawpi High School tlawngta pawl nunau mipatnak zohfiangnak (Sex survey) thusuak (result) cu October ni 25 ah a suak ta. Zohdiknak ih an hmanmi mi 17220 lak ihsin 7261 cun sex an hmang zo ti’n an sim. Sex hmang zo mipa 93% cun nunau lawng an ihpi ih, 3.2% cun an mipat-pi an ihpi, 3.7% cun mipa le nunau an kop. Nunau lak ah 88.1% cun mipa lawng an kop ih, 3.2% cun an nunaupi an kop, 8.7% cun naunau le mipa an kop. Mai’ neihpi, neih bangaw, kop pawl nungtudan zohfiangnak an neihmi cu, thinlung bang, sungkua kaihruainak `ha dong lo le mah le mah niamtuk ih retaw – pawl lakah sex duhduh ih hman poitilonak a tam ti an hmusuak. Dr. Susan Blank cun Sex lam ih nungcang, nundan danglam pawl hi nunau ah kiltu nei lo le tharum thawh `ulnakih kiltu nei lo an si deuh `heh a ti.              Ref. Lengzem, Nov.2010 P.11.

Ekinn sungah tidai thawi’ toihcihmi Diamond zunghruk kum hnih hnuah ngahsal

A liamcia kum hnih ah nu pakhat in ekinn sungah tidai thawn a diamond zunghruk cu a toih cih pang ruangah zunghruk cu a tlak tel. Asinan tu ah cun hnawmbal thianfaitu company pakhat in milla gallon 12000 cu an thianfai ih an hawl tikah zunghruk cu an hmu/ngah sal. Britain ram Gatwask khawpi kiangih um Childwood hotel ah Juanspear timi nu ih zunghruk cu Ekinn sungah tidai in a toih cih/ngah pang a si. Kum 67 a simi nu cun Clear Master timi hnawmbalthianfaitu company cu sangin tanki pakhat camera bunih hotel ihsin suak milli (hnawm bal ti) gallon 12000 cu thianfai in a hawlter. Asina’n zunghruk cu an hawl hmuh lo ruangah Theme tivapi kapih hnawmbal thiantu qhana ah an hawlpehsal. Cu vekih milli hnawmbal ti cu pipe sung a hawl pehzom rero ih kum hnih le hrek a rei hnuah diamond zunghruk cu hmuhsal a si. Ref. Pyi Myanmar 11.11.2010 Cah. 33

Ni 69 sung lei in a silhhnanmi Chile lungkhur hnaquantu New York Marathon tlan zuamawknak ah a net tiang a tel thei

Lei hnuai ah ni 69 sung lei in a silhcihmi Chile lungkhur in hnaquantu minung 33 lakih pakhat a simi Eddison Piener cu November 7 ih timtuahmi leitlun huap Newyork Marathon zuamawknak ah a cemnet tiang a tel thei. Cu pa cu 26.2. peng tiang a tlan hnuah U.S tikcu 3:30 pm ah Newyork Centre pangpar hmuan ah a tlan thleng. Amah cu U.S tikcu 9.40 am ah Statan Island ihsin a tlan thok. Piener cu runsuaktu ding an hngah laiah ni 69 sung lei hnuaiih tlan rak zirrerotu a si. Piener cu ram 100 leng le American ram ih ramqhen 50 ihsin tlan zuamtu 45000 thawn zuamawin a number cu 7127 a si.  Ref. Pyi Myanmar 11.11.2010 Cah. 33

Obama ih unaupa (tawan kuai) Singapore ram ah a tlawngvak

American ram President Barak Obama ih a  paseu (cousin) cu Singapore ram ih um Stermfort American International tlawng ah a tlawngvak. Obama ih unaupa Mr. Mat Obama Ngetsanju in Stermfort International tlawng ah a tlawngvak ih zangfah lainat duhsaknak nei hnaquantu si dingin tlawngta pawl cu a forhfial hai. Mr. Obama Ngetsanju cu Singapore ram ih American sumdawng khualtlawng pawl qangrual ih an sawmnak vekin ni khat sung a ra tlawnnak a si. Mr. Mat Obama cu Tuluk ram Shingjing khawpi a um sumtuahnak hna ih an thuron mi pakhat a si. Anih cu Indonesia khal ah tlawngin American sumtuahnak hna lam hruaitu pawl hnenah qanrualnak lamah minung umtu dan thawi’ peh paraw in thusimnak a nei ding ti a si.

Mr. Obama Ngetsanju cu Kenya ram ih suak, Americanmi pakhat si in President Obama thawn nu hmun lo pa hmun khat an si. Amah hi Piano tumthiam, saya pakhat a si ih Nyrobs ti hmin pu a mai’ cabu hmaisa bik cu amah rori ih nganin a suahmi a si. Cui’ cabu cu amai’ thuhla a ngannak le a hrek cu nunthuleng (novel) ngannak a si ih, Americanmi pakhatin Tuluk ram ih duhdawtnak a hawl thu a ngannak a si.

Ref. Flower news Tues, 9-15 Nov. 2010 Cah. 41

Ti sungah vanzam

Britain ram nisuahnak lam York shire ram qhenOton khua kiang ih Dauamh tipi sungah mi pahnih to theih vanzam pakhat cu October 30 sundiir ah poimawh zetin a qum. fit 50 ih kau tipi sungah cun vanzam mawngtu (pilot) le a sungih to ve pakhat thawn hliamhma zianghman tuar lo te’n ti sungihsin leilung parah an suaksal. 

Ref. Pyi Myanmar 11.11.2010 Cah. 24

Malsawm (thlawsuah) nak dong dingin na timtuah aw

1. Na tefasin hrang ro qha na pektheimi cu na lo le na hmuan an si ih, cuiruangah na lo/ na hmuan leilung cu hmuan le thlaicin thiam pawl (Agriculture) rawnin qha te’n tuamhlawm ringring aw.

2. Na rak farah a si hman ah hnaquan thotho aw la, na len hnu khal ah quan sinsin aw.

3. An hnaquannak ih hlawhsam ih ruat-aw mi tam sawn hi an hlawhsam si lo in, an hna an bansan a si sawn.

4. Quan thok dingin ropit hmaisat a qul lo ih, ropi ding cun quan thok hmaisat a qul.

5. An hnaquan bansannak cang thiam lo ruangih, thuhla zianghman thei lo pawl hi an hlawhtling duh zet.

6. Buh le ba hlawhtling zetih na tharsuahtheinak ding ah thlai-rah rannung le natnak lakih na hmuanthlai na kilkhawi a qul. Thlaici na tuh hlan ihsin si thawn qang hmaisa aw. Cun, si hmangin a tikcu te-ah na hanghnah le hangrah kap qheu aw.

7. Thlaicin hlawhtlinnak hi thlaici ah a qhumaw ih, cuiruangah na hlawhtlin sinsin thei nak dingah na thlaici cu ursun zetin tuamhlawm ta aw.

[(a) Na umnak kiangkap ih lolam mithiam beron ringring aw. Nangmai’ ngaidan in feh hlah.

(b) Biakinn le innsung ih Haleluiah thlacam a tawk lo, na thlai kiangah dawm (leici) le tuhmui thawn haleluiah sawn aw.

(c) Pathian malsawm kan dong lo ti in vuihram hlah. Na hmuansak le hmuanthlang malsawm an dong hleice tiin ruat hlah. Ziangti’n an quan, ziangti’n thlaici an cing, an zoh ti le ziangti vekin can an pe ti thei hmaisa aw la, zir, quan ve aw. Pathian mawhsiat hlah.]

Ref. Aizawl Theological College, 2010-11, p. 192

 

Cuang lo!

– Miler hmuahhmuah an him lo cuang lo.

– Milar hmuahhmuah an porhaw cuang lo.

– Pawl nuam (kawm nuam) hmuahhmuah an nelum cuang lo.

– Sam dir hmuahhmuah in an mawipi cuang lo.

– Fala Jean bawngbi hruh lo mizeilo an si cuang lo.

– B.A hmuahhmuah cathiam an si cuang lo.

– Principal hmuahhmuah tlawng nei an si cuang lo.

– Khawhar hmuahmuah in riahpi an duh cuang lo.

– Mi qong tam ta hmuah thu thei an si cuang lo.

– Lo lengtu hmuahhmuah in an lo duhdawt cuang lo.

– Kawl qong thiam ta pauh tlawnpi an tlak cuang lo.

– Bek dum pai ta pauh company ih quan an si cuang lo.

– Evan ta hmuah an luck cuang lo.

– Pastor ta pauh in thlarau hlo an helhkam cuang lo.

– Pase ta hmuah in an ti fuh cuang lo.

Kan Sung Thu

(Local News)

Zankhat ah Cekan Bike 2  a hlo

November 5, 2010 zan ah cekan ah Bike pahnih a hlo. Pu Hram Nei Dum le Pu Biak Kam, inn pakhat lakdan ih um, tei’ bike cu in tangah zantin an riah ringring qheu. Inteknu veve ih rel dan in “zantin tawh kan kalh qheu ko na’n, hi zan cu kan kalh lo ngelcel. Zantin kan riah ringring qheu ruangah a hloh kan zum hrimhrim lo” an ti. Pu Hrang Nei Dum tei bike hmai thlaih cu an in ihsin hla tuk lo ah a thaizing ah an sar. 125 veve an si ih, Pu Dum tei’ ta hi 2006 model a si ih, Pu Biak te hi 2009 model a si. Pu Dum tei’ bike Engin number cu YX 153 FMI 06911951 a si ti in thu kan dong.

Evan. S. Qha Nei Fai in B.P.C ah crusade nei

Evan. Qha Nei Fai in Biblical Presbyterian Kawhhran ah ni 15-21 tiang crusade a nei. Sun ah zirnak neih a si ih, zan ah khawmnak hman a si. Kristian nun qhanso lam hoiin zirtirnak a nei. Kawhhran dangdang ihsin telpitu an qhahnem zet. Biakinn khat mermerin an khawm ih kan hlawkpi zet tiin thu kan dong.

Falam Youth Icon

Falam Youth Icon cu Kalay le Falam ah hmunhnih ah tuah a si. Zuamawknak ah Kalay lamah mi 71, Falam ah mi 22 an tel thei. Lairawn ah cun Youth Center (St. John Biakinn kiang) ah hman a si. Falam ah cun Falam Baptist Hall ah hman a si. Nov. 23-24, 2010 (nazi 8:00-3:00 pm) ah aveikhatnak neih a si ih, cui’ hnuah Kalay lam ihsinmi 16, Falam ihsin mi 4 Top 20 cu hril an si dingih Final cu Nov. 31, le Dec 1, 2010 ni ah Falam Town Hall ah nei leh a si ding tiah quanvo neitu pawl hnenin thudon a si.

Hakha

Hakha hi Kalay ihsin peng 120  a hla. Mawqaw in nazi 8 sung a rei. Hakha in Kankaw khal feh a theih ih peng 86 a hla. Hakha ihsin Thlantlang cu peng 21 a hla ih Matupi cu peng 170 a hla. Hakha  cu tipi thuanthum ihsin pi 6120 a sang. Cun phone 1063 a um ih, CDMA phone 326 bun qheh zo a si.         Ref.NLM.21,11,2010

Assembly Mission Board Hmunqha ah an hmang

Presbyterian Kawhhran ramsung ih Mission rongbawlnak khawmpi tum bik, Presbyterian church of Myanmar Assembly Mission Board cu ni 20-21 tiang Hmunqha vengpi ah sunglawi zetin an hmang. Newzaland ihsin khuallian pahnih in an ra hmanpi tiin thu kan dong.

Segyi lilawn 2011 ah qheh thei tum a si

Segyi lilawn cu November 2010 ihsin an quan thok ih, kum 2011 ah qheh thei an tum. Segyi lilawn hi Tahan khawpi ihsin peng 4 ih hla, Kalaymyo hmar sak (North-West) ih um a si. Lairawn khawpi pahnih, Letpanchaung, inn 2000 lenglo khua le Tahan khawpi karlak-ih um a si. Hi lilawn hi cozah lam thuneitui’ siannak le remtinak ih tuah a si. A za dingah thinguk a hlailam pi khat, a sahlam zungbok (letma) paruk, a saulam pi 25, cuvek 35 a qul ih, tu-ah 23 a thleng zo. A zial dinghi 6 _3 qan 5 lenglo a qul. Tu-ih tuahzo mi ah 2000000 lai leiba an nei zo. Lei nortu (J.C.B) cozahta in a quanman 5000000 cu la loin bomnak ah ti in an hlu cih. Cui’ hleiah Kyitkhaizi a tin a si laiih mi in Balatmi dip 150 in an bawm. Lilawn saulam hi pi 125 a si dingih  a kauhlam pi 12 a si ding ti’n Segyi ukaqha hnenihsin thu kan dong. (Sumpai in siseh, thilri in siseh, thlacamnak in siseh, a bawmduh tui’ hrangah bomnak on ringring a si.

Chin Taungtan Bus a cangsual:

U Cin Pu ih Bus, U Khaisang (zebaw) ih mawnmi 4c^1021 Chin Taungtan cu November 26, 2010 zirtawp ni ah, Tonzang ihsi Tidim a fehnak ahvansiatthlak zetin a cangsual. Hi Bus hi Tonzang ihsi Tidim pan ih feh a si. A cuang tu hi Tonzangmyo ih um an si deuh thluh. A fehsan cu ni 25 ihsin 28 tiang hi Tidim qong tuahsaktu JH Cop theihringringnak puai ropi zet hmang dingih Tidim khawpi pan an si. ni 25 ni hi thlen kim ni a si na’n, mawqaw a um lo ruangah 26 ih feh an si. Hi Bus ah hin mipum 83 lai an to. Tonzang an suah ih Zalui tiva an kan, cui’ tiva ihsin peng 5 hrawng an lawnso, zinkawi pakhat ah lawnso vivo tumih a so cu lawnso suak theiloin dunglam ah a tolhkir ih cuti’n zinthlang ah an liamcih. An tlaknak hi pi 1000 leng hnakih mal lo kham parang a si. Bus khal a hmuhtheih lo. A hmun ah mi 12 an thicih. Sizung ah mi 4 an thi bet. Tu ah mi 16 an thi zo.

Sungkawkhat ih mi 3 thi tla an um . Mithi pawl cu Tonzang ah an phurkir sal ih, hliamhma tuar pawl cu Tidim sizung ah phurhluh an si. An eksident hi nazi 10:30 (pahra le khuai) cekci a si. Siat a tongtu hi mino deuh hlir an si. Mi 20 lenglo Tidim sizung ah hliamhma na zet tuarin an um lai. Siat a tongtu lakah Sayakyi Sum, Tuimang khua ih um a tel ve. Tonzang khawmi an tam bik. A mawngtu (driver) khal sizung ah phurhluh a si ve. Hi sunlawihpuai ropi ah mipum 100000 dar thei dingih timtuah a si. JH Cop ih tufa, vuavang khal an ra ti in Chin Taungtan Office ihsin thu kan dong. Kan unau pawl in hi vek ih siat an tonnak tlunah kan tuarpi ih, kan riahsiatpi ngaingai. An hrang thlacamsak cio uh si.

Kalay Theological Students Fellowship : (KTSF)

KTSF cu Nov. 13, 2010 ah PCM Immanuel Biakinn ah tonawkkhawmnak an nei. Mipum 400 lenglo an suak ih, tlawng 10 ihsin an tel thei. Kalay huap sungah Bible tlawng 32 a um. Hi tonawk khawmnak ah lehnak a phunphun laksawng peknak an nei. Laksawng ngahtu cu a hnuailam vekin an si.

1.   Bawhlung 1-nak

– Tahan Institute of Theology (T.I.T)

2.   Bawhlung 2-nak

– Tahan Theological College (T.T.C)

3.   Bawhlung ben 1-nak

– Faith Theological College (FTC)

4.   Nunau bawhlung ben 1-nak

– Zomi Theological Siminary (ZTS)

5.   Pingpong mipa 1-nak         – TIT

6.   Pingpong mipa 2-nak   – TBCNS

7.   Pingpong nunau 1-nak

– Bethlel Theological Siminary (BTS)

8.   Pingpong nunau 2-nak – TBCNS

9.   Sitlung (can ball) 1-nak      – TIT

10. Sitlung (can ball) 2-nak      – BTS

11. Essay ngan zuam 1-nak     – (Mirang) TTC

12. Essay ngan zuam 1-nak     – (Kawl) FTC

13. Biazai ngan  zuam 1-nak   – (Mirang)FTC

14. Biazai ngan zuam 1-nak    – (Kawl) ZTS

15. Pakzai 1-nak                      – TTC

16. Awnmawi 1-nak                –  BTS

Kristmas hmuahnak bawhlung lehnak

Kristmas hmuahnak ah Falam Pawlpi hohanakin lehnak tuah tum a si. Joint-sub Game Committee (Falam Pawlpi (JFP) hohanakin Dec. 17, 2010-ah Tahan bualrawn ah Tahan le Taungphila branch huap sung bawhlung lehnak cu ropi takih tuah a si ding. Laksawng pakhatnak Ks. 30,000  a si ding ih, pahnihnak ah Ks. 20,000 a si ding. Zoh cio dingin mipi kan lo sawm.

Lairawn Zirsang Pawlkom Senpi pungkhawm

Dec. 11, 2010 Inrinni ah LZP Senpi pungkhawm an nei zik ih a hmun cu PCM  Vengpi, Hmuntha ah a si ding. Hi ni ah Lucky Ticket onnak sunglawi zetih hman a si ding. LZP hin cozah tlawng ih phunhra ong le Bible lam B.Th. Degree ngah zo a huap tel theh. Sawmnak dong lo hrang khal ah ra tel ciar ding in kan lo sawm.

Fala Zei Si ding Cun ….

1. Nan um tlangah: Nan pahnih te nan um canah zak zum tuk vekin um hlah uh, a kiangah to aw la hni siamsi aw. Na hmuh lo can ih na ngaitheizia sim aw, a lo ngainep lo ding tawk te’n hngohsan phah aw, a duh zawng na si maw? na umdan ah lungawilonak a nei maw? na kiangih a um can ah nuam a ti ngaingai maw? ti tiangin sut aw. Na tlaksamnak laite theithiam dingin ngen aw, a lungawi hmel na hmu dingih a lo duhzia a rel rero ding.

2. Ngaihsak aw: Mi tampi thawi’ nan um can khal ah na duhnak cu na tilang thei ko. Pungkhawm nikhua khal ah midang mitkhamter tla ol te. Cuiruangah a kiang naiah na um ngam lo tla a si thei, a theihthiam tawk te’n hni siamsi te’n mitsin phah aw la cun zei a lo ti ko ding.

3. Qihzah dingih um thiam: Nan ngaihzawngawk ruangah ton ringring tum hlah, na man can khal ah man lo vekin um qheu aw. Asina’n na duhawk tuk ahcun a lo piat hngal ding, na duhzia na langter tuk le a lo ning ding, cu mi karlak ah um thiam tum aw. Zah um dingih na um thiam, na ngaihsak ringring ahcun a lo qhen thei taktak zik lo. Mipa kelte taktak a si ahcun zei a lo ti ko ding.

4. Theihthiampitnak: Mipa hi ziangziang simaw buaipi ding an nei thei ve zet. Mipa um ol tuk le laktlak an si leh fawn lo, a lo buaipi man ringring lo ih thil ziangsi maw a buaipi can ah theihthiampi aw. Ralkhat ih thikthu rak ti siat vak hi a qhathnemnak a um tuk lo, na hrang lawng ih rinum ih fala dang ngaihsak lo dingih na duh a si le na zei tuk a qul.

5. A cintawk thei aw: A thupteih na duhmi thawi’ nan rak melhaw pang, na lungawinak  na sartharsal a si khal le a cintawk thei aw. Na duh tuk ruangih a lo ning a si ahcun na tuarnak cu a na ko ding. Duhawktawkthiam a qul, na duh taktak a si ti a theihthiam tawk dingin um aw, a ngainat hleice dingin leh a buaipi dan tawk thiam aw.

Hi tlukih nan karlak remnak dingih qha na ti ih a takih na tuahsuak thluh cun fala zei tak, ler cuang fawn si lo fala nasa tuk si cuang si lo, ngainat um fala na si ko ding.

Translated By Liantenator Immanuel

__________xx___________

Lehnak Thuthang

International Friendly Matches:

November thla ne khan International friendly matches an nei nasa. Mi ngaihven bik cu South America pacang veve, Brazil le Argentina puai kha a si. World Cup ih an cangqhat lo ruangah Coach an thleng veve. UAE ram le Dubai khawpi ah an ra sit ih can cem zawngah Messi in Argentina hrang khawl a thun ruangah one-love (1-0) in an neh. A sangtu cu England le France puai kha a si.

French Coach thar Blane in World Cup in an ram timualphotu ih a ruah senior player hmuahhmuah a hnong ih mithar pawl thawn a dinmi French Team cun Terry, Lampard, Rooney pawl tellonak England cu 2-1 in anmai’ tualrawn ah a hei sop neknek. Cun, World Cup champion Spain cu a hmuanthlangpa Portugale in amai’ inn ah mualpho takin a rak velh. Bawhlung cu Spain ke ah a um nasa sawn na’n Protugale kilhimtu pawl an pahtlang thei lo ruangah C.Ronaldo ih ho Portugal pawl in 4-0 in an rak rawt neknek.         Ref: Eleven

Spain La Liga:

Spain La Liga khal puai 12 an lek zo ih Mourinho ih Real in hma an hruai. Mourinho hi Coach thiam a sizia le a ho pawl lo qang dingih a cawhthawh thiamzia cu an fak nasa. A sangtu Barcelona in a dungah mark 1 in a dawi vivo. November 29 an sitmi Spain Derby an ti Real le Barcelona puai cu mi ngaihsak a hlawh nasa. Bacca in Real cu anmai’ tualrawn ah 5-0 in an rak sop neknek.                      Ref: Eleven/TV

Haly Serie A

Haly Serie A ah cun AC milan in hma an hruai. An qha ciamco lo na’n an khingpi pawl an cak lo ruangah a si. Mourinho ih um laiih Serie A, Halian Cup, le Champious league champion lnter milan cu Benetez san ah apasarihnak lam ah an tlaniam. Club neitu moretti khal a vuihram nasa thlang. Culaiah Inter, Bercelona – AC ih ra kirsal Ibramovic cu Sweden bawhlung thiam bik lawmman a dong.  Ref: Eleven

Champions League:

European Champions League khal an sit peh vivo. England Club Man U cu an lamah khawl khat hman lut loin Second round an kai zo. Tuikum ih champions league lut thok Tottemham Spur khal German Club Warda Bremen 3-0 in an neh ih Inter thawn an kai. Spain ah Borcelona, Real le Valencia an kai ve zo. Chelsea an kai zo ih Arsenal khal an boruak a qha.

Ref: BBC 25-11.2010

________x________

Harhdamnak:

Taksa (vun) hrang vaitamin le a ngahtheinak:

– Vaitamin A : Vun hriselnak ah a qha ih, vun tinungtu cells pawl tiqhatu a si. Vun cuar ol tuk ding kiltu a si.

Tlaksam tikah (Deficiency) – Vaitamin A tlaksam len vun ro a thlen ih, hrik cu, khuaihli, hmaibol, sam le luvun ro a thlen qheu.

Ngahtheinak – satin, cawhnawi, arti sungmu, hanghnah dangdang

– Vaitamin B1: Cahnak tuahtu vitamin a si ih, tha le tit a tuah qha.

Tlaksam len – Kut ke thlan a tuah, tiza a thlen

Ngahtheinak – Nicia, sangphut, badam (mipe)ih tuah mi pawl ei ding. Cawsa, voksa, satin, arti sungmu, tiva sa le be hmuahhmuah

– Vaitamin B2: Sam a tihrisel, vun le tin a tinal ih, theihnak a ticak, hrikcu nei hrangah a qha sinsin.

Tlaksam tikah – Vun durh tete a suahtir, vun thak, kamhma le lei le ka sung na a thlen.

Ngahtheinak – Thei hawngkhalci hrimhrim, arti, cawhnawi, hanghnah hring, ngasa.

– Vaitamin B3: Taksa ah qangkainak 50 lai a nei ih, a langcubik ah cun vun a tihrisel ih, theihnak, thazam le cells a ticak.

Tlaksam tikah – Vun bol le thak, tiqiamqo ih bol tivek, vunsa.

Ngahtheinak – Satin, arsa, ngate, badam, cawhnawi, (coffee no 1 ah hin 3 mg um tluk a si ih, nunau in nikhat ah 13 mg hrawng kan qul.

-Vaitamin B12: Kum upa deuh pawl hrang a qha, cahnak petu a si ih, eihuatnak le cancer lakah mi a kil thei. (Hi hi eitam tuk ah cun vun ah harsatnak a thlen thei, hanghnah ihsin kan ngah thei lo ih, ramsa le vulhsa lawng ihsin kan ngah thei.

Ti in tam hi…..

– Nitin ti no 8 tal in aw.

– Zing na thawh vete’n, na pum lawng lai ah ti no hnih tal in aw, kan taksa ih toxin (thausia) a hlon suak thei.

– Vun no hrangah (sensitive skin) ti hlum in ding.

– Vun ro (dry skin) – Ti hlum depdo

– Vun rim/ ciap (oily skin) – ti suanso dai zo

– Vun kel (normal skin) ziangvek ti khal in a poi lo.

(Vurti [Ice water] hi ayurvedictherapy cun pumpai nuam lo, pumpi caklonak a thlen thei a ti.)

Ref. Zonu

Lasun (khasuan rang) ei tam a qha

Lasun (Garlic) hi si qha tuk a rak si. Hritlang (raibur), lungna, thisen sang nei pawl hrangah a qha ti an hmusuak. Fa nei thei lo le nu rai lai hrang khal ah si qha zet a si ti tubai ah an hmusuak. Nu in nau a pai lai ih a ei a si le nau a tirit thei ih, nau hrin a olaiter.

Ref. Sulhnu cah. 125

Pasal nei lo ih hlawknak:

1. Duhduhin a len theih, sim zet khal ah tlung aw la zo si maw hnenih simfiangawk a qul ve lo.

2. Rualpile thawi’ film zohnuam le lungtizur thei zoh ih, qahkhal le in hnihsantu ding an um ve lo.

3. TV na duhduh na zoh thei ih, remote control lo cuhtu zohman an um lo.

4. Nangmah lawng na si ahcun na can hmuahhmuah na thu te’n na hmang thei qheh ih, rualpilethawn tlangval duhzawng le duhlozawng fak le relsiat cang khal ah phuhrunawk ding a um lo.

5. Fala si ringring nomnak cu zing thawhpek ah ziangvek hmel ka keng ti ruah a qul ve lo.

6. Pasal neih lo ahcun rualpile thawn can a hman ringring theih.

7. Fala hrangah hna hawl a ol hleiah, hna a tam hleice. Hnaquan duh ruangih ramdang feh duh hrang khal ah inlam ih khamtu le ngai ding an um lo.

8. Fala hrangah hin hlawknak ding tampi a um. Pasal nei lo ih um hi zo simaw thawi’ kopawk hnak cun a nuam sawn hrimhrim.

9. Tarkun tiang pasal qha a ngah theih fawn.

Ref. Zonu

Hnih hi harhdamnak

Taj Mahal kiangah mirang fala zuk a sawm ih,

“Come on, let’s album together” ti in

Nauhak pakhat in an zawhte cu petrol a inter, zawhtecu a herkual rero, tawk fangin zawhte cu a tlu ih a thi cih. Nauhak cun zawhte cu a zoh ringring hnuah “a petrol a cem si maw” a ti.

Zirhtu : Leitlun ah ziang va ha zam thei lo?

Tlawngta : Kuhva

Rualvah hnih thlanmual ah an feh ih pakhat tu in, “ka rual, RIP ti hi ziangha a hlamsau (long form)?” “Rin lo ih phum.”

Mi pakhat in chuhmuk hi ziang khal ah thlak seh la a thaw thluh a ti. A kiangih um pa ti buambi in cu ti a si le kerong ah thlak aw la, a thaw kem a ti pan lo maw.

Ngaihzawngaw mi pahnih kha hotel ah an thleng ih,

Tlangval : Ka lo duh tuk

Fala : Kei cun, ka lo duh nawn lo

Tlangval : In duh thu veikhat talin in sim aw

Fala : Aw… ka lo duh nawn lo ka lo ti cu!

Tlangval : A sile, Waiter kan einak man a dangdang tein ron pe aw

Fala : Hei! a sile ka lo duh silawm U Thang

Tlangvalpa in a fala a phur, mipa to in a to ih, hmun fianrial an thleng. Bike cu a muang vivo, a netnak ah a ding dukdi. Fala nu cun a vunpom ih, beisei zetin a hna kianghrul ah “ziangah saw na din i?” Tlangvalpa cun aw ral ruairo in “petrol a cem”.     By- Liante

Favang Bawhlung lehnak Sekan ah Taungphila in pakhatnak ngah:

Lairawn favang Bawhlung lehnak neta bik cu Sekan khua ah hman a si. November thla lai hrawngah cicai le Taungphila an final pakhatnak an cuhaw. Can pitling (full time) sungah kawl 3 ve ve an thun aw. Can pek bet ah Cicai in benalti an ngah ih an khawl (goal) lo. Van neih phirsirh in Taungphila in a hmaisatu minute 10 sungah goal an thun. Minute 10 ve ve pek an si. Cutin 4-3 in Taungphila cun pakhatnak a ngah, ti in thu kan dong.

Thufim:

§ Mitcaw in kebai a pawk ah cun an pahnihin hmailam an pan thei.  (Swedish Thufim)

§ Na bansan hlan lo ah cun hlawhsam na si hrih lo. (Mike Ditka)

§ Ti thei in na theiaw simaw, ti thei lo in na theiaw simaw an dik ve ve. (Na ruahawk vek ciahin na um, na cang, na ti thei, na ti theilo a si)

(Henry Ford – 1863-1947)

——————————————————–

Comments

comments

One Comment

  1. Shady Malsawma says:

    Nan thuthang ca suah mi hi ka rak siar ve theu ih siar nuam ka ti ngai2..

Comments

%d bloggers like this: