Cabu nei lo hnatuan fialtu in RM 84,000 a kuan

Cabu nei lo hnatuan fialtu in RM 84,000 a kuan

July 30, 2008 ah Shah Alam (Section 25) ih rawl dawr neitu pakhat palik in an kaihmi Mariappan (kum 44) cu ram dang mi cabu nei lo mi (8) lai a dawr ih hna a tuanter ruangah RM 84,000 kuanter a si. Mariappan cun India ram mi (6), Bangladesh mi (1) le Indonesia nunau (1) cu rawl dawr ah a tuanter ih, cuih a hnatuantu pawl cun ‘lahkhah’ cu thla (19) lai an ngah thei nawn lo ruangah ‘Malaysia Labour Department’ ah bomnak an dil. Asinan palik pawl cun an hnatuannak dawr an zohfiang tikah cabu nei lo hnatuantu pawl cu an kai thluh ih, anmah fialtu (dawr neitu) khal kaih a si. An thubuai cu High Court tiang a thlen hnu ah dawr neitu Mariappan cu ‘cabu nei lo pawl’ hnatuan a fial ruangah mi pakhat fialnak hrangah RM 12,000 kuanter a si ih, cucun thla (4) thawngthlak theinak ihsin a luatter. Nunau hrang ahcun thuthentu ih ngaidamnak in zianghman a kuan lo. Mariappan ih lawyer cun ngaidam a dil sak na’n thuthentu cun ‘ram dang mi cabu nei lo pawl hnatuan fial lo dingin acozah in kum tampi thu a than zo’ tiah a el.

KL khawpi sungah inn sung boruak thianghlim lo ti hmusuak

Malaysia ih sibawi pawl cun Kuala Lumpur khawpi sungih inn sang tin in nitin an tuar thei ringringmi harsatnak, a thuptei’ phurrit an neih theimi pawl zingzawi in ‘lenglam ih hnatuan lotu pawl khalin’ olsamzet ih natnak an ngah thei dan pawl cu an hmuhsuak. University of Putra ih mithiam pawl cun Sick Building Syndrome (SBS) timi ‘khawsik tuah theitu le natnak dangdang khal tuah theitu’ cu inn sung ihsin a ra suak thei tiah an sim.

Sick Bulding Syndrome (SBS) cu nitin inn sungih um menmen phah ih ngah theimi a si ih, mitthli tla phahphah, khuh le awm-na, lu na le thawpnak pawl an si tiah Dr. Juliana Jalauddin cun a sim. Hih natnak tuahtu (SBS) pawl hi inn sungih thilri tampi ihsin ngah thei a si ih, Tuluk ram ih nauhak tampi thihpi mi ‘indoor air pollution’ khal ‘formaldehyde’ (inn sung thilri tuahnak ih hmanrua) pawl ruangah a si tiah a ti.

Cuih thilri pawl cu, inn sung phar (wall) parih an benmi ca-ku (wall paper) le a erhnak (glue), sangka te ih thlalang le aluminium pawl erhnak, Fibre thawn tuahmi cabuai le tokham, plywood thawn tuahmi bizu le thil dangdang, kuak ci retnak le kuak bul pawl ihsin ngah theimi an si. Kuala Lumpur khawpi sungih kum 18 tlunlam 20% cun hivek natnak hi an tuar ringring ih, 1984 ih World Health Organization khalin leitlun mi 30% hrawng in SBS timi hi an tuar ringring tiah an ti. – The Sun

Comments

comments

Comments

%d bloggers like this: