Tilik tuartu mi 130 thi

Tilik tuartu mi 130 thi

Poland ram thlanglam ih ruahpi cun khawsung ah tilik a umter ih, May 24, 2010 tiang mi (15) lai in an thihpi zo tiah Poland Interior minister Jerzy Miller cun a sim. Ni (6) sung ruahpi a sur hnu ah inn le lo tampi a siatsuah ih, kum 1884 ihsin tilik ruangih milai thih tamnakbik a si.

Tuluk ram thlanglam khalah thlipi le ruahpi ruangah tilik nasazet a um ih, mi (115) cun an thihpi zo. Acozah cun mi 685,000 lai cu an umnak ihsin hmun dangah an thiar suak. Mi (21) hrawng an hlo ti a si.

Thailand in Thaksin cu tapung tiah a puhmawh

Thailand acozah cun ahlan ih prime minister rak tuantu Thaksin Sinawatra cu ‘tapung lungput le tapung cangvaihnak tuahtu’ tiah a puhmawh ih, High court cun ‘kaih ding’ tiah May 25, 2010 ah thu a suah thar. Thailand ram sumpai ei ruknak thubuai neitu Thaksin cun 2006 ihsin an ram suah san in hmunkip ah a um ih, amah duhdawttu pawl cun kan dung March thla ihsin Bangkok khawpi sungah buainak an tuah ih, tuni tiangah mi (88) an thi zo ih, mi 1,900 hrawngin hliamhma an tuar. Thaksin cun ‘Tapung’ ti ih an puhmawhnak cu politics ruangah a si tiah a ti.

India ah vanzam a tla

Kan dung May 22, 2010 ah Dubai (UAE) ihsin India ram thlanglam ‘Mangalore’ khawpi ih vanzam ra tum cu, a fehnak lamzin a zawh pial ruangah a cangsual ih, meisa kang hluahhlo in a parh thluh. A sungih passenger 158 an thi ih, mi (8) lawng cu an runsuak (thihnak tuar lo) ti a si. Ruak (22) cu an siat tuk ruangah DNA zoh in, zo an si ti an hawl ding. India vanzam pahnih cu 1996 ah boruak ah an khawng aw ngah pang ih, mi 350 lai an thi. Hitivek ih buainak a thlen ruangah India vanzam mawngtu pawlin acozah dodal ih ‘hnatuan colhsan’ an tumnak cu ‘an colhsan sal’ ti a si. US cun vanzam a tlak dan le a tlak theinak san pawl zingzawi dingin ‘mi (4)’ cu a thlah zo ih, May 23, 2010 ah vanzam mawngtu pawlin thil ziangkim an record nak ‘black box’ khal an hmusuak sal zo. Hrekkhat cun ‘pilot a bang (stress) tuk ruangah a si ding’ tiah an rel.

(Visited 29 times, 1 visits today)

Comments

comments

Comments

%d bloggers like this: