NDF party hotu dingah Aung San Suu Kyi

Campbell in Suu Kyi le NLD hotu pawl Yangon ah a tong

Kan dung May 10,2010 (tlawngkai nikhat ni) ah US Assistant Secretary for East Asia and Pacific Region Kurt Campbell cun Aung San Suu Kyi le NLD party hruaitu pawl cu Yangon khawpi ah a tong hai. Campbell hin NLD (National League for Democracy) party lawng si loin Democratic Pary, National Unity Party (NUP) le Kawlram ralkap pawlih bom rero mi Union Solidarity and Development Party (USDP) hotu pawl thawn Suu Kyi a ton hlanah biak awknak a nei.

Campbell cun Kawlram hril awknak thu thawn pehpar in Foreign minister Nyan Win, Information minister Kyaw San le Science & Technology minister U Thaung pawl thawn biak awknak a nei zo.

NLD hotu pawl cun Campbell hnenah ‘Kawlram acozah cun International community aiawh in nasazet ih nunsim tlak a si thu le hmailam caan ih Kawlram hril awknak ding cu ‘thianghlim lo le zumtlak lo’ a si thu khal an simfiang. Campbell cun ‘Kawlram in democracy ih uk awknak tlamtling a neih ding tikcu hi US cun a hngakhlapzet, asinan acozah thuneitu pawlin tlawngta le phungki thawngtla pawl a suah lo ahcun hril awknak cu ‘zum tlak lozet’ a si tiah a ti. Campbell in a simbetmi cu, “Kawlram acozah in kum cem lam ih hril awk ding ni a thawn cu US cun a thei thiam lo zet” tiah a ti.

Campbell hi May 09,2010 (zarhpi ni) ah Yangon a thleng ih, Thailand ih a um lai ah thuthang ngantu pawl hnenah ‘Kawlram cun kum 1974 ih UN Security Council in resolution (thu relcah zo mi) a tuah zo bangin ‘Independent ram’ a sinak cu fimkhurzet in a hman a tul ding. UN Security Council Resolution dan a pahbal ahcun US cun International Community dan vekin ‘Independent ram’ a sinak khal nasazet in a zohfiang ding’ tiah a ti. – Irrawaddy

Kawlram in April thla sungah Bomb le Meithal a lei

Kawlram acozah cun April thla sungah ram sung mipi 90% hrawngin ‘ti toih puai (water festival) an nei lai ah ram dang ihsin a thupte’n bomb le meithal tuahnak thilri a rak lei tiah Kawlram thlingthlatu pawl cun an sim. Yangon khawpi kiangih Thilawar port ah April thla sungah North Korea long a ra thleng ih, ‘Kawlram’ acozah cun ‘Fangfai phurtu ding’ tiah mipi an bum na’n ralkap thilri le bomb tuahnak pawl an si tiah Kawlram ramri thuthang ngantu Aung Kyaw Zaw cun a simfiang. North Korea ihsin lawng si loin Tuluk ram ihsin tla ralkap hman ding thilri tampi an lei ih, leilung ihsin vanzam kap ban (surface to air) le leilung ihsin leilung kaptu (surface to surface) rocket missile pawl cu Tuluk hnen ihsin April thla sungah an lei thar ti a si.

Kan dung March thla ih suak Australian Journal of International Affair timi khalah Andrew Selth cun “North Korea in Kawlram suak thilri tampi a duh ih, Kawlram khalin North Korea ihsin ralkap hman ding thilri tampi a tul ve ruangah, thilri le thilri thleng awknak in ram pahnih biak rem awknak an tuah” tiah a ngan. Kawlram cun ralkap thilri pawl cu India, Pakistan, Russia le North Korea ihsin a lei ringring na’n Tuluk cun 1988 ihsin ralkap tulsammi pohpoh a kuat lut ringring ti a si.

Tuluk cun leiltun ram dangdang pawlih mithmai zohin, Kawlram cu nuclear thilri tuah lo dingin a kham na’n, ram dang ihsin a thiar lut rero cu a kham cuang lo. Cun, ralkap vanzam, ralkap long, tank, pukpi, radar le thir mawtaw pawl cu Kawlram sungah a zuar ringring ti a si.

2009 August thla ih suak ‘Sydney Morning Herald’ timi Australia ih thuthangca pakhat cun, “Kawlram cun North Korea ihsin thilri a leimi pawl cu khawl vivo in, kum (5) sungah amai’ ram suak Uranium thir le North Korea pawlih ‘Technology’ thawn ‘Atom bomb’ a tuah ding’ tiah a rak ngan zo. May 09, 2010 ih Kawlram tlawng luttu US Assistant Secretary for East Asia and Pacific Region Kurt Campbell khalin Kawlram le North Korea karlak in raalkap thilri lei awknak thu pawl cu thupibik ah ruatin nasazet in a zingzawi ding tiah Hongkong ih a tlawn lai ah a sim. Campbell hi 2009 ah Kawlram a ra tlawng dah.

Suu Kyi ih dilnak ca Supreme Court in a pom sak

Kawlram Supreme court in 2009 August ni 11 ah thla (18) lai ‘house arrest (inn sungih hrenbet) dingih thu a then sak hnu ah Suu Kyi cun a vei (2) nak dingah ‘supreme court hnenah ih dilnak ca’ a kuatmi cu cu May 10, 2010 ah acozah cun an cohlang sal tiah Suu Kyi ih lawyer Kyi Win cun a sim.

2009 ah US ram mi Joh Yettaw cun Suu Kyi umnak inn kiangih Inn yar lake cu a leuh suak ih, Suu Kyi ih umnak inn sungah ni (2) lai a um bet ruangah acozah thuneitu pawl cun Suu Kyi cu ‘1975 ih State Protection Law section 22’ vekin kum (3) thawng thlak dingin thuthensak a si. Asinan, Suu Kyi cun a thiamnak thu a rel ve ruangah thla (18) sung inn sungih hrenbet ding ti a si. Cucu, 2010 kum cem tiang a si ding ruangah ‘hril awknak ih tel thei lo dingih tumtahnak’ khal a si.

Suu Kyi cun Supreme court in thu a then saknak cu February 26, 2010 ah ‘Ruah sak sal dingih dilnak (appeal letter)’ a kuat na’n pom sak a si lo. Tui’ tum  May 10, 2010 ih an pom saknak parah Suu Kyi cun ruahsannak malte cu a nei lai ih, ahlan ahcun thuthentu mi (2) ih thuthennak in ‘dilnak’ cu an pom sak thei lo na’n, tui’ tum ahcun mi (3) in an ruat sal ding ih, cuti cingih zianghman a ra cang suak thei lo a si ahcun, ruahsan ding kan nei nawn lo’ tiah Kyi Win cun a sim.

NDF party hotu dingah Aung San Suu Kyi

May 06, 2010 ah Aung San Suu Kyi ih hruaimi National League for Democracy (NLD) cun 2010 Kawlram hril awknak ih tel nawn lo dingih a relcat hnu ah NLD sungih Central Executive Committee member (4), Dr. Than Nyein, Thein Nyunt, Sein Hla Oo le Khin Maung Swe cun National Democratic Force (NDF) timi party thar cu dinsuak in Kawlram hril awknak dingah NLD in mipi hnenih thu a rak kam zo mi pawl tuan suah a tum. Hih party thar hi Khin Maung Swe in a hoha ding. “NLD dung thlun in a cangvai dingih, Aung San Suu Kyi cu hotu a si ringring ding” tiah Khin Maung Swe cun a sim.

NLD thuphuangtu Nyan Win cun “Kan party in hril awknak ih tel lo ding (boycott) thu kan relcat zo mi cu thlun thluh dingin annih (NDF pawl) khal kan duh. Asinan, an duh hrilnak cu kham sak kan tum cuang loih, anmai’ thuthu a si” tiah a ti.

(Visited 68 times, 1 visits today)

Comments

comments

Comments

%d bloggers like this: