Federal Fehphung Article 261 Remlo Ruangah Myanmar Ah Ziang A Cang Thei?

11227865_842251795829458_4529159370451268498_n

Salai Lal Nun Uk

2008 daan hrampi Article 20(f) sungah “ralkap cu rampi daanhrampi kilhim ding in a hleice in tuanvo a nei” ti’n tarlang.

Cumi hlan ah a thupi mi thu pakhat a um lai. Daan hrampi article 20 (e) sungih an nganmi si.
“Ramdinkhawm thenthek lo ding, ramhrin miphun pawl lungrualnak siatsuah lo ding le rampi thuneihnak huham ding ih humhim ding cu ralkap ih tuanvo a si” timi ca tlang a si.

Asilen kan thupi Article 261 cu ziang si? Ti’n thusut duhtu kan um pang thei. 261 (c) sungah “president in ramthen lole ramkulh hluttaw ih lungkimnak a ngahzo mi hluttaw palai kha cui’ ramthen le ramkulh vuanzi chuk ah tuanvo a pek ding” ti a si.

Tlangparmi party pawl komkhawm a simi National Brotherhood Front(NBF) ih thubur sungah cun ramthen le ramkulh vuanzi chuk cu president ih direct tuanvo pekmi si nawn lo in ramkulh le ramthen hluttaw palai pawl an hril tlinmi kha vuanzi chuk si sawn ding ti a si.

Asinan hluttaw sungah mipi hriltlin a si lo mi ralkap zatek 25% an va um tikah hivek daan pawl rem ding cun hluttaw zatek 75% luan ih lungkimnak a tul tikah tlangparmi pawl kan au rero mi Federal kalhmang cu ralkap pawl kut sungah a um. Mipi hrilmi hluttaw palai pawl in rem an duh hman ah mipi duhnak tel miah lo ih hluttaw sungah a to menmi ralkap zatek 25 % kutsungah kan daan hrampi rem ding/ rem lo ding a um tinak si.

Chin ramkulh Falam peng MP a simi U Con Kheng tla cun kan dung July zarh khatnak ah hluttaw sungah daan hrampi rem thei ding in ralbawi hlun U Than Shwe hnenah zaangfah kan dil a tul ding a rak ti hngehnge.

Tulai fang hi Pyithawngsuh hluttaw sungah Nargis daan hrampi ti tlan an timi 2008 daan hrampi cu USDP party thuburnak thawn an rem tum rero lai fang a si. Sihmansehla ralkap cun Article 59 (d) sung president le vice-president pakhat cun ‘ralhmai tawngdan’ thiamnak a nei ding timi zawn ah ‘humhimnak’ timi siar lo a dang rem ding an lungkim lo.

Hi thuhla thawn pehpar in Pyithuh hluttaw palai Daw Nan Se On cun “Hluttaw sung sim theinak um lai ah a thei pang pei maw ti’n ka sim men mi si. Hi tluk tam mipi in an sim rero hmanah ralkap palai 166 ih hnasung lut thei lo ding in zo nih a kham. Minung 166 hi zatek 25 % lawng an um. Annih pawl hi mipi hrilmi tla an si lo. Hluttaw sungah an to hmethmet ih rem lo ding lawng an tang eu eu. Mipi in an tuar lo a si len hi thu hi a puak kuai theh ding” ti’n Daily Eleven ah a hmuhdan a sim.

Ralkap in daan hrampi rem ding thu ah article 59(f), 60(c), 418 (b), 436 pawl rem an duh lo cu pompi a theih. Bulpak hrang lole mibur pakhat hrang asi ruangah ti’n an puhmawh thei. Sinan Article 261 cu bulpak hrang a si lo.

Tlangpar mi zate hrang a si bangtuk in Federal rampi kan din ding ti’n hmailam ah ruahsannak a neimi Kawl rampi hrang a thupi mi a si. Hi Article an rem lo a si le Federal rampi timi ziangti zawng hman in a hung cang thei hrimhrim lo ding. Kawl pawl lawng kulhbet mi Kawl uknak lawng a si thotho ding.

Cun khat lam ah Article 261 hi an rem duh lo taktak a si len president U Thein Sein ih a zuam rero mi remdaihnak khal a siat ding tlun ah rampi ral a tho sal thei ih anmah ralkap tiang a hngong sal thei.
Sihmansehla tui’ 2015 kum thok ah Sagaing ramthen CAM Pu No Than Kap cun Kawl ram hi democracy kalhmang ah kan no tuk lai ruangah caan tawkfang lai cu ralkap in tu bang in in kaihruai hrih sehla a tha ti’n Kawl media pawl hnenah a rak sim dah.

Article 261 rem ding thu hi a rei hlan ah mee an then ding. Hi thu ah kan rem thei lo ti’n ralkap in an duhdan an sim zo. Curruangah tlangpar mi pawl ih kan duhdan in zulh thei lo ding tinak a si.

Ahleice in Chin party pawl teh tuvek boruak ah ziangti’n an rak cangvai pei? Ahlan 2010 lai bang in cozah ding lai thu hnuai ah MP le vuanzi dinhmun ah cozah pekmi neih le siah thawn nuam tawl tahrat men in mipi hmuah a thum a al ei thei hrih lomi dinhmun ah kan diriam tum lai maw. Falam peng sung 2015 hrilawknak ih MP cuhtumtu minung (7) thusuhnak ka tuahnak ah 2008 daan hrampi hi federal fehphung in kan rem ding ti ai in 2008 daanhrampi sung in thansonak kan tuah ding titu an tam sawn. 2008 daan hrampi hi a tha tawk ko lo maw ti tla an si culci.

Pyithawngsuh Hluttaw sungah palai 664 an um ih cumi lakah ralkap 166 an tel cih.Pyithuh Hluttaw le Amyotha Hluttaw komaw cu Pyithawngsuh Hluttaw an ti.

(Visited 43 times, 1 visits today)

Comments

comments

Comments

%d bloggers like this: